ಮಳೆ ನೀರನ್ನೇ ಸಾಹಸ ಕ್ರೀಡೆಯಾಗಿಸಿಕೊಂಡ ಕಿಲಾಡಿ: ದೆಹಲಿ ರಸ್ತೆಯಲ್ಲಿ ಬೋಟ್ ಸವಾರಿ ಕಂಡು ಜನ ಶಾಕ್! Delhi Rains

ಇನ್‌ಸ್ಟಾಗ್ರಾಮ್ ಬಳಕೆದಾರ ಖಂಡೇಲ್‌ವಾಲ್ ಹಂಚಿಕೊಂಡಿರುವ ಈ ವೀಡಿಯೋದಲ್ಲಿ ದೆಹಲಿಯ ಗ್ರೇಟರ್ ಕೈಲಾಶ್ ರಸ್ತೆಯಲ್ಲಿ ಮೊಣಕಾಲುದ್ದ ನೀರು ನಿಂತಿರುವುದನ್ನು ಕಾಣಬಹುದು. ಈ ಜಲಾವೃತ ರಸ್ತೆಯಲ್ಲಿ ವ್ಯಕ್ತಿಯೊಬ್ಬ ತೇಲುವ ಸಣ್ಣ ರ‍್ಯಾಫ್ಟ್ (ಬೋಟ್) ಮೇಲೆ ಆರಾಮವಾಗಿ ಮಲಗಿ, ಕೈಯಲ್ಲಿ ಹುಟ್ಟು ಹಿಡಿದು ಸಾಗುತ್ತಿದ್ದಾನೆ. ಆತನ ಸ್ನೇಹಿತರು ಪ್ಯಾಂಟ್ ಮಡಚಿಕೊಂಡು ನೀರಿನಲ್ಲಿ ನಡೆಯುತ್ತಾ ಆ ಬೋಟ್‌ ಅನ್ನು ಮುಂದೆ ತಳ್ಳಲು ನೆರವಾಗುತ್ತಿರುವುದು ವೀಡಿಯೋದಲ್ಲಿ ಕಂಡುಬಂದಿದೆ.

ಈ ವೀಡಿಯೋಗೆ ಹಂಚಿಕೊಳ್ಳಲಾದ ಶೀರ್ಷಿಕೆ ಸಾರ್ವಜನಿಕರ ಗಮನ ಸೆಳೆದಿದೆ. "ಗ್ರೇಟರ್ ಕೈಲಾಶ್‌ನಂತಹ ದುಬಾರಿ ಪ್ರದೇಶದಲ್ಲಿ ನಿವಾಸಿಗಳು ಭಾರಿ ಪ್ರಮಾಣದ ತೆರಿಗೆ ಪಾವತಿಸಿದರೂ, ಮಳೆ ಬಂದರೆ ಸಾಕು ರಸ್ತೆಗಳು ಬೋಟಿಂಗ್ ಪಾಯಿಂಟ್‌ಗಳಾಗಿ ಬದಲಾಗುತ್ತವೆ. ಇಲ್ಲಿ ಉತ್ತಮ ಒಳಚರಂಡಿ ವ್ಯವಸ್ಥೆಗೆ 'ವೇಟಿಂಗ್ ಲಿಸ್ಟ್' ಇದೆಯೋ ಏನೋ!" ಎಂದು ನಗರದ ಮೂಲಸೌಕರ್ಯ ಹಾಗೂ ಒಳಚರಂಡಿ ವ್ಯವಸ್ಥೆಯನ್ನು ತೀವ್ರವಾಗಿ ವ್ಯಂಗ್ಯವಾಡಲಾಗಿದೆ.

ಈ ವೀಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗುತ್ತಿದ್ದಂತೆಯೇ ಅನೇಕ ಬಳಕೆದಾರರು ಮಿಶ್ರ ಪ್ರತಿಕ್ರಿಯೆ ನೀಡಿದ್ದಾರೆ. ಒಬ್ಬ ಬಳಕೆದಾರರು "ಭಾರಿ ಮಳೆ ಬಂದಾಗ ನೀರು ಹರಿದುಹೋಗಲು ಸ್ವಲ್ಪ ಸಮಯ ಬೇಕಾಗುತ್ತದೆ. ವಾಶ್ ಬೇಸಿನ್‌ಗೆ ಒಮ್ಮೆಲೆ ಬಕೆಟ್ ನೀರು ಸುರಿದರೆ ತಕ್ಷಣ ಖಾಲಿಯಾಗುವುದಿಲ್ಲವೇ ಹಾಗೆ, ಇದು ಸಿಸ್ಟಮ್ ವೈಫಲ್ಯವಲ್ಲ" ಎಂದು ಕಮೆಂಟ್ ಮಾಡಿದ್ದಾರೆ. ಇನ್ನೊಬ್ಬ ಬಳಕೆದಾರರು "ಸರ್ಕಾರ ದೆಹಲಿ ಜನರಿಗೆ ಉಚಿತವಾಗಿ 'ವಾಟರ್ ಪಾರ್ಕ್' ಸೌಲಭ್ಯ ಮಾಡಿಕೊಟ್ಟಿದೆ" ಎಂದು ಕಾಲೆಳೆದಿದ್ದಾರೆ (ಏಜೆನ್ಸೀಸ್​).