ಸತತ ಎರಡನೇ ವಿಂಬಲ್ಡನ್ ಪ್ರಶಸ್ತಿ ಮುಡಿಗೇರಿಸಿಕೊಂಡ ಹಾಲಿ ಚಾಂಪಿಯನ್​ ಇಟಲಿಯ ಯಾನಿಕ್​ ಸಿನ್ನರ್​ | Wimbledon 2026

Wimbledon 2026: 2026ರ ವಿಂಬಲ್ಡನ್​ ಟೆನಿಸ್ ಚಾಂಪಿಯನ್​​ಶಿಪ್​ನಲ್ಲಿ ವಿಶ್ವ ನಂ. 1 ಮತ್ತು ಹಾಲಿ ಚಾಂಪಿಯನ್​ ಇಟಲಿಯ ಯಾನಿಕ್​ ಸಿನ್ನರ್​, ಫ್ರೆಂಚ್​ ಓಪನ್​ ಹಾಲಿ ಚಾಂಪಿಯನ್​ ಜರ್ಮನಿಯ ಅಲೆಕ್ಸಾಂಡರ್​ ಜ್ವೆರೇವ್​ ಅವರನ್ನು ಸೋಲಿಸಿ ಚಾಂಪಿಯನ್ ಆಗಿ ಹೊರಹೊಮ್ಮಿದ್ದಾರೆ.

ಭಾನುವಾರ(ಜು. 12) ಆಲ್ ಇಂಗ್ಲೆಂಡ್ ಕ್ಲಬ್‌ನಲ್ಲಿ ನಡೆದ ಪುರುಷರ ಸಿಂಗಲ್ಸ್ ಫೈನಲ್‌ನಲ್ಲಿ ಯಾನಿಕ್​ ಸಿನ್ನರ್ 6-7 (7), 7-6 (2), 6-3, 6-4 ಸೆಟ್‌ಗಳಿಂದ ಜ್ವೆರೇವ್​ ಅವರನ್ನು ಸೋಲಿಸಿ ಸತತ ಎರಡನೇ ವಿಂಬಲ್ಡನ್ ಪ್ರಶಸ್ತಿಯನ್ನು ತಮ್ಮ ಮುಡಿಗೇರಿಸಿಕೊಂಡಿದ್ದಾರೆ. 

ಸುಮಾರು 3 ಗಂಟೆ 46 ನಿಮಿಷಗಳ ಕಾಲ ಪಂದ್ಯ ನಡೆದಿದ್ದು, ಮೊದಲ ಸೆಟ್ ಸೋತರೂ ಅದ್ಭುತವಾಗಿ ಪುನರಾಗಮನ ಮಾಡಿದ ಯಾನಿಕ್ ಸಿನ್ನರ್, ಜ್ವೆರೇವ್​ ವಿರುದ್ಧ ಸತತ 10ನೇ ಗೆಲುವು ದಾಖಲಿಸಿದರು. ಈ ಗೆಲುವಿನ ಮೂಲಕ ಸಿನ್ನರ್ ವಿಂಬಲ್ಡನ್ ಇತಿಹಾಸದಲ್ಲಿ ಸತತವಾಗಿ ಎರಡು ಬಾರಿ ಪುರುಷರ ಸಿಂಗಲ್ಸ್ ಪ್ರಶಸ್ತಿ ಗೆದ್ದ 10ನೇ ಆಟಗಾರ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ.

ಈ ಮೊದಲು ಅವರು 2025ರಲ್ಲೂ ಚಾಂಪಿಯನ್ ಆಗಿದ್ದರು. ಇನ್ನೂ ಇದು ಸಿನ್ನರ್ ವೃತ್ತಿಜೀವನದ 5ನೇ ಗ್ರಾಂಡ್ ಸ್ಲಾಮ್ ಪ್ರಶಸ್ತಿಯಾಗಿದ್ದು, 2026ರ ಸಾಲಿನ ಅವರ ಮೊದಲ ಮೇಜರ್ ಪ್ರಶಸ್ತಿಯಾಗಿದೆ. ಮತ್ತು ಗ್ರಾಂಡ್ ಸ್ಲಾಮ್​ನಲ್ಲಿ ತಮ್ಮ ವೃತ್ತಿಜೀವನದ ಇತಿಹಾಸದಲ್ಲಿ 100ನೇ ಪಂದ್ಯದ ಗೆಲುವಾಗಿದೆ.

ಮೂರನೇ ಸೆಟ್‌ನಲ್ಲಿ ಜ್ವೆರೆವ್ 2 ಗಂಟೆ 42 ನಿಮಿಷಗಳ ಆಟದ ನಂತರ 3-3 ಅಂಕಗಳಿಂದ ಪಂದ್ಯದ ಮೊದಲ ಬ್ರೇಕ್ ಪಾಯಿಂಟ್ ಗಳಿಸುವವರೆಗೂ ಫೈನಲ್ ಸಮತೋಲಿತವಾಗಿತ್ತು. ಪಾಯಿಂಟ್ ಸಮಯದಲ್ಲಿ ಸಿನ್ನರ್ ಡ್ರಾಪ್ ಶಾಟ್ ಆಡಿದರು ಮತ್ತು ಅದನ್ನು ಬೆನ್ನಟ್ಟುವಾಗ ಜ್ವೆರೆವ್ ಹುಲ್ಲಿನ ಮೇಲೆ ಜಾರಿಬಿದ್ದರು. ಅವರ ಬಲ ಮೊಣಕಾಲಿಗೆ ಏಟು ಬಿದ್ದಿತ್ತು (ಏಜೆನ್ಸೀಸ್).