ಅಂಕಣ | ಬಿಹಾರ ಚುನಾವಣೆ ಫಲಿತಾಂಶ ಸಾರಿದ ಸಪ್ತ ಪಾಠಗಳು!

(ಲೇಖಕರು ಬಿಜೆಪಿಯ ಹಿರಿಯ ವಕ್ತಾರರು)

ಇತ್ತೀಚಿನ ಬಿಹಾರ ವಿಧಾನಸಭಾ ಚುನಾವಣೆಯ ಫಲಿತಾಂಶ ರಾಷ್ಟ್ರ ರಾಜಕಾರಣಕ್ಕೆ ಹೊಸ ತಿರುವು ನೀಡಿದೆ. ಈ ಫಲಿತಾಂಶವನ್ನು ಹತ್ತು ಹಲವು ಕೋನಗಳಲ್ಲಿ ವಿಶ್ಲೇಷಣೆ ಮಾಡಲಾಗುತ್ತಿದೆ. ಅವುಗಳ ಪೈಕಿ ರಾಜಕೀಯವಾಗಿ, ಸಾಮಾಜಿಕವಾಗಿ, ಸಾಂವಿಧಾನಿಕವಾಗಿ ನಾವು ಗಮನಿಸಲೇಬೇಕಾದ ಕೆಲ ಪ್ರಮುಖಾಂಶಗಳ ಮೇಲೆ ಗಮನ ಹರಿಸೋಣ.

ಮೊದಲನೆಯದು, ಆಡಳಿತ ವಿರೋಧಿ ಅಲೆ. ಆಡಳಿತ ವಿರೋಧಿ ಅಲೆಯ ಪ್ರತಿಕೂಲ ಪರಿಣಾಮ ಕೇವಲ ಆಡಳಿತಾರೂಢ ಸರಕಾರ ಮತ್ತು ಅದರ ನಾಯಕತ್ವವನ್ನು ಅಲುಗಾಡಿಸುತ್ತದೆ ಎಂಬುದು ಇದುವರೆಗಿನ ಒಪ್ಪಿತ ಗ್ರಹಿಕೆ. ಆದರೆ ಅದು ಹಾಲಿ ಸರಕಾರಕ್ಕೆ ಮಾತ್ರ ಸಂಬಂಧಿಸಿರುವುದಿಲ್ಲ. ದುರಾಡಳಿತ ಎಸಗಿದ ಹಳೆಯ ಸರಕಾರ, ಅದು ಮುನ್ನಡೆಸಿದ ಪಕ್ಷವನ್ನೂ, ನಾಯಕತ್ವವನ್ನೂ ಬಿಡುವುದಿಲ್ಲ ಎಂಬ ಹೊಸ ತರ್ಕವನ್ನು ಹುಟ್ಟು ಹಾಕಿದೆ. ಬಿಹಾರದಲ್ಲಿ ಲಾಲುಪ್ರಸಾದ್​ ಯಾದವ್​ ಅವರ ಕೆಟ್ಟ ಆಡಳಿತ ಕೊನೆಗೊಂಡು 28 ವರ್ಷಗಳಾಗಿವೆ. ಮೇವು ಹಗರಣ ಇತ್ಯಾದಿ ಭ್ರಷ್ಟಾಚಾರ ಪ್ರಕರಣಗಳಲ್ಲಿ ಸಿಕ್ಕಿಬಿದ್ದು ಅಧಿಕಾರ ಕಳೆದುಕೊಂಡ ನಂತರವೂ ಅಧಿಕಾರ ಲಾಲಸೆ ಬಿಡದೆ ತನ್ನ ಪತ್ನಿ ರಾಬ್ಡಿದೇವಿಯವರನ್ನೇ ಮುಖ್ಯಮಂತ್ರಿಯಾಗಿ ನೇಮಿಸಿದ್ದರು. ಬಳಿಕವೂ ಲಾಲೂ ದುರಾಡಳಿತ ನಿಲ್ಲಲಿಲ್ಲ. ಪ್ರಭುತ್ವದ ಬಲದಲ್ಲಿ ಮಾಡಿದ ಗಾಯದ ನೆನಪುಗಳು ಅಷ್ಟು ಸುಲಭವಾಗಿ ಮಾಸುವುದಿಲ್ಲ. ಅದೇ ಕಾರಣಕ್ಕೆ ಇಡೀ ಬಿಹಾರ ಚುನಾವಣೆ ಪ್ರಚಾರದಲ್ಲಿ ಒಂದೇ ಒಂದು ಕಡೆ ಲಾಲೂ ಫೋಟೋ ಇರಲಿಲ್ಲ. ಲಾಲೂ ಹೆಸರಿನಲ್ಲಿ ರ್ಯಾಲಿಗಳು ನಡೆಯಲಿಲ್ಲ. ಸಂದೇಶ ಇಷ್ಟೇ, ಆರ್​ಜೆಡಿ ಮತ್ತು ಮಹಾಟಬಂಧನ ಒಕ್ಕೂಟಕ್ಕೆ ಲಾಲು ಆಡಳಿತವೇ ದಶಕಗಳ ಬಳಿಕವೂ ವಿರೋಧಿ ಅಲೆಯಾಗಿ ಕಾಡಿತು.

