ಅಸನ್ಸೋಲ್ ಉತ್ತರ 'ಕೃಷ್ಣೇಂದು' ಮಯ... ಒಂದೇ ಹೆಸರಿನ ಮೂವರು ಅಭ್ಯರ್ಥಿಗಳು ಕಣಕ್ಕೆ; ಇದು ಗೊಂದಲಕ್ಕೀಡುಮಾಡುವ ಪಿತೂರಿ ಎಂದ ಬಿಜೆಪಿ | Asansol North

ಈ ಅಪರೂಪದ ಕ್ಷಣ ಕೇವಲ ಮತದಾರರಲ್ಲಿ ಮಾತ್ರವಲ್ಲದೆ, ಚುನಾವಣಾ ಅಧಿಕಾರಿಗಳಲ್ಲೂ ಗೊಂದಲದ ವಾತಾವರಣ ನಿರ್ಮಿಸಿದೆ.

ಮಂಗಳವಾರ ಅಸನ್ಸೋಲ್‌ನಲ್ಲಿರುವ ಬಿಜೆಪಿ ಜಿಲ್ಲಾ ಕಚೇರಿಯಲ್ಲಿ ನಡೆದ ಪತ್ರಿಕಾಗೋಷ್ಠಿಯಲ್ಲಿ ಈ ವಿಷಯವು ಮುನ್ನೆಲೆಗೆ ಬಂದಿತು. ಜಿಲ್ಲಾ ಬಿಜೆಪಿ ಅಧ್ಯಕ್ಷ ದೇವತನು ಭಟ್ಟಾಚಾರ್ಯ ನೇತೃತ್ವದಲ್ಲಿ ನಡೆದ ಈ ಸಭೆಯಲ್ಲಿ ಅಸನ್ಸೋಲ್ ಉತ್ತರ, ದಕ್ಷಿಣ, ಜಮುರಿಯಾ, ರಾಣಿಗಂಜ್, ಕುಲ್ಟಿ ಮತ್ತು ಬರಾಬನಿ ಸೇರಿದಂತೆ ಹಲವು ಕ್ಷೇತ್ರಗಳ ಪಕ್ಷದ ಅಭ್ಯರ್ಥಿಗಳು ಭಾಗವಹಿಸಿದ್ದರು.

ಅಸನ್ಸೋಲ್ ಎಸ್‌ಡಿಎಂ ಕಚೇರಿಯಲ್ಲಿ ನಾಮಪತ್ರಗಳ ಪರಿಶೀಲನೆಯ ಸಮಯದಲ್ಲಿ ಈ ವಿಷಯ ಬೆಳಕಿಗೆ ಬಂದಿದ್ದು, ಅಧಿಕಾರಿಗಳು ನಾಮಪತ್ರ ಪರಿಶೀಲನೆಗಾಗಿ ಕೃಷ್ಣೇಂದು ಎಂಬ ಹೆಸರನ್ನು ಕರೆದಾಗ, ಮೂವರು ವಿಭಿನ್ನ ಅಭ್ಯರ್ಥಿಗಳು ಎದ್ದು ನಿಂತು ಪ್ರತಿಕ್ರಿಯಿಸಿದರು. ಇವರಲ್ಲಿ ಒಬ್ಬರು ಬಿಜೆಪಿಯ ಕೃಷ್ಣೇಂದು ಮುಖರ್ಜಿ ಆಗಿದ್ದರೆ, ಉಳಿದ ಇಬ್ಬರು ಸ್ವತಂತ್ರ ಅಭ್ಯರ್ಥಿಗಳಾದ ಕೃಷ್ಣೇಂದು ಮುಖೋಪಾಧ್ಯಾಯ ಮತ್ತು ಕೃಷ್ಣೇಂದು ಚಟರ್ಜಿ.

ಒಂದೇ ಹೆಸರಿನ ಪುನರಾವರ್ತನೆಯು ಕೆಲಕಾಲ ಅಲ್ಲಿದ್ದವರಲ್ಲಿ ಗೊಂದಲ ಸೃಷ್ಟಿಸಿತು. ಭಾರತೀಯ ರಾಜಕೀಯದಲ್ಲಿ ಇಂತಹ ಸನ್ನಿವೇಶಗಳು ಹೊಸದೇನಲ್ಲದಿದ್ದರೂ, ಅಸನ್ಸೋಲ್ ಉತ್ತರದಂತಹ ಸೂಕ್ಷ್ಮ ಕ್ಷೇತ್ರದಲ್ಲಿ ಇದು ವಿಶೇಷ ಗಮನ ಸೆಳೆದಿದೆ.

