"ಸಲ್ಮಾನ್ ಖಾನ್ ಮೇಲೆ ನಮಗಾಗಲಿ ಅಥವಾ ನಮ್ಮ ಸಮಾಜಕ್ಕಾಗಲಿ ಯಾವುದೇ ವೈಯಕ್ತಿಕ ದ್ವೇಷವಿಲ್ಲ. ಆದರೆ ಕೃಷ್ಣಮೃಗ ಹತ್ಯೆಯ ವಿಚಾರದಲ್ಲಿ ನಮ್ಮ ಇಡೀ ಸಮುದಾಯದಲ್ಲಿ ಆಳವಾದ ನೋವು ಮತ್ತು ಆಕ್ರೋಶವಿದೆ. ಸಲ್ಮಾನ್ ಖಾನ್ ಆರಂಭದಲ್ಲೇ ನಮ್ಮ ಸಮಾಜದ ದೇವಾಲಯಕ್ಕೆ ಬಂದು ಕ್ಷಮೆ ಕೇಳಿದ್ದರೆ, ಈ ಕಿಡಿ ಇಷ್ಟು ದೊಡ್ಡದಾಗಿ ಬೆಳೆಯುತ್ತಲೇ ಇರಲಿಲ್ಲ," ಎಂದು ರಮೇಶ್ ಬಿಷ್ಣೋಯ್ ಬೇಸರ ವ್ಯಕ್ತಪಡಿಸಿದ್ದಾರೆ.
"ಕ್ಷಮೆ ಕೇಳಿದರೆ ಸಾಕು, ಸಂಪೂರ್ಣ ಸುರಕ್ಷತೆ ನನ್ನ ಹೊಣೆ!"
ನಟ ಸಲ್ಮಾನ್ ಖಾನ್ ಬಿಷ್ಣೋಯ್ ದೇವಾಲಯಕ್ಕೆ ಹೋದರೆ ಅವರ ಪ್ರಾಣಕ್ಕೆ ಅಪಾಯವಿದೆ ಎಂದು ಅವರ ತಂದೆ, ಹಿರಿಯ ಚಿತ್ರಕಥೆಗಾರ ಸಲೀಂ ಖಾನ್ ಇತ್ತೀಚೆಗೆ ಆತಂಕ ವ್ಯಕ್ತಪಡಿಸಿದ್ದರು. ಈ ಕುರಿತು ಮಾತನಾಡಿದ ರಮೇಶ್ ಬಿಷ್ಣೋಯ್, ಸಲೀಂ ಖಾನ್ ಅವರ ಭಯವನ್ನು ಸಂಪೂರ್ಣವಾಗಿ ತಳ್ಳಿಹಾಕಿದ್ದಾರೆ.
"ಸಲ್ಮಾನ್ ಖಾನ್ ರಾಜಸ್ಥಾನದ ಬಿಕಾನೇರ್‌ನಲ್ಲಿರುವ ನಮ್ಮ ಸಮಾಜದ ಪವಿತ್ರ 'ಮುಕ್ತಿ ಧಾಮ್ ಮುಕಾಮ್' ದೇವಾಲಯಕ್ಕೆ ಧೈರ್ಯವಾಗಿ ಬರಲಿ. ಅಲ್ಲಿ ಬಂದು ಗುರುಗಳ ಮುಂದೆ ನಮನ ಸಲ್ಲಿಸಿ ಕ್ಷಮೆಯಾಚಿಸಿದರೆ ಸಾಕು. ಅವರ ಸುರಕ್ಷತೆಯ ಸಂಪೂರ್ಣ ಜವಾಬ್ದಾರಿಯನ್ನು ನಾನೇ ವೈಯಕ್ತಿಕವಾಗಿ ವಹಿಸಿಕೊಳ್ಳುತ್ತೇನೆ. ಈ ವಿವಾದ ಈಗಾಗಲೇ ದಶಕಗಳ ಕಾಲ ಎಳೆದಾಡಿದೆ. ಕ್ಷಮೆಯೊಂದೇ ಇದಕ್ಕೆ ಶಾಶ್ವತ ಪರಿಹಾರ, ಈ ಪ್ರಕರಣ ಇಲ್ಲಿಗೇ ಅಂತ್ಯವಾಗಬೇಕು," ಎಂದು ಅವರು ಸಲ್ಮಾನ್‌ಗೆ ಓಪನ್ ಆಫರ್ ನೀಡಿದ್ದಾರೆ.