ರಾಹುಲ್​, ಕಾಂಗ್ರೆಸ್​ ಭವಿಷ್ಯ ಮಂಕು: ರಾಷ್ಟ್ರ ರಾಜಕಾರಣದಲ್ಲಿ ನರೇಂದ್ರ ಮೋದಿ ಅವರ ಸತತ ಹತ್ತು ವರ್ಷಗಳ ನಾಗಾಲೋಟಕ್ಕೆ ಸಿಲುಕಿ ಕಾಂಗ್ರೆಸ್​ ಮತ್ತು ಅದರ ಮಿತ್ರಪಗಳೆಂಬ ಸ್ವಘೋಷಿತ ಸೆಕ್ಯುಲರ್​ ಶಕ್ತಿಗಳು ಅಕ್ಷರಶಹಃ ಕೊಚ್ಚಿ ಹೋಗಿದ್ದವು. ಆದರೂ ಇಂಡೀ ಒಕ್ಕೂಟ ಅಥವಾ ಮಹಾಟಬಂಧನ ಎಂಬ ಮಗದೊಂದು ಯತ್ನದ ಮೂಲಕ 2024ರ ಲೋಕಸಭಾ ಚುನಾವಣೆಯಲ್ಲಿ ಮೋದಿ ನೇತೃತ್ವದ ಎನ್​ಡಿಎ ಒಕ್ಕೂಟವನ್ನು ಎದುರಿಸಲಾಯಿತು. ಚುನಾವಣೆಯಲ್ಲಿ ಈ ಒಕ್ಕೂಟ ಎನ್​ಡಿಎ ಒಕ್ಕೂಟದ ಶೇ. 3ರಷ್ಟು ಮತ ಕಸಿಯುವಲ್ಲೂ ಯಶಸ್ವಿಯಾಯಿತು. ಪರಿಣಾಮ ಬಿಜೆಪಿ 63 ಸೀಟುಗಳನ್ನು ಕಳೆದುಕೊಂಡು 303ರಿಂದ 240ಕ್ಕೆ ಕುಸಿಯಿತು. ಇಷ್ಟಾದ ಬಳಿಕವೂ ಕಾಂಗ್ರೆಸ್​ ಅಥವಾ ಸೆಕ್ಯುಲರ್​ ಶಕ್ತಿಗಳಿಗೆ ಮೋದಿಯಿಂದ ಅಧಿಕಾರ ಕಳೆದುಕೊಳ್ಳುವುದು ಸಾಧ್ಯವಾಗಲಿಲ್ಲ. ಹತ್ತು ವರ್ಷಗಳ ನಂತರ ಲೋಕಸಭೆಯಲ್ಲಿ ಅಧಿಕೃತ ಪ್ರತಿಪಕ್ಷ ಸ್ಥಾನವನ್ನು ಪಡೆದವು. ಹೀಗೆ ಗಳಿಸಿದ ಅಲ್ಪ ಯಶಸ್ಸಿನ ಅಮಲೇರಿಸಿಕೊಂಡ ರಾಹುಲ್​ 2024ರ ಬಳಿಕ ಹುಚ್ಚಾಪಟ್ಟೆ ವರ್ತನೆ ಶುರು ಮಾಡಿಕೊಂಡರು. ಅದರ ಮೊದಲ ನಕಾರಾತ್ಮಕ ಪರಿಣಾಮವನ್ನು 2024ರ ಮಹಾರಾಷ್ಟ್ರ ವಿಧಾನಸಭೆ ಚುನಾವಣೆಯಲ್ಲಿ ಉಂಡರು.

