ಮಾರುಕಟ್ಟೆಯಲ್ಲಿ ಕರಡಿ ಅಬ್ಬರ: 1,000 ಪಾಯಿಂಟ್ಸ್ ಕುಸಿದ ಸೆನ್ಸೆಕ್ಸ್, ಹೂಡಿಕೆದಾರರ 4 ಲಕ್ಷ ಕೋಟಿ ಧೂಳಿಪಟ..! Stock Market Crash

ಕೃತಕ ಬುದ್ಧಿಮತ್ತೆ (AI) ತಂತ್ರಜ್ಞಾನದ ಹೊಸ ಆವಿಷ್ಕಾರಗಳು ಸಾಂಪ್ರದಾಯಿಕ ಐಟಿ ಸೇವೆಗಳಿಗೆ ಧಕ್ಕೆ ತರಲಿವೆ ಎಂಬ ಆತಂಕ ಹೂಡಿಕೆದಾರರಲ್ಲಿ ಮನೆಮಾಡಿದೆ. ಅಂಥ್ರೋಪಿಕ್ ಸಂಸ್ಥೆಯ ಹೊಸ Claude Code ಬಿಡುಗಡೆಯು ಇನ್ಫೋಸಿಸ್, ಟಿಸಿಎಸ್​ ಮತ್ತು ಎಚ್‌ಸಿಎಲ್ ಟೆಕ್‌ನಂತಹ ದೈತ್ಯ ಕಂಪನಿಗಳ ಷೇರು ಮೌಲ್ಯವನ್ನು ಶೇ. 4 ರಿಂದ 6ರಷ್ಟು ಕುಸಿಯುವಂತೆ ಮಾಡಿದೆ.

ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ರಫ್ತು ಮತ್ತು ಆಮದು ಸುಂಕದ ಬಗ್ಗೆ ನೀಡಿರುವ ಹೊಸ ಎಚ್ಚರಿಕೆಗಳು ಜಾಗತಿಕ ವಾಣಿಜ್ಯ ವಲಯದಲ್ಲಿ ಆತಂಕ ಮೂಡಿಸಿವೆ. ಇದು ಭಾರತದ ರಫ್ತು ಆಧಾರಿತ ಕಂಪನಿಗಳ ಮೇಲೆ ನೇರ ಪರಿಣಾಮ ಬೀರಿದೆ.

ಮಾಸಿಕ ಫ್ಯೂಚರ್ಸ್ ಮತ್ತು ಆಪ್ಶನ್ಸ್ (F&O) ಒಪ್ಪಂದಗಳ ಮುಕ್ತಾಯದ ದಿನವಾಗಿದ್ದರಿಂದ ಮಾರುಕಟ್ಟೆಯಲ್ಲಿ ವಿಪರೀತ ಏರಿಳಿತ ಕಂಡುಬಂದಿದೆ. ಟ್ರೇಡರ್‌ಗಳು ತಮ್ಮ ಪೊಸಿಷನ್‌ಗಳನ್ನು ಕ್ಲೋಸ್ ಮಾಡುವ ಅವಸರದಲ್ಲಿದ್ದರಿಂದ ಮಾರಾಟದ ಒತ್ತಡ ಹೆಚ್ಚಾಯಿತು.

ಅಮೆರಿಕ ಮತ್ತು ಇರಾನ್ ನಡುವಿನ ಉದ್ವಿಗ್ನತೆ ಹೆಚ್ಚುತ್ತಿರುವುದು ಮತ್ತು ಕಚ್ಚಾ ತೈಲ ಬೆಲೆಯಲ್ಲಿನ ಅನಿಶ್ಚಿತತೆ ಹೂಡಿಕೆದಾರರನ್ನು ಸುರಕ್ಷಿತ ಹೂಡಿಕೆಯತ್ತ ಮುಖಮಾಡುವಂತೆ ಮಾಡಿದೆ.

ಅಮೆರಿಕನ್ ಡಾಲರ್ ಎದುರು ಭಾರತೀಯ ರೂಪಾಯಿ ಮೌಲ್ಯವು ಗರಿಷ್ಠ ಕುಸಿತ ಕಂಡು 90.95 ಮಟ್ಟಕ್ಕೆ ತಲುಪಿದೆ. ಇದು ವಿದೇಶಿ ಬಂಡವಾಳ ಹೂಡಿಕೆದಾರರು (FII) ಮಾರುಕಟ್ಟೆಯಿಂದ ಹಣವನ್ನು ಹಿಂತೆಗೆದುಕೊಳ್ಳಲು ಪ್ರಮುಖ ಕಾರಣವಾಯಿತು.

ಇಂದಿನ ಒಂದೇ ದಿನದ ವಹಿವಾಟಿನಲ್ಲಿ ಹೂಡಿಕೆದಾರರ ಸುಮಾರು 4 ಲಕ್ಷ ಕೋಟಿ ರೂಪಾಯಿ ಸಂಪತ್ತು ನಾಶವಾಗಿದೆ. ಟೆಕ್ ಮಹೀಂದ್ರಾ, ಎಚ್‌ಸಿಎಲ್ ಟೆಕ್ ಮತ್ತು ಇನ್ಫೋಸಿಸ್ ಇಂದಿನ ಟಾಪ್ ಲೂಸರ್ಸ್ ಎನಿಸಿಕೊಂಡವು. ಆದರೆ, ಸನ್ ಫಾರ್ಮಾ ಮತ್ತು ಎನ್‌ಟಿಪಿಸಿ ಷೇರುಗಳು ಮಾತ್ರ ಸ್ವಲ್ಪ ಮಟ್ಟಿನ ಚೇತರಿಕೆ ಕಂಡವು,(ಏಜೆನ್ಸೀಸ್).