Punjab Influencer​​​, ಮಾಡೆಲ್​ನ ಭೀಕರ ಹತ್ಯೆ; ಮರಕ್ಕೆ ಕಟ್ಟಿ ಹಾಕಿ, ಬೆಂಕಿ ಹಚ್ಚಿ ಕೊಂದ ಪರಿಚಯಸ್ಥರು..ಪೊಲೀಸರಿಂದ ತನಿಖೆ ಶುರು

ವಿಚ್ಛೇದಿತರಾಗಿದ್ದ ಮಂಜಿತ್ ಕೌರ್ (28) ಅವರು ಏಳು ವಾರಗಳ ಗರ್ಭಿಣಿಯಾಗಿದ್ದರು ಎನ್ನುವುದು ಮರಣೋತ್ತರ ಪರೀಕ್ಷೆಯಿಂದ ತಿಳಿದುಬಂದಿದೆ. ಪರಿಚಯಸ್ಥರಿಂದಲೇ ಈ ಕೃತ್ಯ ನಡೆದಿದೆ ಎಂದು ಅವರ ತಾಯಿ ಪೊಲೀಸರಿಗೆ ಕೊಟ್ಟ ದೂರಿನಲ್ಲಿ ಉಲ್ಲೇಖಿಸಲಾಗಿದೆ.

ಜುಲೈ 28 ರಂದು ಮಂಜಿತ್ ಕೌರ್ ಆಪ್ತ ಸ್ನೇಹಿತ ಹಾಗೂ ಪಂಜಾಬ್​ ಮೂಲದ ಇನ್‌ಫ್ಲುಯೆನ್ಸರ್ ಗಿಲ್ ಮೊಹಾಲಿ ಪೋಸ್ಟ್​ ಹಂಚಿಕೊಂಡು, ಮಂಜಿತ್​​​ ಅವರು ಶೇ.50ರಷ್ಟು ಚೇತರಿಸಿಕೊಂಡಿದ್ದಾರೆ. 10-15 ದಿನಗಳಲ್ಲಿ ಅವರು ಸ್ವತಃ ಲೈವ್ ಬಂದು ಘಟನೆ ಬಗ್ಗೆ ವಿವರಿಸುತ್ತಾರೆ. ಆದರೆ, ಕೆಟ್ಟದಾಗಿ ಕಾಮೆಂಟ್ ಮಾಡಿ ನೋಯಿಸಬೇಡಿ ಎಂದಿದ್ದರು. ಆದರೆ ಆ ಕ್ಷಣ ಎದುರಾಗುವ ಮುನ್ನವೇ ಆ ಯುವತಿ ಮೃತಪಟ್ಟಿದ್ದಾರೆ.

ಮಂಜಿತ್​ ಅವರ ತಾಯಿ ಕೊಟ್ಟ ದೂರಿನ ಪ್ರಕಾರ, ಜುಲೈ.3ನೇ ತಾರೀಖಿನಂದು ಮಂಜಿತ್​ ಕೌರ್​ ಅವರು ಚಂಢೀಗಡದ ಸೆಕ್ಟರ್​ 34ರ ಬಳಿ ಶುಭಿ ಮತ್ತು ಪಿಂಡಾ ಎನ್ನುವ ಪರಿಚಯಸ್ಥರನ್ನು ಭೇಟಿ ಮಾಡಲು ಮಂಜಿತ್​ಗೆ ಬೆದರಿಕೆ ಹಾಕಲಾಗಿತ್ತು. ಇದರಿಂದ ಸ್ಥಳಕ್ಕೆ ತೆರಳಿದ್ದ ಅವರನ್ನು ಬಲವಂತವಾಗಿ ಸ್ಥಳಕ್ಕೆ ಕರೆದುಕೊಂಡು ಹೋಗಿದ್ದಾರೆ. ಪಂಜಾಬ್​​ನ ರೂಪಿನಗರ ಜಿಲ್ಲೆಯ ಮೊರಿಂದಾಗೆ ಕರೆದುಕೊಂಡು ತೆರಳಿದ್ದಾರೆ. ಅಲ್ಲಿ ಅವರ ಮೇಲೆ ಭೀಕರ ಹಲ್ಲೆ ಮಾಡಿ, ಮರಕ್ಕೆ ಕಟ್ಟಿ ಹಾಕಿ ಬೆಂಕಿ ಹಚ್ಚಿದ್ದಾರೆ. ಮಂಜಿತ್​ ಸ್ನೇಹಿತರೊಬ್ಬರು ಇದೇ ಸಮಯದಲ್ಲಿ ಅಲ್ಲಿಗೆ ಆಗಮಿಸಿ ಅವರನ್ನು ತಕ್ಷಣವೇ ರಕ್ಷಣೆ ಮಾಡಿ ಆಸ್ಪತ್ರೆಗೆ ದಾಖಲಿಸಿದ್ದರು ಎನ್ನುವುದನ್ನು ಉಲ್ಲೇಖಿಸಲಾಗಿದೆ,

