ಕ್ಲಾಸೆನ್-ಕಿಶನ್ ಆರ್ಭಟಕ್ಕೆ ಶ್ರೇಯಸ್​ ಪಡೆ ಹೈರಾಣ! ಪಂಜಾಬ್‌ಗೆ 236 ರನ್‌ಗಳ ಬೆಟ್ಟದಂತಹ ಗುರಿ! SRHvsPBKS

ಟಾಸ್ ಗೆದ್ದು ಮೊದಲು ಬ್ಯಾಟಿಂಗ್ ಆಯ್ಕೆ ಮಾಡಿಕೊಂಡ ಸನ್‌ರೈಸರ್ಸ್ ನಾಯಕನ ನಿರ್ಧಾರವನ್ನು ಆರಂಭಿಕ ಆಟಗಾರರು ಸಮರ್ಥಿಸಿಕೊಂಡರು. ಅಭಿಷೇಕ್ ಶರ್ಮಾ ಮತ್ತು ಟ್ರಾವಿಸ್ ಹೆಡ್ ಕೇವಲ 3.3 ಓವರ್‌ಗಳಲ್ಲಿ 54 ರನ್‌ಗಳನ್ನು ಚಚ್ಚುವ ಮೂಲಕ ಪಂಜಾಬ್ ಬೌಲರ್‌ಗಳಿಗೆ ನಡುಕ ಹುಟ್ಟಿಸಿದರು.

ಈ ಸ್ಫೋಟಕ ಆರಂಭವು ಸನ್‌ರೈಸರ್ಸ್ ತಂಡಕ್ಕೆ 200 ಪ್ಲಸ್ ರನ್ ದಾಟಲು ಭದ್ರ ಬುನಾದಿ ಹಾಕಿಕೊಟ್ಟಿತು.

ಆರಂಭಿಕರು ನಿರ್ಗಮಿಸಿದ ನಂತರ ಕ್ರೀಸ್‌ಗೆ ಬಂದ ಇಶಾನ್ ಕಿಶನ್ ಮತ್ತು ಹೆನ್ರಿಚ್ ಕ್ಲಾಸೆನ್ ಪಂಜಾಬ್ ಕಿಂಗ್ಸ್ ಫೀಲ್ಡರ್‌ಗಳ ತಪ್ಪುಗಳ ಲಾಭವನ್ನು ಪೂರ್ಣವಾಗಿ ಪಡೆದರು. ಇಶಾನ್ ಕಿಶನ್ ಕೇವಲ 32 ಎಸೆತಗಳಲ್ಲಿ 55 ರನ್ ಬಾರಿಸಿ ಮಿಂಚಿದರೆ, ದಕ್ಷಿಣ ಆಫ್ರಿಕಾದ ಸ್ಫೋಟಕ ಬ್ಯಾಟರ್ ಹೆನ್ರಿಚ್ ಕ್ಲಾಸೆನ್ 43 ಎಸೆತಗಳಲ್ಲಿ 69 ರನ್ ಚಚ್ಚುವ ಮೂಲಕ ತಂಡದ ಮೊತ್ತವನ್ನು 235ಕ್ಕೆ ತಲುಪಿಸಿದರು.

ಪಂಜಾಬ್ ಕಿಂಗ್ಸ್ ತಂಡಕ್ಕೆ ಇಂದು ಫೀಲ್ಡಿಂಗ್ ದೊಡ್ಡ ವಿಲನ್ ಆಗಿ ಪರಿಣಮಿಸಿತು. ಕೈಗೆ ಬಂದ ಕ್ಯಾಚ್‌ಗಳನ್ನು ಕೈಚೆಲ್ಲಿದ ಪಂಜಾಬ್ ಫೀಲ್ಡರ್‌ಗಳು, ಹೈದರಾಬಾದ್ ಬ್ಯಾಟರ್‌ಗಳಿಗೆ ಜೀವದಾನ ನೀಡಿದರು. ಈ ಉದಾರತೆಯ ಬೆಲೆಯನ್ನು ಪಂಜಾಬ್ ಬೌಲರ್‌ಗಳು ರನ್ ನೀಡುವ ಮೂಲಕ ತೆತ್ತರು.

ಪಂಜಾಬ್ ಕಿಂಗ್ಸ್ ಪರ ಯಜುವೇಂದ್ರ ಚಹಾಲ್ ಮಾತ್ರ ಶಿಸ್ತುಬದ್ಧ ಬೌಲಿಂಗ್ ಪ್ರದರ್ಶಿಸಿದರು. ಉಳಿದೆಲ್ಲಾ ಬೌಲರ್‌ಗಳು ಓವರ್‌ಗೆ ಸರಾಸರಿ 11-12 ರನ್ ನೀಡುತ್ತಿದ್ದರೆ, ಚಹಾಲ್ 4 ಓವರ್‌ಗಳಲ್ಲಿ ಕೇವಲ 32 ರನ್ ನೀಡಿ 1 ವಿಕೆಟ್ ಪಡೆದರು. ಇದು ಪಂಜಾಬ್ ಪಾಲಿಗೆ ಸ್ವಲ್ಪ ಸಮಾಧಾನಕರ ವಿಷಯವಾಗಿತ್ತು. ಈ ವರ್ಷ ಪಂಜಾಬ್ ತಂಡ 200ಕ್ಕಿಂತ ಹೆಚ್ಚು ರನ್ ಬಿಟ್ಟುಕೊಡುತ್ತಿರುವುದು ಇದು ನಾಲ್ಕನೇ ಬಾರಿ ಎಂಬುದು ಗಮನಾರ್ಹವಾಗಿದೆ.

ಸದ್ಯ ಪಂಜಾಬ್ ಕಿಂಗ್ಸ್ ಅಂಕಪಟ್ಟಿಯಲ್ಲಿ ಅಗ್ರಸ್ಥಾನದಲ್ಲಿದೆ. ಆದರೆ, ಇಂದು ಹೈದರಾಬಾದ್ ತಂಡವು ಈ ಬೃಹತ್ ಮೊತ್ತವನ್ನು ಡಿಫೆಂಡ್ ಮಾಡಿಕೊಂಡರೆ, ಪಂಜಾಬ್ ತಂಡವನ್ನು ಕೆಳಗಿಳಿಸಿ ಸನ್‌ರೈಸರ್ಸ್ ಅಗ್ರಸ್ಥಾನಕ್ಕೇರಲಿದೆ. ಹೈದರಾಬಾದ್ ಪಾಲಿಗೆ ಇದು ಕೇವಲ ಪಂದ್ಯವಲ್ಲ, ಪ್ರತಿಷ್ಠೆಯ ಕಣವಾಗಿದೆ,(ಏಜೆನ್ಸೀಸ್​).