ಚಿನ್ನ ಖರೀದಿಗೆ ಬ್ರೇಕ್​! ಪ್ರಧಾನಿ ನರೇಂದ್ರ ಮೋದಿ ಮತ್ತೆ ಮತ್ತೆ ಮನವಿ ಮಾಡುತ್ತಿರುವುದು ಏಕೆ?

ಚಿನ್ನ ಖರೀದಿಸದಂತೆ ಪ್ರಧಾನಿ ನರೇಂದ್ರ ಮೋದಿ ಅವರು ಕಳೆದ ನಾಲ್ಕು ತಿಂಗಳಲ್ಲಿ ಎರಡನೇ ಬಾರಿಗೆ ಮನವಿ ಮಾಡಿದ್ದಾರೆ. ಇತ್ತೀಚೆಗೆ ರ್ಕಿಗಿಸ್ತಾನ್ ಪ್ರವಾಸದ ನಡುವೆಯೇ ಇನ್​ಸ್ಟಾಗ್ರಾಮ್ ರೀಲ್ ಮಾಡಿ, ‘ಅಗತ್ಯವಿಲ್ಲದಿದ್ದರೆ ಚಿನ್ನವನ್ನು ಖರೀದಿಸಬೇಡಿ’ ಎಂದು ಹೇಳಿದರು. 

ಈ ಹಿಂದೆ ಮೇ 10ರಂದು ಕೂಡ ಚಿನ್ನ ಖರೀದಿಸದಿರುವುದು, ಕಡಿಮೆ ಎಣ್ಣೆ ಬಳಸುವುದು ಮತ್ತು ವಿದೇಶ ಪ್ರವಾಸ ಕೈಗೊಳ್ಳದಿರುವುದು ಸೇರಿದಂತೆ ಏಳು ಮನವಿಗಳನ್ನು ಮಾಡಿದ್ದರು. ಅಷ್ಟಕ್ಕೂ, ಪ್ರಧಾನಿ ಮೋದಿ ಈ ಮನವಿ ಮಾಡಿರುವುದು ದೇಶದ ಡಾಲರ್ ಉಳಿಸುವುದಕ್ಕಾಗಿ. ಚಿನ್ನ ಖರೀದಿಯ ಪ್ರಮಾಣ ತಗ್ಗಿದರೆ ಸದ್ಯದ ಮಟ್ಟಿಗಂತೂ ಆರ್ಥಿಕತೆ ದೃಷ್ಟಿಯಲ್ಲಿ ಪೂರಕ ಹೆಜ್ಜೆ ಇಟ್ಟಂತೆಯೇ. ಚಿನ್ನ ಆಮದು ಕುರಿತಾದ ಆಯಾಮದ ಬಗ್ಗೆ ಇಲ್ಲಿದೆ ವಿವರ.

ಭಾರತವು ತನ್ನ ಬಳಕೆಯ ಹೆಚ್ಚಿನ ಪ್ರಮಾಣದ ಕಚ್ಚಾ ತೈಲ, ಎಲೆಕ್ಟ್ರಾನಿಕ್ಸ್, ಯಂತ್ರೋಪಕರಣಗಳು, ಚಿನ್ನ ಮುಂತಾದವುಗಳನ್ನು ವಿದೇಶಗಳಿಂದಲೇ ಖರೀದಿಸುತ್ತದೆ. ವಿದೇಶಗಳಿಂದ ನಡೆಯುವ ಈ ಖರೀದಿಯ ಲೆಕ್ಕಾಚಾರವನ್ನು ದೇಶದ ಆಮದು ಬಿಲ್ ಎನ್ನಲಾಗುತ್ತದೆ. ಆಮದು ಬಿಲ್ ಅನ್ನು ಹೆಚ್ಚಾಗಿ ಡಾಲರ್​ಗಳಲ್ಲಿ ಪಾವತಿಸಲಾಗುತ್ತದೆ, ಇದನ್ನು ಭಾರತೀಯ ರಿಸರ್ವ್ ಬ್ಯಾಂಕ್​ನ (ಆರ್​ಬಿಐ) ವಿದೇಶಿ ವಿನಿಮಯ ಮೀಸಲು (ಫಾರೆಕ್ಸ್ ರಿಸರ್ವ್) ನಿಧಿಯಿಂದ ಖರ್ಚು ಮಾಡಲಾಗುತ್ತದೆ. ಭಾರತವು ತನ್ನ ಬಳಕೆಯ 90%ರಷ್ಟು ಚಿನ್ನವನ್ನು ವಿದೇಶಗಳಿಂದಲೇ ಆಮದು ಮಾಡಿಕೊಳ್ಳುತ್ತದೆ. 

