ವಿಜಯ್‌ಗೆ ಬಿಜೆಪಿ ಗಾಳ..! 80 ಸೀಟುಗಳ ಜೊತೆ ಪಟ್ಟದ ಆಫರ್ ನೀಡಿದ್ರಾ ನೆರೆರಾಜ್ಯದ ಡಿಸಿಎಂ..? | TVK

ಈ ನಡುವೆ, ಬಿಜೆಪಿಯು ವಿಜಯ್ ಅವರನ್ನು ಎನ್‌ಡಿಎ (NDA) ಮೈತ್ರಿಕೂಟಕ್ಕೆ ಸೆಳೆಯಲು ಭರ್ಜರಿ ಕಸರತ್ತು ನಡೆಸುತ್ತಿದೆ ಎನ್ನುವ ಸುದ್ದಿಗಳು ಜೋರಾಗಿದ್ದು, ಮೈತ್ರಿ ಮಾತುಕತೆಗಳು ಅಂತಿಮ ಹಂತಕ್ಕೆ ತಲುಪಿವೆ ಎನ್ನುವುದು ರಾಜಕೀಯ ವಲಯದ ತಾಜಾ ಸುದ್ದಿ.

ಮುಂಬರುವ ವಿಧಾನಸಭಾ ಚುನಾವಣೆಯಲ್ಲಿ ಎನ್‌ಡಿಎ ಮೈತ್ರಿಕೂಟ ಜಯಗಳಿಸಿದರೆ, ನಟ ವಿಜಯ್​ಗೆ ಉಪಮುಖ್ಯಮಂತ್ರಿ ಹುದ್ದೆಯನ್ನು ನೀಡಲು ಬಿಜೆಪಿ ಮುಂದಾಗಿದೆ ಎಂದು ವರದಿಗಳು ಉಲ್ಲೇಖಿಸಿದ್ದು, ಸೀಟು ಹಂಚಿಕೆಯ ಮಾತುಕತೆಗಳಲ್ಲಿ ಟಿವಿಕೆಗೆ ಸುಮಾರು 80 ಸ್ಥಾನಗಳನ್ನು ಬಿಟ್ಟುಕೊಡಲು ಕೇಸರಿ ಪಾಳಯ ಸಿದ್ಧವಿದೆ ಎಂದು ತಿಳಿದುಬಂದಿದೆ. ಇದು ತಮಿಳುನಾಡಿನಲ್ಲಿ ಬಿಜೆಪಿಯ ಅಸ್ತಿತ್ವವನ್ನು ಗಟ್ಟಿಗೊಳಿಸಲು ಮತ್ತು ಡಿಎಂಕೆ ನೇತೃತ್ವದ ಮೈತ್ರಿಕೂಟವನ್ನು ಸೋಲಿಸಲು ಹಾಕಿರುವ ದೊಡ್ಡ ಪ್ಲಾನ್​ ಎನ್ನಲಾಗಿದೆ.

ಬಿಜೆಪಿ ಉಪಮುಖ್ಯಮಂತ್ರಿ ಸ್ಥಾನದ ಭರವಸೆ ನೀಡಿದ್ದರೂ, ವಿಜಯ್ ಮುಖ್ಯಮಂತ್ರಿ ಹುದ್ದೆಯ ಮೇಲೆ ಕಣ್ಣಿಟ್ಟಿದ್ದಾರೆ ಎನ್ನಲಾಗಿದೆ. ರಾಜಕೀಯಕ್ಕೆ ಹೊಸ ಶಕ್ತಿಯಾಗಲು ಪಣತೊಟ್ಟಿರುವ ವಿಜಯ್, ನೇರವಾಗಿ ಅಧಿಕಾರ ಹಿಡಿಯುವ ಹಂಬಲ ಹೊಂದಿದ್ದಾರೆ. ಆದರೆ, ಮೈತ್ರಿಕೂಟದ ಸಮೀಕರಣದಲ್ಲಿ ಈ ವಿಷಯವು ಸಂಧಾನದ ಪ್ರಮುಖ ಅಂಶವಾಗಿ ಉಳಿದಿದೆ. 

ವಿಜಯ್ ಅವರ ಅಪಾರ ಅಭಿಮಾನಿ ಬಳಗ ಮತ್ತು ಯುವ ಮತದಾರರನ್ನು ಸೆಳೆಯಲು ಬಿಜೆಪಿ ಬಹು ಹಂತದ ಸಂವಹನ ಮಾರ್ಗಗಳನ್ನು ಬಳಸುತ್ತಿದೆ ಎನ್ನಲಾಗಿದ್ದು, ನೆರೆರಾಜ್ಯದ ಪ್ರಭಾವಿ ಉಪಮುಖ್ಯಮಂತ್ರಿಯೊಬ್ಬರು ಈ ಸಂಧಾನ ಪ್ರಕ್ರಿಯೆಯ ಜವಾಬ್ದಾರಿ ತೆಗೆದುಕೊಂಡಿದ್ದಾರೆ ಎಂಬ ಮಾತು ಕೇಳಿಬರುತ್ತಿದೆ.

