ಮಗ ಮಾಡಿದ ತಪ್ಪಿಗೆ ತಾಯಿಗ್ಯಾಕೆ ಶಿಕ್ಷೆ..? ತಾತನ ಹಂತಕನ ಪೆರೋಲ್ ಬೆಂಬಲಿಸಿ ಬಿಜೆಪಿ ನಾಯಕನ ಭಾವುಕ ಮಾತು! | Ravneet Bittu

ಜಗತಾರ್ ಸಿಂಗ್ ಹವಾರಾ ತಾಯಿ ವಯೋಸಹಜ ಆರೋಗ್ಯ ಸಮಸ್ಯೆಗಳಿಂದ ಬಳಲುತ್ತಿದ್ದು, ಪ್ರಸ್ತುತ ಅರೆ ಪ್ರಜ್ಞಾವಸ್ಥೆಯಲ್ಲಿದ್ದಾರೆ. ಈ ಹಿನ್ನೆಲೆಯಲ್ಲಿ, ಹವಾರಾ ತಮ್ಮ ತಾಯಿಯನ್ನು ಭೇಟಿಯಾಗಲು ಮಾನವೀಯ ಆಧಾರದ ಮೇಲೆ 10 ದಿನಗಳ ಪೆರೋಲ್ ನೀಡಬೇಕು ಎಂದು ಸಿಎಂ ಮಾನ್ ರಾಜ್ಯಪಾಲರಿಗೆ ಮನವಿ ಮಾಡಿದ್ದಾರೆ. ಹವಾರಾ ಭೇಟಿಯ ಸಂದರ್ಭದಲ್ಲಿ ರಾಜ್ಯದಲ್ಲಿ ಕಾನೂನು ಮತ್ತು ಸುವ್ಯವಸ್ಥೆಗೆ ಯಾವುದೇ ಭಂಗ ಬಾರದಂತೆ ಪಂಜಾಬ್ ಸರ್ಕಾರ ಸಂಪೂರ್ಣ ಜವಾಬ್ದಾರಿ ವಹಿಸಿಕೊಳ್ಳಲಿದೆ ಎಂದು ಮಾನ್ ಭರವಸೆ ನೀಡಿದ್ದಾರೆ.

ಬೀಯಂತ್ ಸಿಂಗ್ ಹತ್ಯೆ ಪ್ರಕರಣದಲ್ಲಿ ಜಗತಾರ್ ಸಿಂಗ್ ಹವಾರಾ ಶಿಕ್ಷೆಗೆ ಗುರಿಯಾಗಿದ್ದರೂ, ಅವರ ಮೊಮ್ಮಗ ರವನೀತ್ ಸಿಂಗ್ ಬಿಟ್ಟು ಈ ಪೆರೋಲ್ ವಿನಂತಿಯನ್ನು ಬೆಂಬಲಿಸಿದ್ದಾರೆ. ತಮ್ಮ ತಾತನ ಹತ್ಯೆಯ ಕಾನೂನು ಪ್ರಕ್ರಿಯೆಗೂ ಮತ್ತು ಒಬ್ಬ ವಯೋವೃದ್ಧ ತಾಯಿಯ ಮೇಲಿನ ಅನುಕಂಪಕ್ಕೂ ವ್ಯತ್ಯಾಸವಿದೆ ಎಂದಿರುವ ಬಿಟ್ಟು, ದಿವಂಗತ ಬೀಯಂತ್ ಸಿಂಗ್ ಕುಟುಂಬವಾಗಿ ನಾವು ಈ ಮಾನವೀಯ ನಿರ್ಧಾರವನ್ನು ಬೆಂಬಲಿಸುತ್ತೇವೆ ಎಂದಿದ್ದಾರೆ. ಮಗ ಮಾಡಿದ ತಪ್ಪಿಗೆ ತಾಯಿಗೆ ಶಿಕ್ಷೆಯಾಗಬಾರದು, ಕಾನೂನಿನಲ್ಲಿ ಪೆರೋಲ್‌ಗೆ ಅವಕಾಶವಿರುವಾಗ, ಅನಾರೋಗ್ಯದಿಂದ ಬಳಲುತ್ತಿರುವ ತಾಯಿಗೆ ಮಗನನ್ನು ಭೇಟಿಯಾಗುವ ಹಕ್ಕನ್ನು ಕಸಿದುಕೊಳ್ಳಬಾರದು ಎಂದು ದೊಡ್ಡತನ ಪ್ರದರ್ಶಿಸಿದ್ದಾರೆ.

