ಪಾಕಿಸ್ತಾನದಲ್ಲೂ ಇದೆಯೇ Paytm, Google Pay? ಅಲ್ಲಿನ ಜನರು ಆನ್‌ಲೈನ್ ಪಾವತಿ ಮಾಡುವುದು ಹೇಗೆ?

ಭಾರತದಲ್ಲಿ ಯುಪಿಐ (UPI) ಕ್ರಾಂತಿ ಎಷ್ಟರ ಮಟ್ಟಿಗೆ ಬೆಳೆದಿದೆ ಎಂದರೆ ಪರ್ಸ್ ಇಲ್ಲದಿದ್ದರೂ ಮೊಬೈಲ್ ಇದ್ದರೆ ಸಾಕು ಎಂಬ ಸ್ಥಿತಿ ಇದೆ. ಡಿಜಿಟಲ್ ಇಂಡಿಯಾದ ಈ ಯಶಸ್ಸು ವಿಶ್ವದ ಗಮನ ಸೆಳೆದಿದೆ. ಇತ್ತೀಚಿನ ದಿನಗಳಲ್ಲಿ ಅನೇಕರಿಗೆ ಒಂದು ಪ್ರಶ್ನೆ ಕಾಡುತ್ತಿದೆ - ಅದೇನಪ್ಪಾ ಅಂದರೆ, ಭಾರತದ ನೆರೆಯ ರಾಷ್ಟ್ರ ಪಾಕಿಸ್ತಾನದಲ್ಲೂ ಇಂತಹ ಸೌಲಭ್ಯಗಳಿವೆಯೇ? ಅಲ್ಲಿನ ಜನರು ಸ್ಕ್ಯಾನ್ ಮಾಡಿ ಹಣ ಪಾವತಿಸುತ್ತಾರಾ?

ಮೊದಲನೆಯದಾಗಿ ಮತ್ತು ಸ್ಪಷ್ಟವಾಗಿ ಹೇಳಬೇಕೆಂದರೆ, ಭಾರತದ ಜನಪ್ರಿಯ ಡಿಜಿಟಲ್ ಪಾವತಿ ಆ್ಯಪ್‌ಗಳಾದ ಪೇಟಿಎಂ, ಫೋನ್‌ಪೇ ಮತ್ತು ಗೂಗಲ್ ಪೇ ಪಾಕಿಸ್ತಾನದಲ್ಲಿ ಕೆಲಸ ಮಾಡುವುದಿಲ್ಲ. ಭಾರತದ ಯುಪಿಐ ತಂತ್ರಜ್ಞಾನವು ಅಂತರಾಷ್ಟ್ರೀಯ ಮಟ್ಟದಲ್ಲಿ ವಿಸ್ತರಣೆಯಾಗುತ್ತಿದ್ದರೂ, ಪಾಕಿಸ್ತಾನದೊಂದಿಗೆ ಸದ್ಯಕ್ಕೆ ಅಂತಹ ಯಾವುದೇ ಒಪ್ಪಂದಗಳಿಲ್ಲ. ಭದ್ರತೆ ಮತ್ತು ರಾಜತಾಂತ್ರಿಕ ಕಾರಣಗಳಿಂದಾಗಿ ಈ ಸೇವೆಗಳು ಅಲ್ಲಿ ಲಭ್ಯವಿಲ್ಲ.

ಪಾಕಿಸ್ತಾನದಲ್ಲೂ ಡಿಜಿಟಲ್ ಪಾವತಿ ವ್ಯವಸ್ಥೆ ಇದೆ, ಆದರೆ ಅದು ಭಾರತದ ಯುಪಿಐನಷ್ಟು ಮುಂದುವರಿದಿಲ್ಲ. ಅಲ್ಲಿನ ಜನರು ಹೆಚ್ಚಾಗಿ ಬಳಸುವ ಆ್ಯಪ್‌ಗಳೆಂದರೆ.

