ಡೀಸೆಲ್​​ಗೆ ಐಸೊಬ್ಯುಟನಾಲ್​​ ಮಿಶ್ರಣ:ಕಡ್ಡಾಯಕ್ಕೆ ಕೇಂದ್ರ ಸರ್ಕಾರದ ಚಿಂತನೆ

ಡೀಸೆಲ್​ಗೆ ಐಸೊಬ್ಯುಟನಾಲ್ ಮಿಶ್ರಣ ಕಡ್ಡಾಯಗೊಳಿಸುವ ಕೇಂದ್ರ ಸರ್ಕಾರದ ಚಿಂತನೆ ಭಾರತದ ಇಂಧನ ಸ್ವಾವಲಂಬನೆಯ ಕನಸಿಗೆ ಜೀವ ನೀಡುವ ಮತ್ತೊಂದು ಆಶಾದಾಯಕ ಹೆಜ್ಜೆ. ಇದರಿಂದ ತೈಲ ಆಮದು ಕಡಿಮೆ ಆಗುವುದಲ್ಲದೆ, ಪರಿಸರ ಮಾಲಿನ್ಯದ ವಿರುದ್ಧದ ಹೋರಾಟದಲ್ಲಿ ಭಾರತವನ್ನು ಜಾಗತಿಕ ಮಟ್ಟದಲ್ಲಿ ಮುಂಚೂಣಿಯಲ್ಲಿ ನಿಲ್ಲಿಸಲಿದೆ. ತಾಂತ್ರಿಕ ಸವಾಲುಗಳನ್ನು ಸಮರ್ಥವಾಗಿ ನಿಭಾಯಿಸಿ, ವ್ಯವಸ್ಥಿತವಾಗಿ ಜಾರಿಗೊಳಿಸಿದರೆ, ಈ ಯೋಜನೆ ದೇಶದ ಆರ್ಥಿಕತೆ, ಪರಿಸರ ಮತ್ತು ಕೃಷಿ ಈ ಮೂರೂ ವಲಯಗಳಿಗೂ ‘ತ್ರಿವೇಣಿ ಸಂಗಮ’ದಂತೆ ಕೆಲಸ ಮಾಡಿ ಲಾಭ ತಂದುಕೊಡಬಲ್ಲದು.

ನಾಲ್ಕು ಕಾರ್ಬನ್ ಪರಮಾಣುಗಳನ್ನು ಹೊಂದಿರುವ ಒಂದು ಪ್ರಮುಖ ಆಲ್ಕೋಹಾಲ್​ಗೆ ಐಸೊಬ್ಯುಟನಾಲ್ ಎನ್ನುತ್ತಾರೆ. ಇದನ್ನು ಕೂಡ ಎಥನಾಲ್​ನಂತೆ ಜೈವಿಕ ಮೂಲಗಳಿಂದಲೇ, ಅಂದರೆ ಕಬ್ಬಿನ ಸಿಪ್ಪೆ, ಜೋಳ, ಕೃಷಿ ತ್ಯಾಜ್ಯ ಮತ್ತು ಇತರ ಜೈವಿಕ ರಾಸಾಯನಿಕ ಪ್ರಕ್ರಿಯೆಗಳ ಮೂಲಕ ಉತ್ಪಾದಿಸಲಾಗುತ್ತದೆ. ದ್ವಿತೀಯ ಪೀಳಿಗೆಯ ಜೈವಿಕ ಇಂಧನ -ಸೆಕೆಂಡ್ ಜನರೇಷನ್ ಬಯೋ ಫ್ಯುಯೆಲ್- ಎಂಬ ಹೆಸರೂ ಇದಕ್ಕಿದೆ. ಎಥನಾಲ್​ಗೆ

ಹೋಲಿಸಿದರೆ ಐಸೊಬ್ಯುಟನಾಲ್ ಹೆಚ್ಚಿನ ಇಂಧನ ಸಾಂದ್ರತೆ ಮತ್ತು ಕಡಿಮೆ ತೇವಾಂಶ ಹೀರಿಕೊಳ್ಳುವ ಗುಣವನ್ನು ಹೊಂದಿದೆ. ಹೀಗಾಗಿ, ಇದನ್ನು ಡೀಸೆಲ್ ಜತೆ ಸುಲಭವಾಗಿ ಮಿಶ್ರಣ ಮಾಡಬಹುದು. ಇದು ಎಂಜಿನ್​ಗಳ ದಕ್ಷತೆ ಕಾಯ್ದುಕೊಳ್ಳಲು ಸಹಾಯ ಮಾಡುತ್ತದೆ ಎನ್ನುತ್ತಾರೆ ವಿಜ್ಞಾನಿಗಳು.

