ಸತೀಶನ್ ಆಯ್ಕೆ 'ಮುಸ್ಲಿಂ ಲೀಗ್' ಆದೇಶ!...ಕೇರಳ ನಾಯಕತ್ವಕ್ಕಾಗಿ ಗಾಂಧಿ ಫ್ಯಾಮಿಲಿಯಲ್ಲಿ ವಾರ್​ ನಡೆಯುತ್ತಿದೆ ಎಂದ ಬಿಜೆಪಿ | Kerala CM

ಕಾಂಗ್ರೆಸ್ ತನ್ನ ಅಸ್ತಿತ್ವಕ್ಕಾಗಿ ತುಷ್ಟೀಕರಣ ರಾಜಕೀಯ ಮಾಡುತ್ತಿದೆ ಮತ್ತು ಅಲ್ಪಸಂಖ್ಯಾತ ಸಮುದಾಯಗಳ ಓಲೈಕೆಯಲ್ಲಿ ತೊಡಗಿದೆ ಎಂಬುದು ಕೇಸರಿ ಪಡೆಯ ಪ್ರಮುಖ ಟೀಕೆಯಾಗಿದೆ. ಸುಮಾರು ಹತ್ತು ದಿನಗಳ ಕಾಲ ನಡೆದ ಹಗ್ಗ ಜಗ್ಗಾಟದ ಬಳಿಕ ಸತೀಶನ್ ಹೆಸರನ್ನು ಅಂತಿಮಗೊಳಿಸಲಾಗಿದ್ದು, ಈ ಆಯ್ಕೆಯು ಕಾಂಗ್ರೆಸ್‌ನ ಆಂತರಿಕ ಲೆಕ್ಕಾಚಾರಕ್ಕಿಂತಲೂ ಮಿತ್ರಪಕ್ಷಗಳ ಪ್ರಭಾವದಿಂದಲೇ ನಡೆದಿದೆ ಎಂಬ ಚರ್ಚೆಗೆ ದಾರಿ ಮಾಡಿಕೊಟ್ಟಿದೆ.

ಸತೀಶನ್ ತಳಮಟ್ಟದ ನಾಯಕರಾಗಿದ್ದರೂ, ಸಿಎಂ ರೇಸ್​​ನಲ್ಲಿ ಕೆ ಸಿ ವೇಣುಗೋಪಾಲ್ ಮುಂದಿದ್ದಾರೆ ಎಂದು ಭಾವಿಸಲಾಗಿತ್ತು. ಕೆಸಿವಿ ರಾಹುಲ್ ಗಾಂಧಿ ಅವರ ಆಪ್ತ ವಲಯದಲ್ಲಿ ಗುರುತಿಸಿಕೊಂಡಿದ್ದವರು ಮತ್ತು ಇತ್ತೀಚಿನ ಚುನಾವಣಾ ಗೆಲುವಿನ ರೂವಾರಿ ಎಂದೇ ಹೆಸರು ಮಾಡಿದ್ದರು. ಆದರೂ ಕಾಂಗ್ರೆಸ್ ಸತೀಶನ್​ರನ್ನು ಆರಿಸಿದ್ದರ ಹಿಂದೆ ಐಯುಎಂಎಲ್‌ನ ಪ್ರಬಲ ಬೆಂಬಲ ಪ್ರಮುಖ ಕಾರಣವಾಗಿತ್ತು.

