CBSC OSM ವಿವಾದ; ಪ್ರಧಾನಿಗೆ ಮಕ್ಕಳ ಭವಿಷ್ಯ ಬೇಕಾಗಿಲ್ಲ, ತಮ್ಮ ಸರ್ಕಾರ ಉಳಿಯುವ ಬಗ್ಗೆ ಮಾತ್ರ ಕಾಳಜಿ; ಮೋದಿ ವಿರುದ್ಧ ರಾಹುಲ್ ಕಿಡಿ

ನವದೆಹಲಿ: ಕೇಂದ್ರೀಯ ಪ್ರೌಢ ಶಿಕ್ಷಣ ಮಂಡಳಿಯ(CBSE) ಆನ್-ಸ್ಕ್ರೀನ್ ಮಾರ್ಕಿಂಗ್(OSM) ವ್ಯವಸ್ಥೆಯ ಸುತ್ತಲಿನ ವಿವಾದದ ಬಗ್ಗೆ ಪ್ರಧಾನಿ ಮೋದಿ ವಿರುದ್ಧ ವಾಗ್ದಾಳಿ ನಡೆಸಿರುವ ವಿರೋಧ ಪಕ್ಷದ ನಾಯಕ ರಾಹುಲ್ ಗಾಂಧಿ,  ಪ್ರಧಾನಿಗೆ ಮಕ್ಕಳ ಭವಿಷ್ಯ ಬೇಕಾಗಿಲ್ಲ, ತಮ್ಮ ಸರ್ಕಾರ ಉಳಿಯುವ ಬಗ್ಗೆ ಮಾತ್ರ ಕಾಳಜಿ ಎಂದು ಕಿಡಿಕಾರಿದ್ದಾರೆ.

ಈ ಕುರಿತು ಎಕ್ಸ್​ನಲ್ಲಿ ಸುದೀರ್ಘ ಪೋಸ್ಟ್ ಮಾಡಿರುವ ಅವರು, ಡಿಜಿಟಲ್ ಮೌಲ್ಯಮಾಪನ ಒಪ್ಪಂದವನ್ನು ಹೇಗೆ ನೀಡಲಾಯಿತು ಮತ್ತು ನಿರ್ದಿಷ್ಟ ಕಂಪನಿಗೆ ಅನುಕೂಲವಾಗುವಂತೆ ಟೆಂಡರ್ ಷರತ್ತುಗಳನ್ನು ಕ್ರಮೇಣ ಹೇಗೆ ಸಡಿಲಿಸಲಾಯಿತು, ಈ ಸ್ಟೋರಿಯನ್ನು ಗಮನವಿಟ್ಟು ಓದಿ ಎಂದು ಕರೆ ನೀಡಿದ್ದಾರೆ.

'CBSE ಮೂರು ಬಾರಿ OSM ಟೆಂಡರ್‌ಗಳನ್ನು ಕರೆದಿದೆ. ಮೊದಲ ಬಾರಿಗೆ ಶೂನ್ಯ ಬಿಡ್‌ಗಳು. ಎರಡನೇ ಬಾರಿಗೆ ಯಾವುದೇ ಅರ್ಹ ಬಿಡ್​ದಾರರು ಇರಲಿಲ್ಲ. ಅಂತಿಮವಾಗಿ COEMPTಗಾಗಿ ತಾಂತ್ರಿಕ ಪಟ್ಟಿಯನ್ನು ಕಡಿಮೆ ಮಾಡಲಾಯಿತು. ಸ್ಕ್ಯಾನಿಂಗ್ ರೆಸಲ್ಯೂಶನ್ ಕಡಿತ ಮಾಡಿತು, ರೊಬೊಟಿಕ್ ಸ್ಕ್ಯಾನರ್ ಅವಶ್ಯಕತೆಯನ್ನು ಕೈಬಿಡಲಾಯಿತು. CMMI ಪ್ರಮಾಣೀಕರಣವನ್ನು ಹಂತ 5 ರಿಂದ ಹಂತ 3 ಕ್ಕೆ ಇಳಿಸಲಾಗಿದೆ. ಉತ್ತರ ಪತ್ರಿಕೆಗಳಲ್ಲಿನ ದೋಷಗಳಿಗೆ ದಂಡವನ್ನು ತೆಗೆದುಹಾಕಲಾಯಿತು.

ಭಾರತದ ಅತಿದೊಡ್ಡ ಐಟಿ ಸೇವೆಗಳ ಕಂಪನಿಯಾದ ಟಿಸಿಎಸ್ ಮೂರನೇ ಸುತ್ತಿನಲ್ಲಿಯೂ ಅರ್ಹತೆಯನ್ನು ಗಳಿಸಿತು. ಆದರೂ ಬಿಡ್​ ಪಡೆಯುವಲ್ಲಿ ಸೋತಿತು. ಇನ್ನೂ ವೈಫಲ್ಯದ ಅದ್ಭುತ ದಾಖಲೆಯನ್ನು ಹೊಂದಿರುವ COEMPT ಕಂಪನಿ ಗೆದ್ದಿತು. ಇಂದು ಸಿಬಿಎಸ್‌ಇ ವಿದ್ಯಾರ್ಥಿಗಳು ಏನು ದೂರುತ್ತಿದ್ದಾರೆ? ಸರಿಯಾಗಿ ಸ್ಕ್ಯಾನ್ ಮಾಡದ ಉತ್ತರ ಪತ್ರಿಕೆಗಳು. ಪುಟಗಳು ಕಾಣೆಯಾಗಿವೆ. ಮುರಿದ ಮೌಲ್ಯಮಾಪನ ಪೋರ್ಟಲ್ ಬಗ್ಗೆ ಪ್ರಶ್ನೆಗಳನ್ನೆತ್ತಿದ್ದಾರೆ. 

ಇನ್ನೂ ದೇಶಾದ್ಯಂತ ಜಾರಿಗೆ ತರುವ ಮೊದಲು OSM ವ್ಯವಸ್ಥೆಗೆ ಹೆಚ್ಚಿನ ಸಿದ್ಧತೆಗಾಗಿ ಕನಿಷ್ಠ ಒಂದು ಅಥವಾ ಎರಡು ವರ್ಷಗಳು ಬೇಕಾಗುತ್ತದೆ ಎಂದು ಶಿಕ್ಷಕರು ಸಿಬಿಎಸ್‌ಇಗೆ ಎಚ್ಚರಿಕೆ ನೀಡಿದ್ದರು, ಆದರೆ ಅದನ್ನು ತರಾತುರಿಯಲ್ಲಿ ಜಾರಿಗೆ ತರಲಾಯಿತು. ಈಗ ನಾನು ಮತ್ತೊಮ್ಮೆ ಕೇಳ್ತಿದ್ದೇನೆ. COEMPT ಗೆಲ್ಲಬೇಕೆಂದು ಯಾರು ಬಯಸಿದ್ದರು? ಯಾಕಾಗಿ ಈ ಕಂಪನಿಗಾಗಿ ಹಂತ ಹಂತವಾಗಿ ನಿಯಮಗಳನ್ನು ಸಡಿಲಿಸಲಾಯಿತು ಎಂದು ಪ್ರಶ್ನಿಸಿದ್ದಾರೆ.

ಮುಂದುವರೆದು ಕೇಂದ್ರ ಉನ್ನತ ಶಿಕ್ಷಣ ಸಚಿವ ಪ್ರಧಾನ್ ಅವರು ಸಿಬಿಎಸ್ಇ ಸರಿಯಾದ ಪ್ರಕ್ರಿಯೆ ಅನುಸರಿಸಿದೆ ಎನ್ನುತ್ತಾರೆ. ಆದರೆ ಅದು ಉತ್ತರವಲ್ಲ, ಅದು ಹೊಣೆಗಾರಿಕೆಯೂ ಅಲ್ಲ. ಕೆಲಸವನ್ನು ಸರಿಯಾಗಿ ಮಾಡಬಲ್ಲ ಅತ್ಯುತ್ತಮ ಕಂಪನಿಗೆ ಪ್ರಾಮಾಣಿಕವಾಗಿ ಒಪ್ಪಂದವನ್ನು ನೀಡಲಾಗಿದೆಯೇ ಎಂಬುದು ಪ್ರಶ್ನೆ. ನಿಯಮಗಳನ್ನು ಕಡಿತಗೊಳಿಸಿದ ನಂತರವೇ ಅರ್ಹತೆ ಪಡೆಯಬಹುದಾದ ಕಂಪನಿಗೆ 18.5 ಲಕ್ಷ ಮಕ್ಕಳ ಭವಿಷ್ಯವನ್ನು ಹಸ್ತಾಂತರಿಸಲಾಗಿದೆ ಎಂದು ಆರೋಪಿಸಿದ್ದಾರೆ.

ಪ್ರಶ್ನೆಗಳನ್ನು ಕೇಳಿದ್ದಕ್ಕಾಗಿ ನನ್ನ ಮೇಲೆ ಬಿಜೆಪಿ ಸಚಿವರು ದಾಳಿ ಮಾಡ್ತಿದ್ದಾರೆ. ಅವರಿಗೆ ನಾನು ಮೊದಲ ದಿನದಿಂದಲೂ ಸ್ವತಂತ್ರ ನ್ಯಾಯಾಂಗ ತನಿಖೆಗೆ ಒತ್ತಾಯಿಸುತ್ತಿದ್ದೇನೆ. CBSE ಯಿಂದ COEMPTಗೆ ನೀಡಲಾದ ಪ್ರತಿಯೊಂದು ಒಪ್ಪಂದವನ್ನು ತನಿಖೆ ನಡೆಸಿ, ಸತ್ಯ ತಿಳಿದುಕೊಳ್ಳಲು ನಮ್ಮ ಯುವಕರು ಅರ್ಹರು.

ಪ್ರಧಾನಿ ಮೋದಿಯವರೇ ಸಿಬಿಎಸ್​ಇ ಮತ್ತು ಶಿಕ್ಷಣ ಸಚಿವರ ವೈಫಲ್ಯದ ಬಗೆಗಿನ ನಿಮ್ಮ ಮೌನವು ನೀವು ನಿಜವಾಗಿಯೂ ಏನು ಕಾಳಜಿ ವಹಿಸುತ್ತೀರಿ ಎಂಬುದನ್ನು ದೇಶ ನೋಡುತ್ತಿದೆ. ಲಕ್ಷಾಂತರ ವಿದ್ಯಾರ್ಥಿಗಳ ಭವಿಷ್ಯದ ಬಗ್ಗೆ ಅಲ್ಲ, ನಿಮ್ಮ ಸ್ವಂತ ಸರ್ಕಾರದ ಉಳಿವಿನ ಬಗ್ಗೆ ಮಾತ್ರ ನಿಮಗೆ ಕಾಳಜಿ ಇದೆ ಎಂದು ಕಿಡಿಕಾರಿದ್ದಾರೆ (ಏಜೆನ್ಸೀಸ್).