ಚಡ್ ದೇ ಇಂಡಿಯಾ ಪೋಸ್ಟರ್ ಮೂಲಕ ರಾಹುಲ್‌ಗೆ ಬಿಜೆಪಿ ಟಾಂಗ್; ವಿಶ್ವವೇ ಅವರ ಮಾತು ಕೇಳಲು ಕಾಯ್ತಿದೆ ಎಂದ ಕಾಂಗ್ರೆಸ್! | Rahul Gandhi

ಬಾಲಿವುಡ್‌ನ ಪ್ರಸಿದ್ಧ ಸಿನಿಮಾಗಳ ಶೀರ್ಷಿಕೆಗಳನ್ನು ಆಧರಿಸಿ ಚಡ್ ದೇ ಇಂಡಿಯಾ (Chhad de India) ಮತ್ತು ಲಾಪತ್ತಾ ರಾಹುಲ್ (Laapata Rahul) ಎಂಬ ಒನ್‌ಲೈನರ್‌ಗಳನ್ನೊಳಗೊಂಡ ಪೋಸ್ಟರ್‌ಗಳನ್ನು ಬಿಜೆಪಿಯ ವಿವಿಧ ರಾಜ್ಯ ಘಟಕಗಳು ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಂಡಿವೆ. ಇಷ್ಟೇ ಅಲ್ಲದೆ, ಗೋ ರಾಹುಲ್ ಗಾನ್, ಟೂರಿಸ್ಟ್ ಜಿಂದಾ ಹೈ ಹಾಗೂ ಪರ್ದೇಸ್ ಎಂಬ ವಿಡಂಬನಾತ್ಮಕ ಪೋಸ್ಟರ್‌ಗಳು ಸದ್ಯ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಸದ್ದು ಮಾಡುತ್ತಿವೆ.

ದೆಹಲಿ ಬಿಜೆಪಿ ಘಟಕವು, ರಾಹುಲ್ ಬಾಬಾಗೆ ಏನು ಇಷ್ಟ? ಸ್ವದೇಶ್ (ತಪ್ಪು ಗುರುತು) ಪರ್ದೇಸ್ (ಸರಿ ಗುರುತು) ಎಂದು ಪ್ರಶ್ನಿಸಿದೆ. ಇತ್ತ ಗೋವಾ ಬಿಜೆಪಿ ಘಟಕವು, #WhereIsRahul? ಥಾಯ್ಲೆಂಡ್‌ನಲ್ಲಿ ರಜೆ ಎಂಜಾಯ್ ಮಾಡುತ್ತಿದ್ದಾರಾ? ಅಥವಾ ಭಾರತದ ವಿರುದ್ಧ ಹೊಸ ಪ್ರಚಾರದ ಸಂಚು ರೂಪಿಸಲು ರಹಸ್ಯ ಪ್ರವಾಸದಲ್ಲಿದ್ದಾರಾ? ಎಂದು ವ್ಯಂಗ್ಯವಾಡಿದೆ. ವಿರೋಧ ಪಕ್ಷದ ನಾಯಕ ಅಲ್ಲ, ಪರ್ಯಟನ್ ನಾಯಕ!. ಬಿಜೆಪಿ ವಕ್ತಾರ ಶೆಹಜಾದ್ ಪೂನಾವಾಲಾ ರಾಹುಲ್ ಗಾಂಧಿ ಅವರ ಹುದ್ದೆಯಾದ LoP (Leader of Opposition) ಎಂಬುದನ್ನು Leader of Paryatan and Partying (ಪ್ರವಾಸ ಮತ್ತು ಪಾರ್ಟಿ ಮಾಡುವ ನಾಯಕ) ಎಂದು ಬದಲಾಯಿಸಿಕೊಳ್ಳಬೇಕು ಎಂದು ಲೇವಡಿ ಮಾಡಿದ್ದಾರೆ. ನಮ್ಮ ಪ್ರಧಾನಿಯವರು ದೇಶಕ್ಕಾಗಿ ಕಷ್ಟಪಟ್ಟು ಕೆಲಸ ಮಾಡುತ್ತಿದ್ದರೆ, ರಾಹುಲ್ ಗಾಂಧಿ ಮಾತ್ರ ಸದಾ ಪ್ರವಾಸ ಮತ್ತು ಪಾರ್ಟಿ ಮೂಡ್‌ನಲ್ಲಿ ಇರುತ್ತಾರೆ ಎಂದು ಟೀಕಿಸಿದ್ದಾರೆ.

