ಹೃದಯಾಘಾತಕ್ಕೆ ಮಂತ್ರವೇ ಮದ್ದು!...ಓಂ ಸುರಚಾರಿ ನಮಃ ಅಂದ್ರೆ ಸಾವು ಬರಲ್ವಂತೆ; ಸಿಎಂ ವಿಜಯ್ ಜ್ಯೋತಿಷಿಯ ವಿಡಿಯೋ ವೈರಲ್ | Vijay Astrologer

ವೈರಲ್​ ಆಗಿರುವ ವಿಡಿಯೋದಲ್ಲಿ ರಾಧನ್​ ಪಂಡಿತ್​ ತಮ್ಮ ಅನುಯಾಯಿಗಳಿಗೆ ಹೃದಯಾಘಾತದಂತಹ ಗಂಭೀರ ಆರೋಗ್ಯ ಸಮಸ್ಯೆಗಳ ಸಮಯದಲ್ಲಿ ವೈದ್ಯಕೀಯ ಚಿಕಿತ್ಸೆಗಿಂತ ಹೆಚ್ಚಾಗಿ ಮಂತ್ರಗಳನ್ನು ಪಠಿಸಲು ಸಲಹೆ ನೀಡಿದ್ದು ಮತ್ತು ಜ್ಯೋತಿಷ್ಯದ ಮೂಲಕ ಸಾವು ಹಾಗೂ ಅನಾರೋಗ್ಯವನ್ನು ಜಯಿಸಬಹುದು ಎಂದು ಪ್ರತಿಪಾದಿಸಿರುವುದು ಈ ವಿವಾದದ ಕೇಂದ್ರಬಿಂದುವಾಗಿದೆ.

ವೈದ್ಯರು ಹೃದಯಾಘಾತದ ಎಚ್ಚರಿಕೆ ನೀಡಿದರೂ ಭಯಪಡದೆ ಓಂ ಸುರಚಾರಿ ನಮಃ ಎಂಬ ಮಂತ್ರ ಜಪಿಸುವಂತೆ ರಾಧನ್​ ಪಂಡಿತ್​ ತಿಳಿಸಿದ್ದು, ಸಾವು ಮತ್ತು ರೋಗಗಳಿಗೆ ನಿರ್ದಿಷ್ಟ ಸಮಯವಿರುತ್ತದೆ ಹಾಗೂ ಆ ಸಮಯವನ್ನು ಜ್ಯೋತಿಷ್ಯದ ಮೂಲಕ ಹೇಗೆ ಜಯಿಸಬಹುದು ಎಂಬುದು ತಮಗೆ ತಿಳಿದಿದೆ ಎಂದು ಅವರು ಹೇಳಿಕೊಂಡಿದ್ದರು. ಸದ್ಯ ಈ ಹೇಳಿಕೆಗಳು ವಿರೋಧ ಪಕ್ಷಗಳ ಕೆಂಗಣ್ಣಿಗೆ ಗುರಿಯಾಗಿದ್ದು, ಮುಖ್ಯಮಂತ್ರಿ ಕಚೇರಿಯಲ್ಲೇ ಇದ್ದ ವ್ಯಕ್ತಿಯೊಬ್ಬರು ಇಂತಹ ಮೂಢನಂಬಿಕೆಯನ್ನು ಉತ್ತೇಜಿಸುತ್ತಿರುವುದು ಎಷ್ಟು ಸರಿ ಎಂದು ಪ್ರಶ್ನಿಸಿದ್ದಾರೆ. ಹೊಸದಾಗಿ ರಚನೆಯಾದ ಸರ್ಕಾರವು ವೈಜ್ಞಾನಿಕ ಮನೋಭಾವದ ಬದಲಿಗೆ ಅಂಧಶ್ರದ್ಧೆಗೆ ಮನ್ನಣೆ ನೀಡುತ್ತಿದೆ ಎಂಬ ಆರೋಪಗಳು ಕೇಳಿಬಂದಿವೆ.

