ಏನಿದು ಕೊಲೆ ಪ್ರಕರಣ​? ಪತ್ನಿಗೆ ಅರಿವಳಿಕೆ ಕೊಟ್ಟು ಕೊಂದ ಬೆಂಗಳೂರು ವೈದ್ಯನಿಗೆ ಕಾಡುತ್ತಿತ್ತು ಆ ಭಯ!

ಬೆಂಗಳೂರು: ಕಳೆದ ವರ್ಷ ಅಕ್ಟೋಬರ್​ನಲ್ಲಿ ತನ್ನ ಪತ್ನಿಯನ್ನು ಕೊಂದು ತನಗೆ ಏನು ಗೊತ್ತಿಲ್ಲದಂತೆ, ಕುಟುಂಬಸ್ಥರ ಬಳಿಕ ಡ್ರಾಮಾ ಮಾಡಿದ್ದ ವೈದ್ಯನ ಅಸಲಿ ಮುಖ ಕಡೆಗೂ ಪೊಲೀಸರ ತನಿಖೆಯಿಂದ ಕಳಚಿ ಬಿದ್ದಿತು. ಈ ಪ್ರಕರಣದ ತನಿಖೆಯನ್ನು ಮುಂದುವರಿಸಿದ ಖಾಕಿ ಪಡೆಗೆ ಈಗ ಇನ್ನಷ್ಟು ಶಾಕಿಂಗ್​ ಸಂಗತಿಗಳು ಬೆಳಕಿಗೆ ಬಂದಿವೆ. ಅದರಲ್ಲಿ ಪೊಲೀಸರಿಗೆ ತನ್ನ ಕೈವಾಡದ ಬಗ್ಗೆ ಶಂಕೆ ಬರಬಹುದು ಎಂಬ ಮುಂದಾಲೋಚನೆಯಲ್ಲಿ ಆತ ಪ್ರಿಯತಮೆಗೆ ಹೇಳಿದ ವಿಷಯ ಕಡೆಗೂ ಬಯಲಾಗಿದೆ.  

ಮೂಲತಃ ಚರ್ಮರೋಗ ತಜ್ಞೆಯಾಗಿದ್ದ ಪತ್ನಿ ಕೃತಿಕಾ ರೆಡ್ಡಿಯನ್ನು ಓವರ್​​ಡೋಸ್​ ಅನಸ್ತೇಶಿಯಾ ಕೊಟ್ಟು ಕೊಂದಿದ್ದ ಗಂಡ ಮಹೇಶ್​ ರೆಡ್ಡಿ. ಪ್ರೇಯಸಿ ಜೊತೆಗಿನ ಅಕ್ರಮ ಸಂಬಂಧ ಗೊತ್ತಾಗಿ, ತನ್ನನ್ನು ದೊಡ್ಡ ಸಮಸ್ಯೆಗೆ ತಂದಿಡುತ್ತಾಳೆ ಎಂದು ತಿಳಿದು ಲವರ್​ಗೆ ಸತ್ಯ ಬಾಯ್ಬಿಡದಂತೆ ಹೇಳಿಕೊಟ್ಟಿದ್ದ ಭೂಪನ ಕರಾಳ ಮುಖ ಇದೀಗ ಬಟಾಬಯಲಾಗಿದೆ. ಕೊಲೆ ಸಂಭವಿಸಿ ಒಂದು ವರ್ಷದ ಬಳಿಕ ಆತ ಮಾಡಿದ್ದ ಚಾಟ್ಸ್​ಗಳು ತಡವಾಗಿ ಬೆಳಕಿಗೆ ಬಂದಿವೆ.

