ಎಂ.ಡಿ. ಅಜರುದ್ದೀನ್ ಸಚಿವ ಸ್ಥಾನ ಅಬಾಧಿತ; ಎಂಎಲ್​ಸಿಯಾಗಿ ನಾಮನಿರ್ದೇಶನ ಮಾಡಿದ ರಾಜ್ಯಪಾಲರು | Azharuddin

ಹೈದರಾಬಾದ್: ತೆಲಂಗಾಣದ ಮುಖ್ಯಮಂತ್ರಿ ರೇವಂತ್ ರೆಡ್ಡಿ ನೇತೃತ್ವದ ಕಾಂಗ್ರೆಸ್​ ಸರ್ಕಾರದಲ್ಲಿ ಮಾಜಿ ಕ್ರಿಕೆಟಿಗ ಎಂ.ಡಿ.ಅಜರುದ್ದೀನ್ ಅವರ ಸಚಿವ ಸ್ಥಾನ ಅಬಾಧಿತವಾಗಿದ್ದು, ಕೊನೆಗೂ ರಾಜ್ಯಪಾಲ ಶಿವ ಪ್ರತಾಪ್ ಶುಕ್ಲಾ ಅವರು ಅವರನ್ನೂ ಎಂಎಲ್​ಸಿಗಳಾಗಿ ನಾಮನಿರ್ದೇಶನ ಮಾಡಿದ್ದಾರೆ.

ಶನಿವಾರ(ಏ. 25) ಟಿಜೆಎಸ್ ಅಧ್ಯಕ್ಷ ಪ್ರೊ. ಎಂ. ಕೋದಂಡರಾಮ್ ಮತ್ತು ಮೊಹಮ್ಮದ್ ಅಜರುದ್ದೀನ್ ಅವರನ್ನು ರಾಜ್ಯಪಾಲರ ಕೋಟಾದಡಿಯಲ್ಲಿ ಎಂಎಲ್‌ಸಿಗಳಾಗಿ ನಾಮನಿರ್ದೇಶನ ಮಾಡಲು ಅನುಮೋದನೆ ನೀಡಿದ್ದಾರೆ.

2025 ಅಕ್ಟೋಬರ್ 31ರಂದು ಅಜರುದ್ದೀನ್​ ಸಚಿವರಾಗಿ ಪ್ರಮಾಣ ವಚನ ಸ್ವೀಕರಿಸಿದ್ದರು. ಅಧಿಕಾರ ವಹಿಸಿಕೊಂಡ ಬಳಿಕ ನಿಗದಿತ 6 ತಿಂಗಳೊಳಗೆ ಯಾವುದೇ ವಿಧಾನಸಭೆ ಅಥವಾ ವಿಧಾನ ಪರಿಷತ್​ನ ಸದಸ್ಯರಾಗಿ ಆಯ್ಕೆಯಾಗಬೇಕಿತ್ತು. ಆದರೆ ಈವರೆಗೆ ಅವರು ಯಾವುದೇ ಸದನದ ಸದಸ್ಯರಾಗಿ ಆಯ್ಕೆಯಾಗಿಲ್ಲ ಮತ್ತು ನಾಮನಿರ್ದೇಶನಗೊಂಡಿದ್ದಿಲ್ಲ.

ಕಳೆದ ವಾರ ರಾಜ್ಯಪಾಲರನ್ನು ಭೇಟಿಯಾಗಿದ್ದ ಮುಖ್ಯಮಂತ್ರಿ ಎ ರೇವಂತ್ ರೆಡ್ಡಿ ಮತ್ತು ಶಾಸಕಾಂಗ ವ್ಯವಹಾರಗಳ ಸಚಿವ ಡಿ ಶ್ರೀಧರ್ ಬಾಬು, ರಾಜ್ಯಪಾಲರ ಕೋಟಾದಡಿಯಲ್ಲಿ ಎಂಎಲ್‌ಸಿಗಳಾಗಿ ಮೊಹಮ್ಮದ್ ಅಜರುದ್ದೀನ್ ಮತ್ತು ಪ್ರೊಫೆಸರ್ ಎಂ ಕೋದಂಡರಾಮ್ ಅವರ ನಾಮನಿರ್ದೇಶನವನ್ನು ಪರಿಗಣಿಸುವಂತೆ ಒತ್ತಾಯಿಸಿದರು. ಈ ಹಿನ್ನೆಲೆ ಇಂದು ಪರಿಷತ್ ಶಾಸಕರಾಗಿ ನೇಮಕವಾಗಿದ್ದಾರೆ (ಏಜೆನ್ಸೀಸ್).