ಹಿಂದೂ ದೇವತೆಗಳಿಗೆ ಅವಮಾನ: ಭಾರತದಲ್ಲಿ ಧ್ರುವ್​ ರಾಠಿ ವಿಡಿಯೋ ರದ್ದು; ದೆಹಲಿ ಹೈಕೋರ್ಟ್​ಗೆ ಗೂಗಲ್​ ಹೇಳಿದ್ದೇನು? Dhruv Rathee Insult to Hindu Deities

ನವದೆಹಲಿ: ಹಿಂದೂ ದೇವತೆಗಳಾದ ಪ್ರಭು ಶ್ರೀರಾಮ, ಸೀತೆ ಮತ್ತು ಕೃಷ್ಣ ಇವರು ಮಾಂಸ ಮತ್ತು ಮದ್ಯವನ್ನು ಸೇವಿಸುತ್ತಿದ್ದರೆಂದು ಧ್ರುವ್​ ರಾಠಿ (Dhruv Rathee Insult to Hindu Deities) ಹರಿಬಿಟ್ಟಿದ್ದ ವಿಡಿಯೋವನ್ನು ಭಾರತದಲ್ಲಿ ಪ್ರಸಾರವಾಗದಂತೆ ಮಾಡಲಾಗಿದ್ದು, ಜಾಗತಿಕವಾಗಿ ಈ ವಿಡಿಯೋವನ್ನು ತೆಗೆದು ಹಾಕುವುದಾಗಿ ಗೂಗಲ್​ ದೆಹಲಿ ಹೈಕೋರ್ಟ್​ಗೆ ತಿಳಿಸಿದೆ.

ಈ ವಿಡಿಯೋಗೆ ಭಾರಿ ವಿರೋಧ ವ್ಯಕ್ತವಾಗುತ್ತಿದ್ದಂತೆ ಕೇಂದ್ರ ಸರ್ಕಾರದ ಕುಂದುಕೊರತೆ ಮೇಲ್ಮನವಿ ಸಮಿತಿ ಗೂಗಲ್​ ಅನ್ನು ಸಂಪರ್ಕಿಸಿ ಈ ವಿಡಿಯೋವನ್ನು ನಿಷೇಧ ಮಾಡುವುದಾಗಿ ಕೇಳಿಕೊಂಡ ಬೆನ್ನಲ್ಲೆ ತಾವು ಕ್ರಮ ಕೈಗೊಂಡಿದ್ದಾಗಿ ಗೂಗಲ್​ ನ್ಯಾಯಪೀಠಕ್ಕೆ ತಿಳಿಸಿದೆ.

ಧ್ರವ್​ ರಾಠಿ ಮಾರ್ಚ್​ 21, 2026 ರಲ್ಲಿ ಹಂಚಿಕೊಂಡಿದ್ದ ಹಿಂದೂಗಳು ದನದ ಮಾಂಸವನ್ನು ಸೇವಿಸುತ್ತಾರೆಯೇ? ಕೇರಳಾ ಸ್ಟೋರಿ 2 ವಿಶ್ಲೇಷಣೆ ಎಂಬ ವಿಡಿಯೋದಲ್ಲಿ ಹಿಂದೂ ದೇವತೆಗಳಿಗೆ ಅಪಮಾನ ಮಾಡಿದ್ದಾನೆ. ಇದರಿಂದ ಧಾರ್ಮಿಕ ನಂಬಿಕೆಗೆ, ಆಚರಣೆಗೆ ಧಕ್ಕೆ ಉಂಟಾಗಿದೆ ಎಂದು ವಕೀಲೆ ಅಮಿತಾ ಸಚ್ಚದೇವಾ ಪಿಐಎಲ್​ ಸಲ್ಲಿಸಿದ್ದರು.

ಅಮಿತಾ ಅವರು ಹೇಳಿದಂತೆ, ಧ್ರವ್​ ರಾಠಿ ಅವರ ಈ ವಿಡಿಯೋ, ಅವಹೇಳನಾಕಾರಿ, ಪ್ರಚೋದನಾಕಾರಿ ಹಾಗೂ ಧಾರ್ಮಿಕ ಸೂಕ್ಷ್ಮ ಸಂಗತಿಯಾಗಿದ್ದು, ಇಂತಹ ವಿಡಿಯೋಗಳಿಂದ ದೇಶದಲ್ಲಿ ಧಾರ್ಮಿಕ ಸಂಘರ್ಷ ಉಂಟಾಗುವ ಸಾಧ್ಯತೆ ಇರುತ್ತದೆ. ಇದು ಭಾರತೀಯ ನ್ಯಾಯ ಸಂಹಿತೆ ಸೆಕ್ಷನ್ 196, 299 ಮತ್ತು 302 ರ ಅಡಿಯಲ್ಲಿ ಶಿಕ್ಷೆಗೆ ಅರ್ಹವಾದ ಅಪರಾಧವಾಗಿದೆ ಎಂದು ಅಮಿತಾ ವಾದ ಮಂಡಿಸಿದ್ದರು, (ಏಜನ್ಸೀಸ್​).