ವಂದೇ ಭಾರತ್​ ಎಕ್ಸ್​ಪ್ರೆಸ್​ ರೈಲಿಗಿಟ್ಟ ಮೊದಲ ಹೆಸರಿದು! ಇಲ್ಲಿದೆ ನೋಡಿ ನಿಮಗೆ ಗೊತ್ತಿರದ ಇಂಟ್ರೆಸ್ಟಿಂಗ್​ ಸ್ಟೋರಿ

ನವದೆಹಲಿ: ಇಂದು ಭಾರತೀಯ ರೈಲ್ವೆ ಇಲಾಖೆ ದೇಶದ ಜನತೆಗೆ ಉತ್ತಮ ಪ್ರಯಾಣದ ಸೇವೆಯನ್ನು ನೀಡುವಲ್ಲಿ ಮುಂಚೂಣಿಯಲ್ಲಿದೆ. ಹೊಸ ಮತ್ತು ಆಧುನಿಕ ರೈಲುಗಳನ್ನು ಪ್ರಯಾಣಿಕರಿಗೆ ಪರಿಚಯಿಸುತ್ತಿರುವ ಇಲಾಖೆ, ಸುಗಮ ಮತ್ತು ಸುರಕ್ಷಿತ ಪ್ರಯಾಣವನ್ನು ಒದಗಿಸುತ್ತಿರುವುದು ಖುಷಿಯ ವಿಚಾರ. ಕಡಿಮೆ ಖರ್ಚಿನಲ್ಲಿ ಮತ್ತು ಸಮಯದಲ್ಲಿ ತಮ್ಮ ತಮ್ಮ ಸ್ಥಳಕ್ಕೆ ಜನರು ತಲುಪಲು ರೈಲುಗಳು ದೊಡ್ಡ ಕೊಡುಗೆ ನೀಡುತ್ತಿವೆ. ಈ ಪೈಕಿ ವಂದೇ ಭಾರತ್​ ಎಕ್ಸ್​ಪ್ರೆಸ್​ ರೈಲು ಕೂಡ ಒಂದು.

ಸುಧಾರಿತ ಸೌಲಭ್ಯಗಳು, ಕಾಲಕ್ಕೆ ತಕ್ಕಂತೆ ಡಿಸೈನ್​ ಮತ್ತು ವೇಗದ ಪ್ರಯಾಣದೊಂದಿಗೆ, ಈ ರೈಲು ದೇಶಾದ್ಯಂತ ಹೆಚ್ಚಿನ ಪ್ರಯಾಣಿಕರನ್ನು ತನ್ನತ್ತ ಸೆಳೆಯುತ್ತಿದೆ. ಕೇಸರಿ ಮತ್ತು ನೀಲಿ ಬಣ್ಣದಲ್ಲಿ ಕಾಣಿಸುವ ಈ ರೈಲಿನಲ್ಲಿ ಪ್ರಯಾಣಿಸಲು ಅನೇಕರು ಬಯಸುತ್ತಾರೆ. ಹಲವು ವಿಶೇಷತೆಗಳಿಂದ ಕೂಡಿರುವ ಈ ರೈಲನ್ನು ಆರಂಭದಲ್ಲಿ ವಂದೇ ಭಾರತ್ ಎಂದು ಕರೆಯುತ್ತಿರಲಿಲ್ಲ. ಅಷ್ಟಕ್ಕೂ ಈ ರೈಲನ್ನು ವಂದೇ ಭಾರತ್ ಎಕ್ಸ್​ಪ್ರೆಸ್​ ಎಂದು ಕರೆಯುವ ಮುನ್ನ ಬೇರೆಯೇ ಹೆಸರಿಡಲಾಗಿತ್ತು. ಈ ವಿಷಯ ಬಹುತೇಕರಿಗೆ ಗೊತ್ತಿರಲು ಸಾಧ್ಯವೇ ಇಲ್ಲ.

ಈ ರೈಲನ್ನು ಮೊದಲು ಅಭಿವೃದ್ಧಿಪಡಿಸಿದಾಗ, ಅದಕ್ಕೆ 'ಟ್ರೈನ್ 18' ಎಂದು ಹೆಸರಿಡಲಾಯಿತು. ಯೋಜನೆಯನ್ನು ಅಂತಿಮಗೊಳಿಸಿ, 2018ರಲ್ಲಿ ಪೂರ್ಣಗೊಳಿಸಿದ ಬಳಿಕ ಇದನ್ನೇ ಫಿಕ್ಸ್​ ಮಾಡಲಾಗಿತ್ತು. ಆದರೆ, ಜನವರಿ 2019ರಲ್ಲಿ ರೈಲನ್ನು ಅಧಿಕೃತವಾಗಿ ಪ್ರಾರಂಭಿಸುವ ಸಮಯದಲ್ಲಿ ಮತ್ತೊಮ್ಮೆ ಹೆಸರಿನ ಬಗ್ಗೆ ಚರ್ಚೆಗಳು ನಡೆದಾಗ, ಅದನ್ನು 'ವಂದೇ ಭಾರತ್ ಎಕ್ಸ್‌ಪ್ರೆಸ್' ಆಗಿ ಮರುನಾಮಕರಣ ಮಾಡಲಾಯಿತು.

