ಮಾಜಿ ಗುರುವಿಗೆ ಬಿಗ್ ಶಾಕ್ ಕೊಟ್ಟ ಶಿಷ್ಯ: ಪ್ರಧಾನಿ ರೇಸ್‌ನಲ್ಲಿ ಕೇಜ್ರಿವಾಲ್​ರನ್ನೇ ಹಿಂದಿಕ್ಕಿದ ಸಿಜೆಪಿ ನಾಯಕ ಅಭಿಜೀತ್ ದಿಪ್ಕೆ! | MOTN 2026

ಈ ವ್ಯತ್ಯಾಸವು ಕೇವಲ ಶೇಕಡಾ 0.1 ರಷ್ಟಿರಬಹುದು, ಆದರೆ ಇದರ ರಾಜಕೀಯ ಸಂಕೇತವನ್ನು ನಿರ್ಲಕ್ಷಿಸುವಂತಿಲ್ಲ. 2020 ರಿಂದ 2023 ರವರೆಗೆ ಕೇಜ್ರಿವಾಲ್ ನಾಯಕತ್ವದಲ್ಲಿ ಎಎಪಿಯ ಕಮ್ಯುನಿಕೇಷನ್ಸ್ ತಂಡದಲ್ಲಿ ಕಾರ್ಯನಿರ್ವಹಿಸಿದ್ದ ದಿಪ್ಕೆ, ಇತ್ತೀಚಿನ ಕೆಲ ತಿಂಗಳುಗಳಲ್ಲಿ ತಮ್ಮನ್ನು ರಾಜಕೀಯ ಸಂವಹನ ವೃತ್ತಿಪರನಿಂದ, ಪ್ರಭಾವಿ ಚಳವಳಿಯ ಮುಖವಾಗಿ ಗುರುತಿಸಿಕೊಂಡಿದ್ದಾರೆ. ಭಾರತದ ಮುಂದಿನ ಪ್ರಧಾನಿಯಾಗಲು ಯಾರು ಅತ್ಯಂತ ಸೂಕ್ತ ಎಂಬ ಪ್ರಶ್ನೆಗೆ ಉತ್ತರವಾಗಿ, ದಿಪ್ಕೆ ಅವರ ಈ ಬೆಳವಣಿಗೆಯು ಅವರು ಒಮ್ಮೆ ಯಾರ ಬಳಿ ಕೆಲಸ ಮಾಡಿದ್ದರೋ ಅದೇ ವ್ಯಕ್ತಿಗಿಂತ ಅವರನ್ನು ಅಲ್ಪ ಅಂತರದಿಂದ ಮುಂದೆ ತಂದು ನಿಲ್ಲಿಸಿದೆ.

ಮೂಡ್ ಆಫ್ ದಿ ನೇಷನ್ ಎಂಬುದು ಇಂಡಿಯಾ ಟುಡೇ ಗ್ರೂಪ್‌ನಿಂದ ಕಳೆದ ಸುಮಾರು ಎರಡು ದಶಕಗಳಿಂದ ನಡೆಸಲ್ಪಡುತ್ತಿರುವ ವರ್ಷಕ್ಕೆ ಎರಡೆರಡು ಬಾರಿ ನಡೆಸುವ ಸಮೀಕ್ಷೆಯಾಗಿದೆ. ಈ ತಿಂಗಳ ಆವೃತ್ತಿಯನ್ನು ಸಿವೋಟರ್ ಸಂಸ್ಥೆಯು ಜುಲೈ 1 ಮತ್ತು ಆಗಸ್ಟ್ 25 ರ ನಡುವೆ ಸಮೀಕ್ಷೆಗೊಳಪಡಿಸಿದ 25,184 ಜನರ ಮಾದರಿಯೊಂದಿಗೆ ನಡೆಸಿದೆ. ಇದರೊಂದಿಗೆ, ಆಗಸ್ಟ್ ಮೂಡ್ ಆಫ್ ದಿ ನೇಷನ್ 2026 ರ ಫಲಿತಾಂಶಗಳನ್ನು ರೂಪಿಸಲು ಸಿವೋಟರ್‌ನ ನಿಯಮಿತ ಟ್ರ್ಯಾಕಿಂಗ್‌ನ ಭಾಗವಾಗಿ ಕಳೆದ ಆರು ತಿಂಗಳಲ್ಲಿ ನಡೆಸಲಾದ ಮತ್ತೊಂದು 91,795 ಸಂದರ್ಶನಗಳನ್ನು ಬಳಸಿಕೊಳ್ಳಲಾಗಿದೆ.

