ಅಯೋಧ್ಯೆಯಿಂದ ನಾಮಪತ್ರ ಸಲ್ಲಿಸುವಂತೆ ಯೋಗಿ ಆದಿತ್ಯನಾಥ್ ಮರುಸವಾಲು: ಬಿರುಗಾಳಿಗೆ ಎಲ್ಲರ ಅಹಂಕಾರ ಧೂಳೀಪಟ ಅಂದಿದ್ದೇಕೆ ಅಖಿಲೇಶ್..? | Akhilesh Yadav Vs CM Yogi

Akhilesh Yadav Vs CM Yogi: ಸಮಾಜವಾದಿ ಪಕ್ಷದ ಮುಖ್ಯಸ್ಥ ಅಖಿಲೇಶ್ ಯಾದವ್ ಅವರಿಗೆ ಅಯೋಧ್ಯೆಯಿಂದ ಚುನಾವಣೆಗೆ ಸ್ಪರ್ಧಿಸುವಂತೆ ಉತ್ತರ ಪ್ರದೇಶ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್ ಸವಾಲು ಹಾಕಿದ್ದು, ನೀವು ಅಯೋಧ್ಯೆಯಿಂದ ನಾಮಪತ್ರ ಸಲ್ಲಿಸಿ, ನಾನು ಇಲ್ಲಿಂದಲೇ ಕಣಕ್ಕಿಳಿಯುತ್ತೇನೆ ಎಂದು ಸವಾಲ್​ ಹಾಕಿದ್ದಾರೆ.

ಈ ಹಿಂದೆ ಅಯೋಧ್ಯೆಯಿಂದ ಸ್ಪರ್ಧಿಸುವಂತೆ ತಮಗೆ ಸವಾಲು ಹಾಕಿದ್ದ ಯಾದವ್ ಅವರ ಮಾತುಗಳಿಗೆ ಪ್ರತಿಕ್ರಿಯೆಯಾಗಿ ಬಲರಾಮಪುರದಲ್ಲಿ ನಡೆದ ಸಾರ್ವಜನಿಕ ಸಭೆಯನ್ನು ಉದ್ದೇಶಿಸಿ ಮಾತನಾಡಿದ ಸಿಎಂ ಆದಿತ್ಯನಾಥ್ ಈ ಸವಾಲನ್ನು ಸ್ವೀಕರಿಸಿದ್ದಾರೆ. ತಾವು ಚುನಾವಣಾ ರಾಜಕೀಯಕ್ಕಾಗಿ ಅಲ್ಲ, ಬದಲಿಗೆ ಅಯೋಧ್ಯೆಯ ಅಭಿವೃದ್ಧಿಗಾಗಿ ಮತ್ತು ಉತ್ತರ ಪ್ರದೇಶದ ಗೌರವವನ್ನು ಕಾಪಾಡಲು ಅಲ್ಲಿಗೆ ಭೇಟಿ ನೀಡುವುದಾಗಿ ಸ್ಪಷ್ಟಪಡಿಸಿದ್ದಾರೆ.

ಅಖಿಲೇಶ್ ಜಿ, ನಾನು ನಿಮಗೆ ಒಂದು ಸವಾಲು ಹಾಕುತ್ತೇನೆ. ನೀವು ಶ್ರೀ ಅಯೋಧ್ಯೆ ಧಾಮದಿಂದ ನಿಮ್ಮ ನಾಮಪತ್ರವನ್ನು ಸಲ್ಲಿಸಿ, ನಾನು ಕೂಡ ನನ್ನ ನಾಮಪತ್ರವನ್ನು ಸಲ್ಲಿಸುತ್ತೇನೆ. ಒಮ್ಮೆ ನಮ್ಮ ಅದೃಷ್ಟವನ್ನು ಪರೀಕ್ಷಿಸಿಕೊಳ್ಳೋಣ ಎಂದು ಯೋಗಿ ಆದಿತ್ಯನಾಥ್ ಸವಾಲು ಹಾಕಿದ್ದಾರೆ.