ಅಂದರೆ, ಹೆಚ್ಚು ಚಿನ್ನ ಖರೀದಿಸಿದಷ್ಟೂ ಹೆಚ್ಚು ಡಾಲರ್​ಗಳನ್ನು ಪಾವತಿಸಬೇಕಾಗುತ್ತದೆ. ಇದರಿಂದ ಆಮದು ಬಿಲ್ ಹೆಚ್ಚಾಗಿ, ಫಾರೆಕ್ಸ್ ರಿಸರ್ವ್ ಕಡಿಮೆಯಾಗುತ್ತದೆ. ಕಳೆದ ಆರ್ಥಿಕ ವರ್ಷದಲ್ಲಿ, ಅಂದರೆ 2025ರ ಏಪ್ರಿಲ್​ನಿಂದ 2026ರ ಮಾರ್ಚ್​ನ ಅವಧಿಯಲ್ಲಿ ಭಾರತವು 6.85 ಲಕ್ಷ ಕೋಟಿ ರೂಪಾಯಿ ಮೌಲ್ಯದ ಚಿನ್ನವನ್ನು ಖರೀದಿಸಿದೆ. ವಿದೇಶಗಳಿಂದ ಆಮದು ಮಾಡಿಕೊಳ್ಳಲಾಗುವ ಒಟ್ಟು ಸರಕುಗಳ ವೆಚ್ಚದಲ್ಲಿ 9% ಪಾಲನ್ನು ಹೊಂದಿರುವ ಚಿನ್ನವು ಎರಡನೇ ಸ್ಥಾನದಲ್ಲಿದೆ. ಆದರೆ, ಕಳೆದ ಆರು ವರ್ಷಗಳಲ್ಲಿ ಚಿನ್ನ ಖರೀದಿಗಾಗಿ ಅಂದರೆ ವಿದೇಶಗಳಿಂದ ಚಿನ್ನ ಆಮದಿಗೆ ಮಾಡುತ್ತಿರುವ ವೆಚ್ಚ ಎರಡೂವರೆ ಪಟ್ಟು ಹೆಚ್ಚಾಗಿದೆ.

ಹೂಡಿಕೆ ಸಲಹಾ ಸಂಸ್ಥೆಯಾದ ಕೇಡಿಯಾ ಅಡ್ವೈಸರಿಯ ವರದಿ ಪ್ರಕಾರ, ಚಿನ್ನ ಖರೀದಿ ಮತ್ತು ವಿದೇಶ ಪ್ರವಾಸಗಳು ಭಾರತದಲ್ಲಿ ಡಾಲರ್​ಗೆ ಇರುವ ಬೇಡಿಕೆಯ ಮೇಲೆ ನೇರ ಪರಿಣಾಮ ಬೀರುತ್ತವೆ. ಚಿನ್ನ ಮತ್ತು ವಿದೇಶ ಪ್ರವಾಸಗಳ ಮೇಲಿನ ಬೇಡಿಕೆ ಕಡಿಮೆಯಾದಂತೆ, ಡಾಲರ್​ಗೆ

