ಡಿಸಿಎಂ ಉದಯನಿಧಿ ಹುಟ್ಟುಹಬ್ಬದಲ್ಲಿ ತುಂಡುಡುಗೆ ನೃತ್ಯ; ಸಚಿವರ ಚಪ್ಪಾಳೆ..! Udananiydhi Stalin

ಚೆನ್ನೈ: ತಮಿಳುನಾಡು ಉಪಮುಖ್ಯಮಂತ್ರಿ ಉದಯನಿಧಿ ಸ್ಟಾಲಿನ್ ಹುಟ್ಟುಹಬ್ಬದ ಕಾರ್ಯಕ್ರಮದಲ್ಲಿ ತುಂಡುಡುಗೆ ತೊಟ್ಟ ಯುವತಿಯರ ನೃತ್ಯಕ್ಕೆ ಸಚಿವ ಎಸ್. ಪೆರಿಯಕರುಪ್ಪನ್ ಚಪ್ಪಾಳೆ ತಟ್ಟುತ್ತಿರುವ ವಿಡಿಯೋ ಸಾಮಾಜಿಕ ಮಾಧ್ಯಮದಲ್ಲಿ ವೈರಲ್​ ಆಗಿದೆ.

ಈ ಪ್ರದರ್ಶನವನ್ನು ಸಾಮಾಜಿಕ ಜಾಲತಾಣಗಳ ಬಳಕೆದಾರರು ಅಶ್ಲೀಲ ಎಂದು ಕರೆದಿದ್ದು, ಜನಪ್ರತಿನಿಧಿಯೊಬ್ಬರು ಈ ರೀತಿಯ ನೃತ್ಯವನ್ನು ನೋಡುವುದು ಹಾಗೂ ಚಪ್ಪಾಳೆ ತಟ್ಟುವುದು ಸರಿಯಲ್ಲ ಎಂದರೆ, ಇನ್ನು ಕೆಲವರು, ಸಚಿವರು ನೃತ್ಯಗಾರ್ತಿಯರನ್ನು ಹತ್ತಿರ ಬಂದು ನೃತ್ಯ ಮಾಡುವಂತೆ ಆಹ್ವಾನಿಸಿರುವುದು ಒಳ್ಳೆಯ ನಡೆಯಲ್ಲ ಎಂದಿದ್ದಾರೆ.

ಸಾಮಾಜಿಕ ಮಾಧ್ಯಮದಲ್ಲಿ ವೈರಲ್​ ಆಗಿರುವ ದೃಶ್ಯಗಳಲ್ಲಿ ಡಿಎಂಕೆ ಸಚಿವರು, ಜಿಲ್ಲಾ ಮಟ್ಟದ ಪಕ್ಷದ ಕಾರ್ಯಕರ್ತರು ಮುಂದಿನ ಸಾಲಿನಲ್ಲಿ ಕುಳಿತುಕೊಂಡಿದ್ದಾರೆ. ಈ ವೇಳೆ ನೃತ್ಯ ತಂಡವು ವೇದಿಕೆಯಲ್ಲಿ ಪ್ರದರ್ಶನ ಮಾಡುತ್ತಿರುವುದನ್ನು ಕಾಣಬಹುದು. ನಂತರ ಪ್ರದರ್ಶಕರನ್ನು ವೇದಿಕೆಯಿಂದ ತಮ್ಮ ಬಳಿ ಬರಲು ಆಹ್ವಾನಿಸಿ, ನೃತ್ಯ ಮಾಡುವಂತೆ ಸೂಚನೆ ನೀಡಿರುವುದನ್ನು ಈ ವಿಡಿಯೋ ತೋರಿಸುತ್ತದೆ.

ಅರೆನಗ್ನ ಉಡುಪಿನಲ್ಲಿರುವ ಮಹಿಳೆಯರನ್ನು ತಮ್ಮ ಬಳಿ ಕರೆಸಿಕೊಂಡು ನೃತ್ಯ ಮಾಡಲು ಹೇಳಿ ಸಂತೋಷದಿಂದ ಚಪ್ಪಾಳೆ ತಟ್ಟುವ ನಾಯಕರ ಬಳಿ ತಮಿಳುನಾಡಿನ ಮಹಿಳೆಯರು ಹೇಗೆ ಕುಂದುಕೊರತೆಗಳನ್ನು ವ್ಯಕ್ತಪಡಿಸಬೇಕು? ಎಂದು ಪ್ರಶ್ನಿಸಿ ಸಾಮಾಜಿಕ ಮಾಧ್ಯಮದಲ್ಲಿ ಪೋಸ್ಟ್​ ಮಾಡಿದೆ.

ಈ ಘಟನೆಯು ಎಐಎಡಿಎಂಕೆ ಪಕ್ಷದಿಂದಲೂ ತೀವ್ರ ಚರ್ಚೆಗೆ ಗ್ರಾಸವಾಗಿದ್ದು, ಪಕ್ಷದ ನಾಯಕ ಪಶುಪತಿ ಸೆಂಥಿಲ್ ಈ ದೃಶ್ಯವು ಸಾರ್ವಜನಿಕ ಗೌರವದ ಬಗ್ಗೆ ಕಳವಳವನ್ನು ಹುಟ್ಟುಹಾಕಿದೆ. ನಿಮಗೆ ಇನ್ನು ದೊಡ್ಡ ಕರುಪ್ಪನ್ ಅವರ ಭೂತಕಾಲದ ಬಗ್ಗೆ ತಿಳಿದಿಲ್ಲವೆಂದು ಕಾಣುತ್ತದೆ. ಸಧ್ಯ ಇದು ಹಗಲು ಹೊತ್ತಿನಲ್ಲಿ ಸಂಭವಿಸಿದೆ, ಇಲ್ಲದಿದ್ದರೆ ಏನಾಗಿರಬಹುದು ಎಂದು ಯೋಚಿಸಲು ಸಾಧ್ಯವಾಗುತ್ತಿರಲಿಲ್ಲ ಎಂದು ಹೇಳಿದ್ದಾರೆ.

ಈ ಘಟನೆಯ ಬಗ್ಗೆ ಅಂತರ್ಜಾಲದಲ್ಲಿ ಜನರು ಹೆಚ್ಚಿನ ಪ್ರತಿಕ್ರಿಯೆಯನ್ನು ನೀಡಿದ್ದು, ಒಬ್ಬ ಬಳಕೆದಾರರು ಇದು ಡಿಎಂಕೆಯ ಸ್ತ್ರೀವಾದವೇ, ಅವರ ಘನತೆಯೇ? ಇದು ನಾಚಿಕೆಗೇಡಿನ ಸಂಗತಿಯಲ್ಲವೇ? ಎಂದು ಪಕ್ಷದ ನಿಲುವನ್ನು ಪ್ರಶ್ನಿಸಿದ್ದಾರೆ (ಏಜೆನ್ಸೀಸ್​).