Corporate Life: 25 ಲಕ್ಷ ಸಂಬಳದ ಜಾಬ್‌ಗೆ ಗುಡ್‌ಬೈ: 29ರ ಟೆಕ್ಕಿ ಕಥೆ ವೈರಲ್!

ಈ ಘಟನೆ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದ್ದು, ಕಾರ್ಪೊರೇಟ್ ಜೀವನದ ಒತ್ತಡ ಮತ್ತು ಮಾನಸಿಕ ದಣಿವಿನ ಬಗ್ಗೆ ದೊಡ್ಡ ಚರ್ಚೆಗೆ ಕಾರಣವಾಗಿದೆ.

ವೈರಲ್ ಆದ ರೆಡಿಟ್ ಪೋಸ್ಟ್‌ನಲ್ಲಿ ಈ ಟೆಕ್ಕಿ ತಮ್ಮ ಮನಸ್ಥಿತಿಯನ್ನು ಹಂಚಿಕೊಂಡಿದ್ದಾರೆ. “ನಾನು ಸುಮಾರು ಆರು ವರ್ಷಗಳಿಂದ ಸಾಫ್ಟ್‌ವೇರ್ ಕ್ಷೇತ್ರದಲ್ಲಿ ಕೆಲಸ ಮಾಡುತ್ತಿದ್ದೇನೆ. ಆದರೆ ಈಗ ಜೀವನದಲ್ಲಿ ‘ಬಸ್‌ ಹೋ ಗಯಾ’ ಅನ್ನಿಸುವ ಹಂತಕ್ಕೆ ಬಂದಿದ್ದೇನೆ,” ಎಂದು ಅವರು ಬರೆದಿದ್ದಾರೆ.

ಕಾಲೇಜು ದಿನಗಳಿಂದಲೇ ನಿರಂತರವಾಗಿ ದುಡಿದಿದ್ದಾಗಿ ಅವರು ಹೇಳಿದ್ದಾರೆ. ಮುಖ್ಯ ಉದ್ಯೋಗದ ಜೊತೆಗೆ ವಿದ್ಯಾರ್ಥಿಗಳಿಗೆ ಟ್ಯೂಷನ್‌, ಫ್ರೀಲಾನ್ಸ್ ಕೆಲಸ, ವೆಬ್‌ಸೈಟ್ ನಿರ್ಮಾಣ ಸೇರಿದಂತೆ ಹಲವು ಸೈಡ್‌ ಕೆಲಸಗಳನ್ನು ಮಾಡುತ್ತಿದ್ದರಂತೆ. “ಹಣ, ಬೆಳವಣಿಗೆ ಮತ್ತು ಯಶಸ್ಸಿಗಾಗಿ ನಿರಂತರ ಓಡುತ್ತಿದ್ದೆ. ಆದರೆ ಈಗ ಸಂಪೂರ್ಣ ಮಾನಸಿಕವಾಗಿ ದಣಿದಿದ್ದೇನೆ,” ಎಂದು ತಮ್ಮ ನೋವನ್ನು ವ್ಯಕ್ತಪಡಿಸಿದ್ದಾರೆ.

ಪ್ರಸ್ತುತ ತಮ್ಮ ಬಳಿ ಸುಮಾರು 15 ಲಕ್ಷ ಉಳಿತಾಯವಿದ್ದು, ಕೆಲ ವರ್ಷಗಳ ಕಾಲ ಹಿಮಾಚಲ ಪ್ರದೇಶದ ಮನಾಲಿಯಲ್ಲಿ ಶಾಂತ ಜೀವನ ನಡೆಸುವ ಯೋಚನೆ ಇದೆ ಎಂದು ತಿಳಿಸಿದ್ದಾರೆ. “ನನಗೆ ಈಗ ಶಾಂತಿ ಬೇಕು. ನಿಧಾನವಾದ ಜೀವನ ಬೇಕು. ನಾನು ನಿಜವಾಗಿ ಯಾವ ರೀತಿಯ ಜೀವನ ಬಯಸುತ್ತೇನೆ ಅನ್ನೋದನ್ನು ಅರ್ಥಮಾಡಿಕೊಳ್ಳಲು ಸಮಯ ಬೇಕು,” ಎಂದು ಅವರು ಬರೆದಿದ್ದಾರೆ.

ಈ ಪೋಸ್ಟ್ ಸಾಮಾಜಿಕ ಜಾಲತಾಣಗಳಲ್ಲಿ ಲಕ್ಷಾಂತರ ಜನರ ಗಮನ ಸೆಳೆದಿದೆ. ಹಲವರು ಈ ಟೆಕ್ಕಿಯ ನಿರ್ಧಾರವನ್ನು ಬೆಂಬಲಿಸಿದ್ದಾರೆ. “ಬರ್ನೌಟ್ ನಿಜವಾಗಿಯೂ ದೊಡ್ಡ ಸಮಸ್ಯೆ”, “ಹಣಕ್ಕಿಂತ ಮನಸ್ಸಿನ ಆರೋಗ್ಯ ಮುಖ್ಯ” ಎಂಬ ಕಾಮೆಂಟ್‌ಗಳು ಹೆಚ್ಚಾಗಿ ಕಾಣಿಸಿಕೊಂಡಿವೆ.

