ದೀದಿ ಕೋಟೆಯಲ್ಲಿ ಬಾಬರಿ ಮಸೀದಿ ವಿವಾದದ ಕಿಡಿ! ಅಮಿತ್ ಷಾ ಹೇಳಿದ ಬಂಗಾಳ ವಿಭಜನೆಯ ಗ್ಯಾಂಗ್ ಲೀಡರ್ಸ್ ಇವರೇ ನೋಡಿ? Amit Shah

ದೇಶದ ಗಡಿ ಭದ್ರತೆಯ ವಿಷಯದಲ್ಲಿ ಮಮತಾ ಸರ್ಕಾರ ಅಸಹಕಾರ ತೋರುತ್ತಿದೆ ಎಂದು ಅಮಿತ್ ಷಾ ಗಂಭೀರವಾಗಿ ಆರೋಪಿಸಿದ್ದಾರೆ. ಅಂತಾರಾಷ್ಟ್ರೀಯ ಗಡಿಯಲ್ಲಿ ಬೇಲಿ ಹಾಕಲು ಬಿಎಸ್ಎಫ್‌ಗೆ (BSF) ಮಮತಾ ಬ್ಯಾನರ್ಜಿ ಜಮೀನು ನೀಡುತ್ತಿಲ್ಲ ಎಂದು ಷಾ ದೂರಿದ್ದಾರೆ.

ಈ ನುಸುಳುಕೋರರು ನಮ್ಮ ರಾಷ್ಟ್ರೀಯ ಭದ್ರತೆಗೆ ದೊಡ್ಡ ಕಂಟಕವಾಗಿದ್ದು. ಅವರು ನಮ್ಮ ಯುವಕರ ಉದ್ಯೋಗಾವಕಾಶಗಳನ್ನು ಕಸಿದುಕೊಳ್ಳುತ್ತಿದ್ದಾರೆ. ಬಂಗಾಳದಲ್ಲಿ ಬಿಜೆಪಿ ಸರ್ಕಾರ ಅಧಿಕಾರಕ್ಕೆ ಬಂದ ತಕ್ಷಣ, ಯಾವುದೇ ವಿಳಂಬವಿಲ್ಲದೆ ಗಡಿ ಬೇಲಿ ನಿರ್ಮಾಣಕ್ಕೆ ಭೂಮಿ ಒದಗಿಸುತ್ತೇವೆ. ರಾಜ್ಯದ ಪ್ರತಿಯೊಬ್ಬ ನುಸುಳುಕೋರನನ್ನು ಹೊರಹಾಕುತ್ತೇವೆ ಎಂದು ಗೃಹಸಚಿವರು ಭರವಸೆ ನೀಡಿದ್ದಾರೆ.

ಅಮಿತ್ ಶಾ ಅವರ ಭಾಷಣದಲ್ಲಿ ಅತ್ಯಂತ ಸ್ಫೋಟಕವಾಗಿದ್ದು ಬಾಬರಿ ಮಸೀದಿ ಕುರಿತಾದ ಹೇಳಿಕೆಯಾಗಿದ್ದು. ಮುರ್ಷಿದಾಬಾದ್‌ನಲ್ಲಿ ಬಾಬರಿ ಮಸೀದಿಯ ಪ್ರತಿಕೃತಿಯನ್ನು ನಿರ್ಮಿಸಲು ಮಮತಾ ಬ್ಯಾನರ್ಜಿ ಮತ್ತು ಅವರ ಏಜೆಂಟ್ ಹುಮಾಯೂನ್ ಕಬೀರ್ ಯತ್ನಿಸುತ್ತಿದ್ದಾರೆ ಎಂದು ಷಾ ಆರೋಪಿಸಿದ್ದಾರೆ.

ಮುಂದುವರೆದು ಮಾತನಾಡಿದ ಷಾ, ದೀದಿ, ಬಂಗಾಳದಲ್ಲಿ ಬಿಜೆಪಿ ಸರ್ಕಾರ ಬರಲಿದೆ. ಇಲ್ಲಿ ಬಾಬರಿ ಮಸೀದಿ ನಿರ್ಮಿಸಲು ನಾವು ಎಂದಿಗೂ ಬಿಡುವುದಿಲ್ಲ. ಹುಮಾಯೂನ್ ಕಬೀರ್ ಎಂಬುವವರು ದೀದಿಯ ಆದೇಶದಂತೆ ಈ ಕೆಲಸ ಮಾಡುತ್ತಿದ್ದಾರೆ. ಆದರೆ ನಿಮ್ಮ ಸಮಯ ಮುಗಿದಿದೆ ಎಂದು ಎಚ್ಚರಿಸಿದ್ದಾರೆ. ಪಶ್ಚಿಮ ಬರ್ಧಮಾನ್ ಜಿಲ್ಲೆಯ ರಾಣಿಗಂಜ್‌ನಲ್ಲಿ ನಡೆದ ಮತ್ತೊಂದು ಱಲಿಯಲ್ಲೂ ಇದೇ ವಿಷಯವನ್ನು ಪುನರುಚ್ಚರಿಸಿದ ಷಾ, ಮಮತಾ ಮತ್ತು ಹುಮಾಯೂನ್ ಕಬೀರ್ ಇಬ್ಬರೂ ಒಂದೇ ಅಚ್ಚಿನವರು ಎಂದು ಲೇವಡಿ ಮಾಡಿದ್ದಾರೆ.

