2,700 ಕೋಟಿ ವೆಚ್ಚದ ಭಾರತ ಮಂಟಪದಲ್ಲಿ ಬ್ರಿಕ್ಸ್ ಮಹಾಸಂಗಮ!...ವಿಶ್ವದ ನಾಯಕರು ಒಂದಾಗುವ ವೇದಿಕೆಗೆ ಬಸವತತ್ವವೇ ಆಧಾರವಂತೆ! | Bharat Mandapam

ಈ ಮಹತ್ವದ ನಾಯಕರ ಭೇಟಿ, ಸಭೆ-ಸಮಾರಂಭಗಳು ಹಾಗೂ ಉನ್ನತ ಮಟ್ಟದ ಔತಣಕೂಟಗಳಿಗೆ ನವದೆಹಲಿಯ ಹೃದಯಭಾಗದಲ್ಲಿರುವ ಅತ್ಯಾಧುನಿಕ ಭಾರತ ಮಂಟಪ ಅದ್ಧೂರಿಯಾಗಿ ಜಗಮಗಿಸುತ್ತಾ ಜಾಗತಿಕ ನಾಯಕರನ್ನು ಬರಮಾಡಿಕೊಳ್ಳುತ್ತಿದೆ.

ನವದೆಹಲಿಯ ಪ್ರಗತಿ ಮೈದಾನ ಸಂಕೀರ್ಣದಲ್ಲಿ ಸುಮಾರು 123 ಎಕರೆ ಪ್ರದೇಶದಲ್ಲಿ 2,700 ಕೋಟಿ ರೂಪಾಯಿ ವೆಚ್ಚದಲ್ಲಿ ನಿರ್ಮಿಸಲಾದ ಭಾರತ ಮಂಟಪವನ್ನು 2023ರಲ್ಲಿ ಉದ್ಘಾಟಿಸಲಾಯಿತು. ಇಂದು ಇದು ಅಂತರರಾಷ್ಟ್ರೀಯ ಮಟ್ಟದ ಬೃಹತ್ ಕಾರ್ಯಕ್ರಮಗಳನ್ನು ಆಯೋಜಿಸುವ ಭಾರತದ ಸಾಮರ್ಥ್ಯದ ಸಂಕೇತವಾಗಿ ಹೊರಹೊಮ್ಮಿದೆ. ಸಾವಿರಾರು ಅತಿಥಿಗಳಿಗೆ ಆತಿಥ್ಯ ನೀಡಬಲ್ಲ ಸಾಮರ್ಥ್ಯ ಹೊಂದಿದೆ.

ಭಾರತ ಮಂಟಪ ಎಂಬ ಹೆಸರು 12ನೇ ಶತಮಾನದ ಶರಣ ಕ್ರಾಂತಿಯ ಸಾರ್ವಜನಿಕ ಚರ್ಚೆ ಮತ್ತು ಪ್ರಜಾಪ್ರಭುತ್ವದ ಮೊದಲ ವೇದಿಕೆ ಎಂದು ಪರಿಗಣಿಸಲ್ಪಟ್ಟ ಅನುಭವ ಮಂಟಪದಿಂದ ಪ್ರೇರಣೆ ಪಡೆದಿದೆ ಎಂದು ಹೇಳಲಾಗುತ್ತದೆ.

ಈ ಸಂಕೀರ್ಣದ ಪ್ರಮುಖ ಆಕರ್ಷಣೆಗಳಲ್ಲಿ ಒಂದಾಗಿ 27 ಅಡಿ ಎತ್ತರ ಹಾಗೂ 18 ಟನ್ ತೂಕದ ಭವ್ಯ ನಟರಾಜ ವಿಗ್ರಹವು ಮಂಟಪದ ಮುಂದೆ ಕಂಗೊಳಿಸುತ್ತಿದೆ. ತಮಿಳುನಾಡಿನ ಶಿಲ್ಪಿಗಳು ಅಷ್ಟಧಾತುಗಳಿಂದ (ಎಂಟು ಲೋಹಗಳ ಮಿಶ್ರಣ) ಈ ವಿಗ್ರಹವನ್ನು ಕೆತ್ತಿದ್ದಾರೆ. ಈ ಸಂಕೀರ್ಣದ ವೈಭವವು ಕೇವಲ ಎತ್ತರ, ಗಾತ್ರ ಅಥವಾ ಭವ್ಯತೆಗೆ ಮಾತ್ರ ಸೀಮಿತವಾಗಿಲ್ಲ ಇದನ್ನು ನಿರ್ಮಿಸಿದ ಪರಿಕಲ್ಪನೆಯಲ್ಲಿ ಇದರ ನೈಜ ಸೌಂದರ್ಯ ಅಡಗಿದೆ.

