ಕುಣಿಯಲಾರದೆ ನೆಲ ಡೊಂಕು ಎನ್ನುತ್ತಿರುವ ಕಾಂಗ್ರೆಸ್!

ಅಯೋಧ್ಯೆಯ ಮೇಲೆ ದಾಳಿ ಮಾಡಿ ಶ್ರೀರಾಮ ಮಂದಿರವನ್ನು ಧ್ವಂಸ ಮಾಡಿದ ಬಾಬರನ ಸೇನಾಪತಿ ಮೀರ್ ಬಾಕಿ ಕುರಿತು ಹೇಳಿದರಾ? ಕಾಶಿ ವಿಶ್ವನಾಥನ ಮಂದಿರ ಅತಿಕ್ರಮಿಸಿಕೊಂಡವರ ಕುರಿತು ಹೇಳಿದರಾ? ಸೌರಾಷ್ಟ್ರದ ಸೋಮನಾಥವನ್ನು ಸತತವಾಗಿ ಧ್ವಂಸ ಮಾಡಿದ ಮುಸ್ಲಿಂ ಆಕ್ರಮಣಕಾರರ ಬಗ್ಗೆ ಹೇಳಿದರಾ? ವಿಜಯನಗರ ಸಾಮ್ರಾಜ್ಯದ ಅವನತಿ ಹೇಗಾಯಿತು ಎಂಬುದರ ಬಗ್ಗೆ ಹೇಳಿದರಾ? ಬ್ರಿಟಿಷರ ಕುರಿತು ಹೇಳಿದರಾ? ಪಾಕಿಸ್ತಾನ, ಬಾಂಗ್ಲಾದೇಶದ ಕುರಿತು ಹೇಳಿದರಾ? ಭಾರತದ ಡೆಮಾಗ್ರಫಿ(ಜನಸಂಖ್ಯೆ ಲೆಕ್ಕಾಚಾರ ತಲೆಕೆಳಗಾಗುವುದು)ಯನ್ನು ಬದಲಿಸುತ್ತಿರುವ ಬಾಂಗ್ಲಾ ಅಕ್ರಮ ವಲಸಿಗರ ಕುರಿತು ಹೇಳಿದರಾ? ರಾಹುಲ್ ಗಾಂಧಿ ಕುರಿತು ಹೇಳಿದರಾ? ಉದ್ಧವ ಠಾಕ್ರೆ ಕುರಿತು ಹೇಳಿದರಾ? ಬೆಂಗಳೂರಿನ ಕೋಗಿಲು ಬಳಿ ನೆಲೆಸಿದ್ದ ಬಾಂಗ್ಲಾ ಅಕ್ರಮ ವಲಸಿಗರನ್ನೂ ಸಕ್ರಮ ಮಾಡುವ ಸಲುವಾಗಿ ಕಾಂಗ್ರೆಸ್ ಸರಕಾರ ಅಧಿಕೃತ ಸೂರು ಕಲ್ಪಿಸಲು ಹೊರಟಿರುವುದರ ಕುರಿತು ಹೇಳಿದರಾ? ವಾಸ್ತವದಲ್ಲಿ ಅಜಿತ್ ದೋವಲ್ ಅವರ ಮಾತನ್ನು ನಾವು ಈ ಎಲ್ಲ ಸಂದರ್ಭಗಳಿಗೆ ಅನ್ವಯ ಮಾಡಿಕೊಂಡು ಅವಲೋಕನ ಮಾಡಬೇಕು. ಆಲೋಚನೆ ಮಾಡಬೇಕು. ಯಾವ ಕಾರಣಕ್ಕೂ ನಮ್ಮ ನಿರೀಕ್ಷೆ ನಿಜ ಆಗುವುದಿಲ್ಲ. ಕಾರಣ ರಾಜಕೀಯ ಲಾಭ ಹಾನಿ ಲೆಕ್ಕಾಚಾರವನ್ನು ಬಿಟ್ಟು ಬೇರೆ ಏನನ್ನೂ ನೋಡಲು ಸೆಕ್ಯುಲರ್ ಪಕ್ಷಗಳ ನಾಯಕರು ತಯಾರಿಲ್ಲ.

