ನಿಮ್ಮನ್ನು ಯಾರೂ ಉಳಿಸಲು ಸಾಧ್ಯವಿಲ್ಲ!... ಬಿಜೆಪಿ ನಾಯಕರಿಗೆ ಎಚ್ಚರಿಕೆ ನೀಡಿದ ಟಿಎಂಸಿ ಸಂಸದೆ ಮೊಯಿತ್ರಾ | Mahua Moitra

ತಮ್ಮ ಎಕ್ಸ್ ಖಾತೆಯಲ್ಲಿ ಪೋಸ್ಟ್​​ನಲ್ಲಿ ಸಂಸದೆ ಮಹುವಾ ಮೊಯಿತ್ರಾ, ಹಿಟ್ ಲಿಸ್ಟ್​ನಂತೆ ಕಾಣುವ ಫೋಟೋವೊಂದನ್ನು ಹಂಚಿಕೊಂಡಿದ್ದಾರೆ. ಇದರಲ್ಲಿ ಬಿಜೆಪಿ ನಾಯಕರಾದ ಸೌರಭ್ ಸಿಂಗ್, ಪ್ರೊಫೆಸರ್ ಸ್ವದೇಶ್ ಸಿಂಗ್ ಮತ್ತು ಇತ್ತೀಚೆಗಷ್ಟೇ ಬಿಜೆಪಿ ಸೇರಿದ ಟೆನಿಸ್ ದಂತಕಥೆ ಲಿಯಾಂಡರ್ ಪೇಸ್ ಅವರ ಚಿತ್ರಗಳಿವೆ. ವಿಶೇಷವೆಂದರೆ, ಸೌರಭ್ ಮತ್ತು ಸ್ವದೇಶ್ ಚಿತ್ರಗಳನ್ನು ಕೆಂಪು ಬಣ್ಣದಲ್ಲಿ ವೃತ್ತಾಕಾರವಾಗಿ ಗುರುತಿಸಲಾಗಿದ್ದು, ಫೋಟೋ ಮೇಲೆ S+S ಎಂದು ಬರೆಯಲಾಗಿದೆ.

ಛತ್ತೀಸ್‌ಗಢದ ಮಾಜಿ ಬಿಜೆಪಿ ಶಾಸಕ ಸೌರಭ್ ಸಿಂಗ್ ಬಂಗಾಳದ ಮತದಾರರ ಮೇಲೆ ಪ್ರಭಾವ ಬೀರಲು ಹಣ ಹಂಚಿಕೆ ಮಾಡುತ್ತಿದ್ದಾರೆ ಎಂದು ಮೊಯಿತ್ರಾ ಗಂಭೀರವಾಗಿ ಆರೋಪಿಸಿದ್ದು, ಸೌರಭ್ ಸಿಂಗ್, ಹುಷಾರಾಗಿರಿ! ನನ್ನ ಟ್ವೀಟ್ ಬಳಿಕ ನೀವು ಎಲ್ಜಿನ್ ಹೋಟೆಲ್‌ನಿಂದ ಚೆಕ್ ಔಟ್ ಮಾಡಿ ನೊವೊಟೆಲ್‌ಗೆ ತೆರಳಿ ಹಣ ವಿತರಣೆ ಮುಂದುವರಿಸುತ್ತಿದ್ದೀರ. ನೆನಪಿರಲಿ, ಇದು ಬಂಗಾಳ, ಬಿಜೆಪಿ ಅಧ್ಯಕ್ಷ ನಿತಿನ್ ನಬಿನ್ ಕೂಡ ನಿಮ್ಮನ್ನು ಇಲ್ಲಿ ಉಳಿಸಲು ಸಾಧ್ಯವಿಲ್ಲ ಎಂದು ಅವರು ನೇರವಾಗಿ ಎಚ್ಚರಿಸಿದ್ದಾರೆ.

ರಾಜ್ಯದಲ್ಲಿ ಮೊದಲ ಹಂತದ ಚುನಾವಣೆ ನಡೆಯುತ್ತಿರುವಾಗಲೇ ಸಂಸದೆಯೊಬ್ಬರು ವಿರೋಧ ಪಕ್ಷದ ನಾಯಕರ ಇರುವಿಕೆಯನ್ನು ಸಾರ್ವಜನಿಕವಾಗಿ ಬಹಿರಂಗಪಡಿಸಿರುವುದು ಭದ್ರತೆಯ ದೃಷ್ಟಿಯಿಂದಲೂ ಚರ್ಚೆಗೆ ಕಾರಣವಾಗಿದೆ. ಮೊಯಿತ್ರಾ ಅವರ ಈ ಓಪನ್ ಥ್ರೆಟ್ ಮತ್ತು ಗಂಭೀರ ಆರೋಪಗಳ ಕುರಿತು ಬಿಜೆಪಿ ಇದುವರೆಗೆ ಅಧಿಕೃತ ಪ್ರತಿಕ್ರಿಯೆ ನೀಡಿಲ್ಲ(ಏಜೆನ್ಸೀಸ್​​).