23 ವರ್ಷಕ್ಕೆ 19 ಸರ್ಕಾರಿ ಪರೀಕ್ಷೆಗಳು ಕ್ಲಿಯರ್!​ ಈಕೆಯ ದಾಖಲೆ ಬಗ್ಗೆ ಕೇಳಿದ್ರೆ ಸಲಾಂ ಅಂತೀರಾ

ಛತ್ತೀಸ್‌ಗಢ: ಕೇಂದ್ರ ಮತ್ತು ಸರ್ಕಾರಿ ಪರೀಕ್ಷೆಗಳನ್ನು ಎದುರಿಸುವ ಅದೆಷ್ಟೋ ಸಂಖ್ಯೆಯ ಅಭ್ಯರ್ಥಿಗಳು, ಹೇಗಾದರೂ ಇದೊಂದು ಪರೀಕ್ಷೆ ಪಾಸಾದರೆ ಸಾಕಪ್ಪ ಎಂದು ಹಗಲಿರುಳು ಶ್ರಮಿಸಿದರೂ ಅಷ್ಟು ಸುಲಭವಾಗಿ, ಅಂದುಕೊಂಡ ಸಮಯಕ್ಕೆ ಕ್ಲಿಯರ್​ ಮಾಡೋದು ಕಷ್ಟಸಾಧ್ಯ. ಇದಕ್ಕೆ ವರ್ಷಾನುಗಟ್ಟಲೇ ಸಮಯವೂ ಹಿಡಿಯಬಹುದು. ಹೀಗಿರುವಾಗ, ಇಲ್ಲೊಬ್ಬಳು ಯುವತಿ ಕೇವಲ 23 ವರ್ಷಕ್ಕೆ ಬರೋಬ್ಬರಿ 19 ಸರ್ಕಾರಿ ಎಕ್ಸಾಂಗಳನ್ನು ಪಾಸ್​ ಮಾಡುವ ಮೂಲಕ ವಿಶಿಷ್ಟ ಹಾಗೂ ವಿಶೇಷ ದಾಖಲೆಯನ್ನು ನಿರ್ಮಿಸಿರುವುದು ಸದ್ಯ ಅನೇಕರ ಹುಬ್ಬೇರಿಸಿದೆ.

ಈಕೆಯ ಹೆಸರು ಚಾರು ಪಾಂಡೆ. ಕಷ್ಟಪಟ್ಟು ಓದಿದರೆ ಯಾವುದನ್ನೂ ಭೇದಿಸುವುದು ಅಸಾಧ್ಯವಲ್ಲ ಎಂದು ಮತ್ತೊಮ್ಮೆ ಸಾಬೀತುಪಡಿಸಿದ್ದಾರೆ. ಸಣ್ಣ ಹಳ್ಳಿಯಿಂದ ಬಂದ ಈ ಯುವತಿ, 19 ಸರ್ಕಾರಿ ನೇಮಕಾತಿ ಪರೀಕ್ಷೆಗಳಲ್ಲಿ ಉತ್ತೀರ್ಣರಾಗುವ ಮೂಲಕ ದೇಶದಲ್ಲಿ ಹೊಸ ಸಂಚಲನ ಮೂಡಿಸಿದ್ದಾರೆ. ಈ ಅಪರೂಪದ ಸಾಧನೆಗಾಗಿ, ಅವರು ಸ್ವಾತಂತ್ರ್ಯ ದಿನಾಚರಣೆಯ ಸಂದರ್ಭದಲ್ಲಿ ರಾಷ್ಟ್ರಪತಿ ದ್ರೌಪದಿ ಮುರ್ಮು ಅವರಿಂದ ಚಿನ್ನದ ಪದಕವನ್ನು ಸ್ವೀಕರಿಸಲಿದ್ದಾರೆ.

ಚಾರು ಪಾಂಡೆ ಛತ್ತೀಸ್‌ಗಢದ ರಾಯ್‌ಪುರ ಜಿಲ್ಲೆಯ ಟಿಲ್ಡಾ-ನಿಯೋರಾ ಪ್ರದೇಶದಲ್ಲಿ ಶಾಲಾ ಶಿಕ್ಷಣವನ್ನು ಮುಗಿಸಿದರು. ನಂತರ, ಹೇಮಚಂದ್ ಯಾದವ್ ವಿಶ್ವವಿದ್ಯಾಲಯದಿಂದ ಗಣಿತಶಾಸ್ತ್ರದಲ್ಲಿ ಬಿ.ಎಸ್ಸಿ ಪದವಿ ಪಡೆದರು. ಇದರ ಜೊತೆ ಜೊತೆಯಲ್ಲೇ ಸ್ಪರ್ಧಾತ್ಮಕ ಪರೀಕ್ಷೆಗಳಿಗೆ ತಯಾರಿ ಆರಂಭಿಸಿದರು. ಶಿಸ್ತಿನ ಯೋಜನೆ, ನಿರಂತರ ಕಠಿಣ ಅಭ್ಯಾಸ ಮತ್ತು ಸಮಯಪಾಲನೆ ಅವರ ದಾಖಲೆಯ ಯಶಸ್ಸಿಗೆ ಮೂಲ ಕಾರಣವಾಗಿದೆ.