ಒಂದೊಂದಾಗಿ ನೋಡುತ್ತ ಹೋಗುವುದಾದರೆ, ಕಾಂಗ್ರೆಸ್ ಮುಖ್ಯಸ್ಥ ಮತ್ತು ಲೋಕಸಭೆಯಲ್ಲಿ ಪ್ರತಿಪಕ್ಷದ ನಾಯಕ ರಾಹುಲ್ ಗಾಂಧಿ ಮುಲಾಜಿಲ್ಲದೆ ದೇಶದ ಪ್ರತಿಷ್ಠೆಯನ್ನು ಪಣಕ್ಕಿಡುತ್ತಾರೆ. ಅವರಿಗೆ ದೇಶದ ಇತಿಹಾಸ, ವರ್ತಮಾನ ಮತ್ತು ಭವಿಷ್ಯ ಮೂರೂ ಲೆಕ್ಕಕ್ಕಿಲ್ಲ. ಇತ್ತೀಚಿನ ಬಿಹಾರ ವಿಧಾನಸಭೆ ಚುನಾವಣೆ ಮಾತ್ರವಲ್ಲ, ಮಹಾರಾಷ್ಟ್ರದ ಸ್ಥಳೀಯ ಸಂಸ್ಥೆಗಳಲ್ಲಿ ಕಾಂಗ್ರೆಸ್ ಸೋಲುವುದಕ್ಕೂ ವೋಟ್ ಚೋರಿ ಕಾರಣ ಎಂದು ಹೇಳುತ್ತಾರೆ. ಅದೇ ವೋಟ್ ಚೋರಿ ಮತ್ತು ಇವಿಎಂನಿಂದಲೇ ಬೆರಳೆಣಿಕೆಯಷ್ಟು ಕಾರ್ಪೆರೇಟರ್ಗಳು ಗೆದ್ದಿದ್ದಾರಲ್ಲ? ಈ ಪ್ರಶ್ನೆಗೆ ಅವರ ಬಳಿ ಉತ್ತರ ಇರುವುದಿಲ್ಲ.

ಪಶ್ಚಿಮ ಬಂಗಾಳದ ಮುಖ್ಯಮಂತ್ರಿ ಮಮತಾ ಬ್ಯಾನರ್ಜಿ ಅವರ ಇತ್ತೀಚಿನ ನಡೆಯನ್ನು ನೀವು ಗಮನಿಸಿಯೇ ಇರುತ್ತೀರಿ. ಇನ್ನು ಕೆಲ ತಿಂಗಳಲ್ಲಿ ಪಶ್ಚಿಮ ಬಂಗಾಳ ವಿಧಾನಸಭೆಗೆ ಚುನಾವಣೆ ನಡೆಯಲಿದೆ. ಮಮತಾ ಬ್ಯಾನರ್ಜಿ ಅವರ ಟಿಎಂಸಿ ತನ್ನ ಚುನಾವಣೆ ನಿರ್ವಹಣೆ ಗುತ್ತಿಗೆಯನ್ನು ಐ-ಪ್ಯಾಕ್ ಎಂಬ ಸಂಸ್ಥೆಗೆ ನೀಡಿದೆ. ಈ ಸಂಸ್ಥೆ ಪ್ರತಿ ವಿಧಾನಸಭಾ ಕ್ಷೇತ್ರದಲ್ಲಿ ಟಿಎಂಸಿ ಅಭ್ಯರ್ಥಿಗಳ ಗೆಲುವಿಗೆ ನಿರ್ಣಾಯಕ ಆಗಿರುವ 5ರಿಂದ 15 ಸಾವಿರ ಬಾಂಗ್ಲಾ ಅಕ್ರಮ ವಲಸಿಗ ಮತದಾರರ ಸಂಖ್ಯೆಯನ್ನು ವಿಧಾನಸಭಾ ಕ್ಷೇತ್ರವಾರು ಹಂಚಿಕೆ ಮಾಡುವ ತಂತ್ರಗಾರಿಕೆಯಲ್ಲಿ ಮುಳುಗಿದೆ ಎಂಬ ಆರೋಪವಿದೆ. ಆ ಬಗ್ಗೆ ದೂರು ದಾಖಲಾಗಿದೆ. ಅದನ್ನು ಆಧರಿಸಿ ಜಾರಿ ನಿರ್ದೇಶನಾಲಯ ಕೋಲ್ಕತ್ತಾದ ಆಯಕಟ್ಟಿನ ಜಾಗದಲ್ಲಿರುವ ಐ-ಪ್ಯಾಕ್ ಕಚೇರಿಗೆ ದಾಳಿ ಮಾಡಿ ದಾಖಲೆಗಳನ್ನು ವಶಪಡಿಸಿಕೊಳ್ಳಲು ಮುಂದಾಯಿತು. ಅದು ಗೊತ್ತಾಗುತ್ತಲೇ ಸ್ವತಃ ಮುಖ್ಯಮಂತ್ರಿ ಮಮತಾ ಬ್ಯಾನರ್ಜಿ ಐ-ಪ್ಯಾಕ್ ಕಚೇರಿಗೆ ರಾಜ್ಯದ ಪೊಲೀಸ್ ಮಹಾನಿರ್ದೇಶಕರೊಂದಿಗೆ ನುಗ್ಗಿ ಪ್ರಮುಖವಾದ ಕಡತಗಳನ್ನು ಕಸಿದುಕೊಂಡು ಹೋಗುತ್ತಾರೆ.

ಜಾರಿ ನಿರ್ದೇಶನಾಲಯದ ಅಧಿಕಾರಿಗಳ ವಿರುದ್ಧವೇ ಎಫ್ಐಆರ್ ದಾಖಲು ಮಾಡುತ್ತಾರೆ. ಈ ಮೊದಲೇ ಸಿಬಿಐ ರಾಜ್ಯ ಪ್ರವೇಶವನ್ನು ನಿರ್ಬಂಧಿಸಿ ಮಮತಾ ಆದೇಶ ಹೊರಡಿಸಿದ್ದರು. ಮತದಾರ ಪಟ್ಟಿ ಸಮಗ್ರ ಪರಿಷ್ಕರಣೆ ವಿಷಯದಲ್ಲಿ ಚುನಾವಣಾ ಆಯೋಗದ ವಿರುದ್ಧ ಮಮತಾ ತೊಡೆ ತಟ್ಟಿದ್ದರು. ಇದೀಗ ಇ.ಡಿ. ವಿರುದ್ಧ ಸಮರಕ್ಕೆ ಧುಮುಕಿದ್ದಾರೆ. ಇದಕ್ಕೆಲ್ಲ ಕಾರಣ ಒಂದೇ ಒಂದು, ಅದು ಅಲ್ಪಸಂಖ್ಯಾತರ ಮತ ಬ್ಯಾಂಕ್ ರಕ್ಷಣೆ. ಮತದಾರರು ಬಾಂಗ್ಲಾದವರಾದರೂ ಆಗಲಿ, ಪಾಕಿಸ್ತಾನದವರಾದರೂ ಆಗಲಿ, ಒಟ್ಟಿನಲ್ಲಿ ತೃಣಮೂಲ ಕಾಂಗ್ರೆಸ್ ಗೆಲ್ಲಬೇಕು. ಪ್ರಮುಖ ರಾಜಕೀಯ ನಾಯಕರ ಈ ನೀತಿಯಿಂದ ದೇಶಕ್ಕೆ ಒಳಿತಾಗಲು ಸಾಧ್ಯವೇ? ಮೊಘಲರಿಂದ ಬ್ರಿಟಿಷರ ಆಡಳಿತದವರೆಗೆ ದೇಶದ ಹಿತಾಸಕ್ತಿಗೆ ಹಿನ್ನಡೆ ಆದದ್ದು ನಮ್ಮವರ ಸ್ವಹಿತಾಸಕ್ತಿ ಮತ್ತು ಸಂಕುಚಿತ ಆಲೋಚನೆಯ ಪರಿಣಾಮದಿಂದ.