ಇದನ್ನೂ ಓದಿ:ದೆಹಲಿಯಲ್ಲಿ ವಶಕ್ಕೆ ಪಡೆದ ಬೆನ್ನಲ್ಲೇ ಅಜ್ಜಿ ನಿಧನ: ಅಭಿಜಿತ್ ದೀಪ್ಕೆಗೆ ನೆರವಾಗಲು ದೆಹಲಿ ಪೊಲೀಸರ ನಿರ್ಧಾರ! | Abhijeet Dipke

ಅಯೋಧ್ಯೆಯು ಧಾರ್ಮಿಕ ಮಹತ್ವ ಹೊಂದಿರುವ ಸ್ಥಳವಾಗಿದ್ದು, ಅದನ್ನು ಕೇವಲ ರಾಜಕೀಯ ಅಖಾಡವನ್ನಾಗಿ ಬದಲಾಯಿಸಬಾರದು ಎಂದಿರುವ ಯೋಗಿ, ನಾವು ರಾಜಕೀಯಕ್ಕಾಗಿ ಅಯೋಧ್ಯೆಗೆ ಹೋಗುವುದಿಲ್ಲ, ಅಭಿವೃದ್ಧಿಗಾಗಿ ಹೋಗುತ್ತೇವೆ. ಅಯೋಧ್ಯೆ ನಮ್ಮ ನಂಬಿಕೆಯ ಪವಿತ್ರ ಭೂಮಿಯೆ ಹೊರತು ಚುನಾವಣೆಯಲ್ಲಿ ಸ್ಪರ್ಧಿಸುವ ಸ್ಥಳವಲ್ಲ ಎಂದು ಅವರು ತಿಳಿಸಿದ್ದಾರೆ. ಅಲ್ಲದೆ, ನಗರದ ಹಿಂದಿನ ಪರಿಸ್ಥಿತಿಯನ್ನು ಇಂದಿನ ಸ್ಥಿತಿಯೊಂದಿಗೆ ಹೋಲಿಸುತ್ತಾ, ಅಯೋಧ್ಯೆಯು ಹೊಸ ಮಾದರಿಯನ್ನು ಸೃಷ್ಟಿಸಿದೆ, ತಮ್ಮ ಸರ್ಕಾರದ ಗಮನವೆಲ್ಲವೂ ಅಭಿವೃದ್ಧಿ ಹಾಗೂ ರಾಜ್ಯದ ಗೌರವಕ್ಕೆ ಯಾವುದೇ ಕಳಂಕ ಬಾರದಂತೆ ನೋಡಿಕೊಳ್ಳುವುದರ ಮೇಲಿದೆ ಎಂದು ಅವರು ಹೇಳಿದರು.

ಗಾಳಿಯ ಬಿರುಗಾಳಿಯ ತಿರುಗೇಟು!...

ಯೋಗಿ ಆದಿತ್ಯಾನಾಥ್​ ಸವಾಲಿಗೆ ಖಡಕ್ ತಿರುಗೇಟು ನೀಡಿರುವ ಸಮಾಜವಾದಿ ಪಕ್ಷದ ಮುಖ್ಯಸ್ಥ ಅಖಿಲೇಶ್ ಯಾದವ್, ಒಂದು ಗಾಳಿಯ ಬಿರುಗಾಳಿ ಬರುತ್ತದೆ, ಎಲ್ಲರ ಅಹಂಕಾರವು ಕೊಚ್ಚಿಹೋಗುತ್ತದೆ. ಅಯೋಧ್ಯೆಯಲ್ಲಿ ಕಾಣಿಕೆ-ದೇಣಿಗೆ-ಧರ್ಮದ ಕಳ್ಳರನ್ನು ಸೋಲಿಸಲು ಕೇವಲ ಒಬ್ಬ ಯುವ ಪಿಡಿಎ ಪ್ರಹರಿಯೇ ಸಾಕು ಎಂದು ವಾಗ್ದಾಳಿ ನಡೆಸಿದ್ದಾರೆ.