ವಂದೇ ಭಾರತ್ ಅನ್ನು ಸ್ಥಳೀಯ ಅರೆ-ಹೈಸ್ಪೀಡ್ ರೈಲು ಎಂದೇ ಪರಿಚಯಿಸಲಾಗಿದೆ. ಹಿಂದೆ, ಭಾರತೀಯ ರೈಲ್ವೆ ಅನೇಕ ಆಧುನಿಕ ರೈಲುಗಳಿಗೆ ವಿದೇಶಿ ತಂತ್ರಜ್ಞಾನವನ್ನು ಅವಲಂಬಿಸಿತ್ತು. ಆದರೆ, ಈ ಯೋಜನೆಯನ್ನು ಸಂಪೂರ್ಣವಾಗಿ ಸ್ಥಳೀಯ ಟೆಕ್ನಾಲಜಿಯನ್ನೇ ಆಧರಿಸಿ, ರೂಪಿಸಲಾಗಿದೆ. ಇದನ್ನು ಮೇಕ್ ಇನ್ ಇಂಡಿಯಾದ ಭಾಗವಾಗಿ ವಿನ್ಯಾಸಗೊಳಿಸಿರುವುದು ಖುಷಿಯ ವಿಷಯ.

ಸಾಮಾನ್ಯವಾಗಿ, ಹೊಸ ರೈಲು ಯೋಜನೆಗಳು ಪೂರ್ಣಗೊಳ್ಳಲು ಹಲವು ವರ್ಷಗಳೇ ಬೇಕಿದೆ. ಆದರೆ, ವಂದೇ ಭಾರತ್​ ಎಕ್ಸ್​ಪ್ರೆಸ್​ ರೈಲು ಕೇವಲ 18 ತಿಂಗಳಲ್ಲಿ ನಿರ್ಮಿಸಲಾಯಿತು. ಈ ರೈಲನ್ನು ಚೆನ್ನೈನ ಇಂಟಿಗ್ರಲ್ ಕೋಚ್ ಫ್ಯಾಕ್ಟರಿಯಲ್ಲಿ (ಐಸಿಎಫ್) ತಯಾರು ಮಾಡಲಾಯಿತು. ಇದು ಭಾರತೀಯ ಇಂಜಿನಿಯರ್‌ಗಳ ಪ್ರತಿಭೆಗೆ ಹಿಡಿದ ಕನ್ನಡಿಯಾಗಿದೆ.

ವಂದೇ ಭಾರತ್ ಎಕ್ಸ್‌ಪ್ರೆಸ್‌ನ ಡಿಸೈನರ್​ ಮಾಜಿ ಭಾರತೀಯ ರೈಲ್ವೆ ಅಧಿಕಾರಿಯಾದ ಸುಧಾಂಶು ಮಣಿ. ಚೆನ್ನೈನಲ್ಲಿ ಐಸಿಎಫ್‌ನ ಜನರಲ್ ಮ್ಯಾನೇಜರ್ ಆಗಿದ್ದಾಗ ಅವರು ಈ ಯೋಜನೆಯ ಮುಂದಾಳತ್ವ ವಹಿಸಿದರು. ಹೀಗಾಗಿಯೇ, ಅನೇಕರು ಅವರನ್ನು ವಂದೇ ಭಾರತ್‌ನ ಪಿತಾಮಹ ಎಂದು ಇಂದಿಗೂ ಕರೆಯುತ್ತಾರೆ. ವಾಸ್ತವವಾಗಿ, ಭಾರತವು ವಿದೇಶದಿಂದ ಸೆಮಿ ಹೈಸ್ಪೀಡ್ ರೈಲುಗಳನ್ನು ಖರೀದಿಸುವ ಸಾಧ್ಯತೆಯನ್ನು ಪರಿಶೀಲಿಸಿತು. ಆದರೆ, ಆ ಯೋಜನೆಗಳು ಮುಂದುವರಿಯದಿದ್ದಾಗ, ದೇಶದಲ್ಲೇ ರೈಲನ್ನು ತಯಾರಿಸಲು ನಿರ್ಧರಿಸಿತು.

18 ತಿಂಗಳಲ್ಲೇ ನಿರ್ಮಿಸಿದ್ದೇ 'ಟ್ರೈನ್ 18' ಎಂದು ವಂದೇ ಭಾರತ್‌ ಎಕ್ಸ್​ಪ್ರೆಸ್​ಗೆ ಹೆಸರಿಡಲು ಮುಖ್ಯ ಕಾರಣ. ಮತ್ತೊಂದು ವಿಶೇಷ ಲಕ್ಷಣವೆಂದರೆ ಈ ರೈಲಿಗೆ ಪ್ರತ್ಯೇಕ ಇಂಜಿನ್ ಅಗತ್ಯವಿಲ್ಲ. ಪ್ರಯೋಗದ ಸಮಯದಲ್ಲಿ, ವಂದೇ ಭಾರತ್ ಗಂಟೆಗೆ 180 ಕಿ.ಮೀ ವೇಗವನ್ನು ತಲುಪಿತು. ಆದರೆ, ಪ್ರಸ್ತುತ ಮಾರ್ಗಗಳನ್ನು ಹಾದು ಹೋಗುವಾಗ, ಅದಕ್ಕಿಂತ ಕಡಿಮೆ ವೇಗದಲ್ಲಿ ಚಲಿಸುತ್ತಿರುವುದು ಗಮನಾರ್ಹ,(ಏಜೆನ್ಸೀಸ್).