ಜಲಮಂಡಳಿ ಗುಂಡಿಗೆ ಬಲಿಯಾದ ಬೈಕರ್​: ಮೇಣದಬತ್ತಿ ಹಚ್ಚಲು ಬಿಡದ ಪೊಲೀಸರ ವಿರುದ್ಧ ಎಎಪಿ ಆಕ್ರೋಶ | Biker

ನವದೆಹಲಿ: ದೆಹಲಿ ಜಲಮಂಡಳಿ ತೋಡಿದ್ದ ಗುಂಡಿಗೆ ಬಿದ್ದು ಸಾವನ್ನಪ್ಪಿದ ಬೈಕರ್ (Biker) ಕಮಲ್ ಧ್ಯಾನಿಗೆ ಗೌರವ ಸಲ್ಲಿಸಲು ಮೇಣದಬತ್ತಿ ಮೆರವಣಿಗೆ ನಡೆಸುತ್ತಿದ್ದ ಆಮ್ ಆದ್ಮಿ ಪಕ್ಷದ ನಾಯಕ ಸೌರಭ್ ಭಾರದ್ವಾಜ್ ಮತ್ತು ಪಕ್ಷದ ಕಾರ್ಯಕರ್ತರನ್ನು ದೆಹಲಿ ಪೊಲೀಸರು ಭಾನುವಾರ ಜನಕಪುರಿಯಲ್ಲಿ ಬಂಧಿಸಿದ್ದಾರೆ.

ಭಾರದ್ವಾಜ್ ಅವರ ಪ್ರಕಾರ, ಪಕ್ಷದ ನಾಯಕರು ಮೃತರಿಗೆ ಶಾಂತಿಯುತವಾಗಿ ಗೌರವ ಸಲ್ಲಿಸಲು ಸ್ಥಳಕ್ಕೆ ತಲುಪಿದ್ದರು, ಆದರೆ ಮೇಣದಬತ್ತಿಗಳನ್ನು ಬೆಳಗಿಸಲು ಸಹ ಅವಕಾಶ ನೀಡಲಿಲ್ಲ ಎಂದು ಆಕ್ರೋಶವನ್ನು ಹೊರಹಾಕಿದ್ದಾರೆ.

ದೆಹಲಿ ಜಲ ಮಂಡಳಿ ನಿರ್ಮಾಣ ಕಾರ್ಯಕ್ಕಾಗಿ ಅಗೆದಿದೆ ಎಂದು ಹೇಳಲಾದ ಗುಂಡಿಗೆ ಫೆಬ್ರವರಿ 5 ರಂದು ತಮ್ಮ ಮೋಟಾರ್ ಸೈಕಲ್ ಸಮೇತ ಬಿದ್ದು ಪ್ರಾಣ ಕಳೆದುಕೊಂಡ ಧ್ಯಾನಿಗೆ ಗೌರವ ಸಲ್ಲಿಸಲು ಎಎಪಿ ನಾಯಕರು ಜನಕಪುರಿ ಪ್ರದೇಶದಲ್ಲಿ ಮೌನ ಮೇಣದಬತ್ತಿ ಮೆರವಣಿಗೆ ನಡೆಸಲು ನಿರ್ಧರಿಸಿದ್ದರು. ಆದರೆ ಪೊಲೀಸರು ಆ ಪ್ರದೇಶದಲ್ಲಿ ಬ್ಯಾರಿಕೇಡ್​ಗಳನ್ನು ಅಳವಡಿಸಿ ತಮ್ಮ ಪಕ್ಷದ ಕಾರ್ಯಕರ್ತರನ್ನು ಬಂಧಿಸಿದ್ದಾರೆ ಎಂದು ಎಎಪಿ ನಾಯಕ ಸೌರಭ್ ಭಾರದ್ವಾಜ್ ಹೇಳಿದ್ದಾರೆ.

ಪೊಲೀಸ್ ವ್ಯಾನ್‌ನಲ್ಲಿ ಭಾರದ್ವಾಜ್​ರನ್ನು ಕರೆದೊಯ್ಯುವಾಗ, ತಮ್ಮ ಸಾಮಾಜಿಕ ಮಾಧ್ಯಮ ವೇದಿಕೆಯಲ್ಲಿ ನೇರ ಪ್ರಸಾರ ಆರಂಭಿಸಿದ ಅವರು, ಇಂದು ನಾವು ಜನಕಪುರಿಯಲ್ಲಿ ಕೊಲ್ಲಲ್ಪಟ್ಟ ಕಮಲ್ ಧ್ಯಾನಿಗೆ ಗೌರವ ಸಲ್ಲಿಸಲು ಬಂದಿದ್ದೇವೆ ಆದರೆ ಪೊಲೀಸರು ಎಲ್ಲೆಡೆ ಬ್ಯಾರಿಕೇಡ್‌ಗಳನ್ನು ಹಾಕಿದ್ದಾರೆ ಎಂದು ಆರೋಪಿಸಿದರು.

