ದಶಕಗಳ ಆಸ್ತಿ ವಿವಾದಕ್ಕೆ ಮುಕ್ತಿ ನೀಡಿದ ಪ್ರಧಾನಿ!...ಮೋದಿ ಬಾಲ್ಯದ ಗೆಳೆಯನಿಗೆ ಜಮೀನು ಬಿಟ್ಟುಕೊಟ್ಟ ಬಿಜೆಪಿ ಶಾಸಕ | PM Modi Friend

ಮಂಗಳವಾರದಂದು, ಬಿಜೆಪಿ ಶಾಸಕ ನರೇಂದ್ರ ಮೆಹ್ತಾ ಅವರು ತಗಾದೆಯಲ್ಲಿದ್ದ ಜಮೀನಿನ ಹಕ್ಕನ್ನು ಬಿಟ್ಟುಕೊಡುತ್ತಿರುವುದಾಗಿ ಮತ್ತು ಅದಕ್ಕಾಗಿ ಪಡೆದುಕೊಂಡಿದ್ದ ನಿರ್ಮಾಣ ಪರವಾನಗಿಯನ್ನು ವಾಪಸ್ ನೀಡುತ್ತಿರುವುದಾಗಿ ಪ್ರಕಟಿಸಿದರು. ಇದಲ್ಲದೆ, ಇಬ್ಬರ ನಡುವೆ ಸಮನ್ವಯ ಏರ್ಪಟ್ಟಿದ್ದರಿಂದ ಅವರು ವೋರಾ ಅವರ ಮೇಲೆ ನೀಡಿದ್ದ ಪೊಲೀಸ್ ದೂರನ್ನೂ ಸಹ ಹಿಂಪಡೆದರು.

ಗುಜರಾತ್‌ನ ವಡ್‌ನಗರದ ಬಿಎನ್ ಶಾಲೆಯಲ್ಲಿ ಪ್ರಧಾನಿ ಮೋದಿ ಅವರೊಂದಿಗೆ ವ್ಯಾಸಂಗ ಮಾಡಿದ್ದ ವೋರಾ, ಸೆಪ್ಟೆಂಬರ್ 8 ರಂದು ಪ್ರಧಾನಿಯವರನ್ನು ಭೇಟಿಯಾಗಿ ಭಯಂದರ್ ಈಸ್ಟ್‌ನಲ್ಲಿರುವ ತಮ್ಮ ಜಮೀನನ್ನು ಮೆಹ್ತಾ ಅವರೊಂದಿಗೆ ಸಂಪರ್ಕ ಹೊಂದಿರುವ ಬಿಲ್ಡರ್‌ಗಳು ಒತ್ತುವರಿ ಮಾಡಿಕೊಂಡಿದ್ದಾರೆ ಎಂದು ಆರೋಪಿಸಿದ್ದರು.

ಪ್ರಧಾನಿ ಮೋದಿ ಅವರೊಂದಿಗಿನ ಭೇಟಿಯ ಸಂದರ್ಭದಲ್ಲಿ, ವೋರಾ ಅವರು 1989 ರಲ್ಲಿ ನೋಂದಾಯಿತ ಒಪ್ಪಂದದ ಮೂಲಕ ಭಯಂದರ್ ಈಸ್ಟ್‌ನ ನವ್ಘರ್‌ನಲ್ಲಿ ಸುಮಾರು 2,810 ಚದರ ಮೀಟರ್ ಜಮೀನನ್ನು ಖರೀದಿಸಿದ್ದು, ಅದನ್ನು ಎಂದಿಗೂ ಮಾರಾಟ ಮಾಡಿಲ್ಲ ಅಥವಾ ವರ್ಗಾಯಿಸಿಲ್ಲ. 2011ರಲ್ಲಿ ನಕಲಿ ದಾಖಲೆಗಳನ್ನು ಸಿದ್ಧಪಡಿಸಲಾಗಿದೆ ಮತ್ತು ನಂತರ ತಮ್ಮ ಗಮನಕ್ಕೆ ಬಾರದೆ ಆಸ್ತಿಯನ್ನು ಎರಡು ಭಾಗಗಳಾಗಿ ವಿಂಗಡಿಸಲಾಗಿದೆ ಎಂದು ಅವರು ಆರೋಪಿಸಿದ್ದರು.

ವೋರಾ ಪ್ರಕಾರ, ಆ ಜಮೀನಿನ ಒಂದು ಭಾಗವು ಸ್ವಯಂ ಬಿಲ್ಡರ್ಸ್ ವಶದಲ್ಲಿದೆ ಎಂದು ತೋರಿಸಲಾಗಿತ್ತು. ಇನ್ನೊಂದು ಭಾಗವು ಶಾಸಕ ಮೆಹ್ತಾ ಅವರಿಗೆ ಸೇರಿದ ಸೆವೆನ್ ಇಲವೆನ್ ಕನ್‌ಸ್ಟ್ರಕ್ಷನ್ಸ್‌ಗೆ ಸಂಪರ್ಕ ಹೊಂದಿತ್ತು. ಜಮೀನಿನ ಅಸಲಿ ಮಾಲೀಕತ್ವ ತಮ್ಮ ಹೆಸರಲ್ಲೇ ಇದ್ದರೂ ಸಹ, ಮೀರಾ-ಭಯಂದರ್ ಮುನ್ಸಿಪಲ್ ಕಾರ್ಪೊರೇಷನ್‌ನ ಟೌನ್ ಪ್ಲಾನಿಂಗ್ ವಿಭಾಗವು ಆ ಜಾಗದಲ್ಲಿ ಕಟ್ಟಡ ನಿರ್ಮಿಸಲು ಅನುಮತಿ ನೀಡಿತ್ತು ಎಂದು ಅವರು ಆರೋಪಿಸಿದ್ದರು.

