ಬಂಗಾಳದಲ್ಲಿ ಕೇಂದ್ರದ ವಿರುದ್ಧ ದೀದಿ ಘರ್ಜನೆ: ಚುನಾವಣೆ ಪ್ರಜಾಪ್ರಭುತ್ವದ ಹಬ್ಬವೇ ಹೊರತು ಭಯದ ವಾತಾವರಣವಲ್ಲ ಎಂದ ಮಮತಾ! Mamata Banerjee

ಈ ಬಗ್ಗೆ ಬುಧವಾರ ಉತ್ತರ 24 ಪರಗಣ ಜಿಲ್ಲೆಯಲ್ಲಿ ನಡೆದ ಬೃಹತ್ ರ‍್ಯಾಲಿಯಲ್ಲಿ ಮಾತನಾಡಿದ ದೀದಿ, ಇದು ಪ್ರಜಾಪ್ರಭುತ್ವದ ಹಬ್ಬವೇ ಹೊರತು ಜನರನ್ನು ಬೆದರಿಸುವ ತಂತ್ರವಲ್ಲ ಎಂದು ಗುಡುಗಿದ್ದಾರೆ.

ಕೇಂದ್ರ ಸರ್ಕಾರವು ಬಂಗಾಳದಾದ್ಯಂತ ದಾಖಲೆ ಪ್ರಮಾಣದಲ್ಲಿ ಭದ್ರತಾ ಪಡೆಗಳನ್ನು ನಿಯೋಜಿಸಿರುವುದನ್ನು ಮಮತಾ ಬ್ಯಾನರ್ಜಿ ಪ್ರಶ್ನಿಸಿದ್ದಾರೆ.

ಅಪಾರ ಪಡೆಗಳ ಜಮಾವಣೆ: CRPF, ITBP, CISF ಮತ್ತು BSF ಸೇರಿದಂತೆ ಸುಮಾರು 2 ಲಕ್ಷಕ್ಕೂ ಹೆಚ್ಚು ಕೇಂದ್ರ ಸಿಬ್ಬಂದಿಯನ್ನು ರಾಜ್ಯಕ್ಕೆ ಕರೆತರಲಾಗಿದೆ. ಇಷ್ಟೊಂದು ದೊಡ್ಡ ಮಟ್ಟದ ನಿಯೋಜನೆ ಹಿಂದೆ ಮತದಾರರನ್ನು ಮತ್ತು ರಾಜಕೀಯ ಎದುರಾಳಿಗಳನ್ನು ಹೆದರಿಸುವ ಹುನ್ನಾರ ಅಡಗಿದೆ ಎಂದು ಬಂಗಾಳ ಸಿಎಂ ಆರೋಪಿಸಿದ್ದಾರೆ.

ಬಿಜೆಪಿಗೆ ಸವಾಲು: ನಿಮ್ಮ ಬಳಿ ಶಸ್ತ್ರಸಜ್ಜಿತ ವಾಹನಗಳಿರಬಹುದು, ಆದರೆ ನನ್ನ ಬಳಿ ಜನರ ಶಕ್ತಿ ಇದೆ. ಶಸ್ತ್ರಸಜ್ಜಿತ ವಾಹನಗಳು ದೊಡ್ಡದೋ ಅಥವಾ ಜನರ ಶಕ್ತಿ ದೊಡ್ಡದೋ ಎಂದು ಮಮತಾ ಬಿಜೆಪಿಗೆ ಸವಾಲು ಹಾಕಿದ್ದಾರೆ.

ರಾಜ್ಯದ ಪೊಲೀಸ್ ಇಲಾಖೆಯ ಒಂದು ವಿಭಾಗವು ಬಿಜೆಪಿಯ ಏಜೆಂಟ್‌ನಂತೆ ವರ್ತಿಸುತ್ತಿದೆ ಎಂದು ಮಮತಾ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ಪಕ್ಷಪಾತದ ಆರೋಪ: ಇತ್ತೀಚೆಗೆ ಕೋಲ್ಕತ್ತಾದ ಇಕ್ಬಾಲ್‌ಪುರದಲ್ಲಿ ನಡೆದ ಸಂಘರ್ಷವನ್ನು ಉಲ್ಲೇಖಿಸಿದ ದೀದಿ, ಪೊಲೀಸರು ಕೇವಲ ಟಿಎಂಸಿ ಕಾರ್ಯಕರ್ತರನ್ನೇ ಗುರಿಯಾಗಿಸಿಕೊಂಡಿದ್ದಾರೆ. ಆದರೆ ಬಿಜೆಪಿ ಅಭ್ಯರ್ಥಿ ರಾಕೇಶ್ ಸಿಂಗ್ ವಿರುದ್ಧ ಯಾವುದೇ ಕ್ರಮ ಕೈಗೊಂಡಿಲ್ಲ ಎಂದು ದೂರಿದ್ದಾರೆ.

ತಟಸ್ಥರಾಗಿರಿ: ಐಎಎಸ್ ಮತ್ತು ಐಪಿಎಸ್ ಅಧಿಕಾರಿಗಳು ಸಂವಿಧಾನಕ್ಕೆ ಬದ್ಧರಾಗಿ ತಟಸ್ಥವಾಗಿ ಕೆಲಸ ಮಾಡಬೇಕು ಎಂದು ಬಂಗಾಳ ಸಿಎಂ ಕರೆ ನೀಡಿದ್ದಾರೆ.