ಪಶ್ಚಿಮ ದೆಹಲಿಯ ಜನಕಪುರಿ ಪ್ರದೇಶದಲ್ಲಿ ದೆಹಲಿ ಜಲ ಮಂಡಳಿಯ ಕೆಲಸಕ್ಕಾಗಿ ಅಗೆದ ತೆರೆದ ಹೊಂಡಕ್ಕೆ ಮೋಟಾರ್ ಸೈಕಲ್ ಬಿದ್ದು 25 ವರ್ಷದ ಕಮಲ್ ಧ್ಯಾನಿ ದುರಂತವಾಗಿ ಪ್ರಾಣ ಕಳೆದುಕೊಂಡರು. ಫೆಬ್ರವರಿ 5 ರಂದು ಪ್ರೊಫೆಸರ್ ಜೋಗೆಂದರ್ ಸಿಂಗ್ ಮಾರ್ಗದಲ್ಲಿರುವ ಆಂಧ್ರ ಶಾಲೆಯ ಬಳಿಯ ಜನಕ್‌ಪುರಿಯ ಬಿ3ಬಿ ಬ್ಲಾಕ್ ಬಳಿ ಈ ಘಟನೆ ನಡೆದಿದೆ.

ಕಮಲ್ ಧ್ಯಾನಿ ಅವರ ಕುಟುಂಬವು ದೆಹಲಿ ಜಲ ಮಂಡಳಿಯ ನಿರ್ಲಕ್ಷ್ಯವನ್ನು ಆರೋಪಿಸಿ, ಗುಂಡಿಯನ್ನು ಮುಚ್ಚದೆ ಮತ್ತು ಸರಿಯಾಗಿ ಗುರುತಿಸದೆ ಇರುವುದರಿಂದ ಪ್ರಯಾಣಿಕರಿಗೆ ಗಂಭೀರ ಅಪಾಯವನ್ನುಂಟುಮಾಡಿದೆ ಎಂದು ಆರೋಪಿಸಿದೆ. ಕುಟುಂಬವು ಅಕ್ರಮದ ಅನುಮಾನಗಳನ್ನು ವ್ಯಕ್ತಪಡಿಸಿದೆ ಮತ್ತು ಘಟನೆಯ ಬಗ್ಗೆ ನ್ಯಾಯಯುತ ಮತ್ತು ಪಾರದರ್ಶಕ ತನಿಖೆಗೆ ಒತ್ತಾಯಿಸಿದೆ.

ಈ ಘಟನೆಯು ರಾಜಕೀಯ ಕೆಸರೆರಚಾಟಕ್ಕೆ ದಾರಿ ಮಾಡಿಕೊಟ್ಟಿದ್ದು, ಆಮ್ ಆದ್ಮಿ ಪಕ್ಷದ ನಾಯಕರು ಈ ಘಟನೆಗೆ ಬಿಜೆಪಿ ಪಕ್ಷವೇ ನೇರ ಕಾರಣ ಎಂದರೆ, ಈ ಗುಂಡಿಗಳು ನಿಮ್ಮ ಆಡಳಿತಾವಧಿಯಲ್ಲಿ ಕೊರೆದಿದ್ದು ಎಂದು ಬಿಜೆಪಿ ತಿರುಗೇಟನ್ನು ಕೊಟ್ಟಿದೆ.

ದೆಹಲಿ ಪೊಲೀಸರು ಈ ಘಟನೆ ಕುರಿತು ತನಿಖೆ ಚುರುಕುಗೊಳಿಸಿದ್ದು, ಯುವಕನ ಸಾವಿಗೆ ಸಂಬಂಧಿಸಿದಂತೆ ಒಬ್ಬ ವ್ಯಕ್ತಿಯನ್ನು ಬಂಧಿಸಿದ್ದಾರೆ. ಬಂಧಿತ ವ್ಯಕ್ತಿಯನ್ನು ಯೋಗೇಶ್ (23) ಎಂದು ಗುರುತಿಸಲಾಗಿದೆ. ನಂತರ ಆತನನ್ನು ವಿಚಾರಣೆಗಾಗಿ ದೆಹಲಿಗೆ ಕರೆತರಲಾಗುವುದು ಮತ್ತು ಅಗತ್ಯವಿದ್ದರೆ, ಔಪಚಾರಿಕ ಬಂಧನವನ್ನು ಮಾಡಲಾಗುವುದು ಎಂದು ಪೊಲೀಸರು ತಿಳಿಸಿದ್ದಾರೆ.

ಬೈಕ್ ಸವಾರ ಗುಂಡಿಗೆ ಬಿದ್ದು ಸಾವನ್ನಪ್ಪಿದ ಸ್ಥಳದಲ್ಲಿ ಈ ಆರೋಪಿ ಇದ್ದು, ಅಪಘಾತದ ಬಗ್ಗೆ ಉಪಗುತ್ತಿಗೆದಾರರಿಗೆ ಮಾಹಿತಿ ನೀಡಿ ಸ್ಥಳದಿಂದ ಪರಾರಿಯಾಗಿದ್ದ ಎಂದು ಹೇಳಲಾಗುತ್ತಿದೆ. ಗುಂಡಿಗೆ ಬಿದ್ದು ಕಮಲ್ ಧ್ಯಾನಿ ಸಾವನ್ನಪ್ಪಿದ ಪ್ರಕರಣಕ್ಕೆ ಸಂಬಂಧಿಸಿದಂತೆ ಪೊಲೀಸರು ಉಪಗುತ್ತಿಗೆದಾರ ಪ್ರಜಾಪತಿಯನ್ನು ಸಹ ವಶಕ್ಕೆ ತೆಗೆದುಕೊಂಡಿದ್ದಾರೆ,(ಏಜನ್ಸೀಸ್​).