288 ಸದಸ್ಯರ ಮಹಾರಾಷ್ಟ್ರ ವಿಧಾನಸಭೆಯಲ್ಲಿ ಕಾಂಗ್ರೆಸ್ಸಿಗೆ ಸಿಕ್ಕಿದ್ದು ಕೇವಲ 16 ಸ್ಥಾನ ಮಾತ್ರ. ಕಾಂಗ್ರೆಸ್​ ಸಹವಾಸ ಮಾಡಿದ ಕಾರಣಕ್ಕೆ ಉದ್ಧವ್​ ಠಾಕ್ರೆ ನೇತೃತ್ವದ ಶಿವಸೇನಾ ಬಣವು ಐತಿಹಾಸಿಕ ಕುಸಿತ ಕಂಡು ಕೇವಲ 20 ಸ್ಥಾನಗಳಿಗೆ ತೃಪ್ತಿಪಡುವಂತಾಯಿತು. ಮಹಾರಾಷ್ಟ್ರ ವಿಧಾನಸಭಾ ಚುನಾವಣೆಯ ಫಲಿತಾಂಶವನ್ನು ಗಮನಿಸಿದರೆ ಕಾಂಗ್ರೆಸ್​ ಮತಗಳಿಕೆ ಪ್ರಮಾಣ ಶೇ. 12.5ರಿಂದ ಶೇ. 9ಕ್ಕೆ ಕುಸಿತ ಕಂಡಿತು. ಆ ಪಕ್ಷದ ಸ್ಟ್ರೆಕ್​ ರೇಟ್​ ಕೇವಲ ಶೇ. 15 ಆಗಿತ್ತು. ಮಹಾರಾಷ್ಟ್ರ ವಿಧಾನಸಭಾ ಚುನಾವಣೆಯ ಒಟ್ಟು ಪರಿಣಾಮ ಮಹಾಟಬಂಧನ ಅಥವಾ ಸೆಕ್ಯುಲರ್​ ಮಿತ್ರಪಗಳು ತಾವು ಕಾಂಗ್ರೆಸ್​ ಸಹವಾಸ ಮಾಡಬೇಕೋ ಬೇಡವೋ ಎಂಬುದರ ಕುರಿತು ಮರು ಆಲೋಚನೆ ಮಾಡುವಂತೆ ಮಾಡಿತು!

ಬಿಹಾರ ಮಹಾಘಾತ: ಬಿಹಾರದಲ್ಲಿ ಆರ್​ಜೆಡಿ ಪದ ಅಸ್ತಿತ್ವ ಮತ್ತು ತೇಜಸ್ವಿ ಯಾದವ್​ ನೇತೃತ್ವದ ಕಾರಣಕ್ಕೆ ಕಾಂಗ್ರೆಸ್​ ಚುನಾವಣಾ ಸಾಧನೆ ಕುರಿತು ಒಂದಷ್ಟು ನಿರೀಕ್ಷೆ ಹುಟ್ಟಿದ್ದು ಸುಳ್ಳಲ್ಲ. ಕಾಂಗ್ರೆಸ್​, ಮಹಾಟಬಂಧನ ಮತ್ತು ಮೋದಿ, ನಿತೀಶ್​ ಜುಗಲ್​ಬಂದಿ ನೇತೃತ್ವದ ಕಾರಣಕ್ಕೆ ಬಿಹಾರ ಚುನಾವಣೆ ಒಂದರ್ಥದಲ್ಲಿ ಲೋಕಸಭೆ ಚುನಾವಣೆಯಷ್ಟೇ ಮಹತ್ವ ಪಡೆಯಿತು ನಿಜ. ಆದರೆ ಆದದ್ದೇನು? ಕಾಂಗ್ರೆಸ್​ ಈ ಹಿಂದೆ ಗೆದ್ದ 19 ಸ್ಥಾನಗಳನ್ನೂ ಉಳಿಸಿಕೊಳ್ಳಲಾಗದೆ 6 ಸ್ಥಾನಗಳಿಗೆ ತೃಪ್ತಿಪಡಬೇಕಾಯಿತು. ಮಹಾರಾಷ್ಟ್ರ ಚುನಾವಣೆಯಲ್ಲಿ ಕಾಂಗ್ರೆಸ್​ ಸ್ಟ್ರೆಕ್​ ರೇಟ್​ ಶೇ. 15. ಆದರೆ ಬಿಹಾರದಲ್ಲಿ ಅದು ಶೇ. 10ಕ್ಕೆ ಕುಸಿಯಿತು.

