Cockroach: ಒಂದು ಜಿರಳೆ 400ಕ್ಕೂ ಹೆಚ್ಚು ಮಕ್ಕಳಿಗೆ ಜನ್ಮ ಕೊಡುತ್ತದೆಯೇ? ಇಲ್ಲಿದೆ ಅಚ್ಚರಿ ಸತ್ಯ!

ಇದರ ಬೆನ್ನಲ್ಲೇ ಜನರಲ್ಲಿ ಜಿರಳೆಗಳ( Cockroach ) ಬಗ್ಗೆ ಕುತೂಹಲ ಹೆಚ್ಚಾಗಿದೆ. ಸಾಮಾನ್ಯವಾಗಿ ಅಡುಗೆಮನೆ, ಹಳೆಯ ಕಟ್ಟಡಗಳು ಅಥವಾ ಕತ್ತಲೆ ಜಾಗಗಳಲ್ಲಿ ಕಾಣಿಸುವ ಜಿರಳೆಗಳನ್ನು ಹಲವರು ಅಸಹ್ಯದಿಂದ ನೋಡುವರು. ಆದರೆ ವಿಜ್ಞಾನಿಗಳ ಪ್ರಕಾರ, ಜಿರಳೆಗಳು ಭೂಮಿಯ ಅತ್ಯಂತ ಹಳೆಯ ಮತ್ತು ಬಲಿಷ್ಠ ಜೀವಿಗಳಲ್ಲಿ ಒಂದಾಗಿದೆ.

ಜಿರಳೆಗಳನ್ನು ಸಂಪೂರ್ಣವಾಗಿ ಅಮರ ಜೀವಿ ಎಂದು ಹೇಳಲು ಸಾಧ್ಯವಿಲ್ಲ. ಆದರೆ ಅವುಗಳ ಬದುಕುಳಿಯುವ ಸಾಮರ್ಥ್ಯವೇ ಈ ಹೆಸರು ಬರಲು ಕಾರಣವಾಗಿದೆ. ವಿಜ್ಞಾನಿಗಳ ಪ್ರಕಾರ, ಜಿರಳೆಗಳು ಕೋಟ್ಯಂತರ ವರ್ಷಗಳಿಂದ ಭೂಮಿಯ ಮೇಲೆ ಬದುಕುತ್ತಿವೆ. ಡೈನೋಸರ್‌ಗಳ ಕಾಲಕ್ಕೂ ಮುಂಚೆ ಇವು ಇದ್ದವು ಎಂಬ ಅಂದಾಜಿದೆ.ಪರಿಸರ ಬದಲಾವಣೆ, ಹವಾಮಾನ ವ್ಯತ್ಯಾಸ, ಆಹಾರದ ಕೊರತೆ – ಇಂತಹ ಅನೇಕ ಸಂಕಷ್ಟಗಳ ನಡುವೆಯೂ ಜಿರಳೆಗಳು ಬದುಕಿ ಉಳಿದಿವೆ. ಇದೇ ಕಾರಣಕ್ಕೆ ಅವುಗಳನ್ನು ಅತ್ಯಂತ ತಾಳ್ಮೆಯ ಜೀವಿಗಳೆಂದು ಪರಿಗಣಿಸಲಾಗುತ್ತದೆ.

ಜಿರಳೆಗಳ ಬಗ್ಗೆ ಜನರನ್ನು ಹೆಚ್ಚು ಅಚ್ಚರಿಗೊಳಿಸುವ ವಿಷಯವೆಂದರೆ, ಅವು ಕೆಲವು ದಿನಗಳ ಕಾಲ ತಲೆಯಿಲ್ಲದೇ ಕೂಡ ಬದುಕಬಲ್ಲವು ಎಂಬುದು. ಮಾನವರ ದೇಹ ವ್ಯವಸ್ಥೆಗಿಂತ ಜಿರಳೆಗಳ ದೇಹ ರಚನೆ ಭಿನ್ನವಾಗಿದೆ.ಅವು ಉಸಿರಾಟಕ್ಕಾಗಿ ಮೂಗಿನ ಮೇಲೆ ಅವಲಂಬಿತವಾಗಿರುವುದಿಲ್ಲ. ದೇಹದ ಬದಿಗಳಲ್ಲಿರುವ ಸಣ್ಣ ರಂಧ್ರಗಳ ಮೂಲಕ ಉಸಿರಾಡುತ್ತವೆ. ಆದ್ದರಿಂದ ತಲೆ ಕಳೆದುಕೊಂಡರೂ ಕೆಲವು ದಿನಗಳವರೆಗೆ ಜೀವಂತವಾಗಿರಲು ಸಾಧ್ಯವಾಗುತ್ತದೆ. ಆದರೆ ನೀರು ಮತ್ತು ಆಹಾರ ಸಿಗದೇ ಕೊನೆಗೆ ಅವು ಸಾಯುತ್ತವೆ.