ಇರುವ ಬೇಡಿಕೆಯೂ ತಗ್ಗಿ ರೂಪಾಯಿ ಮೌಲ್ಯ ಬಲಗೊಳ್ಳುತ್ತದೆ. ಜೊತೆಗೆ ಭಾರತದ ಚಾಲ್ತಿ ಖಾತೆಯು ಸದೃಢವಾಗುತ್ತದೆ. ಮಧ್ಯಪ್ರಾಚ್ಯ ಸಂಘರ್ಷದಿಂದಾಗಿ ಕಚ್ಚಾ ತೈಲ ಮತ್ತು ರಸಗೊಬ್ಬರಗಳ ಬೆಲೆಗಳು ಏರುತ್ತಿದ್ದು, ಅವುಗಳ ಖರೀದಿಗೆ ಭಾರತಕ್ಕೆ ಹೆಚ್ಚಿನ ಡಾಲರ್​ಗಳ ಅಗತ್ಯವಿದೆ. ಕಚ್ಚಾ ತೈಲ, ಎಲೆಕ್ಟ್ರಾನಿಕ್ಸ್, ಯಂತ್ರೋಪಕರಣಗಳಂತಹ ಅಗತ್ಯ ವಸ್ತುಗಳ ಆಮದನ್ನು ಕಡಿಮೆ ಮಾಡಿದರೆ ಅಥವಾ ನಿಲ್ಲಿಸಿದರೆ ದೇಶದ ದೈನಂದಿನ ಚಟುವಟಿಕೆಗಳು ಮತ್ತು ಆರ್ಥಿಕ ಸ್ಥಿತಿಯ ಮೇಲೆ ನೇರ ಪರಿಣಾಮ ಉಂಟಾಗುತ್ತದೆ. ಆದರೆ ಚಿನ್ನದ ವಿಷಯದಲ್ಲಿ ಹಾಗಲ್ಲ. ಒಮ್ಮೆ ಚಿನ್ನವನ್ನು ಖರೀದಿಸಿದ ನಂತರ ಅದು ಲಾಕರ್​ಗಳಲ್ಲಿಯೇ ಉಳಿದುಬಿಡುತ್ತದೆ; ಇದು ಕೇವಲ ಲಾಭ ಗಳಿಸಲು ಅಥವಾ ಸಂಕಷ್ಟದ ಸಮಯದಲ್ಲಿ ನೆರವಾಗುತ್ತದೆ. ಇದೇ ಕಾರಣಕ್ಕಾಗಿ ಪ್ರಧಾನಿ ಮೋದಿಯವರು ಅನಗತ್ಯವಾಗಿ ಚಿನ್ನ ಖರೀದಿಸದಂತೆ ಮನವಿ ಮಾಡಿದ್ದಾರೆ ಎಂದು ಹೇಳಿದೆ.

ಈ ಮನವಿಯ ನಂತರ ಮತ್ತು ಚಿನ್ನದ ಬೆಲೆಯಲ್ಲಿನ ಏರಿಕೆಯ ಕಾರಣದಿಂದಾಗಿ, ಭಾರತೀಯ ಚಿನ್ನದ ಆಮದುದಾರರು ವಿದೇಶಗಳಿಂದ ಚಿನ್ನ ಖರೀದಿಸುವುದನ್ನು ಕಡಿಮೆ ಮಾಡಿದರು. 2026ರ ಜನವರಿಯಲ್ಲಿ 100 ಟನ್ ಚಿನ್ನವನ್ನು ಖರೀದಿಸಲಾಗಿತ್ತು, ಆದರೆ ಜೂನ್ ವೇಳೆಗೆ ಈ ಪ್ರಮಾಣವು ಕುಸಿದು 19.2 ಟನ್​ಗಳಿಗೆ ತಲುಪಿದೆ.

ಆದರೆ, ಹಬ್ಬಗಳ ಋತು ವಿನಿಂದ ಜುಲೈನಲ್ಲಿ ಮತ್ತೆ 40 ಟನ್ ಚಿನ್ನವನ್ನು ಆಮದು ಮಾಡಿಕೊಳ್ಳಾಗಿದೆ ಎಂಬುದು ಮಾರು ಕಟ್ಟೆ ವಿಶ್ಲೇಷಕರ ಅಂದಾಜು. ಜುಲೈ ಮತ್ತು ಆಗಸ್ಟ್​ನಲ್ಲಿನ ಚಿನ್ನ ಆಮದು ಅಂಕಿಅಂಶಗಳನ್ನು ಸರ್ಕಾರ ಇನ್ನೂ ಬಿಡುಗಡೆ ಮಾಡಿಲ್ಲ.

ವರ್ಲ್ಡ್ ಗೋಲ್ಡ್ ಕೌನ್ಸಿಲ್ ಪ್ರಕಾರ, ಜಗತ್ತಿನಾದ್ಯಂತದ ಕೇಂದ್ರೀಯ ಬ್ಯಾಂಕ್​ಗಳು ಪ್ರತಿ ವರ್ಷ ಸರಾಸರಿ ಒಂದು ಸಾವಿರ ಟನ್ ಶುದ್ಧ ಚಿನ್ನವನ್ನು ಖರೀದಿಸುತ್ತಿವೆ. 2026ರ ಏಪ್ರಿಲ್-ಜೂನ್​ನ ತ್ರೖೆಮಾಸಿಕ ಅವಧಿಯಲ್ಲಿ ಕೇಂದ್ರೀಯ ಬ್ಯಾಂಕ್​ಗಳು ಒಟ್ಟು 289 ಟನ್ ಚಿನ್ನವನ್ನು ಖರೀದಿಸಿವೆ. ವಿಶ್ವದ ಶೇ.73ರಷ್ಟು ಕೇಂದ್ರೀಯ ಬ್ಯಾಂಕ್​ಗಳು ಮುಂದಿನ 5 ವರ್ಷಗಳವರೆಗೆ ತಮ್ಮ ಚಿನ್ನದ ಸಂಗ್ರಹವನ್ನು ಹೆಚ್ಚಿಸಲು ಬಯಸಿವೆ.