ಮೊದಲಿಗೆ ಮಂಜಿತ್​ ಅವರನ್ನು ಮೊರಿಂಡಾ ಆಸ್ಪತ್ರೆಗೆ ಕರೆದುಕೊಂಡು ಹೋಗಲಾಗಿತ್ತು. ಆನಂತರ ಸೂಕ್ತ ಚಿಕಿತ್ಸೆಗಾಗಿ ಅವರನ್ನು ಮೊಹಾಲಿಗೆ ಕರೆದೊಯ್ದು ಚಿಕಿತ್ಸೆ ಕೊಡಿಸಲಾಗಿತ್ತು. ಸುಟ್ಟ ಗಾಯಗಳ ತೀವ್ರತೆಯಿಂದಾಗಿ ಜುಲೈ 9 ರಂದು ಪಿಜಿಐಎಂಇಆರ್ ಚಂಡೀಗಢಕ್ಕೆ ಅಡ್ಮಿಟ್ ಮಾಡಲಾಗಿತ್ತು ಎನ್ನಲಾಗಿದೆ.

ಹಲವು ವಾರಗಳ ಕಾಲ ಪ್ರಜ್ಞಾಹೀನ ಸ್ಥಿತಿಯಲ್ಲೇ ಇದ್ದ ಅವರು, ಆ.5ರಂದು ಕೊಂಚ ಮಾತನಾಡಲು ಶುರು ಮಾಡಿದರು. ಈ ವೇಳೆ ಪೋಷಕರ ಬಳಿ ಘಟನೆ ಬಗ್ಗೆ ವಿವರಿಸಿದ್ದಾರೆ, ಆದರೆ ಅದಾದ ಕೆಲವೇ ದಿನಕ್ಕೆ ಅವರ ಸ್ಥಿತಿ ಮತ್ತೆ ಹದಗೆಟ್ಟ ಕಾರಣ, ಚಿಕಿತ್ಸೆ ಫಲಕಾರಿಯಾಗದೇ ಆಗಸ್ಟ್ 26 ರಂದು ಸಾವನ್ನಪ್ಪಿದರು.

ಮರಣದ ಬಳಿಕ, ಭಾರತೀಯ ನ್ಯಾಯ ಸಂಹಿತೆ (BNS) ಸೆಕ್ಷನ್ 140(1) (ಅಪಹರಣ), 103(1) (ಕೊಲೆ) ಮತ್ತು 3(5) (ಜಂಟಿ ಅಪರಾಧ ಹೊಣೆಗಾರಿಕೆ) ಅಡಿಯಲ್ಲಿ ಎಫ್‌ಐಆರ್ ದಾಖಲಿಸಲಾಗಿದೆ. ಸೆಕ್ಟರ್ 34 ರ ಎಸ್‌ಎಚ್‌ಒ ಶಾಧಿ ಲಾಲ್ ಅವರ ನೇತೃತ್ವದಲ್ಲಿ ತನಿಖೆ ಮುಂದುವರಿದಿದ್ದು, ತಲೆಮರೆಸಿಕೊಂಡಿರುವ ಶುಭಿ ಮತ್ತು ಪಿಂಡಾ ಎಂಬ ಇಬ್ಬರು ಆರೋಪಿಗಳ ಪತ್ತೆಗಾಗಿ ಶೋಧಕಾರ್ಯ ಮುಂದುವರೆದಿದೆ ಎನ್ನಲಾಗಿದೆ, (ಏಜೆನ್ಸೀಸ್).