ಮುಂಚೂಣಿಯಲ್ಲಿರುವ ಅಭ್ಯರ್ಥಿಗಳಿಗೆ ಹೋಲಿಸಿದರೆ ದಿಪ್ಕೆಗೆ ಸಿಕ್ಕಿರುವ ಶೇಕಡಾ 1.3 ರಷ್ಟು ಬೆಂಬಲವು ಚಿಕ್ಕ ಸಂಖ್ಯೆಯಾಗಿದ್ದರೂ, ಕೇಜ್ರಿವಾಲ್ ಅವರ ಜೊತೆ ಹೋಲಿಸಿದಾಗ ಅದು ಗಮನಾರ್ಹವಾಗಿ ಕಾಣಿಸುತ್ತದೆ. ಪ್ರಧಾನಿ ನರೇಂದ್ರ ಮೋದಿ ಅವರು ಶೇಕಡಾ 48.7 ರಷ್ಟು ಜನರ ಬೆಂಬಲದೊಂದಿಗೆ ಪ್ರಧಾನಿ ಹುದ್ದೆಗೆ ಅತ್ಯಂತ ಸೂಕ್ತ ವ್ಯಕ್ತಿಯಾಗಿ ಮೊದಲ ಸ್ಥಾನದಲ್ಲಿದ್ದಾರೆ. ಲೋಕಸಭೆಯ ವಿಪಕ್ಷ ನಾಯಕನಾಗಿರುವ ರಾಹುಲ್ ಗಾಂಧಿ ಶೇಕಡಾ 27.1 ರಷ್ಟು ಬೆಂಬಲದೊಂದಿಗೆ ಎರಡನೇ ಸ್ಥಾನದಲ್ಲಿದ್ದರೆ, ಚುನಾವಣಾ ರಾಜಕೀಯಕ್ಕೆ ಬಂದ ಮೇಲೆ ಪ್ರಮುಖ ಶಕ್ತಿಯಾಗಿ ಬೆಳೆದಿರುವ ತಮಿಳುನಾಡು ಮುಖ್ಯಮಂತ್ರಿ ಸಿ. ಜೋಸೆಫ್ ವಿಜಯ್ ಶೇಕಡಾ 9.2 ರಷ್ಟು ಬೆಂಬಲದೊಂದಿಗೆ ಮೂರನೇ ಸ್ಥಾನದಲ್ಲಿದ್ದಾರೆ.

ಅಭಿಜೀತ್ ದಿಪ್ಕೆ ರಾಜಕೀಯ ಪಯಣ ಒಂದು ರೀತಿಯಲ್ಲಿ ಜಾದೂ ಅಂತಲೇ ಹೇಳಬಹುದು. ಭಾರತದ ಮುಖ್ಯ ನ್ಯಾಯಮೂರ್ತಿಗಳು (ಸಿಜೆಐ) ನಿರುದ್ಯೋಗಿ ಯುವಕರನ್ನು ಕಾಕ್ರೋಚ್‌ಗಳು (ಜಿರಳೆಗಳು) ಮತ್ತು ಪರಾವಲಂಬಿಗಳು ಎಂದು ಕರೆದಿದ್ದು ಯುವಜನರಲ್ಲಿ ಆಕ್ರೋಶವನ್ನು ಹುಟ್ಟುಹಾಕಿತು. ಇದನ್ನ ಸರಿಯಾದ ರೀತಿಯಲ್ಲಿ ಲೆಕ್ಕಾಚಾರ ಹಾಕಿ ಬಳಸಿಕೊಂಡ 30 ವರ್ಷದ ಈ ಕಾರ್ಯಕರ್ತ ಪ್ರಮುಖವಾಗಿ ಬೆಳಕಿಗೆ ಬಂದರು. ಸಿಜೆಐ ಹೇಳಿಕೆಗೆ ಪ್ರತಿಕ್ರಿಯೆಯಾಗಿ ದಿಪ್ಕೆ, ಮೇ ತಿಂಗಳಲ್ಲಿ ಕಾಕ್ರೋಚ್ ಜನತಾ ಪಾರ್ಟಿ ಎಂಬ ವ್ಯಂಗ್ಯಾತ್ಮಕ ಸಾಮಾಜಿಕ ಜಾಲತಾಣ ಸಂಘಟನೆಯನ್ನು ರಚಿಸಿದರು. ವ್ಯಂಗ್ಯವಾಗಿ ಪ್ರಾರಂಭವಾದದ್ದು ಶೀಘ್ರದಲ್ಲೇ ವ್ಯಾಪಕ ಯುವ ಚಳವಳಿಯಾಗಿ ಬೆಳೆಯಿತು.