ಇತ್ತೀಚೆಗೆ ಮುರ್ಷಿದಾಬಾದ್‌ನಲ್ಲಿ ಬಾಬರಿ ಮಸೀದಿಯ ಮಾದರಿಯನ್ನು ನಿರ್ಮಿಸಲು ಅಡಿಗಲ್ಲು ಹಾಕಿದ್ದಕ್ಕಾಗಿ ಮಮತಾ ಬ್ಯಾನರ್ಜಿ ಅವರು ಹುಮಾಯೂನ್ ಕಬೀರ್ ಅವರನ್ನು ದ್ರೋಹಿ ಎಂದು ಕರೆದಿದ್ದರು. ಆದರೆ, ಹುಮಾಯೂನ್ ಕಬೀರ್ ಅವರು ಬಿಜೆಪಿ ನಾಯಕರೊಂದಿಗೆ ಸಂಪರ್ಕದಲ್ಲಿದ್ದಾರೆ ಎನ್ನಲಾದ ವೈರಲ್ ವಿಡಿಯೋವೊಂದು ರಾಜ್ಯ ರಾಜಕೀಯದಲ್ಲಿ ಸಂಚಲನ ಮೂಡಿಸಿದೆ. ಕಬೀರ್ ಈ ವಿಡಿಯೋವನ್ನು 'AI-ಜನರೇಟೆಡ್ ಎಂದು ನಿರಾಕರಿಸಿದ್ದಾರಲ್ಲದೆ, ಮಮತಾ ಅವರೇ ತಮ್ಮ ವಿರುದ್ಧ ಸಂಚು ರೂಪಿಸುತ್ತಿದ್ದಾರೆ ಎಂದು ಮರುದಾಳಿ ನಡೆಸಿದ್ದಾರೆ.

ಅಮಿತ್ ಷಾ ಅವರ ಈ ಭೇಟಿಯು ಬಿಜೆಪಿಯ ಆಕ್ರಮಣಕಾರಿ ಚುನಾವಣಾ ತಂತ್ರವನ್ನು ಎತ್ತಿ ತೋರಿಸುತ್ತದೆ. ಪ್ರಮುಖವಾಗಿ ಮೂರು ವಿಷಯಗಳನ್ನು ಬಿಜೆಪಿ ಜನರ ಮುಂದಿಟ್ಟಿದೆ.

ತುಷ್ಟೀಕರಣ ರಾಜಕಾರಣ: ಬಾಬರಿ ಮಸೀದಿ ನಿರ್ಮಾಣದ ಹೆಸರಿನಲ್ಲಿ ಧಾರ್ಮಿಕ ಧ್ರುವೀಕರಣದ ಆರೋಪವಾಗಿದೆ.

ಗಡಿ ಭದ್ರತೆ: ನುಸುಳುಕೋರರ ಸಮಸ್ಯೆಯನ್ನು ರಾಷ್ಟ್ರೀಯ ಭದ್ರತೆಯೊಂದಿಗೆ ತಳುಕು ಹಾಕುವುದು.

ಕುಟುಂಬ ರಾಜಕಾರಣ: ಮಮತಾ ಮತ್ತು ಅವರ ಸೋದರಳಿಯ ಅಭಿಷೇಕ್ ಅವರನ್ನು ಗುರಿಪಡಿಸುವುದು.

ಒಟ್ಟಾರೆಯಾಗಿ, ಬಂಗಾಳದ ಮಣ್ಣಿನಲ್ಲಿ ಈಗ ಅಭಿವೃದ್ಧಿಗಿಂತ ಹೆಚ್ಚಾಗಿ ಧರ್ಮ, ನುಸುಳುವಿಕೆ ಮತ್ತು ಅಧಿಕಾರದ ಹಪಾಹಪಿಯ ಚರ್ಚೆಗಳೇ ಜೋರಾಗಿವೆ. ಬಿಜೆಪಿ ಮತ್ತು ಟಿಎಂಸಿ ನಡುವಿನ ಈ ವಾಕ್ಸಮರವು ಮತದಾರರ ಮೇಲೆ ಯಾವ ರೀತಿಯ ಪ್ರಭಾವ ಬೀರಲಿದೆ ಎಂಬುದು ಚುನಾವಣಾ ಫಲಿತಾಂಶದ ಬಳಿಕವಷ್ಟೇ ತಿಳಿಯಲಿದೆ,(ಏಜೆನ್ಸೀಸ್).