ಮತ್ತೊಂದೆಡೆ, ವೇಣುಗೋಪಾಲ್ ಲೋಕಸಭಾ ಸಂಸದರಾಗಿದ್ದು, ಅವರು ಮುಖ್ಯಮಂತ್ರಿಯಾಗಿದ್ದರೆ ಆರು ತಿಂಗಳೊಳಗೆ ಉಪಚುನಾವಣೆ ಎದುರಿಸಬೇಕಿತ್ತು. ಈ ಅನಿಶ್ಚಿತತೆಯನ್ನು ತಪ್ಪಿಸಲು ಕಾಂಗ್ರೆಸ್ ಸುರಕ್ಷಿತ ಹಾದಿಯನ್ನು ಆರಿಸಿಕೊಂಡಿದೆ ಎಂದು ವಿಶ್ಲೇಷಿಸಲಾಗುತ್ತಿದೆ. ಐಯುಎಂಎಲ್ ಮುಖ್ಯಸ್ಥ ಸಯ್ಯದ್ ಸಾದಿಕ್ ಅಲಿ ಶಿಹಾಬ್ ತಂಗಲ್ ಕಾಂಗ್ರೆಸ್ ನಿರ್ಧಾರವನ್ನು ಸ್ವಾಗತಿಸಿದ್ದು, ಸತೀಶನ್ ಉತ್ತಮ ಆಡಳಿತ ನೀಡಲಿದ್ದಾರೆ ಎಂದು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ. ಆದರೆ, ಇದನ್ನೇ ಅಸ್ತ್ರವಾಗಿಸಿಕೊಂಡಿರುವ ಬಿಜೆಪಿ, ಕಾಂಗ್ರೆಸ್​ಗೆ ಮುಸ್ಲಿಂ ಲೀಗ್ ಹಣೆಪಟ್ಟಿಯನ್ನು ಅಂಟಿಸಲು ಯತ್ನಿಸುತ್ತಿದೆ.

ಕಳೆದ ವರ್ಷ ಪ್ರಧಾನಿ ನರೇಂದ್ರ ಮೋದಿ ಬಿಹಾರ ಚುನಾವಣಾ ಸಂದರ್ಭದಲ್ಲಿ ಕಾಂಗ್ರೆಸ್ ಪಕ್ಷವನ್ನು ಎಂಎಂಸಿ (ಮುಸ್ಲಿಂ ಲೀಗ್ ಮಾವೋವಾದಿ ಕಾಂಗ್ರೆಸ್) ಎಂದು ಲೇವಡಿ ಮಾಡಿದ್ದನ್ನು ಇಲ್ಲಿ ಸ್ಮರಿಸಬಹುದು. ಒಟ್ಟಾರೆಯಾಗಿ, ಕೇರಳದಲ್ಲಿ ಸತೀಶನ್ ಪಟ್ಟಾಭಿಷೇಕ ಕಾಂಗ್ರೆಸ್‌ಗೆ ಅಧಿಕಾರ ನೀಡಿದರೂ, ಎದುರಾಳಿಗಳಿಗೆ ಟೀಕೆ ಮಾಡಲು ಹೊಸ ರಾಜಕೀಯ ಅಸ್ತ್ರವನ್ನಂತೂ ಒದಗಿಸಿದೆ.

ಬಿಜೆಪಿ ರಾಷ್ಟ್ರೀಯ ವಕ್ತಾರ ಶೆಹಜಾದ್ ಪೂನವಾಲ್ಲಾ ತಮ್ಮ ಎಕ್ಸ್ ಖಾತೆಯಲ್ಲಿ ಪೋಸ್ಟ್​ ಹಂಚಿಕೊಂಡಿದ್ದು, ಕೇರಳದ ಮುಖ್ಯಮಂತ್ರಿ ಆಯ್ಕೆಯ ನಿರ್ಧಾರದ ವಿಷಯದಲ್ಲಿ ರಾಜ್ಯ ಘಟಕದ ಮೇಲೆ ಕೇಂದ್ರ ನಾಯಕರು ಒತ್ತಡ ಹೇರಿದ್ದಾರೆ ಎಂದು ಅವರು ಆರೋಪಿಸಿದ್ದಾರೆ. ಕೇರಳದ ಮುಖ್ಯಮಂತ್ರಿ ಅಭ್ಯರ್ಥಿಯನ್ನು ಕೇರಳದಲ್ಲಿ ನಿರ್ಧರಿಸುವ ಬದಲಿಗೆ ನವದೆಹಲಿಯಲ್ಲಿ ತೀರ್ಮಾನಿಸಲಾಗಿದೆ ಎಂಬುದು ಸ್ಪಷ್ಟವಾಗಿದೆ. ಎಐಸಿಸಿ ಪ್ರಧಾನ ಕಚೇರಿಯಿಂದಲೇ ಈ ಘೋಷಣೆ ಹೊರಬಿದ್ದಿರುವುದು ಇದು ರಿಮೋಟ್-ಕಂಟ್ರೋಲ್​ ಸರ್ಕಾರ ಎಂಬುದಕ್ಕೆ ಸಾಕ್ಷಿ ಎಂದು ಪೂನವಾಲ್ಲಾ ಲೇವಡಿ ಮಾಡಿದ್ದಾರೆ.