ಆರೋಪಿ ಮಹೇಂದ್ರ ರೆಡ್ಡಿಯನ್ನು ಕಳೆದ ವರ್ಷ ಅಕ್ಟೋಬರ್‌ನಲ್ಲಿ ಪೊಲೀಸರು ಬಂಧಿಸಿದರು. ಪತ್ನಿಯನ್ನು ಕೊಂದ ಆರು ತಿಂಗಳ ಬಳಿಕ ಆತ ಖಾಕಿ ಬಲೆಗೆ ಬಿದ್ದದ್ದು. ಅಲ್ಲಿಯವರೆಗೆ ಮಹೇಂದ್ರನ ಬಗ್ಗೆ ಯಾರೊಬ್ಬರಿಗೂ ಅನುಮಾನವಿರಲಿಲ್ಲ. ಒಬ್ಬರನ್ನು ಬಿಟ್ಟು. ಅವರೇ ಕೃತಿಕಾ ರೆಡ್ಡಿಯ ಸಹೋದರಿ. ಇದು ಸಹಜ ಸಾವು ಎಂದು ಆರೋಪಿ ಮೇಲ್ನೋಟಕ್ಕೆ ತೋರಿಸಿದ್ದೇ ಆದರೂ, ತನ್ನ ತಂಗಿಯ ಸಾವು ಸಹಜವಲ್ಲ ಎಂದು ಶಂಕಿಸಿ, ಕೃತಿಕಾ ಗಂಡನ ಮೇಲೆ ಒಂದು ಕಣ್ಣೀಟ್ಟರು. ಅಲ್ಲೇ ಸತ್ಯ ಬಟಾಬಯಲಾಗಿದ್ದು.  

ತನಿಖೆಯ ಸಮಯದಲ್ಲಿ, ಆರೋಪಿ ಮಹೇಂದ್ರ, ಹರಿಷ್ಠ ಎಂಬ ನರ್ಸ್ ಜೊತೆ ಅಕ್ರಮ ಸಂಬಂಧ ಹೊಂದಿದ್ದ ಎಂದು ಪೊಲೀಸರು ತನಿಖೆಯಲ್ಲಿ ಬಹಿರಂಗಪಡಿಸಿದ್ದಾರೆ. ಕೊಲೆಯಾದ ಬಳಿಕ ಇವರಿಬ್ಬರು ಪರಸ್ಪರ ಚಾಟ್​ ಮಾಡಿರುವುದು ಸ್ಪಷ್ಟವಾಗಿದೆ. ಆದರಿದು, ವ್ಯಾಟ್ಸ್​ಆ್ಯಪ್​ನಲ್ಲಿ ಅಲ್ಲ. ಬದಲಿಗೆ ಯುಪಿಐ ಖಾತೆಗಳಲ್ಲಿ ಎಂಬುದು ಗಮನಾರ್ಹ. ಪೊಲೀಸರ ದಿಕ್ಕು ತಪ್ಪಿಸಲು ಯುಪಿಐ ಮೂಲಕ ಲವರ್​ಗೆ ಸಂದೇಶ ಕಳುಹಿಸಿದ್ದಾನೆ.  

ಡಿಜಿಟಲ್ ಮತ್ತು ಫೋರೆನ್ಸಿಕ್ ಸಾಕ್ಷಿಗಳನ್ನು ಸಂಗ್ರಹಿಸಿರುವ ಪೊಲೀಸರು, ಆರೋಪಪಟ್ಟಿಯಲ್ಲಿ ಈ ವಿಷಯಗಳನ್ನು ಸೇರಿಸಿದ್ದಾರೆ. ಇದರಲ್ಲಿ ಫೋರೆನ್ಸಿಕ್ ಸೈನ್ಸ್ ಲ್ಯಾಬೋರೇಟರಿ (FSL) ವಶಪಡಿಸಿಕೊಂಡ 10.34 ಲಕ್ಷಕ್ಕೂ ಹೆಚ್ಚು ಡಿಜಿಟಲ್ ಫೈಲ್‌ಗಳು, ಫೋನ್‌ಪೇ ಚಾಟ್‌ಗಳು, ಡಿಲೀಟ್​ ಮಾಡಲಾದ ಡೇಟಾ, ಖಾಸಗಿ ಕ್ಷಣಗಳ ಫೋಟೋಗಳು ಮತ್ತು ಇತರ ಪ್ರಮುಖ ಅಂಶಗಳು ಸೇರಿವೆ.

