ನನಗೇನು ರೆಕ್ಕೆಗಳಿವೆಯೇ ಕತ್ತರಿಸಲು?: ಉದ್ಧವ್ ಆಪರೇಷನ್ ದೇವೇಂದ್ರ ಟೀಕೆಗೆ ಸಿಎಂ ಫಡ್ನವೀಸ್ ಖಡಕ್ ಕೌಂಟರ್! Devendra Fadnavis

ಪಾಲ್ಘರ್ ಜಿಲ್ಲೆಯ ವಧಾವನ್ ಬಂದರು ಮತ್ತು ಇತರೆ ಮೂಲಸೌಕರ್ಯ ಯೋಜನೆಗಳ ಪರಿಶೀಲನೆ ನಡೆಸಿದ ಬಳಿಕ ಭಾನುವಾರ ಸುದ್ದಿಗಾರರೊಂದಿಗೆ ಮಾತನಾಡಿದ ಮಹಾ ಸಿಎಂ, ಸದ್ಯ ಮಹಾರಾಷ್ಟ್ರದಲ್ಲಿ ನಡೆಯುತ್ತಿರುವ ರಾಜಕೀಯ ಚರ್ಚೆಗಳನ್ನು ಹುಚ್ಚರ ಸಂತೆ ಎಂದು ಕರೆದಿದ್ದಾರೆ.

ಶನಿವಾರ ಹಿಂಗೋಲಿ ರ‍್ಯಾಲಿಯಲ್ಲಿ ಉದ್ಧವ್ ಠಾಕ್ರೆ ಮಾಡಿದ್ದ ಗಂಭೀರ ಆರೋಪಗಳಿಗೆ ಪ್ರತಿಕ್ರಿಯಿಸಿದ ಸಿಎಂ, ನನಗೆ ರಾಜಕೀಯ ವಿಷಯಗಳು ಯಾವಾಗಲೂ ದ್ವಿತೀಯ. ನನ್ನ ಸಂಪೂರ್ಣ ಗಮನ ಈಗ ಮಹಾರಾಷ್ಟ್ರದ ಅಭಿವೃದ್ಧಿಯ ಮೇಲಷ್ಟೇ ಇದೆ. ಉದ್ಧವ್ ಅವರ ಮಾತುಗಳಿಗೆ ತಲೆಕೆಡಿಸಿಕೊಳ್ಳುವ ಅಗತ್ಯ ನನಗಿಲ್ಲ. ರಾಜ್ಯದ ಕೋಟ್ಯಂತರ ಜನರ ಹರಸೇ ನನಗಿರುವ ರಕ್ಷಾಕವಚ ಎಂದರು. ಅಲ್ಲದೆ, ಕೊನೆಯಲ್ಲಿ ಒಂದು ರಾಜಕೀಯ ಟಾಂಗ್ ನೀಡಿದ ಫಡ್ನವೀಸ್, ಉದ್ಧವ್ ಅವರು ಭವಿಷ್ಯದ ಪ್ರಧಾನಿ ರೇಸ್ ಬಗ್ಗೆ ನನಗೆ ನೀಡಿರುವ ಶುಭ ಹಾರೈಕೆಯನ್ನು ನಾನು ಸ್ವೀಕರಿಸುತ್ತೇನೆ. ಆದರೆ, ಇದೇ ಒಳ್ಳೆಯ ಬುದ್ಧಿ ಅವರಿಗೆ 2019 ರಲ್ಲೇ ಇದ್ದಿದ್ದರೆ ಇವತ್ತು ಪರಿಸ್ಥಿತಿಯೇ ಬೇರೆ ಇರುತ್ತಿತ್ತು ಎಂದು ನೆನಪಿಸಿದ್ದಾರೆ.