ಸಂವಿಧಾನವೂ ಇವರಿಗೆ ಒಂದು ಅಸ್ತ್ರ: 2024ರ ಲೋಕಸಭಾ ಚುನಾವಣೆ ಪೂರ್ವದಲ್ಲಿ ಬಿಜೆಪಿ ಅಥವಾ ನರೇಂದ್ರ ಮೋದಿ ನೇತೃತ್ವಕ್ಕೆ ರಾಹುಲ್​ ಗಾಂಧಿ ಸಾಂವಿಧಾನಿಕ ಬದ್ಧತೆ ಪ್ರಶ್ನೆ ಎತ್ತಿದ್ದರು. ಹೋದಲ್ಲಿ ಬಂದಲ್ಲಿ ಬಿಜೆಪಿಯಿಂದ ಸಂವಿಧಾನದ ಮೇಲೆ ಹಲ್ಲೆ ಎಂಬ ಗುಲ್ಲೆಬ್ಬಿಸಿ ದಲಿತ, ಹಿಂದುಳಿದ ಮತ್ತು ಅಲ್ಪಸಂಖ್ಯಾತರಲ್ಲಿ ಸುಳ್ಳು ಭ್ರಮಾಲೋಕವೊಂದನ್ನು ಸೃಷ್ಟಿಸುವಲ್ಲಿ ಅಷ್ಟೋ ಇಷ್ಟೋ ಯಶಸ್ಸನ್ನು ಕಂಡಿದ್ದರು. ಆದರೆ ಲೋಕಸಭಾ ಚುನಾವಣೆ ನಡೆದು ಕೇವಲ ಆರು ತಿಂಗಳ ಒಳಗೆ ನಡೆದ ಮಹಾರಾಷ್ಟ್ರ ವಿಧಾನಸಭಾ ಚುನಾವಣೆಯಲ್ಲಿ ಬಿಜೆಪಿ ಸಂವಿಧಾನ ವಿರೋಧಿ, ದಲಿತ ವಿರೋಧಿ, ಮುಸ್ಲಿಂ ವಿರೋಧಿ ಎಂಬ ರಾಹುಲ್​ ಕಟ್ಟಿದ ಸುಳ್ಳಿನ ಗೋಪುರ ಸಂಪೂರ್ಣ ಕಳಚಿ ಬಿದ್ದಿತ್ತು.

ಸಂವಿಧಾನದಿಂದ ಸಾಂವಿಧಾನಿಕ ಸಂಸ್ಥೆ!: ಕಳೆದ ಲೋಕಸಭಾ ಚುನಾವಣೆಯಲ್ಲಿ ರಾಹುಲ್​ ಸಂವಿಧಾನದ ಪ್ರತಿಯನ್ನು ಅಸ್ತ್ರವಾಗಿಸಿಕೊಳ್ಳುವ ಯತ್ನ ಮಾಡಿದರೆ ಬಿಹಾರ ಚುನಾವಣೆಯಲ್ಲಿ ಸಾಂವಿಧಾನಿಕ ಸಂಸ್ಥೆ ಚುನಾವಣಾ ಆಯೋಗವನ್ನು ಗುರಿಯಾಗಿಸಿಕೊಂಡರು. ಬಿಹಾರ ಚುನಾವಣೆ ಸಂದರ್ಭದಲ್ಲಿ ಚುನಾವಣಾ ಆಯೋಗವನ್ನು ರಾಹುಲ್​ ಅರಶಹಃ ಖಳನಾಯಕನಂತೆ ಬಿಂಬಿಸಿದರು. ಪರಿಣಾಮ ಏನಾಯಿತು? ಬಿಹಾರ ಚುನಾವಣೆಯಲ್ಲಿ ಆಯೋಗದ ವಿರುದ್ಧ ರಾಹುಲ್​ ಹೆಣೆದ ಈ ಗೊಬೆಲ್ಸ್​ ತಂತ್ರ ಸಂಪೂರ್ಣವಾಗಿ ಬೆತ್ತಲಾಯಿತು.