ಪ್ರಸ್ತುತ ಚೆನ್ನೈನಲ್ಲಿರುವ ಚಾರು ಪಾಂಡೆ, ಕಂಟ್ರೋಲರ್ ಮತ್ತು ಆಡಿಟರ್ ಜನರಲ್ ಆಫ್ ಇಂಡಿಯಾ (ಸಿಎಜಿ) ಕಚೇರಿಯಲ್ಲಿ ಸಹಾಯಕ ಲೆಕ್ಕಪರಿಶೋಧನಾ ಅಧಿಕಾರಿಯಾಗಿ ಕಾರ್ಯನಿರ್ವಹಿಸುತ್ತಿದ್ದಾರೆ. ಈಕೆ SSC CGL, CHSL, MTS, GD, CPO, IBPS PO, ಕ್ಲರ್ಕ್, SBI PO, ಕ್ಲರ್ಕ್ ಮುಂತಾದ ಪರೀಕ್ಷೆಗಳಲ್ಲಿ ಉತ್ತೀರ್ಣರಾಗಿದ್ದಾರೆ. ಇದರೊಟ್ಟಿಗೆ, ರೈಲ್ವೆ ನೇಮಕಾತಿ ಪರೀಕ್ಷೆ, ದೆಹಲಿ ಪೊಲೀಸ್, ಛತ್ತೀಸ್‌ಗಢ ಸಬ್-ಇನ್ಸ್‌ಪೆಕ್ಟರ್ ಮತ್ತು ಸಾರಿಗೆ ಸಬ್-ಇನ್ಸ್‌ಪೆಕ್ಟರ್ ಹುದ್ದೆಗಳಲ್ಲಿಯೂ ಅರ್ಹತೆ ಪಡೆದಿರುವುದು ನಿಜಕ್ಕೂ ಗಮನಾರ್ಹ.

ಈ ಯಶಸ್ಸು ಅವರಿಗೆ ಅಷ್ಟು ಸುಲಭವಾಗಿ ಅವರಿಗೆ ದಕ್ಕಿಲ್ಲ ಬಿಡಿ. ಆರಂಭದಲ್ಲಿ ಅನೇಕ ಪರೀಕ್ಷೆಗಳಲ್ಲಿ ಫೇಲ್​ ಆಗಿದ್ದರೂ ಚಾರು. ಆದರೆ, ಎಲ್ಲಿಯೂ ಧೃತಿಗೆಡದೆ, ನಿರುತ್ಸಾಹಗೊಳ್ಳದೆ ತನ್ನ ನ್ಯೂನತೆಗಳನ್ನು ಗುರುತಿಸಿ, ಅಲ್ಲಲ್ಲೇ ಸರಿಪಡಿಸಿಕೊಂಡಿದ್ದೇ ಇಷ್ಟೆಲ್ಲ ಬ್ಯಾಕ್​ ಟು ಬ್ಯಾಕ್​ ಸಾಧನೆಗೆ ಜ್ವಲಂತ ಸಾಕ್ಷಿಯಾಗಿದೆ. ಪ್ರತಿ ಪರೀಕ್ಷೆಯ ನಂತರ, ಅವರು ಮಾಡಿದ ತಪ್ಪುಗಳನ್ನು ತಿದ್ದಿಕೊಳ್ಳುತ್ತಾ ಮತ್ತು ಉತ್ತಮ ಯೋಜನೆಯೊಂದಿಗೆ ಮುಂದುವರೆದಿದ್ದಾಗಿ ಹೇಳಿಕೊಂಡಿದ್ದಾರೆ.

ಸ್ಪಷ್ಟ ಗುರಿ, ವ್ಯವಸ್ಥಿತ ಅಧ್ಯಯನ, ಅಣಕು ಪರೀಕ್ಷೆಗಳು ಮತ್ತು ಸ್ವಯಂ ವಿಶ್ಲೇಷಣೆ ಯಶಸ್ಸಿನ ಕೀಲಿಕೈಗಳು ಎಂದಿದ್ದಾರೆ ಚಾರು. 23 ವರ್ಷಕ್ಕೆ ಅಪಾರ ಸಾಧನೆಗೈದಿರುವ ಈಕೆಯ ಕಥೆ, ಇಂದಿನ ಸರ್ಕಾರಿ ಉದ್ಯೋಗಗಳಿಗೆ ತಯಾರಿ ನಡೆಸುತ್ತಿರುವ ಲಕ್ಷಾಂತರ ಯುವಕರಿಗೆ ಸ್ಫೂರ್ತಿ ಎಂಬುದರಲ್ಲಿ ಅನುಮಾನವೇ ಬೇಡ,(ಏಜೆನ್ಸೀಸ್).