ಐಸೊಬ್ಯುಟನಾಲ್ ಸಾಮಾನ್ಯ ವಾಹನಗಳಿಗಷ್ಟೇ ಅಲ್ಲ, ಜಗತ್ತಿನ ಅತ್ಯಂತ ವೇಗದ ರೇಸಿಂಗ್ ಕಾರುಗಳಿಗೂ ಸೂಕ್ತ ಇಂಧನ. ಇದರ ಗರಿಷ್ಠ ಆಕ್ಟೇನ್ ಮತ್ತು ಸೆಟೇನ್ ರೇಟಿಂಗ್ ಗುಣಲಕ್ಷಣಗಳಿಂದಾಗಿ ಪ್ರಮುಖ ಅಂತಾರಾಷ್ಟ್ರೀಯ ರೇಸ್​ಗಳಲ್ಲಿ ಇದನ್ನು ಹೈ ಪರ್ಫಾರ್ವೆನ್ಸ್ ಇಂಧನವಾಗಿ ಬಳಸಲಾಗುತ್ತಿದೆ.

ಡೀಸೆಲ್ ವಾಹನಗಳು ಪ್ರಮುಖವಾಗಿ ಕಣರೂಪದ ದ್ರವ್ಯಗಳನ್ನು (ಪಾರ್ಟಿಕ್ಯುಲೇಟ್ ಮ್ಯಾಟರ್ - ಪಿಎಂ 2.5) ಮತ್ತು ನೈಟ್ರೋಜನ್ ಆಕ್ಸೈಡ್​ಅನ್ನು ಹೆಚ್ಚಿನ ಪ್ರಮಾಣದಲ್ಲಿ ಹೊರಸೂಸುತ್ತವೆ. ಇದು ನಗರ ಪ್ರದೇಶಗಳಲ್ಲಿ ತೀವ್ರ ವಾಯು ಮಾಲಿನ್ಯ ಮತ್ತು ಉಸಿರಾಟದ ಸಮಸ್ಯೆಗಳಿಗೆ ಕಾರಣವಾಗುತ್ತಿದೆ.

ಭಾರತದಲ್ಲಿ ಬಳಕೆಯಾಗುವ ಒಟ್ಟು ಸಾರಿಗೆ ಇಂಧನದಲ್ಲಿ ಡೀಸೆಲ್ ಸಿಂಹಪಾಲು ಹೊಂದಿದೆ. ಟ್ರಾ್ಯಕ್ಟರ್ ಮತ್ತಿತರ ಕೃಷಿ ಉಪಕರಣಗಳು, ಸರಕು ಸಾಗಣೆ ಲಾರಿಗಳು, ಬಸ್​ಗಳು, ರೈಲ್ವೆ ಮುಂತಾದವು ಪ್ರಮುಖವಾಗಿ ಡೀಸೆಲ್​ಅನ್ನೇ ಅವಲಂಬಿಸಿವೆ. ಆದ್ದರಿಂದ, ಡೀಸೆಲ್ ಬಳಕೆಯನ್ನು ಪರಿಸರಸ್ನೇಹಿಯಾಗಿಸುವುದು ಕೇಂದ್ರ ಸರ್ಕಾರದ ಉದ್ದೇಶವಾಗಿದೆ.