ಮಹಾಟಬಂಧನದ ಭವಿಷ್ಯ ಮಂಕಾಗಿದೆ. ರಾಹುಲ್​ ಕಾಂಗ್ರೆಸ್​ ನೇತೃತ್ವ ವಹಿಸಿಕೊಂಡ ಬಳಿಕ ಲೇಟೆಸ್ಟ್​ ಬಿಹಾರದ ಸೋಲನ್ನೂ ಲೆಕ್ಕ ಹಾಕಿದರೆ ಕಾಂಗ್ರೆಸ್​ ಬರೋಬ್ಬರಿ 95 ಬಾರಿ ಸೋತಿದೆ. 2026ರಲ್ಲಿ ಅಸ್ಸಾಂ, ಕೇರಳ, ತಮಿಳುನಾಡು, ಪಶ್ಚಿಮ ಬಂಗಾಳ, ಉತ್ತರಪ್ರದೇಶ ಚುನಾವಣೆಗಳಿವೆ. ಬಿಹಾರದಲ್ಲಿ ಆರ್​ಜೆಡಿಗೆ ಕಾಂಗ್ರೆಸ್​ ಪಕ್ಷವೇ ಹೊರೆ ಆಯಿತು ಎಂಬುದು ಸ್ಪಷ್ಟ. ಇದೇ ಭಾವನೆ ಉತ್ತರಪ್ರದೇಶದ ಅಖಿಲೇಶ್​, ತಮಿಳುನಾಡಿನ ಸ್ಟಾಲಿನ್​, ಬಂಗಾಳದ ಮಮತಾ ಅವರಿಗೆ ಅನಿಸಿದರೆ, ಈ ಎಲ್ಲರೂ ಕಾಂಗ್ರೆಸ್​ ಜತೆ ಸ್ನೇಹ ಮಾಡುವ ಧೈರ್ಯವನ್ನು ಹೇಗೆ ತಾನೆ ಮಾಡಿಯಾರು? ಹಾಗಾದರೆ ಮಹಾಟಬಂಧನದ ಭವಿಷ್ಯ? ಪ್ರಶ್ನಾರ್ಥಕ?

ಜಾತಿ ಸಮೀಕರಣ ಬುಡಮೇಲು: ಬಿಹಾರದಲ್ಲಿ 30 ವರ್ಷಗಳ ಜಾತಿ ರಾಜಕಾರಣ ಹೇಗೆ ಧ್ವಂಸ ಆಯಿತು ಎಂಬುದು ಹೆಚ್ಚು ಆಸಕ್ತಿಕರ. ಮೂರು ದಶಕದಿಂದಲೂ ಬಿಹಾರದ ರಾಜಕಾರಣ ಒಂದೇ ಸೂತ್ರದ ಮೇಲೆ ಓಡಿತು& "ಜಾತಿ ಮೊದಲು, ಅಭಿವೃದ್ಧಿ ನಂತರ'. ಬಹುತೇಕ ಬಾರಿ ಅಭಿವೃದ್ಧಿ ಅನ್ನೋ ಮಾತೇ ಇಲ್ಲ! ಪಕ್ಷಗಳಿಗೆ ದೃಷ್ಟಿ ಬೇಕಾಗಿರಲಿಲ್ಲ, ಕೆಲಸ ಬೇಕಾಗಿರಲಿಲ್ಲ, ಮತದಾರರ ಹೆಸರಿನ ಕೊನೆಯ ಪದ ಸಾಕಾಗಿತ್ತು. ಯಾದವ್​ ಮತ? ಕುರ್ಮಿ ಮತ? ಕೋರಿ ಮತ? ಪಾಸ್ವಾನ್​ ಮತ?ಮುಸ್ಲಿಂ ಮತ? ಚುನಾವಣೆಯುದ್ದಕ್ಕೂ ಜಾತಿ ಗಣಿತದ್ದೇ ಸದ್ದು! ಆದರೆ, ಮೋದಿ ಮತ್ತು ಅಮಿತ್​ ಷಾ ಚುನಾವಣೆಯುದ್ದಕ್ಕೂ ಕೇಳಿದ್ದು, "ಯಾವ ಸ್ಕೀಮ್​ ನಿಮ್ಮ ಮನೆಗೆ ತಲುಪಿದೆ?' ಎಂಬ ಪ್ರಶ್ನೆಯನ್ನು ಮಾತ್ರ.

