ಐಸ್​ಕ್ರೀಮ್ ಮಾರಾಟಗಾರನ ಶಿರಚ್ಚೇದನ ಮಾಡಿ ತಲೆಯನ್ನು ಮನೆಗೊಯ್ದು ಅಡುಗೆ ಮಾಡಿದ ದುಷ್ಕರ್ಮಿ; ಬಂಧನ | ice cream vendor

ಲಖನೌ: ಉತ್ತರ ಪ್ರದೇಶದ ಬಾರಬಂಕಿ ಜಿಲ್ಲೆಯಲ್ಲಿ ಭಯಾನಕ ಘಟನೆಯೊಂದು ನಡೆದಿದ್ದು, ದುಷ್ಕರ್ಮಿಯೊಬ್ಬ ಐಸ್​ಕ್ರೀಮ್​ ಮಾರಾಟಗಾರನ ಶಿರಚ್ಚೇದನ ಮಾಡಿ ತಲೆಯನ್ನು ಮನೆಗೊಯ್ದು ಮೂಲೆಯಲ್ಲಿ ಎಸೆದು ಅಡುಗೆ ಮಾಡಿದ್ದು, ಬಲಪ್ರಯೋಗದ ಮೂಲಕ ಪೊಲೀಸರು ಆರೋಪಿಯನ್ನು ಬಂಧಿಸಿದ್ದಾರೆ ಎಂದು ಭಾನುವಾರ(ಮಾ. 29) ವರದಿಯಾಗಿದೆ.

ಕೊಲೆಯಾದ ವ್ಯಕ್ತಿ ಬಾರಾಬಂಕಿ ಜಿಲ್ಲೆಯ 25 ವರ್ಷದ ಬಬ್ಲು ಎಂದು ಗುರುತಿಸಲಾಗಿದೆ. ಬಬ್ಲುಗೆ ಪತ್ನಿ ಮತ್ತು ಇಬ್ಬರು ಮಕ್ಕಳು, ತಾಯಿ, ತಮ್ಮಂದಿರಿದ್ದು, ಐಸ್ ಕ್ರೀಮ್ ಮಾರಾಟ ಮಾಡುವ ಮೂಲಕ ಜೀವನ ಸಾಗಿಸುತ್ತಿದ್ದ ಎನ್ನಲಾಗಿದೆ. ಇತ್ತೀಚೆಗೆ, ಬಬ್ಲು ಐಸ್ ಕ್ರೀಮ್ ಮಾರಾಟ ಮಾಡಲು ಪರ್ಸಾವಲ್ ಗ್ರಾಮಕ್ಕೆ ಹೋಗಿದ್ದ ತೆರಳಿದ್ದು ಅಲ್ಲಿ ಶಂಕರ್ ಯಾದವ್ ಎಂಬುವನ ಜೊತೆ ಜಗಳವಾಡಿದ್ದಾನೆ.

ಈ ಗಲಾಟೆ ಹಿಂಸಾತ್ಮಕ ರೂಪ ಪಡೆದಿದ್ದು, ಆರೋಪಿ ಶಂಕರ್ ಯಾದವ್ ಬೇಟೆಯಾಡುವ ಆಯುಧದಿಂದ ಬಬ್ಲುವಿನ ಶಿರಚ್ಚೇಧನ ಮಾಡಿದ್ದಾನೆ. ಬಳಿಕ ಮುಂಡದಿಂದ ರುಂಡವನ್ನು ಕತ್ತರಿಸಿಕೊಂಡು ಮನೆಗೆ ತೆಗೆದುಕೊಂಡು ಹೋಗಿ ಒಂದು ಮೂಲೆಯಲ್ಲಿ ಎಸೆದು ಅಡುಗೆ ಮಾಡಲು ಆರಂಭಿಸಿದ್ದಾನೆ ಎನ್ನಲಾಗಿದೆ.

ಸ್ಥಳೀಯರಿಂದ ಕೊಲೆ ಮಾಹಿತಿ ಜಿಲ್ಲಾ ಎಸ್​ಪಿಗೆ ತಲುಪಿದ್ದು, ಅವರು ಸ್ಥಳೀಯ ಪೊಲೀಸರಿಗೆ ಭಾರೀ ಪಡೆಯೊಂದಿಗೆ ಹೋಗಿ ಆರೋಪಿಯನ್ನು ಬಂಧಿಸುವಂತೆ ಆದೇಶಿಸಿದ್ದಾರೆ. ಆರೋಪಿ ಮನೆಗೆ ಬಂದ ಪೊಲೀಸರು ಮನೆ ಸುತ್ತುವರೆದು, ಒಳ ಪ್ರವೇಶಿಸಿದ್ದು, ಆರೋಪಿ ಏನೂ ನಡೆದಿಲ್ಲ ಎಂಬಂತೆ ಅಡುಗೆ ಮಾಡ್ತಿದ್ದ ಎನ್ನಲಾಗಿದೆ. ತಕ್ಷಣ ಪೊಲೀಸರು ಆತನನ್ನು ಬಂಧಿಸಿ, ರುಂಡವನ್ನು ಮತ್ತು ಹತ್ಯೆಗೆ ಬಳಸಿದ್ದ ಆಯುಧವನ್ನು ವಶಪಡಿಸಿಕೊಂಡಿದ್ದು, ಬಬ್ಲುವಿನ ಶವವನ್ನು ಮರಣೋತ್ತರ ಪರೀಕ್ಷೆಗಾಗಿ ಸರ್ಕಾರಿ ಆಸ್ಪತ್ರೆಗೆ ಕಳುಹಿಸಿದ್ದಾರೆ (ಏಜೆನ್ಸೀಸ್).