ರಾಧನ್​ ಪಂಡಿತ್​​ ವೆಟ್ರಿವೇಲ್​ರನ್ನು ಮಂಗಳವಾರವಷ್ಟೇ ಮುಖ್ಯಮಂತ್ರಿ ಕಚೇರಿಗೆ ವಿಶೇಷ ಕರ್ತವ್ಯ ಅಧಿಕಾರಿಯಾಗಿ ನೇಮಿಸಿ ಸರ್ಕಾರಿ ಆದೇಶ ಹೊರಡಿಸಲಾಗಿತ್ತು. ವಿಶೇಷ ಯೋಜನೆಗಳು ಮತ್ತು ಆಡಳಿತಾತ್ಮಕ ಜವಾಬ್ದಾರಿಗಳನ್ನು ನಿರ್ವಹಿಸುವ ಈ ಪ್ರಮುಖ ಹುದ್ದೆಗೆ ಸಾರ್ವಜನಿಕ ಖಜಾನೆಯಿಂದ ಸಂಬಳ ನೀಡಲಾಗುವುದರಿಂದ, ಮುಖ್ಯಮಂತ್ರಿಯವರ ವೈಯಕ್ತಿಕ ಜ್ಯೋತಿಷಿಯನ್ನು ಈ ಸ್ಥಾನಕ್ಕೆ ನೇಮಿಸಿರುವುದು ತೆರಿಗೆದಾರರ ಹಣದ ದುರುಪಯೋಗ ಎಂದು ಅನೇಕರು ಟೀಕಿಸಿದ್ದರು. ಈ ಬೆಳವಣಿಗೆಯಿಂದ ತೀವ್ರ ಮುಜುಗರಕ್ಕೊಳಗಾದ ಟಿವಿಕೆ ಸರ್ಕಾರವು, ನೇಮಕಾತಿ ಆದೇಶವನ್ನು ರದ್ದುಗೊಳಿಸಿದೆ.

ಬುಧವಾರ ವಿಧಾನಸಭೆಯಲ್ಲಿ ಟಿವಿಕೆ ಸರ್ಕಾರವು ವಿಶ್ವಾಸಮತ ಯಾಚನೆಯಲ್ಲಿ ಗೆದ್ದಿದ್ದರೂ, ಮೈತ್ರಿಕೂಟದ ಒಳಗಡೆಯೇ ಈ ನಿರ್ಧಾರಕ್ಕೆ ಅಸಮಾಧಾನ ವ್ಯಕ್ತವಾಗಿದೆ. ಇಂತಹ ನೇಮಕಾತಿಗಳು ಸರ್ಕಾರದ ವಿಶ್ವಾಸಾರ್ಹತೆಯನ್ನು ಹಾಳುಮಾಡುತ್ತವೆ ಎಂದು ಕೆಲವು ಮಿತ್ರಪಕ್ಷಗಳು ಆಕ್ಷೇಪಿಸಿವೆ. ಆದರೆ ಟಿವಿಕೆ ಸಚಿವ ನಿರ್ಮಲ್ ಕುಮಾರ್ ಈ ನೇಮಕಾತಿಯನ್ನು ಸಮರ್ಥಿಸಿಕೊಳ್ಳಲು ಪ್ರಯತ್ನಿಸಿದ್ದು, ವೆಟ್ರಿವೇಲ್​ರನ್ನು ಮಾಧ್ಯಮ ವಕ್ತಾರರಾಗಿ ನೇಮಿಸಲಾಗಿತ್ತು ಮತ್ತು ಜ್ಯೋತಿಷ್ಯ ಅವರ ವೈಯಕ್ತಿಕ ಜೀವನ ಎಂದು ಹೇಳಿದ್ದಾರೆ. ವಿಜಯ್ ನೇತೃತ್ವದ ಸರ್ಕಾರ ಅಸ್ತಿತ್ವಕ್ಕೆ ಬಂದ ಬೆರಳೆಣಿಕೆ ದಿನಗಳಲ್ಲಿ ಈ ಬೆಳವಣಿಗೆಗಳು ನಡೆದಿರುವುದು ಸಿಎಂ ವಿಜಯ್​ಗೆ ಮೊದಲ ಹಿನ್ನಡೆಯಾಗಿ ಪರಿಣಮಿಸಿದ್ದು, ವಿರೋಧ ಪಕ್ಷಗಳಿಗೆ ಸರ್ಕಾರದ ವಿರುದ್ಧ ವಾಗ್ದಾಳಿ ನಡೆಸಲು ಪ್ರಬಲ ಅಸ್ತ್ರವನ್ನು ನೀಡಿದೆ(ಏಜೆನ್ಸೀಸ್​​).