ನಕಲಿ ದಾಖಲೆಗಳನ್ನು ಸೃಷ್ಟಿಸಿದ ಪ್ರಕರಣ ಹಾಗೂ ಇದರಲ್ಲಿ ಬಿಲ್ಡರ್‌ಗಳು ಮತ್ತು ಸರ್ಕಾರಿ ಅಧಿಕಾರಿಗಳ ಪಾತ್ರದ ಕುರಿತು ಸಿಬಿಐ ತನಿಖೆ ನಡೆಸಬೇಕೆಂದು ಒತ್ತಾಯಿಸಿದ್ದ ವೋರಾ, ತಮ್ಮ ದೂರುಗಳ ಮೇಲೆ ಪುರಸಭೆ, ಕಂದಾಯ ಮತ್ತು ಪೊಲೀಸ್ ಇಲಾಖೆಯ ಅಧಿಕಾರಿಗಳು ಯಾವುದೇ ಕ್ರಮ ಕೈಗೊಂಡಿಲ್ಲ ಎಂದು ಆರೋಪಿಸಿದ್ದರು. ಈ ನಕಲಿ ದಾಖಲೆ ಸೃಷ್ಟಿಗೆ ಸಂಬಂಧಿಸಿದಂತೆ 2015 ರಲ್ಲೇ ಎಫ್‌ಐಆರ್ ದಾಖಲಾಗಿದ್ದರೂ, ಈ ಪ್ರಕರಣದ ಸಿಐಡಿ ವರದಿಯನ್ನು ಈ ವರ್ಷವಷ್ಟೇ ಸಲ್ಲಿಸಲಾಗಿದೆ ಎನ್ನುತ್ತಾ, ಈ ಸುದೀರ್ಘ ವಿಳಂಬವನ್ನು ಪ್ರಶ್ನಿಸಿ, ಇದರ ಹಿಂದೆ ರಾಜಕೀಯ ಒತ್ತಡ ಇರಬಹುದು ಎಂದು ಆರೋಪಿಸಿದರು.

ಪ್ರಧಾನಿ ಮೋದಿ ಅವರೊಂದಿಗೆ ವೋರಾ ಭೇಟಿಯಾದ ನಂತರ ಮಹಾರಾಷ್ಟ್ರದ ಹಿರಿಯ ಅಧಿಕಾರಿಗಳು ಈ ವಿಷಯವನ್ನು ಕೈಗೆತ್ತಿಕೊಂಡರು. ಮಂಗಳವಾರ, ಮುಖ್ಯಮಂತ್ರಿಯವರ ಮುಖ್ಯ ಕಾರ್ಯದರ್ಶಿ ಶ್ರೀಕರ್ ಪರದೇಸಿ ಅವರು ರಾಜ್ಯ ಸಚಿವಾಲಯದಲ್ಲಿ ಸಭೆ ನಡೆಸಿದರು. ಈ ಸಭೆಯಲ್ಲಿ ವೋರಾ, ಮೆಹ್ತಾ, ಮೀರಾ-ಭಯಂದರ್ ಮುನ್ಸಿಪಲ್ ಕಾರ್ಪೊರೇಷನ್ ಕಮಿಷನರ್ ರಾಧಾ ವಿನೋದ್ ಶರ್ಮಾ ಮತ್ತು ಟೌನ್ ಪ್ಲಾನರ್ ಪುರುಷೋತ್ತಮ್ ಶಿಂದೆ ಭಾಗವಹಿಸಿದ್ದರು.

ಸಭೆಯ ಸಮಯದಲ್ಲಿ, ಮೆಹ್ತಾ ಅವರು ಟೌನ್ ಪ್ಲಾನಿಂಗ್ ಇಲಾಖೆಗೆ ಪತ್ರವನ್ನು ಸಲ್ಲಿಸಿ, ವಿವಾದಿತ ಜಾಗದ ಸ್ವಾಧೀನವನ್ನು ತೊರೆಯುತ್ತಿರುವುದಾಗಿ ಮತ್ತು ನಿರ್ಮಾಣ ಪರವಾನಗಿಯನ್ನು ಹಿಂತಿರುಗಿಸುತ್ತಿರುವುದಾಗಿ ಹೇಳಿದರು. ಈ ಜಮೀನನ್ನು 2019 ರಲ್ಲಿ ಮೆರ್ವಿನ್ ಫರ್ನಾಂಡಿಸ್ ಅವರಿಂದ ಖರೀದಿಸಲಾಗಿದೆ ಎಂದು ಪತ್ರದಲ್ಲಿ ತಿಳಿಸಿದ್ದಾರೆ. ಪೊಲೀಸ್ ಕಮಿಷನರ್‌ಗೆ ಬರೆದ ಪ್ರತ್ಯೇಕ ಪತ್ರದಲ್ಲಿ, ಉಭಯ ಪಕ್ಷಗಳ ನಡುವಿನ ರಾಜಿಯ ನಂತರ ವೋರಾ ವಿರುದ್ಧದ ಹಿಂದಿನ ದೂರನ್ನು ಹಿಂಪಡೆಯುತ್ತಿರುವುದಾಗಿ ಮೆಹ್ತಾ ತಿಳಿಸಿದ್ದಾರೆ(ಏಜೆನ್ಸೀಸ್​).