ಸಂಪಾದಕೀಯ: ಸ್ವಯಂ ಚಿಕಿತ್ಸೆಗೆ ಕಡಿವಾಣ

ಇತ್ತೀಚಿನ ವರ್ಷಗಳಲ್ಲಿ ಭಾರತದಲ್ಲಿ ತಯಾರಾದ ಕೆಲವು ಕೆಮ್ಮಿನ ಸಿರಪ್​ಗಳನ್ನು ಸೇವಿಸಿ ವಿದೇಶಗಳಲ್ಲಿ ಹಾಗೂ ದೇಶದ ಒಳಗೂ ಮಕ್ಕಳು ಮೃತಪಟ್ಟ ಆಘಾತಕಾರಿ ಘಟನೆಗಳು ನಡೆದಿವೆ. ಇವು ಜಾಗತಿಕ ಮಟ್ಟದಲ್ಲಿ ತಲ್ಲಣ ಸೃಷ್ಟಿಸಿದ್ದವು. ಪಶ್ಚಿಮ ಆಫ್ರಿಕಾದ ಗ್ಯಾಂಬಿಯಾ ದೇಶದಲ್ಲಿ ಭಾರತದ ಕಂಪನಿಯೊಂದು ತಯಾರಿಸಿದ ಕೆಮ್ಮಿನ ಸಿರಪ್ ಕುಡಿದು 2022ರಲ್ಲಿ 66ಕ್ಕೂ ಹೆಚ್ಚು ಮಕ್ಕಳು ಕಿಡ್ನಿ ವೈಫಲ್ಯದಿಂದ ಪ್ರಾಣ ಕಳೆದುಕೊಂಡರು. ಉಜ್ಬೇಕಿಸ್ತಾನ್​ನಲ್ಲಿ ಭಾರತೀಯ ಮೂಲದ ಸಿರಪ್ ಸೇವಿಸಿ ಕನಿಷ್ಠ 18 ಮಕ್ಕಳು ಸಾವನ್ನಪ್ಪಿದ ಘಟನೆ 2023ರಲ್ಲಿ ವರದಿಯಾಯಿತು.

