ನಿಮ್ಮ ದೇವರ ಮನೆಯಲ್ಲಿ ಹೀಗೆ ಮಾಡ್ತಿರಾ? ಲೋಹಗಢ ಕೋಟೆಯಲ್ಲಿ 'ಧಮ್​ ಮಾರೋ ಧಮ್​​': ಪ್ರವಾಸಿಗರನ್ನು ತರಾಟೆಗೆ ತೆಗೆದುಕೊಂಡ ಸ್ಥಳೀಯ ಯುವಕ, ವಿಡಿಯೋ ವೈರಲ್​! Tourist Misbehavior in Lohagad Fort

ಪುಣೆ: ಮಳೆಗಾಲ ಪ್ರಾರಂಭವಾದರೆ ಸಾಕು ಗುಡ್ಡ-ಬೆಟ್ಟಗಳಿಗೆ ಪ್ರವಾಸ ತೆರಳಲು ಯುವಕ/ಯುವತಿಯರು ಸಜ್ಜಾಗುತ್ತಾರೆ. ಆದರೆ ಪ್ರವಾಸಕ್ಕೆಂದು ತೆರಳುವ ಅವರಲ್ಲಿ ಎಷ್ಟು ಹುಮ್ಮಸ್ಸಿರುತ್ತದೆಯೋ, ಅಷ್ಟೇ ಸ್ವಚ್ಛತೆ ಬಗ್ಗೆ ಅರಿವಿದ್ದರೆ ನಮ್ಮ ಯಾವುದೇ ಪರಿಸರ ತಾಣಗಳ ಅಂದಗೆಡುತ್ತಿರಲಿಲ್ಲ. ಆದರೆ, ಹೋದ ಹೋದಲ್ಲಿ ನಮ್ಮ ಜನರು ಪ್ಲಾಸ್ಟಿಕ್​​ಗಳನ್ನು ಎಸೆಯುವುದು, ಎಣ್ಣೆ ಪಾರ್ಟಿ ಮಾಡುವ ಮೂಲಕ ಪ್ರವಾಸಿತಾಣದ ಅಸ್ಮಿತೆಗೆ ಧಕ್ಕೆ ತರುತ್ತಿರುತ್ತಾರೆ.

ಈಗ ಇದೇ ರೀತಿಯ ಘಟನೆ ಮಹಾರಾಷ್ಟ್ರದ ಪುಣೆಯಲ್ಲಿರುವ ಐತಿಹಾಸಿಕ ಲೋಹಗಢ ಕೋಟೆಯಲ್ಲಿ (Tourist Misbehavior in Lohagad Fort) ನಡೆದಿದ್ದು, ಕೋಟೆ ವೀಕ್ಷಣೆಗೆ ಬಂದಿದ್ದ ದೆಹಲಿ ಮೂಲಕ ಯುವಕರ ಗುಂಪೊಂದು ಸಿಗರೇಟ್​ ಸೇದುತ್ತಿರುವ ವಿಡಿಯೋ ಸೋಷಿಯಲ್​ ಮೀಡಿಯಾನಲ್ಲಿ ಸಕ್ಕತ್​ ವೈರಲ್​ ಆಗುತ್ತಿದೆ.

ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೆಯಾಗುತ್ತಿರುವ ವಿಡಿಯೋನಲ್ಲಿ, ದೆಹಲಿ ಮೂಲದ ಕೆಲ ಯುವಕ/ತಿ ಯರ ಗುಂಪೊಂದು ಐತಿಹಾಸಿಕ ಲೋಹಗಢ ಕೋಟೆಯನ್ನು ವೀಕ್ಷಿಸಲು ಬಂದಿದ್ದಾರೆ. ಕೋಟೆ ನೋಡಿ, ಫೋಟೊ ಕ್ಲಿಕ್ಕಿಸಿಕೊಂಡು ಹೋಗುವ ಬದಲು, ಅಲ್ಲಿಯೇ ಧಮ್​ ಎಳೆಯಲು ಮುಂದಾಗಿದ್ದಾರೆ.

ಈ ವಿಡಿಯೋ ವೈರಲ್​ ಆಗುತ್ತಿದ್ದಂತೆ ಪುರಾತತ್ವ ಇಲಾಖೆ ಈ ರೀತಿಯ ಕೃತ್ಯಗಳನ್ನು ತಡೆಯಲು ನಿಯಮಗಳನ್ನು ಮಾಡಿಲ್ಲವೇ? ಎಂಬ ಪ್ರಶ್ನೆ ಜೋರಾಗಿದ್ದು, ಈಗಾಗಲೇ ಪುರಾತತ್ವ ಇಲಾಖೆ ಜಾರಿಗೊಳಿಸಿರುವ ನಿಯಮಗಳ ಪ್ರತಿ ಕೂಡ ಎಲ್ಲೆಡೆ ಹರಿದಾಡುತ್ತಿದೆ.

1. ಪುರಾತತ್ವ ಇಲಾಖೆಯ ಮೇಲ್ವಿಚಾರಣೆಯಲ್ಲಿರುವ ಐಸಿಹಾಸಿಕ ಪ್ರದೇಶದಲ್ಲಿ ತಂಬಾಕು, ಸರಾಯಿ, ಸಿಗರೇಟ್​ ಅಥವಾ ಯಾವುದೇ ಅಮಲು ಉಂಟಾಗುವ ಪದಾರ್ಥಗಳನ್ನು ಸೇವಿಸುವಂತಿಲ್ಲ.

2. ಪುರಾತತ್ವ ಇಲಾಖೆಯ ಮೇಲ್ವಿಚಾರಣೆಯಲ್ಲಿರುವ ಐಸಿಹಾಸಿಕ ಪ್ರದೇಶಗಳಲ್ಲಿ ಲೈಟರ್​, ಬೆಂಕಿಪೊಟ್ಟಣ ಮೊದಲಾದ ಅಗ್ನಿ ಉತ್ಪಾದಕ ವಸ್ತುಗಳನ್ನು ಕೊಂಡೊಯ್ಯುವಹಾಗಿಲ್ಲ.

3. ಐತಿಹಾಸಿಕ ಕಟ್ಟಡಗಳ ಮೇಲೆ ತಮ್ಮ ಹೆಸರುಗಳನ್ನು ಬರೆಯುವುದು, ಅಂದಗಡಿಸುವ ಕೆಲಸ ಮಾಡುವಂತಿಲ್ಲ.

4. ನಿಷೇಧಿತ ಪ್ರದೇಶದಲ್ಲಿ ಡ್ರೋನ್​ಗಳನ್ನು ಹಾರಿಸುವಂತಿಲ್ಲ.

ಈ ನಿಯಮಗಳನ್ನು ಉಲ್ಲಂಘಿಸಿದರೆ ಗರಿಷ್ಟ 1 ಲಕ್ಷ ದಂಡ, ಎರಡು ವರ್ಷ ಕಾರಾಗ್ರಹ ಶಿಕ್ಷೆ ಹಾಗೂ ಕೆಲವೊಮ್ಮೆ ಎರಡು ಶಿಕ್ಷೆಗಳನ್ನು ವಿಧಿಸಲು ಕಾನೂನಿನಲ್ಲಿ ಅವಕಾಶವಿದೆ, (ಏಜನ್ಸೀಸ್​).