ಅಲ್ಲಿ ನೀರೂ ಇಲ್ಲ, ಅನ್ನವೂ ಇಲ್ಲ!...ಪ್ರಾಣ ಕೈಯಲ್ಲಿ ಹಿಡಿದು 4 ದಿನ ಬೆಟ್ಟದಲ್ಲಿ ಕಳೆದ ಯುವಕನ ಕಥೆ ಇದು | Nepal Floods

ಪಂಕಜ್ ಬರ್ಮನ್ ನೇಪಾಳದ ಜಲವಿದ್ಯುತ್ ಯೋಜನೆಯೊಂದರಲ್ಲಿ ಕೆಲಸ ಮಾಡುತ್ತಿದ್ದು, ಪ್ರವಾಹದ ನೀರು ಮಣ್ಣು ಮತ್ತು ಬಂಡೆಗಳೊಂದಿಗೆ ನುಗ್ಗಿ ಬಂದ ಕ್ಷಣವನ್ನು ನೆನಪಿಸಿಕೊಂಡ ಅವರು, ಹಠಾತ್ ದೊಡ್ಡ ಶಬ್ದ ಕೇಳಿಸಿತು. ಎಲ್ಲರೂ ಭಾಗೋ, ಭಾಗೋ (ಓಡಿ, ಓಡಿ) ಎಂದು ಕಿರುಚಾಡುತ್ತಿದ್ದರು. ನಾನು ಹೊರಗೆ ಬಂದ ತಕ್ಷಣ ನನ್ನ ಸ್ನೇಹಿತನೊಬ್ಬ ಭಾಗೋ ಪಂಕಜ್, ಭಾಗೋ ಎಂದು ಚೀರಿದ. ನೋಡ ನೋಡುತ್ತಿದ್ದಂತೆಯೇ ಅಪಾರ ಪ್ರಮಾಣದ ನೀರು ಮತ್ತು ಕೆಸರು ಒಳಗಡೆ ನುಗ್ಗಿತು ಎಂದು ಹೇಳಿದ್ದಾರೆ.

ವಾಹನಗಳು ಮತ್ತು ಕಟ್ಟಡಗಳು ಪ್ರವಾಹದ ನೀರಿನಲ್ಲಿ ಕೊಚ್ಚಿಹೋಗುತ್ತಿದ್ದನ್ನು ನೋಡಿ ಭಯಭೀತರಾದ ಪಂಕಜ್ ಮತ್ತು ಅವರ ಸಹೋದ್ಯೋಗಿಗಳು ಜೀವ ಉಳಿಸಿಕೊಳ್ಳಲು ಎತ್ತರದ ಪ್ರದೇಶದತ್ತ ಓಡಲು ನಿರ್ಧರಿಸಿದರು. ನೀರಿನ ಆರ್ಭಟದಿಂದ ಪಾರಾಗಲು ಬೆಟ್ಟವನ್ನು ಹತ್ತುವುದೊಂದೇ ನಮಗಿದ್ದ ಮಾರ್ಗವಾಗಿತ್ತು. ರಸ್ತೆಗಳು ಮತ್ತು ಸುತ್ತಮುತ್ತಲಿನ ಪ್ರದೇಶಗಳು ಮುಳುಗಡೆಯಾಗಿದ್ದರಿಂದ ನಾವು ಬೆಟ್ಟದ ತುದಿಗೆ ಏರಿದೆವು. ಸುಮಾರು ನೂರು ಜನರು ಅಲ್ಲಿ ಸಿಲುಕಿಕೊಂಡಿದ್ದೆವು. ಕೇವಲ ನೀರು ಮತ್ತು ಬಿಸ್ಕತ್ ತಿಂದೇ ನಾಲ್ಕು ದಿನಗಳನ್ನು ಬೆಟ್ಟದ ಮೇಲೆ ಕಳೆದವು ಎಂದು ಬರ್ಮನ್ ತಮ್ಮ ಸ್ಥಿತಿಯನ್ನು ವಿವರಿಸಿದ್ದಾರೆ.