ಆರೋಪಿಗಳಿಗೆ ಕ್ಲೀನ್ ಚಿಟ್ ನೀಡಿದವರು ಈ ತಪ್ಪು ಕೃತ್ಯಗಳಲ್ಲಿ ನೇರವಾಗಿ ಪಾಲುದಾರರಾಗಿದ್ದಾರೆ ಎಂದು ಯಾದವ್ ಆರೋಪಿಸಿದ್ದಾರೆ. ಮತದಾರರು ಅವರ ಅಹಂಕಾರವನ್ನು ಮುರಿಯಲಿದ್ದಾರೆ ಎಂದು ಉಲ್ಲೇಖಿಸುತ್ತಾ, ಸತ್ಯವು ಇನ್ನೂ ಹೊರಬರಬೇಕಿದೆ, ಆದರೆ ಈ ಬಾರಿ ಜನರು ಆ ಎಲ್ಲಾ ಅಹಂಕಾರವನ್ನು ಧೂಳೀಪಟ ಮಾಡಲಿದ್ದಾರೆ. ಲೋಕಸಭಾ ಚುನಾವಣೆಯನ್ನು ನೀವು ಮರೆತುಬಿಟ್ಟಿದ್ದೀರಾ..? ಎಂದು ಬರೆದಿದ್ದಾರೆ. ಎಸ್ಪಿ ಮುಖ್ಯಸ್ಥರು ಅಯೋಧ್ಯೆಯಲ್ಲಿನ ಮಹಿಳೆಯರ ಅನುಭವಗಳನ್ನು ಪ್ರಸ್ತಾಪಿಸುತ್ತಾ, ರಾಜಕೀಯ ಸ್ಪರ್ಧೆಯಲ್ಲಿ ಮಹಿಳೆಯರೇ ನಿರ್ಣಾಯಕ ಪಾತ್ರವಹಿಸಲಿದ್ದಾರೆ ಎಂದು ಹೇಳಿದ್ದಾರೆ. ಅಹಂಕಾರಿ ಮತ್ತು ಅಸಭ್ಯ ವ್ಯಕ್ತಿಗಳಿಂದ ತೊಂದರೆಗೊಳಗಾದ ತಾಯಿಯೊಬ್ಬರಿಗೆ ಸಾರ್ವಜನಿಕವಾಗಿ ಅವಮಾನ ಮಾಡಿದ್ದನ್ನು ಕಣ್ಣಾರೆ ಕಂಡ ಹೆಣ್ಣುಮಗಳ ಹೆಸರನ್ನು ಅವರು ಉಲ್ಲೇಖಿಸಿದ್ದಾರೆ.

ಆಂತರಿಕ ಸಮೀಕ್ಷೆಗಳನ್ನು ಪ್ರಶ್ನಿಸಿದ ಅಖಿಲೇಶ್!

ಅಯೋಧ್ಯೆಯಿಂದ ತಮ್ಮ ಪರವಾಗಿ ಚುನಾವಣೆ ಎದುರಿಸಲು ತಮ್ಮ ರಾಜಕೀಯ ಶಿಬಿರದಲ್ಲಿ ಯಾರೂ ಮುಂದೆ ಬರುತ್ತಿಲ್ಲ ಎಂಬುದು ಆದಿತ್ಯನಾಥ್ ಅವರ ಆಂತರಿಕ ಸಮೀಕ್ಷೆಯಿಂದ ಗೊತ್ತಾಗಿದೆಯೇ ಎಂದು ಯಾದವ್ ಪ್ರಶ್ನಿಸಿದ್ದಾರೆ. ಅಯೋಧ್ಯೆಯಿಂದ ನಿಮ್ಮ ಪರವಾಗಿ ಚುನಾವಣೆಗೆ ಸ್ಪರ್ಧಿಸಲು ಯಾರೂ ಬಯಸುತ್ತಿಲ್ಲ ಎಂದು ನಿಮ್ಮ ಆಂತರಿಕ ಸಮೀಕ್ಷೆ ಹೇಳಿದೆಯೇ?" ಎಂದು ಅವರು ಕೇಳಿದ್ದಾರೆ.

ಈ ಪರಸ್ಪರ ವಾಗ್ದಾಳಿಯು ಬಿಜೆಪಿ ಮತ್ತು ಸಮಾಜವಾದಿ ಪಕ್ಷದ ನಡುವಿನ ಮತ್ತೊಂದು ಸುತ್ತಿನ ರಾಜಕೀಯ ಸಮರಕ್ಕೆ ನಾಂದಿ ಹಾಡಿದ್ದು, ನಂಬಿಕೆ, ಅಭಿವೃದ್ಧಿ ಮತ್ತು ಚುನಾವಣಾ ಬೆಂಬಲದ ಕುರಿತಾದ ಅವರ ಪರಸ್ಪರ ಹಕ್ಕುಪ್ರತಿಪಾದನೆಗಳ ಕೇಂದ್ರಬಿಂದುವಾಗಿ ಅಯೋಧ್ಯೆ ನಿಂತಿದೆ(ಏಜೆನ್ಸೀಸ್​).