ಆಮದು ವೆಚ್ಚ ಕಡಿತ: ಭಾರತ ತನಗಾಗುವ ಕಚ್ಚಾ ತೈಲದ ಅವಶ್ಯಕತೆಯಲ್ಲಿ ಶೇ. 80ಕ್ಕಿಂತ ಹೆಚ್ಚು ಭಾಗವನ್ನು ವಿದೇಶಗಳಿಂದ ಆಮದು ಮಾಡಿಕೊಳ್ಳುತ್ತದೆ. ಡೀಸೆಲ್​ಗೆ ಐಸೊಬ್ಯುಟನಾಲ್ ಮಿಶ್ರಣ ಮಾಡುವುದರಿಂದ ಪ್ರತಿ ವರ್ಷ ಸಾವಿರಾರು ಕೋಟಿ ರೂ.ಗಳ ವಿದೇಶಿ ವಿನಿಮಯ ಉಳಿತಾಯವಾಗುತ್ತದೆ.

ಕಾರ್ಬನ್ ಹೊರಸೂಸುವಿಕೆ ನಿಯಂತ್ರಣ: ಜಾಗತಿಕ ಹವಾಮಾನ ಬದಲಾವಣೆ ಸಮ್ಮೇಳನಗಳಲ್ಲಿ ಭಾರತ ನೀಡಿದ ಭರವಸೆಯಂತೆ, 2070ರ ವೇಳೆಗೆ ನೆಟ್ ಜೀರೋ ಕಾರ್ಬನ್ ಹೊರಸೂಸುವಿಕೆ ಗುರಿಯನ್ನು ತಲುಪಲು ಈ ಯೋಜನೆ ಸಹಕಾರಿಯಾಗಿದೆ.

ರೈತರ ಆದಾಯ ವೃದ್ಧಿ: ಐಸೊಬ್ಯುಟನಾಲ್ ಉತ್ಪಾದನೆಗೆ ಕೃಷಿ ತ್ಯಾಜ್ಯ, ಒಣ ಗಿದ ಹುಲ್ಲು, ಕಬ್ಬಿನ ಉಪ ಉತ್ಪನ್ನಗಳನ್ನು ಬಳಸುವುದರಿಂದ ಕೃಷಿ ತ್ಯಾಜ್ಯಕ್ಕೂ ಉತ್ತಮ ಬೆಲೆ ಸಿಕ್ಕಂತಾಗುತ್ತದೆ. ಗ್ರಾಮೀಣ ಆರ್ಥಿಕತೆ ಬಲಗೊಳ್ಳುತ್ತದೆ.

ಯೋಜನೆ ಆಕರ್ಷಕವಾಗಿದ್ದರೂ, ಇದನ್ನು ತಳಮಟ್ಟದಲ್ಲಿ ಯಶಸ್ವಿಯಾಗಿ ಅನುಷ್ಠಾನಗೊಳಿಸಲು ಸರ್ಕಾರ ಕೆಲವು ಸವಾಲುಗಳನ್ನು ಎದುರಿಸಬೇಕಾಗುತ್ತದೆ.

ಉತ್ಪಾದನಾ ವೆಚ್ಚ: ಪ್ರಸ್ತುತ ಐಸೊಬ್ಯುಟನಾಲ್ ಉತ್ಪಾದನಾ ತಂತ್ರಜ್ಞಾನ ಎಥನಾಲ್​ಗಿಂತ ಸ್ವಲ್ಪ ದುಬಾರಿ ಯಾಗಿದೆ. ವಾಣಿಜ್ಯಿಕವಾಗಿ ಇದನ್ನು ದೊಡ್ಡ ಪ್ರಮಾಣದಲ್ಲಿ ಉತ್ಪಾದಿಸಲು ತಂತ್ರಜ್ಞಾನದ ಸುಧಾರಣೆ ಅಗತ್ಯವಿದೆ.

ಕಚ್ಚಾ ವಸ್ತುವಿನ ನಿರಂತರ ಪೂರೈಕೆ: ವರ್ಷದ ಎಲ್ಲ ದಿನಗಳಲ್ಲೂ ಜೈವಿಕ ತ್ಯಾಜ್ಯ ಮತ್ತು ಕೃಷಿ ಉತ್ಪನ್ನಗಳು ಒಂದೇ ಪ್ರಮಾಣದಲ್ಲಿ ಲಭ್ಯವಿರುವುದನ್ನು ಖಚಿತಪಡಿಸಿಕೊಳ್ಳಲು ಬಲವಾದ ಪೂರೈಕೆ ಸರಪಳಿ ವ್ಯವಸ್ಥೆ ಬೇಕಾಗುತ್ತದೆ.