ಬಿಜೆಪಿಯ ಈ ಸರಣಿ ಆರೋಪಗಳಿಗೆ ತೀಕ್ಷ್ಣ ಪ್ರತಿಕ್ರಿಯೆ ನೀಡಿರುವ ಕಾಂಗ್ರೆಸ್, ರಾಹುಲ್ ಗಾಂಧಿ ಅವರಿಗೆ ಜಾಗತಿಕ ಮಟ್ಟದಲ್ಲಿ ದೊಡ್ಡ ಮನ್ನಣೆ ಇದೆ ಎಂದು ಸಮರ್ಥಿಸಿಕೊಂಡಿದೆ. ಹಿರಿಯ ಕಾಂಗ್ರೆಸ್ ನಾಯಕ ಸಲ್ಮಾನ್ ಖುರ್ಷಿದ್ ಮಾತನಾಡಿ, ರಾಹುಲ್ ಗಾಂಧಿ ಕೇವಲ ನಮ್ಮ ದೇಶದ ನಾಯಕರಲ್ಲ, ಇಡೀ ವಿಶ್ವವೇ ಅವರನ್ನು ಒಬ್ಬ ಪ್ರಮುಖ ನಾಯಕನಾಗಿ ನೋಡುತ್ತದೆ. ಜಗತ್ತಿನಾದ್ಯಂತದ ಅನೇಕ ಸಂಸ್ಥೆಗಳು ಮತ್ತು ಗಣ್ಯರು ಅವರನ್ನು ಭೇಟಿಯಾಗಲು, ಅವರ ಮಾತುಗಳನ್ನು ಕೇಳಲು ಬಯಸುತ್ತಾರೆ. ನಿರಂತರ ಆಮಂತ್ರಣಗಳು ಬರುವುದರಿಂದ, ಅವರು ಕೇವಲ 2 ರಿಂದ 5 ದಿನಗಳ ಅಲ್ಪಾವಧಿಯ ಪ್ರವಾಸಗಳನ್ನು ಕೈಗೊಳ್ಳಬೇಕಾಗುತ್ತದೆ. ಜಗತ್ತಿನ ಎಲ್ಲರೂ ಬಿಜೆಪಿಯ ಸಿದ್ಧಾಂತವನ್ನೇ ಒಪ್ಪಬೇಕಾಗಿಲ್ಲ, ಅವರು ಭಾರತವನ್ನು ಭಿನ್ನ ದೃಷ್ಟಿಕೋನದಿಂದ ನೋಡುತ್ತಾರೆ ಮತ್ತು ಅದರಲ್ಲಿ ರಾಹುಲ್ ಗಾಂಧಿ ಅವರ ಪಾತ್ರ ದೊಡ್ಡದಾಗಿದೆ ಎಂದಿದ್ದಾರೆ.

ಕಾಂಗ್ರೆಸ್ ಸಂಸದ ಮನೋಜ್ ಕುಮಾರ್ ಪ್ರಧಾನಿ ಮೋದಿ ಅವರ ನಡೆಗಳನ್ನೇ ಪ್ರಶ್ನಿಸಿದ್ದು, ಪ್ರಧಾನಿ ನರೇಂದ್ರ ಮೋದಿಯವರು ದೇಶದ ಜನರಿಗೆ ವಿದೇಶಿ ಪ್ರವಾಸ ಕೈಗೊಳ್ಳಬೇಡಿ ಎಂದು ಮನವಿ ಮಾಡಿದ ಬೆನ್ನಲ್ಲೇ ತಾವೇ ವಿದೇಶಿ ಪ್ರವಾಸಕ್ಕೆ ತೆರಳಿದ್ದರು. ಹೀಗಿರುವಾಗ ರಾಹುಲ್ ಗಾಂಧಿ ವಿದೇಶಕ್ಕೆ ಹೋದರೆ ತಪ್ಪೇನು..? ಅವರು ಜಾಗತಿಕ ಮಟ್ಟದಲ್ಲಿ ಗುರುತಿಸಿಕೊಂಡಿರುವ ನಾಯಕ ಎಂದು ಬಿಜೆಪಿಗೆ ಕೌಂಟರ್ ನೀಡಿದ್ದಾರೆ(ಏಜೆನ್ಸೀಸ್​​).