ಗಂಡು ಮಕ್ಕಳಿಗಷ್ಟೇ ಸೀಮಿತವಾಗಿದ್ದ ರಾಜಮನೆತನದ ಗದ್ದುಗೆ ಏರಿದ 13ರ ಬಾಲಕಿ: 65 ವರ್ಷದ ಸಂಪ್ರದಾಯಕ್ಕೆ ಬ್ರೇಕ್​! Succession Rights To Girl

Succession Rights To Girl : ಶತಶತಮಾನಗಳಿಂದಲೂ ಕೇವಲ ಗಂಡು ಮಕ್ಕಳಿಗೆ ಮಾತ್ರ ಉತ್ತರಾಧಿಕಾರತ್ವದ ಹಕ್ಕನ್ನು ನೀಡುತ್ತಾ ಬಂದಿದ್ದ ರಾಜಸ್ಥಾನದ ರಾಜಮನೆತನವೊಂದು ಇದೀಗ ಹೆಣ್ಣುಮಗಳಿಗೆ ಉತ್ತರಾಧಿಕಾರತ್ವ ನೀಡುವ ಮೂಲಕ ಹೊಸ ಇತಿಹಾಸ ಸೃಷ್ಟಿಸಿದೆ.

ಉದಯಪುರ ಜಿಲ್ಲೆಯ ಖೇರವಾಡ ಗ್ರಾಮದ ರಾಜಮನೆತನದ ಮುಖ್ಯಸ್ಥರ ನಿಧನದ ಬಳಿಕ, ಅವರ 13 ವರ್ಷದ ಪುತ್ರಿ ತೇಜಸ್ವಿ ಕುಮಾರಿ ಜೋಧಾ ಅವರಿಗೆ ಸಾಂಪ್ರದಾಯಿಕವಾಗಿ ರಾಜವಂಶದ ಚುಕ್ಕಾಣಿ ಹಸ್ತಾಂತರಿಸಲಾಗಿದೆ. ರಾಜಸ್ಥಾನದ ಇತಿಹಾಸದಲ್ಲೇ ಹೆಣ್ಣುಮಗಳೊಬ್ಬಳಿಗೆ ಇಂತಹ ಉತ್ತರಾಧಿಕಾರತ್ವದ ಹಕ್ಕು ಹಾಗೂ ಗೌರವ ನೀಡುತ್ತಿರುವುದು ಇದೇ ಮೊಟ್ಟಮೊದಲ ಬಾರಿಯಾಗಿದ್ದು, ಈ ಅಪರೂಪದ ಪಟ್ಟಾಭಿಷೇಕ ಮಹೋತ್ಸವವು ಇಡೀ ದೇಶದ ಗಮನ ಸೆಳೆದಿದೆ.

ಶತಶತಮಾನಗಳಿಂದಲೂ ಕೇವಲ ಪುರುಷರಿಗೆ ಮಾತ್ರ ಸೀಮಿತವಾಗಿದ್ದ ರಾಜಮನೆತನದ ಸಾಂಪ್ರದಾಯಿಕ 'ಪಾಗ್ ಕಾ ದಸ್ತೂರ್' (ಮಂಡಾಸು ಕಟ್ಟುವ ಆಚರಣೆ) ಕಾರ್ಯಕ್ರಮದಲ್ಲಿ ಇದೀಗ 13 ವರ್ಷದ ಬಾಲಕಿ ತೇಜಸ್ವಿ ಕುಮಾರಿ ಕೇಂದ್ರಬಿಂದುವಾಗಿದ್ದಾರೆ. ಇತ್ತೀಚೆಗೆ ನಿಧನರಾದ ಅವರ ತಂದೆಯ ಅಂತ್ಯಕ್ರಿಯೆಯ ವಿಧಿವಿಧಾನಗಳ ಭಾಗವಾಗಿ ಖೇರಗಢ್ ಕೋಟೆಯಲ್ಲಿ ಅಪಾರ ಜನಸ್ತೋಮದ ಸಮ್ಮುಖದಲ್ಲಿ ಈ ಐತಿಹಾಸಿಕ ಕಾರ್ಯಕ್ರಮ ಜರುಗಿತು. ವೇದಮಂತ್ರಗಳ ಘೋಷದ ನಡುವೆ ತೇಜಸ್ವಿ ರಾಜಮನೆತನದ ಸಾಂಪ್ರದಾಯಿಕ 'ಕೆಂಪು ಪೇಟ'ವನ್ನು ಸ್ವೀಕರಿಸಿದರು. ಈ ಕೆಂಪು ಪೇಟವು ಶೋಕಾಚರಣೆಯ ಅವಧಿಯ ಅಂತ್ಯವನ್ನು ಸೂಚಿಸುತ್ತದೆ.