ತೈಲ ಕಂಪನಿಗಳ ಸಿದ್ಧತೆ: ದೇಶದ ಪ್ರಮುಖ ತೈಲ ಮಾರುಕಟ್ಟೆ ಕಂಪನಿಗಳಾದ ಐಒಸಿಎಲ್, ಬಿಪಿಸಿಎಲ್, ಎಚ್​ಪಿಸಿಎಲ್ ತಮ್ಮ ಸಂಗ್ರಹಣಾ ಗೋದಾಮುಗಳು ಮತ್ತು ಬ್ಲೆಂಡಿಂಗ್ (ಮಿಶ್ರಣ) ಘಟಕಗಳನ್ನು ಆಧುನೀಕರಿಸಬೇಕಾಗುತ್ತದೆ.

ಬೆಲೆ ನಿಗದಿ: ಗ್ರಾಹಕರಿಗೆ ಹೊರೆಯಾಗದಂತೆ ಮತ್ತು ಉತ್ಪಾದಕರಿಗೂ ನಷ್ಟವಾಗದಂತೆ ಐಸೊಬ್ಯುಟನಾಲ್ ಮಿಶ್ರಿತ ಡೀಸೆಲ್​ನ ಬೆಲೆಯನ್ನು ನಿಯಂತ್ರಿಸುವುದು ಸರ್ಕಾರಕ್ಕೆ ಸವಾಲಿನ ಕೆಲಸವಾಗುತ್ತದೆ.

ಈ ಯೋಜನೆಯನ್ನು ಯಶಸ್ವಿಗೊಳಿಸಲು ಕೇಂದ್ರ ಸರ್ಕಾರ ಹಂತಹಂತವಾಗಿ ಕಾರ್ಯಪ್ರವೃತ್ತವಾಗಲು ಯೋಜಿಸಿದೆ.

ಕೇಂದ್ರದ ಈ ನಿರ್ಧಾರದಿಂದಾಗುವ ಪ್ರಭಾವ ಕೇವಲ ಇಂಧನ ವಲಯಕ್ಕೆ ಸೀಮಿತವಾಗಿರದೆ, ದೇಶದ ಒಟ್ಟಾರೆ ಆರ್ಥಿಕತೆಯ ಮೇಲೆ ಬಹುಮುಖಿ ಪರಿಣಾಮ ಬೀರಲಿದೆ.

ರೈತರು ಕೇವಲ ಅನ್ನದಾತರಲ್ಲ, ಇನ್ನು ಮುಂದೆ ಅವರು ಇಂಧನದಾತರೂ ಹೌದು. ಜೈವಿಕ ಸಂಸ್ಕರಣಾಗಾರಗಳ (ಬಯೋ ರಿಫೈನರ್ಸ್) ಸ್ಥಾಪನೆ: ದೇಶದಾದ್ಯಂತ ಹೊಸ ಐಸೊಬ್ಯುಟನಾಲ್ ಉತ್ಪಾದನಾ ಘಟಕಗಳು ಸ್ಥಾಪನೆಯಾಗುವುದರಿಂದ ಕೈಗಾರಿಕಾ ವಲಯದಲ್ಲಿ ಹೂಡಿಕೆ ಹೆಚ್ಚುತ್ತದೆ.

ಉದ್ಯೋಗ ಸೃಷ್ಟಿ: ಗ್ರಾಮೀಣ ಮತ್ತು ಅರೆನಗರ ಪ್ರದೇಶಗಳಲ್ಲಿ ಕೃಷಿ ತ್ಯಾಜ್ಯ ಸಂಗ್ರಹಣೆ, ಸಾಗಣೆ ಮತ್ತು ಸಂಸ್ಕರಣಾ ಘಟಕಗಳಲ್ಲಿ ಲಕ್ಷಾಂತರ ಜನರಿಗೆ ಪ್ರತ್ಯಕ್ಷ ಹಾಗೂ ಪರೋಕ್ಷ ಉದ್ಯೋಗಾವಕಾಶಗಳು ಸೃಷ್ಟಿಯಾಗಲಿವೆ.

