57.4% ಅಂಕ ಬಂದಿದ್ಯಾ?… ಮಗನ ಲ್ಯಾಪ್‌ಟಾಪ್ ಒಡೆದ ತಂದೆ! Reddit ನಲ್ಲಿ ವಿದ್ಯಾರ್ಥಿ ಅಳಲು..

ಹೌದು, 57.4 ಶೇಕಡಾ ಅಂಕ ಬಂದ ಕಾರಣಕ್ಕೆ ತಂದೆ ತನ್ನ ಲ್ಯಾಪ್‌ಟಾಪ್ ಒಡೆದು ಹಾಕಿದ್ದಲ್ಲದೆ, ಕೊಠಡಿ ಮತ್ತು ಹಾಸಿಗೆಯನ್ನೂ ಕಿತ್ತುಕೊಂಡು ನೆಲದ ಮೇಲೆ ಮಲಗಲು ಬಲವಂತ ಮಾಡಿದ್ದಾರೆ ಎಂದು ವಿದ್ಯಾರ್ಥಿ ಆರೋಪಿಸಿದ್ದಾನೆ. ಈ ಘಟನೆ ಶಿಕ್ಷಣ ವ್ಯವಸ್ಥೆಯ ಒತ್ತಡ, ಪೋಷಕರ ನಿರೀಕ್ಷೆಗಳು ಮತ್ತು ಮಕ್ಕಳ ಮಾನಸಿಕ ಆರೋಗ್ಯದ ಕುರಿತು ಮತ್ತೆ ದೊಡ್ಡ ಮಟ್ಟದಲ್ಲಿ ಚರ್ಚೆ ಹುಟ್ಟುಹಾಕಿದೆ.

ಈ ವಿದ್ಯಾರ್ಥಿ(ಹೆಸರೇಳಲು ಇಚ್ಚಿಸಿಲ್ಲ) ಸಾಮಾಜಿಕ ಜಾಲತಾಣವಾದ ರೆಡಿಟ್‌ನಲ್ಲಿ ಒಡೆದುಹೋಗಿರುವ ಲ್ಯಾಪ್‌ಟಾಪ್‌ನ ಚಿತ್ರವನ್ನು ಹಂಚಿಕೊಂಡಿದ್ದಾನೆ. “12ನೇ ತರಗತಿ ಫಲಿತಾಂಶ ಬಂದ ನಂತರ ನನ್ನ ತಂದೆ ಹೀಗೆ ಮಾಡಿದ್ದಾರೆ” ಎಂದು ಬರೆದುಕೊಂಡಿದ್ದಾನೆ. ನಂತರ ತನ್ನ ನೋವನ್ನು ವಿವರಿಸುತ್ತಾ, “ಅದರಲ್ಲೂ ಸಾಕಾಗದೇ ನನ್ನ ಕೊಠಡಿ ಮತ್ತು ಹಾಸಿಗೆಯನ್ನೂ ತೆಗೆದುಕೊಂಡಿದ್ದಾರೆ. ಈಗ ನೆಲದ ಮೇಲೆ ಮಲಗಿಸುತ್ತಿದ್ದಾರೆ. ಫಲಿತಾಂಶ ಬಂದ ನಂತರದಿಂದ ಮಾತಿನ ದೌರ್ಜನ್ಯ, ದೈಹಿಕ ಹಿಂಸೆ, ಮಾನಸಿಕ ಹಾಗೂ ಭಾವನಾತ್ಮಕ ಕಿರುಕುಳ ಅನುಭವಿಸುತ್ತಿದ್ದೇನೆ” ಎಂದು ಹೇಳಿದ್ದಾನೆ.

ವಿದ್ಯಾರ್ಥಿಯ ಪೋಸ್ಟ್ ಕೆಲವೇ ಗಂಟೆಗಳಲ್ಲಿ ವೈರಲ್ ಆಯಿತು. ಸಾವಿರಾರು ಜನರು ಕಾಮೆಂಟ್ ಮೂಲಕ ಆತನಿಗೆ ಧೈರ್ಯ ತುಂಬಲು ಮುಂದಾದರು. ಅನೇಕರು “ಅಂಕಗಳು ಜೀವನದ ಅಂತಿಮ ತೀರ್ಪಲ್ಲ”, “ಮಕ್ಕಳನ್ನು ಅರ್ಥಮಾಡಿಕೊಳ್ಳಬೇಕು”, “ಭಯದಿಂದ ಮಕ್ಕಳನ್ನು ಬದಲಾಯಿಸಲು ಸಾಧ್ಯವಿಲ್ಲ” ಎಂದು ಪ್ರತಿಕ್ರಿಯಿಸಿದ್ದಾರೆ. ಕೆಲವರು ತಮ್ಮ ಜೀವನದಲ್ಲಿಯೂ ಇಂತಹ ಘಟನೆಗಳು ನಡೆದಿದ್ದವು ಎಂದು ಹಂಚಿಕೊಂಡಿದ್ದಾರೆ.