ಕರ್ನಾಟಕದ ಕತೆಯೂ ಬಾಂಗ್ಲಾ ಸನ್ನಿವೇಶಕ್ಕಿಂತ ಮಿಗಿಲಾಗಿಲ್ಲ ಅಥವಾ ಮಮತಾ ಹಾದಿಯಲ್ಲೇ ಕರ್ನಾಟಕದ ಸರಕಾರವೂ ಹೆಜ್ಜೆ ಹಾಕುತ್ತಿದೆ ಎಂಬುದು ವಿಪರ್ಯಾಸ. ಆಯುಷ್ಮಾನ್ ಭಾರತ್ ಆರೋಗ್ಯ ವಿಮೆಯಂಥ ಕೇಂದ್ರ ಸರಕಾರದ ಅನೇಕ ಜನಪರ ಯೋಜನೆಗಳನ್ನು ಜಾರಿ ಮಾಡುವುದಿಲ್ಲ ಎಂಬ ಶಪಥವನ್ನು ಕರ್ನಾಟಕದ ಕಾಂಗ್ರೆಸ್ ಸರಕಾರ ಮಾಡಿತ್ತು.

ಕರ್ನಾಟಕದಲ್ಲಿ ಸಿಬಿಐನಂಥ ಕೇಂದ್ರೀಯ ತನಿಖಾ ಏಜೆನ್ಸಿಗಳ ಪ್ರವೇಶಕ್ಕೆ ಆಸ್ಪದ ಕೊಡುವುದಿಲ್ಲ ಎಂಬ ಸರಕಾರಿ ತೀರ್ಮಾನ ತೆಗೆದುಕೊಳ್ಳಲಾಗಿತ್ತು. ರಾಹುಲ್ ಗಾಂಧಿಗೆ ಆಪ್ತರಾದ ಕೇರಳದ ಕೆ.ಸಿ. ವೇಣುಗೋಪಾಲ್ ಟ್ವೀಟ್ ಮಾಡಿದರು ಎಂಬ ಒಂದೇ ಒಂದು ಕಾರಣಕ್ಕೆ ಯಲಹಂಕದ ಕೋಗಿಲು ಬಳಿ ಅತಿಕ್ರಮವಾಗಿ ನೆಲೆಸಿದ್ದ ಬಾಂಗ್ಲಾ ಪ್ರಜೆಗಳಿಗೆ ಸುಸಜ್ಜಿತ ಮನೆಗಳನ್ನು ಹಂಚಿಕೆ ಮಾಡಲು ತರಾತುರಿಯಲ್ಲಿ ಕರ್ನಾಟಕ ಸರಕಾರ ತೀರ್ಮಾನ ತೆಗೆದುಕೊಂಡಿತು. ಹೀಗೆ ಮಾಡುತ್ತ ಹೋದರೆ ಎಷ್ಟು ಮಂದಿಗೆ ಸರಕಾರ ಮನೆ ಕೊಡಲು ಸಾಧ್ಯ? ಈ ಹಿಂದೆ ಅತಿಕ್ರಮ ತೆರವುಗೊಳಿಸಿದಾಗ ಇದೇ ಸಂಪ್ರದಾಯ ಅನುಸರಿಸಲಾಗಿತ್ತೆ? ಮುಂದೆ ಇದನ್ನು ಮುಂದುವರೆಸಲು ಸಾಧ್ಯವೇ? ಯಾವುದೇ ಪೂರ್ವಾಪರ ಆಲೋಚನೆ ಇಲ್ಲವೇ ಇಲ್ಲ. ಮಾಡಬೇಕು ಮಾಡಬೇಕು ಅಷ್ಟೇ.