ಚಳವಳಿ ವೇಗ ಪಡೆದಂತೆ, ಸಿಜೆಪಿ 2026ರ ನೀಟ್-ಯುಜಿ ಪ್ರಶ್ನೆಪತ್ರಿಕೆ ಸೋರಿಕೆ ಮತ್ತು ಶಿಕ್ಷಣ ವ್ಯವಸ್ಥೆಯ ಅಕ್ರಮಗಳ ವಿರುದ್ಧ ಯುವಜನರ ಆಕ್ರೋಶವನ್ನು ಮುಂದಿಟ್ಟುಕೊಂಡು ಹೋರಾಟ ಆರಂಭಿಸಿತು. ಬೋಸ್ಟನ್‌ನಿಂದ ಭಾರತಕ್ಕೆ ಮರಳಿದ ದಿಪ್ಕೆ, ದೆಹಲಿಯ ಜಂತರ್ ಮಂತರ್‌ನಲ್ಲಿ ಸಿಜೆಪಿ ಪರವಾಗಿ ಪ್ರತಿಭಟನೆ ಹಮ್ಮಿಕೊಂಡರು. ಈ ಪತ್ರಿಕೆ ಸೋರಿಕೆಯ ಹೊಣೆ ಹೊತ್ತು ಕೇಂದ್ರ ಶಿಕ್ಷಣ ಸಚಿವ ಧರ್ಮೇಂದ್ರ ಪ್ರಧಾನ್ ಅವರು ರಾಜೀನಾಮೆ ನೀಡಬೇಕು ಎಂದು ಈ ಪ್ರತಿಭಟನೆ ಆಗ್ರಹಿಸಿತು.

ಈ ಹೋರಾಟವು 45 ದಿನಗಳ ಕಾಲ ಮುಂದುವರಿಯಿತು ಮತ್ತು ವಿವಿಧ ವಲಯಗಳಿಂದ ಬೆಂಬಲವನ್ನು ಪಡೆಯಿತು. ಸಾಮಾಜಿಕ ಕಾರ್ಯಕರ್ತ ಸೋನಮ್ ವಾಂಗ್ಚುಕ್ 26 ದಿನಗಳ ಉಪವಾಸ ಸತ್ಯಾಗ್ರಹವನ್ನು ಕೈಗೊಂಡರು. ಧರ್ಮೇಂದ್ರ ಪ್ರಧಾನ್ ಶಿಕ್ಷಣ ಸಚಿವ ಸ್ಥಾನಕ್ಕೆ ರಾಜೀನಾಮೆ ನೀಡಿದ ನಂತರ ಮತ್ತು ಸಿಜೆಪಿಯ ಹಲವು ಬೇಡಿಕೆಗಳನ್ನು ಕೇಂದ್ರ ಸರ್ಕಾರ ಅಂಗೀಕರಿಸಿದ ನಂತರ ಜುಲೈ 25 ರಂದು ಈ ಪ್ರತಿಭಟನೆಯು ಅಂತ್ಯಗೊಂಡಿತು. ಅಂದಿನಿಂದ, ಸಿಜೆಪಿ ಒಂದು ಪ್ರಭಾವಿ ಗುಂಪಿನ ರೂಪ ಪಡೆದುಕೊಂಡಿದೆ(ಏಜೆನ್ಸೀಸ್​).