ದೀದಿ ಸರ್ಕಾರದ ಭ್ರಷ್ಟಚಾರಗಳಿಂದ ಬಂಗಾಳಕ್ಕೆ ಕಳಂಕ ತಟ್ಟಿದೆ: ಉದ್ಯೋಗ ಹಗರಣದ ಕರಾಳ ಮುಖ ಬಿಚ್ಚಿಟ್ಟ ಸಿಎಂ ಸುವೇಂದು! Suvendu Adhikari

ಈ ಬಗ್ಗೆ ಶನಿವಾರ ಕೋಲ್ಕತ್ತಾದಲ್ಲಿ ಹಮ್ಮಿಕೊಳ್ಳಲಾಗಿದ್ದ ಕೇಂದ್ರ ಸರ್ಕಾರದ ಬೃಹತ್ ರೋಜ್‌ಗಾರ್ ಮೇಳ ಕಾರ್ಯಕ್ರಮದಲ್ಲಿ ಭಾಗವಹಿಸಿ, ನೂತನವಾಗಿ ಆಯ್ಕೆಯಾದ ನೂರಾರು ಅಭ್ಯರ್ಥಿಗಳಿಗೆ ಉದ್ಯೋಗ ನೇಮಕಾತಿ ಪತ್ರಗಳನ್ನು ವಿತರಿಸಿ ಸುವೇಂದು ಮಾತನಾಡಿದ್ದಾರೆ. ಅಲ್ಲದೆ, ಭ್ರಷ್ಟಾಚಾರದ ಕೂಪಕ್ಕೆ ತಳ್ಳಲ್ಪಟ್ಟಿರುವ ಪಶ್ಚಿಮ ಬಂಗಾಳವನ್ನು ಈ ದುಸ್ಥಿತಿಯಿಂದ ಹೊರತಂದು, ರಾಜ್ಯದ ಹಳೆಯ ವರ್ಚಸ್ಸು ಮತ್ತು ಗೌರವವನ್ನು ಮರಳಿ ಸ್ಥಾಪಿಸುವುದೇ ನಮ್ಮ ಸರ್ಕಾರದ ಮೊದಲ ಆದ್ಯತೆಯಾಗಿದೆ ಎಂದು ಈ ಸಂದರ್ಭದಲ್ಲಿ ಶಪಥ ಮಾಡಿದ್ದಾರೆ.

ಹಿಂದಿನ ಮಮತಾ ನೇತೃತ್ವದ ಸರ್ಕಾರದ ಅವಧಿಯಲ್ಲಿ ನಡೆದ ಶಿಕ್ಷಕರ ನೇಮಕಾತಿ ಹಾಗೂ ಪೌರಾಡಳಿತ ಮಂಡಳಿಗಳ ನೇಮಕಾತಿ ಹಗರಣಗಳನ್ನು ಪ್ರಸ್ತಾಪಿಸಿದ ಸುವೇಂದು, ಅರ್ಹ ಯುವಕರ ಭವಿಷ್ಯದ ಜೊತೆ ಟಿಎಂಸಿ ನಾಯಕರು ಚೆಲ್ಲಾಟವಾಡಿದ್ದಾರೆ ಎಂದು ದೂರಿದ್ದಾರೆ.