ಈಗ ಮಹತ್ವಾಕಾಂಕ್ಷೆಯ ವಿಬಿ-ಜಿ-ರಾಮ್ ಜಿ ಯೋಜನೆಯ ಜಾರಿ ವಿರೋಧಿಸಲು ವಿಶೇಷ ಅಧಿವೇಶನದ ಸಿದ್ಧತೆ ಆರಂಭವಾಗಿದೆ. ಜಿ ರಾಮ್ ಜಿ ಯೋಜನೆಗೆ ವಿರೋಧ ಏಕೆ? ಗಾಂಧೀಜಿ ಹೆಸರು ಕೈಬಿಟ್ಟಿದ್ದಾರೆ ಎಂದು. ಇದೇ ಉದ್ಯೋಗ ಖಾತ್ರಿ ಯೋಜನೆಗೆ 2001ರ ಮೊದಲು ಯಾವ ಹೆಸರಿತ್ತು? ಜವಾಹರ ರೋಜಗಾರ್ ಯೋಜನೆ! ಹಾಗಾದರೆ ಆಗ ಯಾಕೆ ಗಾಂಧೀಜಿ ಹೆಸರು ಇವರಿಗೆ ನೆನಪಾಗಲಿಲ್ಲ? ಏಕೆಂದರೆ ನೆಹರು ಹೆಸರು ಮರೆಯುವ ಹಾಗಿಲ್ಲ. ಮರೆತವರಿಗೆ ಉಳಿಗಾಲ ಇರಲಿಲ್ಲ. ಸರ್ಕಾರಿ ಯೋಜನೆಗಳಿಗೆ, ಸರಕಾರಿ ಕಟ್ಟಡಗಳಿಗೆ, ಸರಕಾರಿ ವಿವಿಗಳಿಗೆ ನೆಹರು, ಇಂದಿರಾ, ರಾಜೀಲ್ ಹೆಸರು. ಲೆಕ್ಕ ಹಾಕಲು ಹೋದರೆ ಸಾವಿರ ಸಾವಿರ ಹೆಸರುಗಳು. ಎಷ್ಟೋ ಮಂದಿ ಕಾಂಗ್ರೆಸ್ ನಾಯಕರು ತಮ್ಮ ನಿಷ್ಠೆ ಪ್ರದರ್ಶನಕ್ಕೆ ತಮ್ಮ ಮಕ್ಕಳು ಮೊಮ್ಮಕ್ಕಳಿಗೂ ಅದೇ ಹೆಸರುಗಳನ್ನು ಇಟ್ಟಿದ್ದಾರೆ. ಆಗ ಏಕೆ ಗಾಂಧಿ ಹೆಸರು ನೆನಪಾಗಲಿಲ್ಲ? ಉತ್ತರವಿಲ್ಲ.