ಕೆಲವರು ಪೋಷಕರ ವರ್ತನೆ ವಿರುದ್ಧ ತೀವ್ರ ಆಕ್ರೋಶ ವ್ಯಕ್ತಪಡಿಸಿದ್ದಾರೆ. “ಲ್ಯಾಪ್‌ಟಾಪ್ ತೆಗೆದುಕೊಂಡು ಇರಿಸಬಹುದು, ಆದರೆ ಅದನ್ನು ಒಡೆಯುವುದು ತಪ್ಪು”, “ಮಕ್ಕಳನ್ನು ಪ್ರೋತ್ಸಾಹಿಸಬೇಕಾದ ಸಮಯದಲ್ಲಿ ಭಯ ಹುಟ್ಟಿಸುವುದು ಸರಿಯಲ್ಲ” ಎಂದು ಹಲವರು ಅಭಿಪ್ರಾಯಪಟ್ಟಿದ್ದಾರೆ. ಇನ್ನೂ ಕೆಲವರು “ಇದು ಕೇವಲ ಅಂಕಗಳ ವಿಷಯವಲ್ಲ; ಮಕ್ಕಳ ಆತ್ಮವಿಶ್ವಾಸದ ವಿಷಯ” ಎಂದು ಹೇಳಿದ್ದಾರೆ.

ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆದ ಈ ಘಟನೆ ಬಳಿಕ ಭಾರತದಲ್ಲಿ ವಿದ್ಯಾರ್ಥಿಗಳ ಮೇಲೆ ಇರುವ ಶೈಕ್ಷಣಿಕ ಒತ್ತಡದ ಕುರಿತು ಚರ್ಚೆ ಜೋರಾಗಿದೆ. ವಿಶೇಷವಾಗಿ 10ನೇ ಮತ್ತು 12ನೇ ತರಗತಿ ಫಲಿತಾಂಶಗಳ ಸಮಯದಲ್ಲಿ ವಿದ್ಯಾರ್ಥಿಗಳು ತೀವ್ರ ಒತ್ತಡಕ್ಕೆ ಒಳಗಾಗುತ್ತಾರೆ. ಉತ್ತಮ ಅಂಕ ಬರಲಿಲ್ಲ ಎಂದರೆ ಜೀವನವೇ ಮುಗಿದಂತಾಗಿದೆ ಎಂಬ ಭಾವನೆ ಕೆಲ ಕುಟುಂಬಗಳಲ್ಲಿ ಇನ್ನೂ ಇದೆ ಎಂದು ತಜ್ಞರು ಹೇಳುತ್ತಾರೆ.

ಮಾನಸಿಕ ಆರೋಗ್ಯ ತಜ್ಞರ ಪ್ರಕಾರ, ಮಕ್ಕಳ ಮೇಲೆ ಅತಿಯಾದ ನಿರೀಕ್ಷೆ ಇಡುವುದು ಅವರ ಮನಸ್ಥಿತಿಗೆ ದೊಡ್ಡ ಹೊಡೆತ ನೀಡಬಹುದು. ಕಡಿಮೆ ಅಂಕ ಬಂದಾಗ ಮಕ್ಕಳನ್ನು ಅವಮಾನಿಸುವುದು ಅಥವಾ ಶಿಕ್ಷಿಸುವುದು ಅವರ ಆತ್ಮವಿಶ್ವಾಸ ಕುಗ್ಗಿಸುತ್ತದೆ. ಕೆಲವೊಮ್ಮೆ ಇದು ಡಿಪ್ರೆಶನ್‌, ಆತಂಕ ಮತ್ತು ಭಯಕ್ಕೂ ಕಾರಣವಾಗಬಹುದು ಎಂದು ಎಚ್ಚರಿಸಿದ್ದಾರೆ. “ಮಕ್ಕಳಿಗೆ ಅಂಕಕ್ಕಿಂತ ಬೆಂಬಲ ಮುಖ್ಯ” ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.

