CCTVಯಿಟ್ಟು ಪತ್ನಿಯ ಚಲನ ವಲನ ಗಮನಿಸ್ತಿದ್ದ ಡಾಕ್ಟರ್​ ಪತಿ; ದೈಹಿಕ, ಮಾನಸಿಕ ಕಿರುಕುಳಕ್ಕೆ ಬೇಸತ್ತು ನವವಿವಾಹಿತೆ ಆತ್ಮಹತ್ಯೆ..Mumbai

ಮೃತ ಯುವತಿಯನ್ನು 26 ವರ್ಷದ ವಿಶಾಖಾ ಎಂದು ಗುರುತಿಸಲಾಗಿದೆ. ಪತಿ ಡಾ. ನಿತಿನ್ ತಿಲ್ಕರ್​ನನ್ನು ಪೊಲೀಸರು ಬಂಧಿಸಿದ್ದಾರೆ. ವಿಶಾಖರ ಅತ್ತೆ ಛಾಯಾ ತಿಲ್ಕರ್​ ಹಾಗೂ ಸಹೋದರ ನಿನಾದ್​​ಗಾಗಿ ಶಿವಾಜಿನಗರ ಪೊಲೀಸರು ಹುಡುಕಾಟ ನಡೆಸುತ್ತಿದ್ದಾರೆ ಎನ್ನಲಾಗಿದೆ. 

 ಏಪ್ರಿಲ್​ 30ರಂದು ವಿಶಾಖಾ ಮತ್ತು ನಿತಿನ್​ರ ಮದುವೆ ಅದ್ದೂರಿಯಾಗಿ ನಡೆಯಿತು. ಮದುವೆಯಾಗಿ ಒಂದೂವರೆ ತಿಂಗಳಿಗೆ  ಅತ್ತೆ ಸೇರಿದಂತೆ ಕುಟುಂಬಸ್ಥರು ಆಕೆಗೆ ಕಿರುಕುಳ ನೀಡಲು ಶುರುವಿಟ್ಟುಕೊಂಡಿದ್ದರಂತೆ. ನಿತ್ಯವೂ ಆಭರಣಕ್ಕಾಗಿ ಪೀಡಿಸುತ್ತಿದ್ದರು ಅಲ್ಲದೆ, ಸಂತ್ರಸ್ತೆ ಯಾರ ಬಳಿ ಮಾತನಾಡುತ್ತಾಳೆ. ಎಲ್ಲೆಲ್ಲಿ ನಿಲ್ಲುತ್ತಾಳೆ, ಕೂರುತ್ತಾಳೆ ಎನ್ನುವುದನ್ನು ಸಿಸಿಟಿವಿ ಅಳವಡಿಸುವ ಮೂಲಕ ವೀಕ್ಷಿಸುತ್ತಿದ್ದರು ಎನ್ನುವುದು ಪ್ರಕರಣದ ತನಿಖೆಯಿಂದ ತಿಳಿದುಬಂದಿದೆ. 

ವಿಶಾಖಾ ಒಮ್ಮೆ ತಮ್ಮ ನೆರೆಯ ಮನೆಯವರೊಂದಿಗೆ ಮಾತನಾಡಿದರೇ ಸಾಕು ಆಕೆಗೆ ವಾರ್ನಿಂಗ್​ ಕೊಟ್ಟು, ಹಿಂಸಿಸುತ್ತಿದ್ದರಂತೆ. ಇಷ್ಟೇ ಅಲ್ಲ ಸಂತ್ರಸ್ತೆ ಆತ್ಮಹತ್ಯೆ ಮಾಡಿಕೊಳ್ಳುವ ಎರಡು ದಿನದ ಹಿಂದೆ, ನೆರೆ ಮನೆಯವರೊಂದಿಗೆ ಮಾತನಾಡಿದ್ದನ್ನು ಸಿಸಿಟಿವಿ ಮೂಲಕ ಗಮಿಸಿದ ಪತಿ ಸಂಜೆ ಬಂದು ಆಕೆಯನ್ನು ತರಾಟೆಗೆ ತೆಗೆದುಕೊಂಡು ಮನಬಂದಂತೆ ಥಳಿಸಿದ್ದಾನೆ. ಇದರಿಂದ ಬೇಸತ್ತ ಆಕೆ ಆತ್ಮಹತ್ಯೆ ಮಾಡಿಕೊಂಡಿದ್ದಾಳೆ ಎನ್ನಲಾಗಿದೆ. 

ಕಿರುಕುಳದ ಬಗ್ಗೆ ವಿಶಾಖಾ ತನ್ನ ತಾಯಿಯ ಬಳಿ ಹೇಳಿಕೊಂಡಿದ್ದಳಂತೆ. ವಾಪಸ್​ ತವರಿಗೆ ಬಾ ಎಂದು ಹೇಳುವ ಪ್ರಕ್ರಿಯೆಯಲ್ಲಿ ಆಕೆ ಆತ್ಮಹತ್ಯೆ ಮಾಡಿಕೊಂಡಿದ್ದಾಳೆ ಎಂದು ಸಂತ್ರಸ್ತೆಯ ಪೋಷಕರು ಹೇಳಿದ್ದಾರೆ, (ಏಜೆನ್ಸೀಸ್)