ಈಜಿಪೈಸಾ (Easypaisa): ಇದು ಪಾಕಿಸ್ತಾನದ ಮೊದಲ ಮತ್ತು ಅತ್ಯಂತ ಜನಪ್ರಿಯ ಮೊಬೈಲ್ ವ್ಯಾಲೆಟ್. ಭಾರತದ ಪೇಟಿಎಂಗೆ ಇದನ್ನು ಹೋಲಿಸಬಹುದು.

ಜಾಝ್ ಕ್ಯಾಶ್ (JazzCash): ಟೆಲಿಕಾಂ ಕಂಪನಿಯಾದ 'ಜಾಝ್' ಒದಗಿಸುವ ಈ ಸೇವೆಯು ಪಾಕಿಸ್ತಾನದ ದೊಡ್ಡ ಜನಸಂಖ್ಯೆಯನ್ನು ತಲುಪಿದೆ.

ಸಾದಾಪೇ ಮತ್ತು ನಯಾಪೇ (SadaPay & NayaPay): ಇವುಗಳು ಅಲ್ಲಿನ ಹೊಸ ತಲೆಮಾರಿನ ಫಿನ್‌ಟೆಕ್ ಆ್ಯಪ್‌ಗಳಾಗಿದ್ದು, ಯುವಜನತೆ ಇವುಗಳನ್ನು ಹೆಚ್ಚಾಗಿ ಬಳಸುತ್ತಾರೆ.

ಭಾರತದಲ್ಲಿ ಯುಪಿಐ ಇಂಟರ್-ಆಪರೇಬಲ್ ಆಗಿದೆ. ಅಂದರೆ, ನೀವು ಫೋನ್‌ಪೇ ಮೂಲಕ ಗೂಗಲ್ ಪೇ ಕ್ಯೂಆರ್ ಕೋಡ್ ಅನ್ನು ಸ್ಕ್ಯಾನ್ ಮಾಡಬಹುದು. ಆದರೆ ಪಾಕಿಸ್ತಾನದಲ್ಲಿ ಇಂತಹ ಸುಲಭ ವ್ಯವಸ್ಥೆ ಇತ್ತೀಚಿನವರೆಗೂ ಇರಲಿಲ್ಲ. ಪಾಕಿಸ್ತಾನವು 'ರಾಸ್ತ್' (Raast) ಎಂಬ ತನ್ನದೇ ಆದ ತತ್ಕ್ಷಣದ ಪಾವತಿ ವ್ಯವಸ್ಥೆಯನ್ನು ಜಾರಿಗೆ ತಂದಿದೆ. ಇದು ಭಾರತದ ಯುಪಿಐ ಮಾದರಿಯಲ್ಲೇ ಕೆಲಸ ಮಾಡಲು ಪ್ರಯತ್ನಿಸುತ್ತಿದೆಯಾದರೂ, ಸಾರ್ವಜನಿಕ ಬಳಕೆಯಲ್ಲಿ ಭಾರತದಷ್ಟು ವೇಗವಾಗಿ ಹರಡಿಲ್ಲ.

ಪಾಕಿಸ್ತಾನದ ಆರ್ಥಿಕತೆಯು ಇಂದಿಗೂ ಹೆಚ್ಚಾಗಿ ನಗದನ್ನು (Cash) ಅವಲಂಬಿಸಿದೆ. ಭಾರತದಲ್ಲಿ ಡಿಜಿಟಲ್ ವಹಿವಾಟುಗಳು ಶೇ. 80ಕ್ಕೂ ಹೆಚ್ಚು ವಿಸ್ತರಿಸಿದ್ದರೆ, ಪಾಕಿಸ್ತಾನದಲ್ಲಿ ಬ್ಯಾಂಕಿಂಗ್ ವ್ಯವಸ್ಥೆಯ ಹೊರಗಿರುವ ಜನರ ಸಂಖ್ಯೆ ಹೆಚ್ಚಿದೆ. ಹೀಗಾಗಿ, ಅಲ್ಲಿನ ಅನೇಕ ಅಂಗಡಿಗಳಲ್ಲಿ ಇಂದಿಗೂ 'ನಗದು ಮಾತ್ರ' ಸ್ವೀಕರಿಸಲಾಗುತ್ತದೆ,(ಏಜೆನ್ಸೀಸ್​).