ಪಂಜಾಬ್‌ನ ಸೂಕ್ಷ್ಮ ವಿವಾದವೊಂದರ ಎರಡು ವಿರುದ್ಧ ತುದಿಯಲ್ಲಿದ್ದ ಇಬ್ಬರು ಪ್ರಮುಖ ನಾಯಕರು ಈ ವಿಚಾರದಲ್ಲಿ ಒಂದೇ ರೀತಿಯ ನಿಲುವು ತಳೆದಿರುವುದು ಗಮನಾರ್ಹವಾಗಿದೆ. ಆದರೆ, ಈ ಘಟನೆಯು ಕೇವಲ ಒಂದು ಪೆರೋಲ್ ಅರ್ಜಿಗೆ ಮಾತ್ರ ಸೀಮಿತವಾಗಿರದೆ, ಬಂದಿ ಸಿಖ್ (ಸಿಖ್ ಕೈದಿಗಳು) ರಾಜಕೀಯವು ಪಂಜಾಬ್‌ನಲ್ಲಿ ಮತ್ತೆ ಮುಂಚೂಣಿಗೆ ಬರುತ್ತಿರುವುದನ್ನು ತೋರಿಸುತ್ತದೆ. 2027ರ ಪಂಜಾಬ್ ವಿಧಾನಸಭೆ ಚುನಾವಣೆ ಹತ್ತಿರವಾಗುತ್ತಿರುವಾಗ ಸಿಖ್ ಕೈದಿಗಳ ಬಿಡುಗಡೆ, ಪೆರೋಲ್ ಮತ್ತು ಪುನರ್ವಸತಿ ಪ್ರಮುಖ ರಾಜಕೀಯ ವಿಷಯಗಳಾಗಿ ಮಾರ್ಪಡಾಗುತ್ತಿವೆ.

ಈ ವಿಷಯದಲ್ಲಿ ಮಧ್ಯಪ್ರವೇಶಿಸುವ ಮೂಲಕ ಆಪ್ ಸರ್ಕಾರವು ಸಿಖ್ ಸಮುದಾಯದ ಭಾವನಾತ್ಮಕ ವಿಚಾರದಲ್ಲಿ ಮಾನವೀಯ ಮತ್ತು ಸಹಾನುಭೂತಿಯ ನಿಲುವು ತಳೆದಂತಾಗಿದೆ. ಅದೇ ಸಮಯದಲ್ಲಿ, ಪ್ರಕರಣದ ಅಂತಿಮ ನಿರ್ಧಾರ ದೆಹಲಿಯಲ್ಲಿ ನಡೆಯುತ್ತಿರುವುದರಿಂದ ಕೇಂದ್ರೀಯ ಅಂಗಳದಲ್ಲಿದೆ ಎಂಬುದನ್ನೂ ಪರೋಕ್ಷವಾಗಿ ಸ್ಪಷ್ಟಪಡಿಸಿದೆ. ಬಿಜೆಪಿ ನಾಯಕ ರವನೀತ್ ಬಿಟ್ಟು ಬೆಂಬಲವು, ಬೀಯಂತ್ ಸಿಂಗ್ ಹತ್ಯೆಯ ಕಾನೂನಾತ್ಮಕ ಹೋರಾಟವನ್ನು ಕೈಬಿಡದೆ ಮಾನವೀಯ ಆಧಾರದ ಮೇಲಿನ ನಿರ್ಧಾರಕ್ಕೆ ಸಾಥ್ ನೀಡುವ ವಿಶಿಷ್ಟ ರಾಜಕೀಯ ನಿಲುವನ್ನು ಪ್ರದರ್ಶಿಸಿದೆ.

ಬಂದಿ ಸಿಖ್ ರಾಜಕೀಯವು ಈಗ ಕೇವಲ ಅಕಾಲಿ ದಳಕ್ಕೆ ಮಾತ್ರ ಸೀಮಿತವಾಗಿರದೆ ಎಎಪಿ, ಬಿಜೆಪಿ, ಕಾಂಗ್ರೆಸ್ ಸೇರಿದಂತೆ ಎಲ್ಲಾ ಪಕ್ಷಗಳಿಗೂ ಪ್ರಮುಖ ರಾಜಕೀಯ ವಿಷಯವಾಗಿದೆ ಎಂಬುದು ಇದರಿಂದ ಸ್ಪಷ್ಟವಾಗಿದೆ. ಈ ಪೆರೋಲ್ ನಿರ್ಧಾರವು ಕೇವಲ ಒಂದು ಬಾರಿಯ ಮಾನವೀಯ ನಡೆಯಾಗಿಯೇ ಉಳಿಯುತ್ತದೆಯೇ ಅಥವಾ ಪಂಜಾಬ್ ರಾಜಕೀಯದಲ್ಲಿ ಬಂದಿ ಸಿಖ್ ವಿಷಯದ ದೊಡ್ಡ ಮಟ್ಟದ ಚರ್ಚೆಗೆ ದಾರಿಯಾಗುತ್ತದೆಯೇ ಎಂಬುದನ್ನು ಕಾದು ನೋಡಬೇಕಿದೆ(ಏಜೆನ್ಸೀಸ್​).