ಕಳೆದ ಶುಕ್ರವಾರ ಮುಂಬೈನಿಂದ ನಾಗಪುರಕ್ಕೆ ತೆರಳುವಾಗ ಸಿಎಂ ಫಡ್ನವೀಸ್ ಮತ್ತು ಉದ್ಧವ್ ಠಾಕ್ರೆ ಇಬ್ಬರೂ ಒಂದೇ ವಿಮಾನದಲ್ಲಿ ಪ್ರಯಾಣಿಸಿದ್ದು ದೊಡ್ಡ ಸುದ್ದಿಯಾಗಿತ್ತು. ಈ ಬಗ್ಗೆ ಮಾತನಾಡಿದ ಫಡ್ನವೀಸ್, ಅದೊಂದು ಕಾಕತಾಳೀಯ ಘಟನೆ ಅಷ್ಟೇ. ಇಬ್ಬರು ರಾಜಕೀಯ ನಾಯಕರು ಒಂದೇ ವಿಮಾನದಲ್ಲಿ ಪ್ರಯಾಣಿಸುವುದರಲ್ಲಿ ಯಾವುದೇ ವಿಶೇಷತೆ ಇಲ್ಲ. ಕೆಲವೊಮ್ಮೆ ನಾವಿರುವುದು ರಾಜಕಾರಣದಲ್ಲೋ ಅಥವಾ ಹುಚ್ಚರ ಸಂತೆಯಲ್ಲೋ ಎಂದು ನನಗೇ ಅನುಮಾನ ಬರುತ್ತದೆ. ವಿಮಾನದಲ್ಲಿ ಉದ್ಧವ್ ಒಂದು ಮೂಲೆಯಲ್ಲಿ ಕುಳಿತಿದ್ದರು, ನಾನು ಇನ್ನೊಂದು ಮೂಲೆಯಲ್ಲಿದ್ದೆ. ಒಂದು ವೇಳೆ ಪಕ್ಕಪಕ್ಕದಲ್ಲೇ ಸೀಟು ಸಿಕ್ಕಿದ್ದರೆ ಖಂಡಿತಾ ಮಾತನಾಡುತ್ತಿದ್ದೆವು, ಅದರಲ್ಲಿ ತಪ್ಪೇನಿದೆ ಎಂದು ಪ್ರಶ್ನಿಸಿದ್ದಾರೆ.

ವಿಮಾನ ಪ್ರಯಾಣದ ವೇಳೆ ಫಡ್ನವೀಸ್ ಮುಖದಲ್ಲಿ ಅಸಹಾಯಕತೆ ಎದ್ದುಕಾಣುತ್ತಿತ್ತು ಎಂಬ ಉದ್ಧವ್ ಠಾಕ್ರೆ ಅವರ ಲೇವಡಿಗೆ ಉತ್ತರಿಸಿದ ಸಿಎಂ, ವಿಮಾನ ಟೇಕ್ ಆಫ್ ಆದಾಗಿನಿಂದ ಲ್ಯಾಂಡ್ ಆಗುವವರೆಗೂ ನಾನು ನನ್ನ ಮೊಬೈಲ್‌ನಲ್ಲಿ ಸಿನಿಮಾ ಅಥವಾ ವೆಬ್ ಸೀರೀಸ್ ನೋಡುವುದರಲ್ಲಿ ಬ್ಯುಸಿಯಾಗಿದ್ದೆ. ಹಾಗಿರುವಾಗ ನನ್ನ ಮುಖದಲ್ಲಿ ಅವರಿಗೆ ಅಸಹಾಯಕತೆ ಎಲ್ಲಿ ಕಾಣಿಸಿತು ಎಂದು ನಗುತ್ತಲೇ ಕೇಳಿದ್ದಾರೆ. ಈ ಮೂಲಕ ಗಡಿಬಿಡಿಯ ಮಹಾರಾಷ್ಟ್ರ ರಾಜಕೀಯದಲ್ಲಿ ಉದ್ಧವ್ ಠಾಕ್ರೆ ಎಬ್ಬಿಸಿದ್ದ ಬಿರುಗಾಳಿಯ ತೀವ್ರತೆಯನ್ನು ಫಡ್ನವೀಸ್ ಒಮ್ಮೆಗೆ ತಣ್ಣಗಾಗಿಸಿದ್ದಾರೆ,(ಏಜೆನ್ಸೀಸ್).