ಈ ಬೆಳವಣಿಗೆಗೆ ಪ್ರತಿಕ್ರಿಯಿಸಿದ ಬಿಜೆಪಿ ಅಭ್ಯರ್ಥಿ ಕೃಷ್ಣೇಂದು ಮುಖರ್ಜಿ, ನಾವು ಅಲ್ಲಿಗೆ ತಲುಪಿದಾಗ ನನಗೂ ಒಂದು ಕ್ಷಣ ಗೊಂದಲವಾಯಿತು, ಆದರೆ ಸ್ಪರ್ಧೆ ಇರಬೇಕು, ಅದು ಒಳ್ಳೆಯದು ಎಂದು ವ್ಯಂಗ್ಯವಾಗಿ ಹೇಳಿದರು. ತಮ್ಮ ವಿರೋಧಿಗಳನ್ನು ಟೀಕಿಸಿದ ಅವರು, ಕೃಷ್ಣೇಂದು ಎಂಬ ಹೆಸರು ಎಷ್ಟು ಜನಪ್ರಿಯವಾಗಿದೆಯೆಂದರೆ, ಇತರರೂ ಅದನ್ನು ಅಳವಡಿಸಿಕೊಳ್ಳಲು ಒತ್ತಾಯಿಸಲ್ಪಡುತ್ತಿದ್ದಾರೆ. ನಮ್ಮ ವಿರೋಧಿಗಳ ಭಯ ಸ್ಪಷ್ಟವಾಗಿ ಗೋಚರಿಸುತ್ತಿದೆ ಎಂದರು.

ಮತದಾರರ ಗೊಂದಲದ ಬಗ್ಗೆಯೂ ಮಾತನಾಡಿದ ಅವರು, ಜನರು ಕೇವಲ ಹೆಸರನ್ನು ನೋಡುವುದಿಲ್ಲ, ಬದಲಾಗಿ ಪಕ್ಷದ ಚಿಹ್ನೆ ಮತ್ತು ಸಂಬಂಧದ ಆಧಾರದ ಮೇಲೆ ಅಭ್ಯರ್ಥಿಯನ್ನು ಗುರುತಿಸುತ್ತಾರೆ ಎಂದು ತಿಳಿಸಿದರು.

ಕೃಷ್ಣೇಂದು ಮುಖರ್ಜಿ ಇದೊಂದು ಉದ್ದೇಶಪೂರ್ವಕ ತಂತ್ರ ಎಂದು ಆರೋಪಿಸಿದ್ದಾರೆ. ವಿರೋಧ ಪಕ್ಷದವರು ಬಿಜೆಪಿಯ ಮತಗಳನ್ನು ವಿಭಜಿಸಲು ಮತ್ತು ಬಿಜೆಪಿಯ ಭವಿಷ್ಯವನ್ನು ದುರ್ಬಲಗೊಳಿಸಲು ಒಂದೇ ಹೆಸರಿನ ವ್ಯಕ್ತಿಗಳನ್ನು ಕಣಕ್ಕಿಳಿಸಿದ್ದಾರೆ ಎಂದು ದೂರಿದರು. ಇದು ಮತದಾರರನ್ನು ಹಾದಿ ತಪ್ಪಿಸಿ ನಮ್ಮ ಮತಗಳ ಪಾಲನ್ನು ಕಡಿತಗೊಳಿಸುವ ಪಿತೂರಿ ಎಂಬುದು ಸ್ಪಷ್ಟ ಅಸನ್ಸೋಲ್ ಉತ್ತರದ ಮತದಾರರು ಬುದ್ಧಿವಂತರಾಗಿದ್ದು, ಯಾರನ್ನು ಬೆಂಬಲಿಸಬೇಕೆಂದು ಅವರಿಗೆ ತಿಳಿದಿದೆ ಎಂದರು.

ರಾಜಕೀಯ ವೀಕ್ಷಕರ ಪ್ರಕಾರ, ಕಡಿಮೆ ಸಾಕ್ಷರತೆ ಇರುವ ಅಥವಾ ಹೆಸರಿನ ಆಧಾರದ ಮೇಲೆ ಮತ ಹಾಕುವ ಪ್ರದೇಶಗಳಲ್ಲಿ ಮತದಾರರನ್ನು ದಾರಿತಪ್ಪಿಸಲು ಇಂತಹ ತಂತ್ರಗಳನ್ನು ಈ ಹಿಂದೆಯೂ ಭಾರತದ ವಿವಿಧ ಚುನಾವಣೆಗಳಲ್ಲಿ ಬಳಸಲಾಗಿದೆ.

294 ಸದಸ್ಯ ಬಲದ ಪಶ್ಚಿಮ ಬಂಗಾಳ ವಿಧಾನಸಭೆಗೆ ಏಪ್ರಿಲ್ 23 ಮತ್ತು 29 ರಂದು ಎರಡು ಹಂತಗಳಲ್ಲಿ ಚುನಾವಣೆ ನಡೆಯಲಿದ್ದು, ಬಂಗಾಳದ ಜೊತೆಗೆ ತಮಿಳುನಾಡು, ಪುದುಚೇರಿ, ಕೇರಳ ಮತ್ತು ಅಸ್ಸಾಂ ರಾಜ್ಯಗಳ ಫಲಿತಾಂಶ ಮೇ 4 ರಂದು ಪ್ರಕಟವಾಗಲಿದೆ. ಈಗ ಎಲ್ಲರ ಕಣ್ಣು ಮತದಾನದ ದಿನದ ಮೇಲಿದ್ದು, ಯಾವ ಕೃಷ್ಣೇಂದು ಮತದಾರರ ಮನ ಗೆಲ್ಲಲಿದ್ದಾರೆ ಎಂಬುದು ಕುತೂಹಲ ಮೂಡಿಸಿದೆ(ಏಜೆನ್ಸೀಸ್​).