ಪ್ರವಾಹ ಕಡಿಮೆಯಾಗುತ್ತಿದ್ದಂತೆ ನೇಪಾಳದ ರಕ್ಷಣಾ ಪಡೆಗಳು ಪಂಕಜ್ ಬರ್ಮನ್ ಮತ್ತು ಇತರರನ್ನು ರಕ್ಷಿಸಿ ಕಾಠ್ಮಂಡುವಿಗೆ ಕರೆತಂದವು. ಅಲ್ಲಿ ಅವರ ಕಂಪನಿಯು ಹೋಟೆಲ್‌ನಲ್ಲಿ ವಸತಿ ವ್ಯವಸ್ಥೆ ಕಲ್ಪಿಸಿತು. ಈ ವೇಳೆ ಅಸ್ಸಾಂ ಮುಖ್ಯಮಂತ್ರಿ ಹಿಮಂತ ಬಿಸ್ವ ಶರ್ಮಾ ಅವರು ಪಂಕಜ್ ಅವರಿಗೆ ಕರೆ ಮಾಡಿ ಧೈರ್ಯ ತುಂಬಿದರು. ಅಂತಿಮವಾಗಿ ಅಸ್ಸಾಂ ಸರ್ಕಾರದ ನೆರವಿನೊಂದಿಗೆ ಅವರೆಲ್ಲರೂ ಸುರಕ್ಷಿತವಾಗಿ ತಾಯ್ನಾಡಿಗೆ ಮರಳಿದರು.

ಪಂಕಜ್ ಬರ್ಮನ್ ತಮ್ಮ ಕುಟುಂಬವನ್ನು ತಲುಪುವಲ್ಲಿ ಯಶಸ್ವಿಯಾಗಿದ್ದರೂ, ಅವರ ನಿಕಟ ಸ್ನೇಹಿತ ಹಾಗೂ ಸಹೋದ್ಯೋಗಿ ಅರುಣ್ ಮಹಂತ ಇನ್ನೂ ನಾಪತ್ತೆಯಾಗಿದ್ದಾರೆ. ಈ ಕುರಿತು ಭಾವುಕರಾದ ಪಂಕಜ್, ಆಗಸ್ಟ್ 26 ರ ಬೆಳಿಗ್ಗೆ 5 ಗಂಟೆಗೆ ಅರುಣ್ ನೈಟ್ ಡ್ಯೂಟಿ ಮುಗಿಸಿ ಬಂದಿದ್ದ. ಮನೆಗೆ ಕರೆ ಮಾಡಿ ನಿದ್ದೆ ಮಾಡಿ ಮತ್ತೆ ಮಾಡುವುದಾಗಿ ಹೇಳಿದ್ದ. ನಾವಿಬ್ಬರೂ ಜೊತೆಯಾಗಿ ಉಪಹಾರ ಸೇವಿಸಿದೆವು, ನಂತರ ನಾನು ಕೆಲಸಕ್ಕೆ ತೆರಳಿದೆ. ಅಂದಿನಿಂದ ಅವನು ನಾಪತ್ತೆಯಾಗಿದ್ದಾನೆ. ನಾನು ಅವನ ಫೋನ್‌ಗೆ ಕರೆ ಮಾಡುತ್ತಲೇ ಇದ್ದೇನೆ, ಆದರೆ ಸಂಪರ್ಕ ಸಾಧಿಸಲು ಸಾಧ್ಯವಾಗುತ್ತಿಲ್ಲ ಎಂದು ಬೇಸರ ವ್ಯಕ್ತಪಡಿಸಿದ್ದಾರೆ.

ನಮ್ಮಲ್ಲಿ ಎಂಟು ಜನರು ಸುರಕ್ಷಿತವಾಗಿ ಮರಳಿದ್ದೇವೆ, ಆದರೆ ಐದು ಜನರು ಇನ್ನೂ ನಾಪತ್ತೆಯಾಗಿದ್ದಾರೆ. ನಾನು ಇಂದಿಗೂ ನನ್ನ ಸ್ನೇಹಿತನನ್ನೇ ನೆನಪಿಸಿಕೊಳ್ಳುತ್ತಿದ್ದೇನೆ ಎಂದು ಪಂಕಜ್​ ಕಣ್ಣೀರು ಹಾಕಿದ್ದಾರೆ(ಏಜೆನ್ಸೀಸ್​).