ಬಂಗಾಳದಲ್ಲಿ ನಡೆದ ನೇಮಕಾತಿ ಅಕ್ರಮಗಳು ಎಷ್ಟು ಭೀಕರವಾಗಿದ್ದವೆಂದರೆ, ಕಲ್ಕತ್ತಾ ಹೈಕೋರ್ಟ್ ಮತ್ತು ದೇಶದ ಅತ್ಯುನ್ನತ ನ್ಯಾಯಾಲಯವಾದ ಸುಪ್ರೀಂಕೋರ್ಟ್ ಈ ವಿಷಯದಲ್ಲಿ ಮಧ್ಯಪ್ರವೇಶಿಸಬೇಕಾಯಿತು. ನ್ಯಾಯಾಲಯಗಳು ತನಿಖೆಗೆ ಆದೇಶಿಸಿ, ಸಾವಿರಾರು ಅಕ್ರಮ ನೇಮಕಾತಿಗಳನ್ನು ರದ್ದುಗೊಳಿಸಿದಾಗ ಇಡೀ ದೇಶದ ಮುಂದೆ ಬಂಗಾಳದ ಮಾನ ಹರಾಜಾಯಿತು. ಲಂಚ ಪಡೆದು ಅನರ್ಹರಿಗೆ ಉದ್ಯೋಗ ಹಂಚಿದ ಟಿಎಂಸಿ ನಾಯಕರ ಪಾಪದ ಫಲವನ್ನು ಇಂದು ರಾಜ್ಯದ ಪ್ರಾಮಾಣಿಕ ಯುವಜನರು ಅನುಭವಿಸುವಂತಾಗಿದೆ ಎಂದು ದೀದಿ ಸರ್ಕಾರದ ಹಿಂದಿನ ನಡೆಯ ಬಗ್ಗೆ ಸಿಎಂ ಸುವೇಂದು ಕಿಡಿಕಾರಿದ್ದಾರೆ.

ಹಿಂದಿನ ಸರ್ಕಾರದ ಭ್ರಷ್ಟಾಚಾರದಿಂದಾಗಿ ಕೇಂದ್ರ ಸರ್ಕಾರದ ಸಂಸ್ಥೆಗಳೂ ಸಹ ಬಂಗಾಳದಲ್ಲಿ ಪರೀಕ್ಷೆ ನಡೆಸಲು ಹೆದರುವಂತಹ ವಾತಾವರಣ ಸೃಷ್ಟಿಯಾಗಿತ್ತು ಎಂಬ ಆಘಾತಕಾರಿ ಸತ್ಯವನ್ನು ಮುಖ್ಯಮಂತ್ರಿಗಳು ಬಿಚ್ಚಿಟ್ಟರು. ರಾಜ್ಯದ ಪರೀಕ್ಷಾ ಕೇಂದ್ರಗಳು ಮತ್ತು ವ್ಯವಸ್ಥೆ ಎಷ್ಟು ಕಲುಷಿತಗೊಂಡಿದ್ದವೆಂದರೆ, ಈಸ್ಟರ್ನ್ ರೈಲ್ವೆ, ಸೌತ್ ಈಸ್ಟರ್ನ್ ರೈಲ್ವೆ ಮತ್ತು ನಾರ್ತ್‌ಈಸ್ಟ್ ಫ್ರಾಂಟಿಯರ್ ರೈಲ್ವೆ ಸಂಸ್ಥೆಗಳು ಪಶ್ಚಿಮ ಬಂಗಾಳದಲ್ಲಿ ತಮ್ಮ ನೇಮಕಾತಿ ಪರೀಕ್ಷೆಗಳನ್ನು ನಡೆಸುವುದನ್ನೇ ನಿಲ್ಲಿಸಿಬಿಟ್ಟಿದ್ದವು ಎಂದು ಹೇಳಿದ್ದಾರೆ.

ಇದರ ಪರಿಣಾಮವಾಗಿ, ಪಶ್ಚಿಮ ಬಂಗಾಳದ ಲಕ್ಷಾಂತರ ಪ್ರತಿಭಾವಂತ ಯುವಕರು ಕೇವಲ ಒಂದು ರೈಲ್ವೆ ಪರೀಕ್ಷೆ ಬರೆಯುವುದಕ್ಕಾಗಿ ನೆರೆಯ ಬಿಹಾರ, ಅಸ್ಸಾಂ ಮತ್ತು ಒಡಿಶಾ ರಾಜ್ಯಗಳಿಗೆ ನೂರಾರು ಕಿಲೋಮೀಟರ್ ಪ್ರಯಾಣ ಬೆಳೆಸಬೇಕಾಯಿತು. ರಾಜ್ಯದಲ್ಲೇ ಪರೀಕ್ಷೆ ಬರೆಯುವ ಹಕ್ಕನ್ನು ಇಲ್ಲಿನ ಯುವಕರಿಂದ ಹಿಂದಿನ ಸರ್ಕಾರ ಕಸಿದುಕೊಂಡಿತ್ತು ಎಂದು ಸುವೇಂದು ತೀವ್ರ ಆಕ್ಷೇಪ ವ್ಯಕ್ತಪಡಿಸಿದರು.