ಉಜ್ವಲಾ ಗ್ಯಾಸ್​, ಕಿಸಾನ್​ ಕಾಸು, ಆವಾಸ್​ ಮನೆ, ಉಚಿತ ಅಕ್ಕಿ, ವಿದ್ಯುತ್​, ಆಯುಷ್ಮಾನ್​ ಕಾರ್ಡು, ಶೌಚಾಲಯ, ರಸ್ತೆಗಳು, ಇವು ನಿಮ್ಮ ಮನೆಗೆ ಬರೋವಾಗ ಜಾತಿ ಕೇಳಿದ್ವಾ? ಇಲ್ಲ ತಾನೇ? ಹಾಗಾದರೆ ಬಿಜೆಪಿಗೆ ವೋಟು ಹಾಕುವಾಗ ಜಾತಿ ಯಾಕೆ ನೋಡ್ತೀರಿ ಎಂದರು. ಅಷ್ಟೇ, ಬಿಹಾರಿಗಳಿಗೆ ಮನವರಿಕೆ ಆಯಿತು. ಮಾತ್ರವಲ್ಲ, 75 ವರ್ಷ ನಾವು ಹೇಗೆ ಮೋಸ ಹೋಗಿದ್ದೇವೆ ಎಂಬುದೂ ಗೊತ್ತಾಯಿತು.

ಆರ್​ಜೆಡಿ, ಕಾಂಗ್ರೆಸ್​ ಮುಸ್ಲಿಂ&ಯಾದವ ಜೊತೆಗೂಡಿಸುವ ಕುತಂತ್ರ ಮಾಡಿದರೆ, ಬಿಜೆಪಿ ಮೌನವಾಗಿ ದಶಕಗಳಿಂದಲೂ ಆಳುವ ಮಂದಿ ಕಣ್ಣಾಡಿಸದ, ಸೌಲಭ್ಯವಂಚಿತ, ದಮನಿತ ಸಮುದಾಯಗಳಾದ ನಿಶಾದ್​, ತೆಲಿ, ಚೌರಾಸಿಯಾ, ಮಾಳ್ಳಾ, ಕುಂಭಾರ, ನೊನಿಯಾ, ಪಾರ್ಸಿ, ಇಬಿಸಿಗಳು, ಮಹಾದಲಿತರು ಸೇರಿದಂತೆ ಎಲ್ಲರ ಪ್ರೀತಿ, ವಿಶ್ವಾಸ ಗಳಿಸಿತು. ಪರಿಣಾಮ, ತಲೆತಲಾಂತರದಿಂದ ಮೆರೆಯುತ್ತಿದ್ದ ಜಾತಿದರ್ಪದ ಕೋಟೆ ಕುಸಿದು ನೆಲಸಮ ಆಯಿತು. ಇದು ಕೇವಲ ಚುನಾವಣೆ ಗೆಲುವಲ್ಲ, ಜಾತಿ ಆಧಾರಿತ ರಾಜಕೀಯ ಕುಸಂಸತಿಯ ನಾಶ!

ಬಿಹಾರ ಚುನಾವಣೆ ಪೂರ್ವದಲ್ಲಿ ಚುನಾವಣಾ ಆಯೋಗ ಕೈಗೊಂಡ ಸಮಗ್ರ ಮತಪಟ್ಟಿ ಪರಿಷ್ಕರಣೆ (SIR-Special Intensive Revision) ವಿಚಾರವೇ ದೊಡ್ಡ ವಿವಾದವಾಯಿತು. ಅಕ್ರಮ ಮತದಾರರನ್ನು ಮತಪಟ್ಟಿಯಿಂದ ತೆಗೆದುಹಾಕುವುದು, ಸಕ್ರಮ ಮತದಾರರನ್ನು ಹೊಸದಾಗಿ ಪಟ್ಟಿಗೆ ಸೇರ್ಪಡೆ ಮಾಡುವುದನ್ನೇ ಕಾಂಗ್ರೆಸ್​, ಮಿತ್ರ ಪಕ್ಷಗಳು ವೋಟ್​ ಚೋರಿ ಎಂದವು. ಮತ ಹಾಕಲು ಗುರುತು ಚೀಟಿಯಾಗಿ ಆಧಾರ್​ ಕಾರ್ಡನ್ನು ಪರಿಗಣಿಸಿದ್ದನ್ನು ತಪ್ಪು ಎಂದವು. ಆದರೆ ಆಯೋಗ ಮಣಿಯಲಿಲ್ಲ. ಇರುವ ವಿಷಯವನ್ನು ನ್ಯಾಯಾಲಯಕ್ಕೂ ಮನವರಿಕೆ ಮಾಡಿಕೊಟ್ಟು, ಎಲ್ಲ ಅಡೆತಡೆಗಳನ್ನು ದಾಟಿ 68 ಲಕ್ಷ ಅಕ್ರಮ ಮತದಾರರನ್ನು ಚುನಾವಣಾ ಆಯೋಗ ಮತದಾರ ಪಟ್ಟಿಯಿಂದ ಕೈಬಿಟ್ಟಿತು. 24 ಲಕ್ಷ ಹೊಸ ಮತದಾರರು ಪಟ್ಟಿಗೆ ಸೇರ್ಪಡೆ ಆದರು. ಅಲ್ಲಿಗೆ ಸರಾಸರಿ ಕಡಿತ ಆದದ್ದು 44 ಲಕ್ಷ ಮತದಾರರು ಮಾತ್ರ!