ಜಿರಳೆಗಳ ವೇಗವಾದ ಸಂತಾನೋತ್ಪತ್ತಿಯೇ ಅವುಗಳನ್ನು ನಿಯಂತ್ರಿಸಲು ಕಷ್ಟವಾಗುವ ಪ್ರಮುಖ ಕಾರಣ. ವಿಜ್ಞಾನಿಗಳ ಪ್ರಕಾರ, ಒಂದು ಹೆಣ್ಣು ಜಿರಳೆ ತನ್ನ ಜೀವನದಲ್ಲಿ ಸುಮಾರು 300ರಿಂದ 400ಕ್ಕೂ ಹೆಚ್ಚು ಮಗುಗಳಿಗೆ ಜನ್ಮ ನೀಡಬಹುದು. ಒಂದು ಮೊಟ್ಟೆ ಪೊಟ್ಟಣದಲ್ಲಿ ಹಲವು ಕಿರಿಯ ಜಿರಳೆಗಳು ಬೆಳೆಯುತ್ತವೆ. ಪರಿಸರ ಅನುಕೂಲಕರವಾಗಿದ್ದರೆ ಅತಿ ವೇಗವಾಗಿ ಅವುಗಳ ಸಂಖ್ಯೆ ಹೆಚ್ಚಾಗುತ್ತದೆ.

ಜಿರಳೆಗಳು ಹಲವು ದಿನಗಳ ಕಾಲ ಆಹಾರವಿಲ್ಲದೇ ಬದುಕಬಲ್ಲವು. ಕೆಲ ಅಧ್ಯಯನಗಳ ಪ್ರಕಾರ, ಅವು ಒಂದು ತಿಂಗಳವರೆಗೆ ಆಹಾರವಿಲ್ಲದೇ ಜೀವಿಸಬಹುದು. ಆದರೆ ನೀರಿಲ್ಲದೇ ಹೆಚ್ಚು ದಿನ ಬದುಕಲು ಸಾಧ್ಯವಿಲ್ಲ. ಅಡುಗೆಮನೆಯಲ್ಲಿ ಉಳಿದ ಆಹಾರ ಕಣಗಳು, ತೇವಾಂಶ ಮತ್ತು ಕತ್ತಲೆ ಪ್ರದೇಶಗಳು ಜಿರಳೆಗಳಿಗೆ ಸೂಕ್ತ ವಾಸಸ್ಥಾನವಾಗುತ್ತವೆ.

ಜಿರಳೆಗಳ ಬಗ್ಗೆ ಮತ್ತೊಂದು ಜನಪ್ರಿಯ ಮಾಹಿತಿ ಎಂದರೆ, ಅಣುಬಾಂಬ್ ಸ್ಫೋಟವಾದರೂ ಅವು ಬದುಕುತ್ತವೆ ಎನ್ನುವುದು. ವಿಜ್ಞಾನಿಗಳು ಹೇಳುವಂತೆ, ಜಿರಳೆಗಳು ಮಾನವರಿಗಿಂತ ಹೆಚ್ಚು ಮಟ್ಟದ ಕಿರಣೋತ್ಸರ್ಗವನ್ನು ಸಹಿಸಬಲ್ಲವು. ಆದರೆ “ಅಣುಬಾಂಬ್ ಬಳಿಕ ಬದುಕುವ ಏಕೈಕ ಜೀವಿ” ಎನ್ನುವುದು ಅತಿಶಯೋಕ್ತಿಯ ಮಾತು ಎಂದು ತಜ್ಞರು ಸ್ಪಷ್ಟಪಡಿಸಿದ್ದಾರೆ.

