ಯುಪಿಯೊಂದಿಗೆ ತಮಿಳುನಾಡು ಹೋಲಿಕೆ ದೋಷಪೂರಿತ; ಡಿಎಂಕೆ ಸರ್ಕಾರವನ್ನು ಸಮರ್ಥಿಸಿಕೊಂಡ ಪಿ.ಚಿದಂಬರಂ | P Chidambaram

ಚೆನ್ನೈ: ತಮಿಳುನಾಡಿನ ಸಾಲ ಉತ್ತರ ಪ್ರದೇಶಕ್ಕಿಂತ ಹೆಚ್ಚಾಗಿದೆ, ಇದು ಆತಂಕಕಾರಿ ಎಂದು ವೃತ್ತಿಪರರ ಕಾಂಗ್ರೆಸ್ ಮುಖ್ಯಸ್ಥರಾಗಿರುವ ಪ್ರವೀಣ್ ಚಕ್ರವರ್ತಿ ನೀಡಿರುವ ಹೇಳಿಕೆಗೆ ಪ್ರತಿಕ್ರಿಯಿಸಿರುವ ಹಿರಿಯ ಕಾಂಗ್ರೆಸ್ ನಾಯಕ ಮತ್ತು ಯುಪಿಎ ಸರ್ಕಾರದ ಮಾಜಿ ಹಣಕಾಸು ಸಚಿವ ಪಿ.ಚಿದಂಬರಂ(P.Chidambaram), ಯುಪಿಯೊಂದಿಗೆ ತಮಿಳುನಾಡು ಹೋಲಿಕೆ ದೋಷಪೂರಿತದದ್ದು ಎಂದು ಹೇಳಿದ್ದಾರೆ.

ಈ ಕುರಿತು ಎಕ್ಸ್​ನಲ್ಲಿ ಪ್ರತಿಕ್ರಿಯೆ ನೀಡಿರುವ ಅವರು, ಒಂದು ರಾಜ್ಯದ ಒಟ್ಟು ಸಾಲದ ಆಧಾರದ ಮೇಲೆ ಮಾತ್ರ ಆ ರಾಜ್ಯದ ಆರ್ಥಿಕ ಪರಿಸ್ಥಿತಿಯನ್ನು ನಿರ್ಣಯಿಸುವುದು ದಾರಿತಪ್ಪಿಸುವ ಮತ್ತು ವಿಶ್ಲೇಷಣಾತ್ಮಕವಾಗಿ ದೋಷಪೂರಿತ. ತಮಿಳುನಾಡಿನ ಆರ್ಥಿಕತೆಯನ್ನು ಉತ್ತರ ಪ್ರದೇಶದ ಆರ್ಥಿಕತೆಯೊಂದಿಗೆ ಹೋಲಿಸುವುದು ಸೂಕ್ತವಲ್ಲ. ಇದು ಎರಡೂ ರಾಜ್ಯಗಳ ನಡುವಿನ ರಚನಾತ್ಮಕತೆ ಮತ್ತು ಅಭಿವೃದ್ದಿಯ ವ್ಯತ್ಯಾಸಗಳನ್ನು ನಿರ್ಲಕ್ಷಿಸಿದೆ ಎಂದು ಡಿಎಂಕೆ ಸರ್ಕಾರವನ್ನು ಸಮರ್ಥಿಸಿಕೊಂಡಿದ್ದಾರೆ.

ಅಮೆರಿಕ, ಯುಕೆ, ಜಪಾನ್, ಫ್ರಾನ್ಸ್ ಮತ್ತು ಕೆನಡಾ ಸೇರಿದಂತೆ ಎಲ್ಲಾ ಅಭಿವೃದ್ಧಿ ಹೊಂದಿದ ಆರ್ಥಿಕತೆಗಳಲ್ಲಿ ಒಟ್ಟು ಸಾರ್ವಜನಿಕ ಸಾಲವು ವರ್ಷದಿಂದ ವರ್ಷಕ್ಕೆ ಹೆಚ್ಚುತ್ತಲೇ ಇದೆ. ಭಾರತದ ಒಟ್ಟಾರೆ ಸಾಲ ಮತ್ತು ಎಲ್ಲಾ ರಾಜ್ಯಗಳ ಸಂಯೋಜಿತ ಸಾಲವು ವಾರ್ಷಿಕವಾಗಿ ಹೆಚ್ಚುತ್ತಿದೆ. ಇದು ಸಾಮಾನ್ಯ ಆರ್ಥಿಕ ವಿದ್ಯಮಾನ ಎಂದು ಹೇಳಿದ್ದಾರೆ.

ಸಂಪೂರ್ಣ ಸಾಲದ ಅಂಕಿಅಂಶಗಳು ಸರಿಯಾದ ಮೆಟ್ರಿಕ್ ಅಲ್ಲ. ಒಟ್ಟು ಸಾಲದ ಅನುಪಾತವು ರಾಜ್ಯ ದೇಶೀಯ ಉತ್ಪನ್ನಕ್ಕೆ (GSDP) ಹೆಚ್ಚು ಸೂಕ್ತ ಸೂಚಕವಾಗಿದೆ. ತಮಿಳುನಾಡಿನ ಸಾಲ-GSDP ಅನುಪಾತವು 2021-22 ರಿಂದ 2025-26 ರವರೆಗೆ ಸ್ಥಿರವಾಗಿದೆ, ಇದು ಹಣಕಾಸಿನ ಸ್ಥಿರತೆಯನ್ನು ಸೂಚಿಸುತ್ತದೆ. ತಮಿಳುನಾಡು ಪ್ರತಿ ವರ್ಷ ತನ್ನ ಹಣಕಾಸಿನ ಕೊರತೆಯನ್ನು ಕಡಿಮೆ ಮಾಡಿಕೊಳ್ಳುತ್ತಿದೆ. ಪ್ರಸ್ತುತ ಅಂದಾಜಿನ ಪ್ರಕಾರ, 2025-26ರಲ್ಲಿ ನೀತಿ ಆಯೋಗ ನಿಗದಿಪಡಿಸಿ ಶೇ. 3ರಷ್ಟು ಮಿತಿಯನ್ನು ತಲುಪುವ ನಿರೀಕ್ಷೆಯಿದೆ. ಇದು ಶ್ಲಾಘನೀಯವಾದದ್ದು ಎಂದು ಡಿಎಂಕೆ ಸರ್ಕಾರವನ್ನು ಹೊಗಳಿದ್ದಾರೆ (ಏಜೆನ್ಸೀಸ್).