1) ಚಿನ್ನ ನಮ್ಮ ಸಂಸ್ಕೃತಿಯೊಂದಿಗೆ ಬೆಸೆದುಕೊಂಡಿದೆ: ಮದುವೆ, ಹಬ್ಬಗಳು ಮತ್ತು ಶುಭ ಸಮಾರಂಭಗಳಲ್ಲಿ ಚಿನ್ನದ ಆಭರಣಗಳು, ನಾಣ್ಯಗಳು, ಬಿಸ್ಕೆಟ್​ಗಳು ಮುಂತಾದವುಗಳನ್ನು ಖರೀದಿಸುವ ಸಂಪ್ರದಾಯವಿದೆ. ಮದುವೆಗಳಲ್ಲಿ ಇದನ್ನು ವಧುವಿನ ಆರ್ಥಿಕ ಭದ್ರತೆ ಮತ್ತು ಸ್ವಾವಲಂಬನೆಗಾಗಿ ‘ಸ್ತ್ರೀಧನ’ವೆಂದು ಪರಿಗಣಿಸಲಾಗುತ್ತದೆ. ಅದೇ ರೀತಿ ಧನ್​ತೇರಸ್, ದೀಪಾವಳಿ, ಅಕ್ಷಯ ತೃತೀಯಾದಂತಹ ವಿಶೇಷ ಸಂದರ್ಭಗಳಲ್ಲಿ ಚಿನ್ನ ಖರೀದಿಸುವುದು ಸಮೃದ್ಧಿ ಮತ್ತು ಅದೃಷ್ಟದ ಸಂಕೇತವೆಂದು ನಂಬಲಾಗಿದೆ.

2) ಚಿನ್ನ ನೀಡುವ ದುಪ್ಪಟ್ಟು ಲಾಭ: ಭಾರತೀಯರಿಗೆ ಕಷ್ಟಕಾಲದ ಮಿತ್ರ ಎಂದೇ ಪರಿಗಣಿಸಲ್ಪಡುವ ಚಿನ್ನವು ಎರಡು ರೀತಿಯ ಲಾಭವನ್ನು ತಂದುಕೊಡುತ್ತದೆ. ಇದನ್ನು ಹೀಗೆ ಅರ್ಥಮಾಡಿಕೊಳ್ಳಬಹುದು. ನೀವು ಕಳೆದ ವರ್ಷ 1 ಲಕ್ಷ ರೂಪಾಯಿಗೆ 10 ಗ್ರಾಂ ಚಿನ್ನವನ್ನು ಖರೀದಿಸಿದ್ದೀರಿ ಎಂದಿಟ್ಟುಕೊಳ್ಳಿ, ಅದರ ಇಂದಿನ ಬೆಲೆ 1.6 ಲಕ್ಷ ರೂಪಾಯಿ, ಅಂದರೆ ಶೇ.60ರಷ್ಟು ಲಾಭ. ಆದರೆ ಇದೇ ಅವಧಿಯಲ್ಲಿ ಜಾಗತಿಕ ಮಾರುಕಟ್ಟೆಯಲ್ಲಿ ಚಿನ್ನದ ಬೆಲೆ 50%ರಷ್ಟು ಮಾತ್ರ ಏರಿಕೆಯಾಗಿದೆ. ಉಳಿದ 10% ಲಾಭವು ಡಾಲರ್ ಎದುರು ರೂಪಾಯಿ ಮೌಲ್ಯ ಕುಸಿದಿದ್ದರಿಂದ ಬಂದಿದೆ. ಇದನ್ನೇ ದುಪ್ಪಟ್ಟು ಲಾಭ ಎನ್ನುತ್ತಾರೆ. ರೂಪಾಯಿ ಮೌಲ್ಯವು ದೀರ್ಘಕಾಲದಿಂದ ದುರ್ಬಲಗೊಳ್ಳುತ್ತಲೇ ಬಂದಿದೆ. ಇದೇ ಕಾರಣಕ್ಕೆ ಭಾರತೀಯರು ಚಿನ್ನದ ಮೇಲೆ ಹೆಚ್ಚು ನಂಬಿಕೆ ಇಡುತ್ತಾರೆ.