ತಮಿಳುನಾಡಿನ ಅನೇಕ ಕ್ಷೇತ್ರಗಳಲ್ಲಿ ಗೆಲುವು ಮತ್ತು ಸೋಲಿನ ಅಂತರವು ಕೇವಲ ಶೇ. 2 ರಿಂದ 5 ರಷ್ಟಿರುತ್ತದೆ. ವಿಜಯ್​ ಪರ ಇರುವ ಮತ ಬ್ಯಾಂಕ್ ನಿರ್ಣಾಯಕವಾಗಿದ್ದು, ಈ ಸಣ್ಣ ಮತ ಹಂಚಿಕೆಯು ಚುನಾವಣೆಯ ದಿಕ್ಕನ್ನೇ ಬದಲಿಸಬಹುದು. ಹೀಗಾಗಿಯೇ ಬಿಜೆಪಿ, ವಿಜಯ್ ಇಮೇಜ್ ಬಳಸಿಕೊಂಡು ತಮಿಳುನಾಡಿನಲ್ಲಿ ತನ್ನ ಬೇರುಗಳನ್ನು ಗಟ್ಟಿಗೊಳಿಸಲು ಪ್ರಯತ್ನಿಸುತ್ತಿದೆ.

ಈ ಮೈತ್ರಿಯ ಬಗ್ಗೆ ವಿಜಯ್ ಆಪ್ತ ಸಲಹೆಗಾರರಲ್ಲಿ ಅಸಮಾಧಾನವಿದೆ ಎನ್ನಲಾಗಿದ್ದು, ವಿಜಯ್ ದ್ರಾವಿಡ ರಾಜಕಾರಣದ ವಿರುದ್ಧ ಹೊಸ ಪರ್ಯಾಯವಾಗಿ ಪಕ್ಷ ಕಟ್ಟಿದ್ದಾರೆ. ಆರಂಭದಲ್ಲೇ ರಾಷ್ಟ್ರೀಯ ಪಕ್ಷವಾದ ಬಿಜೆಪಿಯೊಂದಿಗೆ ಕೈಜೋಡಿಸಿದರೆ ಅವರ ಇಮೇಜ್ ಮತ್ತು ಪಕ್ಷದ ವಿಶ್ವಾಸಾರ್ಹತೆಗೆ ಧಕ್ಕೆ ಉಂಟಾಗಬಹುದು ಎಂಬ ಕಳವಳ ಸಲಹೆಗಾರರಲ್ಲಿದೆ. ಈ ನಿರ್ಧಾರವು ಟಿವಿಕೆಯನ್ನು ಬಿಜೆಪಿಯ ಬಿ ಟೀಮ್ ಎಂಬ ಹಣೆಪಟ್ಟಿಗೆ ಗುರಿಪಡಿಸಬಹುದು ಎಂಬ ಭಯ ಅನೇಕರನ್ನು ಕಾಡುತ್ತಿದೆ.

ತಮಿಳುನಾಡು ರಾಜಕಾರಣದಲ್ಲಿ ಈ ಸುದ್ದಿ ದೊಡ್ಡ ಮಟ್ಟದ ಸಂಚಲನಕ್ಕೆ ಕಾರಣವಾಗಿದ್ದು, ವಿಜಯ್, ಬಿಜೆಪಿಯ ಆಫರ್ ಒಪ್ಪಿಕೊಂಡು ಡಿಸಿಎಂ ಹುದ್ದೆಗೆ ತೃಪ್ತರಾಗುತ್ತಾರೋ ಅಥವಾ ಏಕಾಂಗಿ ಹೋರಾಟದ ಮೂಲಕ ಮುಖ್ಯಮಂತ್ರಿಯಾಗುವ ಹಾದಿಯನ್ನೇ ತುಳಿಯುತ್ತಾರೋ ಎಂಬುದು ಸದ್ಯದ ಕುತೂಹಲ. ಒಂದು ವೇಳೆ ಈ ಮೈತ್ರಿ ಕಾರ್ಯರೂಪಕ್ಕೆ ಬಂದಿದ್ದೇ ಆದಲ್ಲಿ ರಾಜ್ಯದ ಚುನಾವಣಾ ಇತಿಹಾಸದಲ್ಲಿ ಇದು ಹೊಸ ಕ್ರಾಂತಿಗೆ ಮುನ್ನುಡಿ ಬರೆಯಲಿದೆ(ಏಜೆನ್ಸೀಸ್​​).