ಇದಕ್ಕೂ ಮುನ್ನ ಜಮ್ಮು-ಕಾಶ್ಮೀರ ಮತ್ತು ಹಿಮಾಚಲ ಪ್ರದೇಶದಲ್ಲೂ ಕಲುಷಿತ ಕೆಮ್ಮಿನ ಸಿರಪ್ ಸೇವಿಸಿ ಮಕ್ಕಳು ಮೃತಪಟ್ಟ ಉದಾಹರಣೆಗಳಿದ್ದವು. ಈ ಸಿರಪ್​ಗಳ ತಯಾರಿಕೆಯಲ್ಲಿ ಬಳಸಲಾದ ದ್ರಾವಕಗಳಲ್ಲಿ ಡೈಎಥಿಲಿನ್ ಗ್ಲೈಕಾಲ್ ಮತ್ತು ಎಥಿಲಿನ್ ಗ್ಲೈಕಾಲ್ ಎಂಬ ವಿಷಕಾರಿ ರಾಸಾಯನಿಕಗಳು ಅತಿಯಾದ ಪ್ರಮಾಣದಲ್ಲಿ ಪತ್ತೆಯಾಗಿದ್ದವು. ಇವು ದೇಹ ಸೇರಿದರೆ ಮೂತ್ರಪಿಂಡಗಳನ್ನು ಸಂಪೂರ್ಣವಾಗಿ ಹಾನಿಗೊಳಿಸುತ್ತವೆ. ಕೇಂದ್ರ ಸರ್ಕಾರದ ಹೊಸ ನಿಯಮದಿಂದ ಔಷಧ ಅಂಗಡಿಗಳ ಮಾಲೀಕರು ಇನ್ನು ಮುಂದೆ ಕಟ್ಟುನಿಟ್ಟಾಗಿ ದಾಖಲೆಗಳನ್ನು ನಿರ್ವಹಿಸಬೇಕಾಗುತ್ತದೆ. ನಿಯಮ ಮೀರಿದರೆ ಲೈಸೆನ್ಸ್ ರದ್ದಾಗುವ ಭೀತಿ ಇರುವುದರಿಂದ ಸುರಕ್ಷತೆ ಹೆಚ್ಚುತ್ತದೆ. ಮಕ್ಕಳಿಗೆ ನೀಡುವ ಡೋಸೇಜ್​ಗಳಲ್ಲಿ ಆಗುವ ತಪ್ಪುಗಳು ಮತ್ತು ಅದರಿಂದಾಗುವ ಪ್ರಾಣಾಪಾಯಗಳನ್ನು ಗಣನೀಯವಾಗಿ ತಗ್ಗಿಸಲು ನೆರವಾಗಲಿದೆ. ಮಕ್ಕಳಿಗೆ ಅವರ ತೂಕ ಮತ್ತು ವಯಸ್ಸಿಗೆ ತಕ್ಕಂತೆ ಔಷಧ ನೀಡಬೇಕು. ಸ್ವಯಂ ಚಿಕಿತ್ಸೆಯಿಂದ ಡೋಸ್ ಹೆಚ್ಚಾಗಿ ಲಿವರ್ ಅಥವಾ ಕಿಡ್ನಿ ವೈಫಲ್ಯ ಸಂಭವಿಸಿದರೆ ಪರಿಸ್ಥಿತಿ ಸಂಕಷ್ಟಮಯ. ಕೆಮ್ಮು ಕೇವಲ ನೆಗಡಿಯಿಂದ ಬಂದಿದೆಯೋ ಅಥವಾ ನ್ಯುಮೋನಿಯಾ, ಟಿಬಿ, ಅಸ್ತಮಾದಂತಹ ಗಂಭೀರ ಕಾಯಿಲೆಯಿಂದ ಬಂದಿದೆಯೋ ಎಂಬುದು ತಿಳಿಯದೆ, ಕೇವಲ ಸಿರಪ್ ಕುಡಿಯುವುದರಿಂದ ಮೂಲ ಕಾಯಿಲೆ ಉಲ್ಬಣಗೊಳ್ಳುತ್ತದೆ ಎಂಬುದನ್ನು ಮರೆಯುವಂತಿಲ್ಲ. ಕೆಮ್ಮಿನ ಸಿರಪ್​ಗಳಲ್ಲಿರುವ ಆಂಟಿಹಿಸ್ಟಮೈನ್ಸ್ ನಂತಹ ಘಟಕಗಳು ಅತಿಯಾದ ತೂಕಡಿಕೆ, ಹೃದಯ ಬಡಿತ ಹೆಚ್ಚಾಗುವುದು ಅಥವಾ ಉಸಿರಾಟದ ತೊಂದರೆಯನ್ನು ಉಂಟುಮಾಡಬಹುದು.

ಕೇಂದ್ರ ಸರ್ಕಾರದ ಈ ಹೊಸ ನಿಯಮವು ಔಷಧ ಉದ್ಯಮದಲ್ಲಿ ಪಾರದರ್ಶಕತೆ ತರಲು ಮತ್ತು ಸಾರ್ವಜನಿಕರ ಜೀವ ಉಳಿಸಲು ಅತ್ಯಗತ್ಯವಾಗಿತ್ತು. ಯಾವುದೇ ಕೆಮ್ಮು ಇರಲಿ, ಅದು ವೈದ್ಯರು ಬರೆದುಕೊಟ್ಟ ಸಿರಪ್ ಮಾತ್ರ ಇರಲಿ ಎಂಬ ಪ್ರಜ್ಞೆ ಈಗ ಪ್ರತಿಯೊಬ್ಬ ನಾಗರಿಕರಲ್ಲೂ ಬರಬೇಕಾಗಿದೆ.