ಪ್ರಿಯತಮೆಗೆ ಕಳುಹಿಸಿರುವ ಮೆಸೇಜ್​ನಲ್ಲಿ, ನೀನು ಇದನ್ನು ನೋಡಿದ ಬಳಿಕ ನನಗೆ ಎಲ್ಲಿಯೂ ಸಂದೇಶ ಕಳುಹಿಸಬೇಡ ಅಥವಾ ಫೋನ್​ ಕಾಲ್​ ಮಾಡಬೇಡ. ಎಲ್ಲವೂ ಬಗೆಹರಿದ ನಂತರವೇ ನಾನು ನಿಂಗೆ ಕರೆ ಮಾಡುವೆ. ಪೊಲೀಸರು ಏನಾದರೂ ಅನುಮಾನಿಸಿ, ನಿಮ್ಮಿಬ್ಬರ ಸಂಬಂಧವೇನು? ಎಂದು ಕೇಳಿದರೆ, ನಾವಿಬ್ಬರು ಸ್ನೇಹಿತರೆಂದು ಹೇಳು ಎಂದಿರುವುದು ಪೊಲೀಸರಿಗೆ ಗೊತ್ತಾಗಿದೆ. 

2024ರ ಮೇನಲ್ಲಿ ಮಹೇಂದ್ರ ಮತ್ತು ಕೃತಿಕಾ ರೆಡ್ಡಿ ಮದುವೆಯಾದರು. ವೈದ್ಯ ದಂಪತಿ ಬೆಂಗಳೂರಿನ ಹೆಸರಾಂತ ಆಸ್ಪತ್ರೆಯಲ್ಲಿ ಒಟ್ಟಿಗೆ ಕೆಲಸ ಮಾಡುತ್ತಿದ್ದರು. ಇದೇ ಸಮಯದಲ್ಲಿ ಪ್ರೇಯಸಿಗೋಸ್ಕರ ಪತ್ನಿಗೆ ಗುಂಡಿ ತೋಡಲು ಸಂಚು ರೂಪಿಸಿದ ಮಹೇಂದ್ರ, ಕೃತಿಕಾಗೆ ಓವರ್​ಡೋಸ್​ ಅರಿವಳಿಕೆ ಕೊಟ್ಟು ಕೊಲೆ ಮಾಡಿದ. ಆಕೆಗೆ ಉಸಿರಾಟ ಸೇರಿದಂತೆ ತೀರ ಅನಾರೋಗ್ಯ ಸಮಸ್ಯೆಯಿಂದ ಮೃತಪಟ್ಟಳು ಎಂದು ಕೃತಿಕಾ ಸಂಬಂಧಿಕರನ್ನು ನಂಬಿಸಿದ. ಆದರೆ, ಮೃತಳ ಸಹೋದರಿ ಮಾತ್ರ ಇದನ್ನು ನಂಬಲಿಲ್ಲ.

ತನ್ನ ತಂದೆಗೆ ಇಲ್ಲಿ ಬೇರೆಯೇ ಏನೋ ಆಗಿದೆ. ಆಕೆಯನ್ನು ಮಣ್ಣು ಮಾಡಿದ ಆರು ತಿಂಗಳ ಬಳಿಕ ಶವವನ್ನು ಮರಣೋತ್ತರ ಪರೀಕ್ಷೆಗೆ ಒಳಪಡಿಸುವಂತೆ ಅವರು ಪೊಲೀಸರಿಗೆ ದೂರು ಸಲ್ಲಿಸಿದರು. ತಂದೆಯ ಮೂಲಕ ದೂರು ಕೊಡಿಸಿದ ಕೃತಿಕಾ ಸಹೋದರಿ, ತಂಗಿಯದ್ದು ಸಹಜ ಸಾವಲ್ಲ ಎಂದು ಮಹೇಂದ್ರನ ಮೇಲೆ ಬಲವಾದ ಶಂಕೆ ವ್ಯಕ್ತಪಡಿಸಿದರು. ಅಂತೆಯೇ, ಚುರುಕು ತನಿಖೆ ಕೈಗೊಂಡ ಪೊಲೀಸರಿಗೆ, ಇದು ಕೊಲೆ ಎಂಬುದು ದೃಢವಾಯಿತು. ತಕ್ಷಣವೇ ಆರೋಪಿ ಮಹೇಂದ್ರನನ್ನು ಅ.15ರಂದು ಪೊಲೀಸರು ಬಂಧಿಸಿದರು,(ಏಜೆನ್ಸೀಸ್).