ಆಸ್ಕರ್​ ರೆಡ್​ ಕಾರ್ಪೆಟ್​​ನಲ್ಲಿ ಮಿಂಚಿದ 'ಮೇಡ್ ಇನ್ ಇಂಡಿಯಾ' ಫ್ಯಾಷನ್: 'ಸ್ವದೇಶ್' ಆಭರಣ ತೊಟ್ಟು ಗಮನಸೆಳೆದ ಪ್ರೀತಿಕಾ ಸ್ವರೂಪ್ | Swadesh

ಹೌದು, ಭಾರತೀಯ ಆಭರಣ ಕಲೆ ಮತ್ತು ಆಧುನಿಕ ವಿನ್ಯಾಸದ ಅದ್ಭುತ ಸಂಗಮವಾದ 'ಸ್ವದೇಶ್' (Swadesh) ಬ್ರ್ಯಾಂಡ್‌ನ ಈ ಕಂಠಹಾರವು ಭಾರತದ ಕುಶಲಕರ್ಮಿಗಳ ನೈಪುಣ್ಯತೆಯನ್ನು ವಿಶ್ವದ ವೇದಿಕೆಯಲ್ಲಿ ಅನಾವರಣಗೊಳಿಸಿದೆ.

ಸಾಮಾನ್ಯವಾಗಿ ಉಡುಪುಗಳಲ್ಲಿ ಕಾಣುವ 'ಜಿಪ್' (Zip) ಅನ್ನು ಆಭರಣವನ್ನಾಗಿ ಪರಿವರ್ತಿಸಿರುವುದು ಈ ವಿನ್ಯಾಸದ ವಿಶೇಷತೆ. ಕತ್ತಿನ ಸುತ್ತಲೂ ಅತ್ಯಂತ ನಾಜೂಕಾಗಿ ಹರಡಿರುವ ಈ ಜಿಪ್ ಮಾದರಿಯ ನೆಕ್ಲೇಸ್, ದೈನಂದಿನ ಬಳಕೆಯ ವಸ್ತುವನ್ನು 'ಹೈ ಜ್ಯುವೆಲ್ಲರಿ' (High Jewellery) ಮಟ್ಟಕ್ಕೆ ಏರಿಸಿದೆ. ಇದರ 'ಪುಲ್ ಟ್ಯಾಬ್' ಭಾಗದಲ್ಲಿರುವ 6 ಕ್ಯಾರೆಟ್‌ನ ಜಾಂಬಿಯನ್ ಎಮರಾಲ್ಡ್ (ಪಚ್ಚೆ) ಹಸಿರು ಬಣ್ಣದ ಹೊಳಪಿನೊಂದಿಗೆ ಕಣ್ಮನ ಸೆಳೆಯುತ್ತಿದೆ. ಇದರ ಸುತ್ತಲೂ ಕೈಯಿಂದಲೇ ಕೆತ್ತಲಾದ ವಜ್ರಗಳ ಸಾಲು ಹಾರದ ಅಂದವನ್ನು ಹೆಚ್ಚಿಸಿದೆ.

ಈ ಒಂದು ನೆಕ್ಲೇಸ್ ಸಿದ್ಧಪಡಿಸಲು ಕುಶಲಕರ್ಮಿಗಳು ಸತತ 160 ಗಂಟೆಗಳ ಕಾಲ ಶ್ರಮಿಸಿದ್ದಾರೆ. ಭಾರತದ ಸಾಂಪ್ರದಾಯಿಕ ಆಭರಣ ತಯಾರಿಕೆಯ ಕಲೆಯನ್ನು ಉಳಿಸಿಕೊಂಡು, ಅದನ್ನು ಇಂದಿನ ಜಾಗತಿಕ ಫ್ಯಾಷನ್‌ಗೆ ತಕ್ಕಂತೆ ಮರುರೂಪಿಸುವುದು 'ಸ್ವದೇಶ್' ಸಂಸ್ಥೆಯ ಮುಖ್ಯ ಉದ್ದೇಶವಾಗಿದೆ. ಪ್ರೀತಿಕಾ ಸ್ವರೂಪ್ ಅವರ ಈ ಆಯ್ಕೆಯು ಭಾರತೀಯ ಕಲೆ ಕೇವಲ ಸಂಪ್ರದಾಯಕ್ಕೆ ಸೀಮಿತವಾಗಿಲ್ಲ, ಅದು ಸಮಕಾಲೀನ ಜಗತ್ತಿಗೂ ಸೈ ಎನಿಸಿಕೊಳ್ಳುತ್ತದೆ ಎಂಬುದನ್ನು ಸಾಬೀತುಪಡಿಸಿದೆ.

ಪಾರ್ಟಿಯಲ್ಲಿ ಪಾಲ್ಗೊಂಡಿದ್ದ ಪ್ರಮುಖ ಸೆಲೆಬ್ರಿಟಿಗಳು ಮತ್ತು ಫ್ಯಾಷನ್ ವಿಮರ್ಶಕರು ಈ "ಜಿಪ್ ನೆಕ್ಲೇಸ್" ವಿನ್ಯಾಸವನ್ನು ಶ್ಲಾಘಿಸಿದ್ದಾರೆ. ಭಾರತೀಯ ಕಲೆ ಮತ್ತು ಸಂಸ್ಕೃತಿಯನ್ನು ಹೆಮ್ಮೆಯಿಂದ ವಿಶ್ವದಾದ್ಯಂತ ಪಸರಿಸುವಲ್ಲಿ ಈ ಆಭರಣ ಪ್ರಮುಖ ಪಾತ್ರವಹಿಸಿದೆ,(ಏಜೆನ್ಸೀಸ್).