ಸಕ್ಕರೆ ಕಾರ್ಖಾನೆಗಳಿಗೆ ವರ: ಕಬ್ಬಿನಿಂದ ಸಕ್ಕರೆ ಉತ್ಪಾದನೆ ಮಾತ್ರವಲ್ಲದೆ, ಉಪಉತ್ಪನ್ನಗಳಿಂದ ಐಸೊಬ್ಯುಟನಾಲ್ ತಯಾರಿಸುವುದರಿಂದ ಸಕ್ಕರೆ ಕಾರ್ಖಾನೆಗಳ ಆರ್ಥಿಕ ಪರಿಸ್ಥಿತಿ ಸುಧಾರಿಸಿ, ರೈತರಿಗೆ ಸಕಾಲದಲ್ಲಿ ಬಾಕಿ ಹಣ ಪಾವತಿಸಲು ಸಾಧ್ಯವಾಗುತ್ತದೆ.

ಶೇಖರಣೆ ಸುಲಭ

ಎಥನಾಲ್ ನೀರನ್ನು ಬೇಗನೆ ಹೀರಿಕೊಳ್ಳುವು ದರಿಂದ ಅದನ್ನು ಹೆಚ್ಚು ದಿನಗಳ ಕಾಲ ಇಡಲಾಗುವುದಿಲ್ಲ. ಆದರೆ, ಐಸೊಬ್ಯುಟನಾಲ್ ನೀರಿನೊಂದಿಗೆ ಬೆರೆಯದ ಗುಣ (ಹೈಡ್ರೋಫೋಬಿಕ್) ಹೊಂದಿರುವುದರಿಂದ, ಇದನ್ನು ವರ್ಷಗಟ್ಟಲೆ ಶೇಖರಿಸಿಟ್ಟರೂ ಇಂಧನದ ಗುಣಮಟ್ಟ ಕೆಡುವುದಿಲ್ಲ.

ಐಸೊಬ್ಯುಟನಾಲ್​ಅನ್ನು ರಾಸಾಯನಿಕ ಪ್ರಕ್ರಿಯೆಗಳ ಮೂಲಕ ಬಯೋ-ಜೆಟ್ ಫ್ಯುಯೆಲ್ ಆಗಿ ಸುಲಭವಾಗಿ ಪರಿವರ್ತಿಸ ಬಹುದು. ಇದರಿಂದ ಭವಿಷ್ಯದಲ್ಲಿ ವಿಮಾನಯಾನ ವಲಯದಲ್ಲೂ ಈ ಇಂಧನವನ್ನು ಬಳಸಬಹುದಾಗಿದೆ.

ಅತ್ಯಾಧುನಿಕ ಬಯೋಟೆಕ್ನಾಲಜಿ ನೆರವಿನಿಂದ ವಿಶೇಷವಾಗಿ ವಿನ್ಯಾಸಗೊಳಿಸಿದ ಇ-ಕೋಲಿ ಬ್ಯಾಕ್ಟೀರಿಯಾಗಳನ್ನು ಬಳಸಿ ಕೃಷಿ ತ್ಯಾಜ್ಯದಿಂದ ಅತ್ಯಂತ ವೇಗವಾಗಿ ಐಸೊಬ್ಯುಟನಾಲ್ ಉತ್ಪಾದಿಸುವ ಸಂಶೋಧನೆಗಳು ಪ್ರಗತಿಯಲ್ಲಿವೆ.

ಐಸೊಬ್ಯುಟನಾಲ್​ಅನ್ನು ಕೇವಲ ಇಂಧನವಾಗಿ ಮಾತ್ರವಲ್ಲದೆ, ಪೆಟ್ರೋಕೆಮಿಕಲ್ ಉದ್ಯಮದಲ್ಲಿ ಪರಿಸರಸ್ನೇಹಿ ಪ್ಲಾಸ್ಟಿಕ್ (ಬಯೋ-ಪ್ಲಾಸ್ಟಿಕ್), ರಬ್ಬರ್ ಮತ್ತು ನೂಲು ತಯಾರಿಸಲು ಪ್ರಮುಖ ಕಚ್ಚಾವಸ್ತುವಾಗಿ ಬಳಸಬಹುದು.