ಹೆಣವನ್ನು ಹೆಗಲ ಮೇಲೆ ಹೊತ್ತು ಸಾಗಿದ ಕುಟುಂಬ: ಕಾಂಗ್ರೆಸ್‌ಗೆ ಒಂದು ಅಂಬ್ಯುಲೆನ್ಸ್ ನೀಡುವ ಯೋಗ್ಯತೆಯಿಲ್ಲ; ತೆಲಂಗಾಣ ಸರ್ಕಾರದ ವಿರುದ್ಧ ಬಿಆರ್‌ಎಸ್ ಕೆಂಡಾಮಂಡಲ! Carrying Dead Body on Shoulders

ತೆಲಂಗಾಣ: ಇಡೀ ನಾಗರಿಕ ಸಮಾಜವೇ ತಲೆ ತಗ್ಗಿಸುವ ಘಟನೆಯೊಂದು ತೆಲಂಗಾಣದ ಭದ್ರಾಚಲಂ ಪಟ್ಟಣದಲ್ಲಿ ನಡೆದಿದ್ದು, ಆಸ್ಪತ್ರೆಯಲ್ಲಿ ಮರಣಹೊಂದಿದ ಶವವೊಂದನ್ನು ಕುಟುಂಬದವರು ಹೆಗಲ ಮೇಲೆ ಹೊತ್ತು (Carrying Dead Body on Shoulders) ಮನೆಗೆ ಸಾಗಿಸುತ್ತಿರುವ ವಿಡಿಯೋ ಸೋಷಿಯಲ್​ ಮೀಡಿಯಾನಲ್ಲಿ ವೈರಲ್​ ಆಗುತ್ತಿದೆ.

ಭದ್ರಾಚಲಂ ಪಟ್ಟಣದ ನಿವಾಸಿ ಕಂಡೆ ವೆಂಕಣ್ಣ (42) ಎಂಬ ವ್ಯಕ್ತಿ ತೀವ್ರ ಶಾಖದ ಹೊಡೆತ (Heatstroke) ಕ್ಕೆ ಒಳಗಾದ ಹಿನ್ನಲೆ ಭಾನುವಾರ (ಮೇ.24) ಹತ್ತಿರದ ಆಸ್ಪತ್ರೆಗೆ ಸೇರಿಸಲಾಗಿತ್ತು.

ಮೃತನ ಕುಟುಂಬ ಆರ್ಥಿಕವಾಗಿ ದುರ್ಬಲರಾಗಿರುವ ಕಾರಣ ಖಾಸಗಿ ವಾಹನವನ್ನು ವ್ಯವಸ್ಥೆ ಮಾಡಿಕೊಳ್ಳಲು ಸಾಧ್ಯವಾಗಿಲ್ಲ. ಹೇಗಾದರೂ ಮಾಡಿ ಒಂದು ಗಾಡಿ ವ್ಯವಸ್ಥೆ ಮಾಡಿಕೊಡಿ ಎಂದು ಆಸ್ಪತ್ರೆಯಲ್ಲಿಯೇ ಸುಮಾರು 2-3 ಗಂಟೆ ಕಾದಿದ್ದಾರೆ. ಆದರೆ ಆಸ್ಪತ್ರೆಯವರು ಇದಕ್ಕೆ ಕ್ಯಾರೆ ಎನ್ನದ ಕಾರಣ ಹೆಣವನ್ನು ಹೆಗಲ ಮೇಲೆ ಹೊತ್ತು ಮನೆಯತ್ತ ಸಾಗಿದ್ದಾರೆ.

ಹೀಗೆ ಹೆಣವನ್ನು ಹೊತ್ತು ತಿರುಗುತ್ತಿರುವ ಫೋಟೊ ಹಾಗೂ ವಿಡಿಯೋಗಳು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್​ ಆಗುತ್ತಿದ್ದಂತೆ ಈ ಘಟನೆ ರಾಜಕೀಯ ಸ್ವರೂಪ ಪಡೆದುಕೊಂಡಿದೆ.

ಹಿಂದೆ ಬಿಆರ್​ಎಸ್​ ಪಕ್ಷದ ಆಡಳಿತವಿದ್ದಾಗ ಬಡವರು ತಲೆ ಎತ್ತಿ ನಡೆಯುತ್ತಿದ್ದರು, ಅವರಿಗೆ ಸರಿಯಾದ ಗೌರವವನ್ನು ನಾವು ನೀಡಿದ್ದೆವು. ಆದರೆ ಈ ಕಾಂಗ್ರೆಸ್​ ಪಕ್ಷಕ್ಕೆ ಒಂದು ಅಂಬ್ಯುಲೆನ್ಸ್​ ನೀಡುವ ಯೋಗ್ಯತೆಯಿಲ್ಲ ಎಂದು ಕಿಡಿ ಕಾರಿದ್ದಾರೆ, (ಏಜನ್ಸೀಸ್​).