ಈ ಘೋಷಣೆ ವಿಳಂಬವಾಗಲು ಆಂತರಿಕ ಕಲಹ ಮತ್ತು ಮೈತ್ರಿಕೂಟದ ಪಾಲುದಾರರ ಒತ್ತಡವೇ ಕಾರಣ ಎಂದಿರುವ ಬಿಜೆಪಿ ವಕ್ತಾರ, 11 ದಿನಗಳ ಕುತುಹಲದ ಬಳಿಕ ಸತೀಶನ್ ಹೆಸರು ಘೋಷಣೆಯಾಗಿದೆ. ಜಮಾಅತ್ ಮತ್ತು ಐಯುಎಂಎಲ್ (IUML) ಪಕ್ಷಗಳು ಕಾಂಗ್ರೆಸ್‌ಗೆ ಕಟ್ಟುನಿಟ್ಟಿನ ಎಚ್ಚರಿಕೆ ನೀಡಿದ್ದವು. ಈ ನಿರ್ಧಾರವು ಮುಸ್ಲಿಂ ಮತಬ್ಯಾಂಕ್‌ನ ಸ್ಪಷ್ಟ ಪ್ರಭಾವಕ್ಕೆ ಒಳಗಾಗಿದೆ ಎಂದು ಅವರು ದೂರಿದ್ದಾರೆ.

ರಾಜ್ಯ ಕಾಂಗ್ರೆಸ್ ಸರ್ಕಾರಕ್ಕೆ ಕೇರಳದ ಪರಿಸ್ಥಿತಿಯನ್ನು ಹೋಲಿಸಿರುವ ಪೂನವಾಲ್ಲಾ, ಕರ್ನಾಟಕದಲ್ಲಿ ಸಿದ್ದರಾಮಯ್ಯ ಮತ್ತು ಡಿ.ಕೆ. ಶಿವಕುಮಾರ್ ನಡುವೆ ಇರುವಂತಹ ಪೈಪೋಟಿ ಕೇರಳದಲ್ಲೂ ಮುಂದುವರಿಯಲಿದೆ ಎಂದು ಭವಿಷ್ಯ ನುಡಿದಿದ್ದಾರೆ. ಕೇರಳದಲ್ಲಿ ಸತೀಶನ್, ಕೆ.ಸಿ. ವೇಣುಗೋಪಾಲ್, ರಮೇಶ್ ಚೆನ್ನಿತ್ತಲ ಮತ್ತು ಶಶಿ ತರೂರ್​ರಂತಹ ನಾಲ್ಕೈದು ಹಿರಿಯ ನಾಯಕರ ನಡುವೆ ಅಧಿಕಾರಕ್ಕಾಗಿ ಪೈಪೋಟಿ ನಡೆಯಲಿದೆ. ಈ ಹಿಂದೆಯೂ ಹಿಮಾಚಲ ಪ್ರದೇಶ, ಪಂಜಾಬ್ ಮತ್ತು ರಾಜಸ್ಥಾನಗಳಲ್ಲಿ ಕಾಂಗ್ರೆಸ್ ಇಂತಹದೇ ಆಂತರಿಕ ಸಂಘರ್ಷಗಳಿಂದ ತೊಂದರೆ ಅನುಭವಿಸಿದೆ. ಈ ಅಸ್ಥಿರತೆಯಿಂದಾಗಿ ಕೇರಳದ ಜನರು ಮತ್ತೆ ಸಂಕಷ್ಟಕ್ಕೆ ಸಿದ್ಧರಾಗಬೇಕಿದೆ ಎಂದು ಪೂನವಾಲ್ಲಾ ಎಚ್ಚರಿಸಿದ್ದಾರೆ(ಏಜೆನ್ಸೀಸ್​).