ಈ ರಾಜವಂಶದ ಸಂಪ್ರದಾಯದ ಪ್ರಕಾರ, ಜೋಧ್‌ಪುರ-ಮಾರ್ವಾಡ್‌ನ ಮಾಜಿ ರಾಜ ಮಹಾರಾಜ ಗಜ್ ಸಿಂಗ್ ಅವರ ಪ್ರತಿನಿಧಿಯ ಮೂಲಕ ಈ ವಿಶೇಷ ಪೇಟವನ್ನು ಗ್ರಾಮಕ್ಕೆ ಕಳುಹಿಸಿಕೊಡಲಾಗುತ್ತದೆ. ಇನ್ನು ಈ ವಿಶಿಷ್ಟ ಆಚರಣೆಯ ಭಾಗವಾಗಿ, ಗ್ರಾಮದ ರಾಜಗುರುಗಳು ತಮ್ಮ ಕತ್ತಿಯ ತುದಿಯಿಂದ ತಮ್ಮದೇ ಕೈಯನ್ನು ಸ್ವಲ್ಪ ಕೊಯ್ದುಕೊಂಡು, ಅದರಿಂದ ಬರುವ ರಕ್ತವನ್ನು ಬಾಲಕಿಯ ಹಣೆಗೆ ತಿಲಕವಾಗಿ ಇಡುತ್ತಾರೆ. ಇದು ಶತಮಾನಗಳ ಇತಿಹಾಸವಿರುವ ಅತ್ಯಂತ ಅಪರೂಪದ ಧಾರ್ಮಿಕ ಆಚರಣೆಯಾಗಿದೆ.

ರಾಜಸ್ಥಾನದ ಗ್ರಾಮೀಣ ಭಾಗಗಳಲ್ಲಿ ಕುಟುಂಬದ ಮುಖ್ಯಸ್ಥರು ಮರಣ ಹೊಂದಿದ ನಂತರ ಅವರ ಉತ್ತರಾಧಿಕಾರಿಗೆ ಪೇಟ (ಮಂಡಾಸು) ತೊಡಿಸುವ ಸಂಪ್ರದಾಯ ಇಂದಿಗೂ ಮುಂದುವರಿದುಕೊಂಡು ಬಂದಿದೆ. ರಜಪೂತ ಕುಟುಂಬಗಳಲ್ಲಿ ಇದನ್ನು ತಲೆಮಾರುಗಳ ಬದಲಾವಣೆಯ ಸಂಕೇತವೆಂದು ಪರಿಗಣಿಸಲಾಗುತ್ತದೆ. ಆದರೆ, ಇಷ್ಟು ದಿನಗಳ ಕಾಲ ಈ ಪದ್ಧತಿ ಕೇವಲ ಗಂಡು ಮಕ್ಕಳಿಗೆ ಮಾತ್ರ ಸೀಮಿತವಾಗಿತ್ತು. ಖೇರವಾಡ ರಾಜಮನೆತನದಲ್ಲಿ ಯಾವುದೇ ಗಂಡು ವಾರಸುದಾರರು ಇಲ್ಲದ ಕಾರಣ ಕಳೆದ 65 ವರ್ಷಗಳಿಂದ ಈ ಆಚರಣೆಯೇ ನಡೆದಿರಲಿಲ್ಲ. ಆದರೆ ಈ ಬಾರಿ ಸಮುದಾಯದ ಹಿರಿಯರೆಲ್ಲರೂ ಸೇರಿ, ಮೃತ ಮುಖ್ಯಸ್ಥರ ಏಕೈಕ ಪುತ್ರಿಯಾದ 13 ವರ್ಷದ ತೇಜಸ್ವಿಯನ್ನು ಮುಂದಿನ ಉತ್ತರಾಧಿಕಾರಿಯಾಗಿ ಒಮ್ಮತದಿಂದ ಒಪ್ಪಿಕೊಂಡಿದ್ದಾರೆ.