ಜಿ ರಾಮ್ ಜಿ ಯೋಜನೆಯಲ್ಲಿ ಏನಾದರೂ ಲೋಪವಿದ್ದರೆ ಹೇಳಲಿ. ವರ್ಷಕ್ಕೆ ಈ ಹಿಂದೆ ನೂರು ದಿನ ಕೂಲಿ ಇರುತ್ತಿತ್ತು. ಈಗ 120 ದಿನಕ್ಕೆ ಹೆಚ್ಚಿಸಲಾಗಿದೆ. ಕೂಲಿ ದರವನ್ನೂ ಹೆಚ್ಚಿಸಲಾಗಿದೆ. ಗ್ರಾಮ ಪಂಚಾಯತಿ ಅಧಿಕಾರ ಮೊಟಕುಗೊಳಿಸಲಾಗಿದೆ ಎಂಬ ಸುಳ್ಳಿನ ಗುಲ್ಲು. ಕೂಲಿ ಗುರುತಿಸುವುದು, ಕೂಲಿ ನಿಗದಿ ಮಾಡುವುದು ಮತ್ತು ಪೇಮೆಂಟ್ ನಿರ್ಧರಿಸುವುದು ಗ್ರಾಮಪಂಚಾಯತಿಯೇ. ಈಗ ಹಿಂದಿನ ಹಾಗೆ ನಕಲಿ ಜಾಬ್ ಕಾರ್ಡ್ ಮಾಡಿ ಹಣ ತೆಗೆಯಲು ಮಾತ್ರ ಬರುವುದಿಲ್ಲ. ಡಿಬಿಟಿ ಮೂಲಕ ಫಲಾನುಭವಿ ಖಾತೆಗೆ ನೇರವಾಗಿ ಹಣ ಜಮಾ ಆಗುತ್ತದೆ. ಜಿ ರಾಮ್ ಜಿ ಹಣವನ್ನು ಯಾರ್ಯಾರೋ ಲಪಟಾಯಿಸಲು ಇನ್ನು ಸಾಧ್ಯ ಆಗುವುದಿಲ್ಲ. ತಲೆ ಬಿಸಿ ಆಗಿದ್ದೇ ಇಲ್ಲಿ!.

ಈ ರೀತಿ ಪ್ರತಿಯೊಂದು ಹೆಜ್ಜೆಗೂ ದುರುದ್ದೇಶ ಇಟ್ಟುಕೊಂಡು ಕೆಲಸ ಮಾಡುವುದರಿಂದ, ಕೇಂದ್ರ- ರಾಜ್ಯದ ನಡುವೆ ಕಂದಕ ತೆಗೆದು ಒಕ್ಕೂಟ ವ್ಯವಸ್ಥೆ ದುರ್ಬಲಗೊಳಿಸುವುದರಿಂದ ಯಾವುದೇ ರಾಜಕೀಯ ಪಕ್ಷಕ್ಕೆ ಲಾಭ ಆಗಲು ಸಾಧ್ಯವೇ?.

ಇದನ್ನು ತಿಳಿದುಕೊಳ್ಳದೇ ಹೋದರೆ ಆಗುವ ಪರಿಣಾಮದ ಒಂದು ಉದಾಹರಣೆ ಹೇಳುತ್ತೇನೆ ನೋಡಿ. ಕೇರಳದ ತ್ರಿಶೂರ್ ಸ್ಥಳೀಯ ಸಂಸ್ಥೆ ಚುನಾವಣೆಯಲ್ಲಿ ಕಾಂಗ್ರೆಸ್ ತನ್ನ ಹಾಲಿ ಸ್ಥಾನವನ್ನು ಕಳೆದುಕೊಳ್ಳಬೇಕಾಗಿ ಬಂತು. ಯಾರ ಎದುರಿಗೆ? ಮುಮ್ತಾಜ್ ಎಂಬ ಮುಸ್ಲಿಂ ಸಮುದಾಯದ ಬಿಜೆಪಿ ಅಭ್ಯರ್ಥಿಯ ಮುಂದೆ. ತ್ರಿಶೂರ್ ಕಾರ್ಪೆರೇಷನ್ನ 35ನೇ ವಾರ್ಡ್ ಕಣ್ಣಂಕುಳಂಗರ ಹಿಂದೂ ಬಾಹುಳ್ಯದ ಪ್ರದೇಶ. ಅಲ್ಲಿ ಬಿಜೆಪಿ ಅಭ್ಯರ್ಥಿಯಾಗಿ ಕಣಕ್ಕಿಳಿದಿದ್ದ ಮುಮ್ತಾಜ್ ಚಿಂಜು ವಹಾಬ್ ಭರ್ಜರಿ ಜಯಭೇರಿ ಬಾರಿಸಿದ್ದಾರೆ. ಸೋಲುವ ಕಡೆಗಳಲ್ಲಿ ಮಾತ್ರ ಬಿಜೆಪಿ ಕೇವಲ ಪ್ರಚಾರಕ್ಕೋಸ್ಕರ ಮುಸ್ಲಿಂ ಅಭ್ಯರ್ಥಿಗಳನ್ನು ಕಣಕ್ಕಿಳಿಸುತ್ತದೆ ಎಂದು ಮೂಗು ಮುರಿಯುವವರಿಗೆ ಇದು ಸರಿಯಾದ ಉತ್ತರ. ಎಂಎ, ಎಂಎಡ್ ಪದವಿ ಪಡೆದ ಮುಮ್ತಾಜ್ 2018ರಲ್ಲಿ ಬಿಜೆಪಿ ಸೇರಿದ್ದರು. ಚೆನ್ನೈಯಲ್ಲಿ ಬಿಜೆಪಿ ಸದಸ್ಯತ್ವ ಪಡೆದಿದ್ದರು. ಬಳಿಕ ಪಕ್ಷದ ಹಲವಾರು ಕಾರ್ಯಕ್ರಮಗಳಲ್ಲಿ ಭಾಗಿಯಾಗಿದ್ದರು.

ಲೋಕಸಭಾ ಚುನಾವಣೆಯಲ್ಲಿ ಸುರೇಶ್ ಗೋಪಿ ಅವರ ಪರವಾಗಿ ಸಕ್ರಿಯವಾಗಿ ತೊಡಗಿಸಿಕೊಂಡ ಇವರು, ಹಲವಾರು ಕುಟುಂಬ ಸಂಗಮ, ಪ್ರಚಾರ ನಡೆಸಿ, ಸುರೇಶ್ ಗೋಪಿ ಅವರ ಗೆಲುವಿನಲ್ಲಿ ಪಾತ್ರ ವಹಿಸಿದ್ದರು. ಈಗ ಬಿಜೆಪಿ ನಗರಪಾಲಿಕೆ ಸದಸ್ಯೆ. ತಿರುವನಂತಪುರ ಪಾಲಿಕೆ ಬಿಜೆಪಿ ತೆಕ್ಕೆಗೆ ಬಂದಿದೆ. ಕಾಸರಗೋಡಿನ ಅನೇಕ ಪಂಚಾಯತಿಗಳಲ್ಲಿ ಬಿಜೆಪಿ ಬೆಂಬಲಿತರು ಅಧಿಕಾರ ಹಿಡಿದಿದ್ದಾರೆ. ಪಕ್ಕದ ತಮಿಳುನಾಡು ಮತ್ತು ಪಶ್ಚಿಮ ಬಂಗಾಳದಲ್ಲೂ ಬದಲಾವಣೆಯ ಬಿರುಗಾಳಿಯೇ ಆರಂಭವಾಗಿದೆ. ಮುಂಬೈ ಮನಪಾ ಆಡಳಿತ 30 ವರುಷಗಳ ತರುವಾಯ ಬಾಳಾ ಠಾಕ್ರೆ ಶಿವಸೇನೆಯ ಕೈಯಿಂದ ಜಾರಿ ಬಿಜೆಪಿ ತೆಕ್ಕೆಗೆ ಬಂದಿದೆ. ಇದೆಲ್ಲ ಗಮನಿಸಿದರೆ ಸಮಾಜ, ಜನಮಾನಸ ಬದಲಾಗುತ್ತಿದೆ ಎಂಬುದು ಸ್ಪಷ್ಟ. ಕಾಂಗ್ರೆಸ್ ಬದಲಾಗದೇ ಹೋದರೆ ಹೇಗೆ ?! ಭಾರತದ ಪ್ರಜಾಪ್ರಭುತ್ವಕ್ಕೆ ನಷ್ಟ!.