ಈ ಘಟನೆಯ ಮತ್ತೊಂದು ಅಂಶ ಸಾಮಾಜಿಕ ಜಾಲತಾಣಗಳಲ್ಲಿ ಹೆಚ್ಚು ಗಮನ ಸೆಳೆದಿದೆ. “ಇಂದಿನ ಕಾಲದಲ್ಲಿ ಕೇವಲ ಅಂಕಗಳು ಮಾತ್ರ ಭವಿಷ್ಯ ನಿರ್ಧರಿಸುವುದಿಲ್ಲ. ಕೌಶಲ್ಯ, ಸಂವಹನ, ತಂತ್ರಜ್ಞಾನ ಜ್ಞಾನ ಮತ್ತು ಆತ್ಮವಿಶ್ವಾಸವೂ ಮುಖ್ಯ” ಎಂದು ಅನೇಕರು ಹೇಳಿದ್ದಾರೆ. ಕೆಲ ಬಳಕೆದಾರರು “2026ರಲ್ಲೂ ಮಕ್ಕಳನ್ನು ಭಯದಿಂದ ನಡೆಸುವುದು ಸರಿಯೇ?” ಎಂದು ಪ್ರಶ್ನಿಸಿದ್ದಾರೆ.

ಒಬ್ಬ ಬಳಕೆದಾರ ತನ್ನ ಅನುಭವ ಹಂಚಿಕೊಂಡು, “ನಾನು ಗಣಿತದಲ್ಲಿ ಫೇಲ್ ಆಗಿದ್ದೆ. ಆದರೆ ನನ್ನ ತಂದೆ ನನಗೆ ಬೆಂಬಲ ನೀಡಿದ್ದರು. ಅದರಿಂದಲೇ ನಾನು ಬದುಕಿನಲ್ಲಿ ಮುಂದೆ ಬಂದೆ” ಎಂದು ಬರೆದಿದ್ದಾನೆ. ಮತ್ತೊಬ್ಬರು “ಮಕ್ಕಳು ತಪ್ಪು ಮಾಡಿದಾಗ ಮಾರ್ಗದರ್ಶನ ಬೇಕು, ನಾಶವಲ್ಲ” ಎಂದು ಪ್ರತಿಕ್ರಿಯಿಸಿದ್ದಾರೆ. ಈ ಕಾಮೆಂಟ್‌ಗಳು ಸಾವಿರಾರು ಜನರ ಮೆಚ್ಚುಗೆ ಪಡೆದಿವೆ.

ಇದೀಗ ಈ ಘಟನೆ ಪೋಷಕರ ಹೊಣೆಗಾರಿಕೆ ಕುರಿತು ದೊಡ್ಡ ಚರ್ಚೆಗೆ ಕಾರಣವಾಗಿದೆ. ಮಕ್ಕಳನ್ನು ಹೋಲಿಕೆ ಮಾಡುವುದು, ಹೆಚ್ಚು ಅಂಕ ತರಬೇಕೆಂದು ಒತ್ತಡ ಹೇರುವುದು ಮತ್ತು ವೈಫಲ್ಯವನ್ನು ಅವಮಾನವಾಗಿ ನೋಡುವ ಮನೋಭಾವ ಸಮಾಜದಲ್ಲಿ ಇನ್ನೂ ಜೀವಂತವಾಗಿದೆ ಎಂಬ ಮಾತುಗಳು ಕೇಳಿಬರುತ್ತಿವೆ. ಶಿಕ್ಷಕರು ಮತ್ತು ಮನೋವೈದ್ಯರು ಪೋಷಕರಿಗೆ “ಮಕ್ಕಳನ್ನು ಕೇಳಿ, ಅರ್ಥಮಾಡಿಕೊಳ್ಳಿ, ಬೆಂಬಲಿಸಿ” ಎಂದು ಸಲಹೆ ನೀಡುತ್ತಿದ್ದಾರೆ.

ಸಿಬಿಎಸ್‌ಇ ಫಲಿತಾಂಶಗಳ ಹಿನ್ನೆಲೆಯಲ್ಲಿ ಪ್ರತಿವರ್ಷವೂ ವಿದ್ಯಾರ್ಥಿಗಳ ಮಾನಸಿಕ ಆರೋಗ್ಯದ ಕುರಿತು ಚರ್ಚೆ ನಡೆಯುತ್ತದೆ. ಆದರೆ ಇಂತಹ ಘಟನೆಗಳು ಮತ್ತೆ ಮತ್ತೆ ಮರುಕಳಿಸುತ್ತಿರುವುದು ಆತಂಕಕ್ಕೆ ಕಾರಣವಾಗಿದೆ. ಅಂಕಗಳು ಮುಖ್ಯವಾದರೂ, ಮಕ್ಕಳ ಭಾವನೆಗಳು ಮತ್ತು ಅವರ ಮಾನಸಿಕ ಸ್ಥಿತಿ ಅದಕ್ಕಿಂತ ಮುಖ್ಯ ಎಂಬ ಅರಿವು ಸಮಾಜದಲ್ಲಿ ಹೆಚ್ಚಾಗಬೇಕಿದೆ ಎಂಬ ಅಭಿಪ್ರಾಯಗಳು ಕೇಳಿಬರುತ್ತಿವೆ,(ಏಜೆನ್ಸೀಸ್).