ಸಂಸತ್ತಿನಲ್ಲಿ ನೆಹರು-ಇಂದಿರಾ ಉಲ್ಲೇಖ...ನಿಶಿಕಾಂತ್ ದುಬೆ ಹೇಳಿಕೆಗೆ ವಿಪಕ್ಷಗಳ ಆಕ್ರೋಶ | Nishikant Dubey

ಸದನದೊಳಗೆ ಮಾಜಿ ಪ್ರಧಾನಿಗಳಾದ ಜವಾಹರಲಾಲ್ ನೆಹರು ಮತ್ತು ಇಂದಿರಾ ಗಾಂಧಿಯವರ ಬಗ್ಗೆ ಆಕ್ಷೇಪಾರ್ಹ ಹೇಳಿಕೆಗಳನ್ನು ನೀಡಿದ್ದಾರೆ ಎಂದು ಆರೋಪಿಸಿ ವಿರೋಧ ಪಕ್ಷದ ಸಂಸದರು ದುಬೆ ವಿರುದ್ಧ ಕ್ರಮ ಕೈಗೊಳ್ಳಬೇಕೆಂದು ಒತ್ತಾಯಿಸಿದರು.

ಸ್ಪೀಕರ್ ಓಂ ಬಿರ್ಲಾ ವಿರೋಧ ಪಕ್ಷದ ಸಂಸದರಿಗೆ ತಮ್ಮ ದೂರನ್ನು ಲಿಖಿತವಾಗಿ ಸಲ್ಲಿಸುವಂತೆ ಕೇಳಿಕೊಂಡಿದ್ದು, ಅದಾದ ಬಳಿಕ ಆರೋಪಗಳ ಕುರಿತಾಗಿ ಪರಿಶೀಲನೆ ನಡೆಸುವ ಭರವಸೆ ನೀಡಿದ್ದಾರೆ ಎಂದು ಮೂಲಗಳು ತಿಳಿಸಿವೆ.

ಈ ವಿಷಯದ ಬಗ್ಗೆ ಚರ್ಚಿಸಲು ಲೋಕಸಭಾ ಸ್ಪೀಕರ್ ಮತ್ತು ಗೃಹ ಸಚಿವರ ನಡುವೆ ಸಭೆ ನಡೆಯುತ್ತಿದ್ದು, ನಿಶಿಕಾಂತ್ ದುಬೆ ಕೂಡ ಹಾಜರಿದ್ದರು ಎಂದು ಮೂಲಗಳು ತಿಳಿಸಿವೆ. ಸಂಸತ್ತಿನ ಎರಡೂ ಸದನಗಳು ಕಲಾಪ ಪುನರಾರಂಭವಾದ ನಂತರ ರಾಷ್ಟ್ರಪತಿಗಳ ಭಾಷಣಕ್ಕೆ ವಂದನಾ ನಿರ್ಣಯದ ಕುರಿತು ಚರ್ಚೆಯನ್ನು ಮುಂದುವರಿಸುವ ನಿರೀಕ್ಷೆಯಿದೆ.

ಧನ್ಯವಾದ ನಿರ್ಣಯದ ಸಂದರ್ಭದಲ್ಲಿ ಮಾತನಾಡುವಾಗ ನಿಶಿಕಾಂತ್ ದುಬೆ ಸಂಸತ್ತಿನ ಮಿತಿಯನ್ನು ಮೀರಿದ್ದಾರೆ ಎಂದು ವಿರೋಧ ಪಕ್ಷದ ಸಂಸದರು ಆರೋಪಿಸಿದ್ದು, ದೂರನ್ನು ಔಪಚಾರಿಕವಾಗಿ ದಾಖಲಿಸಿದ ಬಳಿಕ ನಿಯಮಗಳ ಪ್ರಕಾರ ಸಮಸ್ಯೆಯನ್ನು ಪರಿಶೀಲಿಸಲಾಗುವುದು ಎಂದು ಸ್ಪೀಕರ್​ ಹೇಳಿದ್ದಾರೆ.

ನಿಶಿಕಾಂತ್ ದುಬೆ ಸದನದಲ್ಲಿ 6 ಪುಸ್ತಕಗಳನ್ನು ಓದಿ, ಮಾಜಿ ಪ್ರಧಾನಿಗಳಾದ ಜವಾಹರಲಾಲ್ ನೆಹರು ಮತ್ತು ಇಂದಿರಾ ಗಾಂಧಿಯವರ ಬಗ್ಗೆ ಹೇಳಿಕೆಗಳನ್ನು ನೀಡಿದರು. ಇದಕ್ಕೆ ವಿರೋಧ ಪಕ್ಷದ ಸಂಸದರು ವಿರೋಧ ವ್ಯಕ್ತಪಡಿಸಿ ಪ್ರತಿಭಟನೆ ನಡೆಸಿದರು. ಇದರಿಂದಾಗಿ ಲೋಕಸಭೆಯನ್ನು ಮುಂದೂಡಬೇಕಾಯಿತು.

ಸರ್ಕಾರವು ವಿರೋಧ ಪಕ್ಷದ ನಾಯಕರಿಗೆ ಮತ್ತು ಬಿಜೆಪಿ ಸಂಸದರಿಗೆ ವಿಭಿನ್ನ ನಿಯಮಗಳನ್ನು ಅನುಸರಿಸುತ್ತಿದೆ ಎಂದು ವಯನಾಡ್ ಸಂಸದೆ ಪ್ರಿಯಕ ಗಾಂಧಿ ಸೇರಿದಂತೆ ಅನೇಕರು ಆರೋಪಿಸಿದ್ದಾರೆ. ರಾಹುಲ್ ಗಾಂಧಿ ಸೇರಿದಂತೆ ವಿರೋಧ ಪಕ್ಷದ ಸದಸ್ಯರನ್ನು ತಡೆಯಲಾಗಿದೆ, ಅಮಾನತುಗೊಳಿಸಲಾಗಿದೆ.