ಜಗತ್ತಿನಲ್ಲಿ ಸುಮಾರು 4,500ಕ್ಕೂ ಹೆಚ್ಚು ಜಾತಿಯ ಜಿರಳೆಗಳು ಇವೆ ಎಂದು ವಿಜ್ಞಾನಿಗಳು ತಿಳಿಸಿದ್ದಾರೆ. ಆದರೆ ಅವುಗಳಲ್ಲಿ ಕೆಲವೇ ಜಾತಿಗಳು ಮಾನವರ ಮನೆಗಳ ಸುತ್ತಮುತ್ತ ಕಾಣಿಸುತ್ತವೆ. ಬಹುತೇಕ ಜಿರಳೆಗಳು ಕಾಡು ಪ್ರದೇಶಗಳಲ್ಲಿ ಬದುಕುತ್ತವೆ ಮತ್ತು ಪರಿಸರ ಸಮತೋಲನದಲ್ಲೂ ಪಾತ್ರವಹಿಸುತ್ತವೆ.

ಜಿರಳೆಗಳು ಹಲವಾರು ಬ್ಯಾಕ್ಟೀರಿಯಾ ಮತ್ತು ಕೀಟಾಣುಗಳನ್ನು ಹೊತ್ತು ತಿರುಗುವ ಸಾಧ್ಯತೆ ಇದೆ. ಅವು ಆಹಾರ ಪದಾರ್ಥಗಳ ಮೇಲೆ ಹಾದುಹೋಗಿದರೆ ಸೋಂಕಿನ ಅಪಾಯ ಹೆಚ್ಚಬಹುದು. ವಿಶೇಷವಾಗಿ ಅಸ್ತಮಾ ಮತ್ತು ಅಲರ್ಜಿ ಸಮಸ್ಯೆ ಇರುವವರಿಗೆ ಜಿರಳೆಗಳಿಂದ ತೊಂದರೆ ಹೆಚ್ಚಾಗಬಹುದು ಎಂದು ವೈದ್ಯರು ಎಚ್ಚರಿಸುತ್ತಾರೆ. ಆದ್ದರಿಂದ ಮನೆ ಮತ್ತು ಅಡುಗೆಮನೆಯನ್ನು ಸ್ವಚ್ಛವಾಗಿಟ್ಟುಕೊಳ್ಳುವುದು ಮುಖ್ಯ. ತೇವಾಂಶ ಹೆಚ್ಚಿರುವ ಜಾಗಗಳನ್ನು ಸ್ವಚ್ಛಗೊಳಿಸುವುದು ಹಾಗೂ ಆಹಾರವನ್ನು ಮುಚ್ಚಿಡುವುದು ಉತ್ತಮ ಅಭ್ಯಾಸ ಎಂದು ಆರೋಗ್ಯ ತಜ್ಞರು ಸಲಹೆ ನೀಡಿದ್ದಾರೆ.

“Cockroach Janata Party” ಎಂಬ ಖಾತೆ ಸಾಮಾಜಿಕ ಜಾಲತಾಣಗಳಲ್ಲಿ ಮತ್ತೆ ಸದ್ದು ಮಾಡುತ್ತಿದ್ದಂತೆ, ಜಿರಳೆಗಳ ಬಗ್ಗೆ ಜನರು ಇಂಟರ್‌ನೆಟ್‌ನಲ್ಲಿ ಹೆಚ್ಚಿನ ಮಾಹಿತಿ ಹುಡುಕಲು ಆರಂಭಿಸಿದ್ದಾರೆ. ಹಲವರು ಜಿರಳೆಗಳ ಬದುಕುಳಿಯುವ ಶಕ್ತಿಯನ್ನು ನೋಡಿ ಆಶ್ಚರ್ಯ ವ್ಯಕ್ತಪಡಿಸುತ್ತಿದ್ದರೆ, ಇನ್ನೂ ಕೆಲವರು ಹಾಸ್ಯಮಯ ಪ್ರತಿಕ್ರಿಯೆಗಳನ್ನು ಹಂಚಿಕೊಳ್ಳುತ್ತಿದ್ದಾರೆ.ಒಟ್ಟಿನಲ್ಲಿ, ಸಾಮಾನ್ಯವಾಗಿ ಅಸಹ್ಯವಾಗಿ ಕಾಣುವ ಜಿರಳೆಗಳ ಬದುಕಿನ ವೈಶಿಷ್ಟ್ಯಗಳು ವಿಜ್ಞಾನ ಲೋಕಕ್ಕೂ ಕುತೂಹಲ ಹುಟ್ಟಿಸಿರುವುದು ನಿಜ,(ಏಜೆನ್ಸೀಸ್​).