ಚುನಾವಣೆಗೂ ಮುನ್ನ ಟಿಎಂಸಿಯ ಸುಮಾರು 1,000 ಪ್ರಮುಖ ನಾಯಕರನ್ನು ಬಂಧಿಸಲು ಅಧಿಕಾರಿಗಳು ಪಟ್ಟಿ ಸಿದ್ಧಪಡಿಸಿದ್ದಾರೆ ಎಂಬ ಸ್ಫೋಟಕ ಮಾಹಿತಿಯನ್ನು ಮಮತಾ ಹಂಚಿಕೊಂಡಿದ್ದಾರೆ. ನನ್ನ ಕಾರ್ಯಕರ್ತರನ್ನು ಮುಟ್ಟಿದರೆ ಜನ ಸುಮ್ಮನಿರುವುದಿಲ್ಲ, ರಾಜ್ಯಾದ್ಯಂತ ಭಾರಿ ಪ್ರತಿಭಟನೆ ಎದುರಿಸಬೇಕಾಗುತ್ತದೆ ಎಂದು ಎಚ್ಚರಿಸಿದ್ದಾರೆ.

ಮತದಾರರ ಪಟ್ಟಿಯಿಂದ ಹೆಸರುಗಳನ್ನು ಕೈಬಿಡುತ್ತಿರುವುದು NRC ಜಾರಿಗೆ ತರುವ ಮೊದಲ ಹೆಜ್ಜೆ ಎಂದು ಮಮತಾ ಬ್ಯಾನರ್ಜಿ ಜನರಿಗೆ ಎಚ್ಚರಿಕೆ ನೀಡಿದ್ದಾರೆ.

ಗಡೀಪಾರಿನ ಭೀತಿ: ಬಿಜೆಪಿಗೆ ಮತ ನೀಡಬೇಡಿ. ಅವರು ಅಧಿಕಾರಕ್ಕೆ ಬಂದರೆ ಲಕ್ಷಾಂತರ ಜನರನ್ನು ಅಕ್ರಮ ನುಸುಳುಕೋರರು ಎಂದು ಹಣೆಪಟ್ಟಿ ಹಚ್ಚಿ ದೇಶದಿಂದ ಹೊರಹಾಕುತ್ತಾರೆ" ಎಂದು ಅವರು ಭಾವನಾತ್ಮಕವಾಗಿ ಮನವಿ ಮಾಡಿದ್ದಾರೆ.

ಹಜ್ ಯಾತ್ರಿಕರಿಗೆ ಮನವಿ: ಹಜ್ ಯಾತ್ರೆಗೆ ತೆರಳುವವರು ಹೋಗುವ ಮೊದಲೇ ತಮ್ಮ ಮತ ಚಲಾಯಿಸಬೇಕು ಎಂದು ದೀದಿ ಮನವಿ ಮಾಡಿದ್ದಾರೆ.

ಚುನಾವಣಾ ಆಯೋಗವು ಬೈಕ್ ಸಂಚಾರದ ಮೇಲೆ ಹೇರಿರುವ ನಿರ್ಬಂಧಗಳು ಸಾಮಾನ್ಯ ಜನರ ಓಡಾಟಕ್ಕೆ ಮತ್ತು ಪಕ್ಷದ ಪ್ರಚಾರಕ್ಕೆ ಅಡ್ಡಿಯಾಗುತ್ತಿವೆ ಎಂದು ಬಂಗಾಳ ಸಿಎಂ ಟೀಕಿಸಿದ್ದಾರೆ. ಅಲ್ಲದೆ, ಬಿಜೆಪಿ ಪ್ರಚಾರಕ್ಕಾಗಿ ನೂರಾರು ವಿಮಾನ ಮತ್ತು ಹೆಲಿಕಾಪ್ಟರ್‌ಗಳನ್ನು ಬಳಸುತ್ತಿದ್ದು, ಚುನಾವಣೆ ಮುಗಿದ ಮೇಲೆ ಈ ನಾಯಕರೆಲ್ಲ ನಾಪತ್ತೆಯಾಗುತ್ತಾರೆ ಎಂದು ವ್ಯಂಗ್ಯವಾಡಿದ್ದಾರೆ.

ಮಮತಾ ಬ್ಯಾನರ್ಜಿ ಅವರ ಈ ಭಾಷಣವು ಬಂಗಾಳದಾದ್ಯಂತ ಸಂಚಲನ ಮೂಡಿಸಿದ್ದು, ಬಿಜೆಪಿಯ ಮಾತೃ ಯಂತ್ರದ ವಿರುದ್ಧ ದೀದಿ ನಡೆಸುತ್ತಿರುವ ಹೋರಾಟ ಈಗ ನಿರ್ಣಾಯಕ ಹಂತಕ್ಕೆ ಬಂದಿದೆ. ಕೇಂದ್ರ ಪಡೆಗಳು ಮತ್ತು ಚುನಾವಣಾ ಆಯೋಗದ ನಡುವೆ ಬಂಗಾಳದ ಜನತೆ ಯಾರ ಪರವಾಗಿ ತೀರ್ಪು ನೀಡಲಿದ್ದಾರೆ ಎಂಬುದು ಕುತೂಹಲ ಮೂಡಿಸಿದೆ,(ಏಜೆನ್ಸೀಸ್).