2024ರ ಲೋಕಸಭೆ ಮತ್ತು 2025ರ ಬಿಹಾರ ವಿಧಾನಸಭೆ ಚುನಾವಣೆ ಫಲಿತಾಂಶಕ್ಕೆ ಹೋಲಿಸಿದರೆ ಎನ್​ಡಿಎ (ಶೇ. 46.6) ಒಕ್ಕೂಟಕ್ಕೆ ಶೇ. 1.4, ಮಹಾಘಟಬಂಧನಕ್ಕೆ (ಶೇ. 33) ಶೇ. 2.2 ಮತಗಳಿಕೆ ಕಡಿಮೆ ಆಯಿತು. ಈಗ ಅರ್ಥ ಆಗುವುದು ಮೋದಿ, ನಿತೀಶ್​ ಮಾಡಿದ್ದು ವೋಟ್​ ಚೋರಿ ಅಲ್ಲ ಬಿಹಾರಿಗರ ಹಾರ್ಟ್​ ಚೋರಿ ಎಂದು! ಬಿಹಾರ ಚುನಾವಣೆ ಟರ್ನಿಂಗ್​ ಪಾಯಿಂಟ್​ ಏನು ಗೊತ್ತಾ? ಶೇ. 61.8ರಷ್ಟು ಪುರುಷ ಮತದಾರರು ಮತಗಟ್ಟೆಗೆ ಬಂದರೆ, ಶೇ. 71.6ರಷ್ಟು ಮಹಿಳೆ ಮತ್ತು ಯುವ ಮತದಾರರು ಮತಗಟ್ಟೆಗೆ ಬಂದು ಮತ ಚಲಾಯಿಸಿದರು. ಬಿಹಾರ ಬದಲಾವಣೆಗೆ ಕಿವಿ ಗೊಟ್ಟಿದೆಯೇ ಹೊರತು ಸುಳ್ಳಿನ ಸರಮಾಲೆಗೆ ಅಲ್ಲ ಎಂಬುದಕ್ಕೆ ಬೇರೆ ಪುರಾವೆ ಬೇಕೇ?

ಚುನಾವಣಾ ಗುರುತು ಚೀಟಿ ತಪಾಸಣೆ ಬಿಗಿ ಮಾಡಿದ್ದನ್ನೂ ಕಾಂಗ್ರೆಸ್​ ವಿವಾದವನ್ನಾಗಿಸಿತು. ಅದು ಮುಸ್ಲಿಮರನ್ನೇ ಗುರಿಯಾಗಿಸಿಕೊಂಡು ಮಾಡಿದ್ದು ಎಂಬ ಗುಲ್ಲೆಬ್ಬಿಸಲಾಯಿತು. ಇಷ್ಟಾಗಿಯೂ ಮುಸ್ಲಿಂ ಬಾಹುಳ್ಯದ 26 ಕ್ಷೇತ್ರಗಳಲ್ಲಿ ಬಿಜೆಪಿ ಗೆದ್ದಿತು. ಅಲ್ಲಿಗೆ ಮುಸ್ಲಿಂ ಮತ ಧ್ರುವಿಕರಣ ಯತ್ನವೂ ವಿಫಲ ಆಯಿತು ಅಂತಲ್ಲವೇ? ಇದನ್ನೇ ಮುಂದಿನ ರಾಷ್ಟ್ರ ರಾಜಕಾರಣದ ದಿಕ್ಸೂಚಿ ಎಂದು ಹೇಳಿದ್ದು!