ಆದರೆ ಇತ್ತ ಆಡಳಿತ ಪಕ್ಷದ ಸಂಸದರಿಗೆ ಪ್ರಚೋದನಕಾರಿ ಹೇಳಿಕೆಗಳನ್ನು ನೀಡಲು ಮತ್ತು ಪುಸ್ತಕಗಳಿಂದ ಓದಲು ಅವಕಾಶ ನೀಡಲಾಗಿದೆ ಎಂದು ವಿಪಕ್ಷದವರು ಆರೋಪಿಸಿದ್ದು, ಇದು ಸಂಸತ್ತಿನಲ್ಲಿ ಭಿನ್ನಾಭಿಪ್ರಾಯವನ್ನು ಹತ್ತಿಕ್ಕುವ ವ್ಯವಸ್ಥಿತ ಪ್ರಯತ್ನವನ್ನು ಪ್ರತಿಬಿಂಬಿಸುತ್ತದೆ ಎಂದು ಹೇಳಿಕೊಂಡಿವೆ.

ಈ ವಿಷಯದ ಬಗ್ಗೆ ಮಾತನಾಡಿದ ಕಾಂಗ್ರೆಸ್ ಸಂಸದೆ ಪ್ರಿಯಾಂಕಾ ಗಾಂಧಿ ವಾದ್ರಾ, ಕೇಂದ್ರ ಸರ್ಕಾರವು ಸಂಸತ್ತು ಕಾರ್ಯ ನಿರ್ವಹಿಸದಂತೆ ಉದ್ದೇಶಪೂರ್ವಕವಾಗಿ ತಡೆಯುತ್ತಿದೆ ಎಂದು ಆರೋಪಿಸಿದರು. ಸರ್ಕಾರವು ಅಡ್ಡಿಪಡಿಸಲು ನಿಶಿಕಾಂತ್ ದುಬೆಯನ್ನು ಮುಂದೆ ತರಲಾಗುತ್ತಿತ್ತು.

ಬಿಜೆಪಿ ಸಂಸದರೊಬ್ಬರು ಸದನಕ್ಕೆ 6 ಪುಸ್ತಕಗಳನ್ನು ತಂದು ಅವುಗಳಲ್ಲಿನ ವಿಷಯಗಳನ್ನು ಮುಕ್ತವಾಗಿ ಉಲ್ಲೇಖಿಸಲು ಅವಕಾಶ ನೀಡಿದ ಸ್ಪೀಕರ್​, ವಿರೋಧ ಪಕ್ಷದ ಸದಸ್ಯರು ಪ್ರಕಟಿತ ಪುಸ್ತಕವನ್ನು ಬಳಸಿದಾಗ ಸರ್ಕಾರ ಏಕೆ ಆಕ್ಷೇಪಿಸಿತು ಎಂದು ಪ್ರಿಯಾಂಕಾ ಪ್ರಶ್ನಿಸಿದರು.

ಸರ್ಕಾರವು ತನ್ನ ಇಚ್ಛೆಯನ್ನು ಸಂಸತ್ತಿನ ಮೇಲೆ ಹೇರಲು ಬಯಸಿದೆ ಮತ್ತು ಇದು ಸ್ಪೀಕರ್ ಮತ್ತು ಸಂಸ್ಥೆ ಎರಡಕ್ಕೂ ಅಗೌರವ ತೋರಿದಂತಾಗಿದೆ ಎನ್ನುವುದು ಪ್ರಿಯಾಂಕಾ ಗಾಂಧಿಯವರ ಆರೋಪವಾಗಿದ್ದು, ವಿರೋಧ ಪಕ್ಷದ ನಾಯಕರೆಂದರೆ ಕೇವಲ ಒಬ್ಬ ವ್ಯಕ್ತಿಯಲ್ಲ, ಇಡೀ ವಿಪಕ್ಷಗಳ ಒಕ್ಕೂಟವನ್ನು ಪ್ರತಿನಿಧಿಸುತ್ತಾರೆ ಎಂದು ಹೇಳಿದರು.

ನೆಹರೂ ಅವರ ಬಗ್ಗೆ ನಿರಂತರವಾಗಿ ಉಲ್ಲೇಖಿಸುವುದು ದೇಶದ ನಾಯಕತ್ವದ ಬಗ್ಗೆ ಹಿರಿಯ ಜನರಲ್ ಇತ್ತೀಚೆಗೆ ಮಾಡಿದ ಟೀಕೆಗಳಿಂದ ಸಾರ್ವಜನಿಕರನ್ನು ಬೇರೆಡೆಗೆ ಸೆಳೆಯುವ ಉದ್ದೇಶವನ್ನು ಹೊಂದಿದೆ, ಸಂಸತ್ತು ಸ್ವತಃ ಕಾರ್ಯನಿರ್ವಹಿಸುವುದನ್ನು ಬಯಸದ ಸರ್ಕಾರವನ್ನು ನೋಡುತ್ತಿರುವುದು ಇದೇ ಮೊದಲು ಎಂದು ಹೇಳಿದರು(ಏಜೆನ್ಸೀಸ್​).