ಕೆಲವರು ತಮ್ಮ ಅನುಭವವನ್ನೂ ಹಂಚಿಕೊಂಡಿದ್ದಾರೆ. “ನಾನೂ ಕಾರ್ಪೊರೇಟ್ ಕೆಲಸ ಬಿಟ್ಟು ಫ್ರೀಲಾನ್ಸ್ ಮಾಡುತ್ತಿದ್ದೇನೆ. ಈಗ ಜೀವನ ಹೆಚ್ಚು ಸಂತೋಷಕರವಾಗಿದೆ,” ಎಂದು ಒಬ್ಬರು ಬರೆದಿದ್ದಾರೆ. ಮತ್ತೊಬ್ಬರು, “ಕೆಲಸದಿಂದ ಸ್ವಲ್ಪ ಬ್ರೇಕ್ ತೆಗೆದುಕೊಳ್ಳುವುದು ತಪ್ಪಲ್ಲ. ಅದು ಜೀವನವನ್ನು ಮರುಪರಿಶೀಲಿಸಲು ಸಹಾಯ ಮಾಡುತ್ತದೆ,” ಎಂದು ಹೇಳಿದ್ದಾರೆ.

ಇತ್ತೀಚಿನ ವರ್ಷಗಳಲ್ಲಿ ಯುವ ಉದ್ಯೋಗಿಗಳಲ್ಲಿ ಮಾನಸಿಕ ಒತ್ತಡ, ಬರ್ನೌಟ್ ಮತ್ತು ಕೆಲಸದ ದಣಿವು ಹೆಚ್ಚುತ್ತಿದೆ ಎಂಬ ಚರ್ಚೆ ಜೋರಾಗಿದೆ. ವಿಶೇಷವಾಗಿ ಐಟಿ ಕ್ಷೇತ್ರದಲ್ಲಿ ಉದ್ದ ಸಮಯದ ಕೆಲಸ, ನಿರಂತರ ಟಾರ್ಗೆಟ್‌ಗಳು ಹಾಗೂ ಸ್ಪರ್ಧಾತ್ಮಕ ವಾತಾವರಣ ಹಲವರ ಮೇಲೆ ಒತ್ತಡ ಉಂಟುಮಾಡುತ್ತಿದೆ ಎಂದು ತಜ್ಞರು ಹೇಳುತ್ತಿದ್ದಾರೆ.

ಹೆಚ್ಚು ಸಂಬಳ ಇದ್ದರೂ ಜೀವನದಲ್ಲಿ ಸಂತೋಷ ಸಿಗುತ್ತಿಲ್ಲ ಎಂಬ ಅಭಿಪ್ರಾಯ ಹಲವರಲ್ಲಿ ಮೂಡುತ್ತಿದೆ. ಇದೇ ಕಾರಣಕ್ಕೆ ಕೆಲವರು ಕಾರ್ಪೊರೇಟ್ ಜೀವನ ತೊರೆದು ಪ್ರವಾಸ, ಫ್ರೀಲಾನ್ಸ್ ಕೆಲಸ ಅಥವಾ ಶಾಂತ ಬದುಕಿನತ್ತ ಮುಖ ಮಾಡುತ್ತಿದ್ದಾರೆ.

ಈ ಟೆಕ್ಕಿಯ ಕಥೆ ಈಗ ಸಾಮಾಜಿಕ ಜಾಲತಾಣಗಳಲ್ಲಿ ದೊಡ್ಡ ಚರ್ಚೆಗೆ ಕಾರಣವಾಗಿದೆ. “ಹಣವೇ ಜೀವನವಲ್ಲ”, “ಮಾನಸಿಕ ಆರೋಗ್ಯಕ್ಕೂ ಆದ್ಯತೆ ಬೇಕು” ಎಂಬ ಅಭಿಪ್ರಾಯಗಳು ಕೇಳಿಬರುತ್ತಿವೆ. ಮತ್ತೊಂದೆಡೆ, ಉತ್ತಮ ಸಂಬಳದ ಉದ್ಯೋಗ ಬಿಟ್ಟುಬಿಡುವುದು ಅಪಾಯಕಾರಿ ನಿರ್ಧಾರ ಎಂದು ಕೆಲವರು ಎಚ್ಚರಿಸುತ್ತಿದ್ದಾರೆ.

ಒಟ್ಟಿನಲ್ಲಿ, ಈ ಘಟನೆ ಇಂದಿನ ಕಾರ್ಪೊರೇಟ್ ಜೀವನದ ಒತ್ತಡ ಮತ್ತು ಯುವಕರ ಬದಲಾಗುತ್ತಿರುವ ಜೀವನದ ದೃಷ್ಟಿಕೋಣವನ್ನು ಮತ್ತೊಮ್ಮೆ ಹೊರಹಾಕಿದೆ,(ಏಜೆನ್ಸೀಸ್​).