ಈ ಅಪರೂಪದ ನಿರ್ಧಾರದ ಹಿಂದೆ ಸುದೀರ್ಘ ಇತಿಹಾಸ ಹಾಗೂ ಒಂದು ರೋಚಕ ನಂಬಿಕೆಯೂ ಇದೆ. ಸ್ಥಳೀಯ ನಂಬಿಕೆಗಳ ಪ್ರಕಾರ, ಖೇರಗಢ್ ರಾಜಮನೆತನಕ್ಕೆ ಹಿಂದೊಮ್ಮೆ 'ಜಾರ್ಜಿ ಚಂಪಾವತ್' ಎಂಬ ವ್ಯಕ್ತಿ ಶಾಪ ನೀಡಿದ್ದನಂತೆ. ಆತನನ್ನು ವಂಚನೆಯಿಂದ ಕೊಲೆ ಮಾಡಲಾಗಿತ್ತು ಮತ್ತು ಆತ ಸಾಯುವ ಮುನ್ನ "ಈ ವಂಶದಲ್ಲಿ ಇನ್ಮುಂದೆ ಯಾವುದೇ ಗಂಡು ವಾರಸುದಾರರು ಹುಟ್ಟದೇ ಇರಲಿ" ಎಂದು ಶಾಪ ನೀಡಿದ್ದ ಎನ್ನಲಾಗುತ್ತದೆ. ಅಚ್ಚರಿಯೆಂದರೆ, 19ನೇ ಶತಮಾನದ ಅಂತ್ಯದಿಂದ ಈ ಕುಟುಂಬದಲ್ಲಿ ಯಾವುದೇ ಗಂಡು ಮಗು ಜನಿಸದೇ ಇರುವುದು ಈ ನಂಬಿಕೆಯನ್ನು ಮತ್ತಷ್ಟು ಗಟ್ಟಿಯಾಗಿಸಿದೆ.

ಹೀಗೆ ಗಂಡು ಮಕ್ಕಳೇ ಇಲ್ಲದ ಸುದೀರ್ಘ ಇತಿಹಾಸ, ತಲೆಮಾರುಗಳ ಶಾಪದ ಹಿನ್ನೆಲೆ ಹಾಗೂ ಬದಲಾಗುತ್ತಿರುವ ಕಾಲಘಟ್ಟದ ನಡುವೆ, ಎಲ್ಲಾ ಪುರುಷ ಪ್ರಧಾನ ಸಂಪ್ರದಾಯಗಳನ್ನು ಬದಿಗೊತ್ತಿ ತೇಜಸ್ವಿ ಜೋಧಾ ಅವರನ್ನು ರಾಜವಂಶದ ಮುಂದಿನ ವಾರಸುದಾರರನ್ನಾಗಿ ಆಯ್ಕೆ ಮಾಡಿರುವುದು ರಾಜಸ್ಥಾನದ ಇತಿಹಾಸದಲ್ಲೇ ಅತ್ಯಂತ ಕ್ರಾಂತಿಕಾರಕ ಹೆಜ್ಜೆಯಾಗಿ ಹೊರಹೊಮ್ಮಿದೆ, (ಏಜೆನ್ಸೀಸ್​).