ಪ್ರತಿಯೊಬ್ಬ ಸಾಮಾನ್ಯ ಮತ್ತು ಬಡ ಕುಟುಂಬದ ಪೋಷಕರು ತಮ್ಮ ಮಕ್ಕಳ ಉಜ್ವಲ ಭವಿಷ್ಯಕ್ಕಾಗಿ, ಅವರಿಗೆ ಒಂದು ಸ್ಥಿರವಾದ ಉದ್ಯೋಗ ಸಿಗಲಿ ಎಂಬ ಆಸೆಯಿಂದ ತಮ್ಮ ರಕ್ತದ ಬೆವರಿನ ಹಣವನ್ನು ಸುರಿದು ಓದಿಸುತ್ತಾರೆ. ಆದರೆ, ಟಿಎಂಸಿ ಆಡಳಿತಾವಧಿಯಲ್ಲಿ ಅರ್ಹತೆಗಿಂತ ಹೆಚ್ಚಾಗಿ ಲಂಚ ಮತ್ತು ರಾಜಕೀಯ ಪ್ರಭಾವ ಇದ್ದವರಿಗೆ ಮಾತ್ರ ಉದ್ಯೋಗ ಸಿಗುವಂತಾಯಿತು. ಈ ಭ್ರಷ್ಟ ದಂಧೆಯು ರಾಜ್ಯದ ಲಕ್ಷಾಂತರ ಪೋಷಕರ ಮತ್ತು ಯುವಕರ ಕನಸುಗಳನ್ನು ಜೀವಂತವಾಗಿ ಸಮಾಧಿ ಮಾಡಿದೆ ಎಂದು ಸುವೇಂದು ತಿಳಿದ್ದಾರೆ.

ಪ್ರಧಾನಿ ನರೇಂದ್ರ ಮೋದಿ ಅವರ ನೇತೃತ್ವದ ಕೇಂದ್ರ ಸರ್ಕಾರವು ದೇಶಾದ್ಯಂತ ಹಮ್ಮಿಕೊಂಡಿರುವ ರೋಜ್‌ಗಾರ್ ಮೇಳ ಪ್ರಕ್ರಿಯೆಯನ್ನು ಶ್ಲಾಘಿಸಿದ ಮುಖ್ಯಮಂತ್ರಿಗಳು, ಯಾವುದೇ ದಲ್ಲಾಳಿಗಳ ಹಾವಳಿಯಿಲ್ಲದೆ ನೇರವಾಗಿ ಅರ್ಹರಿಗೆ ಉದ್ಯೋಗ ಪತ್ರ ಸಿಗುತ್ತಿರುವುದೇ ಇದಕ್ಕೆ ಸಾಕ್ಷಿ ಎಂದರು. ಪಶ್ಚಿಮ ಬಂಗಾಳದ ನೂತನ ಸರ್ಕಾರವು ಕೇಂದ್ರದ ಮಾದರಿಯಲ್ಲೇ ರಾಜ್ಯದಲ್ಲೂ ಸಂಪೂರ್ಣ ಪಾರದರ್ಶಕ, ಲಂಚಮುಕ್ತ ಮತ್ತು ಮೆರಿಟ್ ಆಧಾರಿತ ನೇಮಕಾತಿ ಪ್ರಕ್ರಿಯೆಯನ್ನು ಜಾರಿಗೆ ತರಲಿದೆ. ಇನ್ನು ಮುಂದೆ ಬಂಗಾಳದ ಯಾವುದೇ ಯುವಕ ಉದ್ಯೋಗಕ್ಕಾಗಿ ಲಂಚ ನೀಡಬೇಕಾಗಿಲ್ಲ ಅಥವಾ ಪರೀಕ್ಷೆಗಾಗಿ ನೆರೆ ರಾಜ್ಯಗಳಿಗೆ ಅಲೆಯಬೇಕಾಗಿಲ್ಲ ಎಂದು ಸುವೇಂದು ಭರವಸೆ ನೀಡಿದ್ದಾರೆ,(ಏಜೆನ್ಸೀಸ್​).