ಶಂಖದ ಆಕಾರ: ಭವನದ ಮುಖ್ಯ ಸಮಾವೇಶ ಕೇಂದ್ರವನ್ನು ಶಂಖದ ಆಕಾರದಲ್ಲಿ ವಿನ್ಯಾಸಗೊಳಿಸಲಾಗಿದ್ದು, ಇದು ಜಾಗೃತಿ, ಶಕ್ತಿ ಮತ್ತು ಶುಭಾರಂಭದ ಸಂಕೇತವಾಗಿದೆ.

ಭಾರತೀಯ ಪರಂಪರೆ: ಒಳಾಂಗಣ ಮತ್ತು ಹೊರಾಂಗಣ ಎರಡರಲ್ಲೂ ಭಾರತೀಯ ನಾಗರಿಕತೆಯ ಜಲಕ್ ಕಾಣ ಸಿಗುತ್ತದೆ. ಸೂರ್ಯ ಶಕ್ತಿ, ಝೀರೋದಿಂದ ಇಸ್ರೋ (Zero to ISRO)ವರೆಗಿನ ಪ್ರೇರಣಾದಾಯಿ ಪ್ರಯಾಣ ಮತ್ತು ಪಂಚಮಹಾಭೂತಗಳ (ನಿಸರ್ಗದ ಐದು ತತ್ತ್ವಗಳು) ವಿನ್ಯಾಸಗಳನ್ನು ಇಲ್ಲಿ ಅತ್ಯಂತ ಕಲಾತ್ಮಕವಾಗಿ ಸಂಯೋಜಿಸಲಾಗಿದೆ.

ಉನ್ನತ ಮಟ್ಟದ ರಾಜತಾಂತ್ರಿಕ ಮಾತುಕತೆಗಳ ಕೇಂದ್ರವಾಗಿರುವ ಭಾರತ ಮಂಟಪದ ಶೃಂಗಸಭೆ ಸಭಾಂಗಣವು 150ಕ್ಕೂ ಹೆಚ್ಚು ದೇಶಗಳ ನಿಯೋಗಿಗಳಿಗೆ ಆಸನ ವ್ಯವಸ್ಥೆ ಕಲ್ಪಿಸುವ ಸಾಮರ್ಥ್ಯ ಹೊಂದಿದೆ. ನಿನ್ನೆ (ಶನಿವಾರ) ಇಲ್ಲಿ ಹಲವು ದ್ವಿಪಕ್ಷೀಯ ಹಾಗೂ ಬಹುಪಕ್ಷೀಯ ಮಾತುಕತೆಗಳು ನಡೆದಿವೆ.

ಹಾಲ್ ನಂಬರ್ 1 (Bharat Innovates): ಶುಕ್ರವಾರ ಇಲ್ಲಿದ್ದ ಭಾರತ್ ಇನ್ನೋವೇಟ್ಸ್ ಕಾರ್ಯಕ್ರಮದಲ್ಲಿ ದೇಶದ ನವೀನ ತಂತ್ರಜ್ಞಾನಗಳನ್ನು ಜಗತ್ತಿಗೆ ಪ್ರದರ್ಶಿಸಲಾಯಿತು. ಡ್ರೋನ್ ತಂತ್ರಜ್ಞಾನದಿಂದ ಹಿಡಿದು ಉದಯೋನ್ಮುಖ ಆಧುನಿಕ ತಂತ್ರಜ್ಞಾನಗಳವರೆಗೆ ಭಾರತದ ನಾವೀನ್ಯತಾ ಸಾಮರ್ಥ್ಯಕ್ಕೆ ಈ ಹಾಲ್ ಸಾಕ್ಷಿಯಾಯಿತು. ಅಲ್ಲದೆ, ಬ್ರಿಕ್ಸ್ ಒಕ್ಕೂಟದ ಎರಡು ದಶಕಗಳ ಪ್ರಯಾಣ ಮತ್ತು ಮುಂದಿನ ಭವಿಷ್ಯದ ಕಾರ್ಯತಂತ್ರಗಳ ಕುರಿತ ವಿಶೇಷ ಕಾರ್ಯಕ್ರಮಗಳು ಇಲ್ಲಿ ನಡೆಯಲಿವೆ.

ಹಾಲ್ ನಂಬರ್ 14 (BRICS Business Forum): ಇದು ಬ್ರಿಕ್ಸ್ ಶೃಂಗಸಭೆಯ ಅತ್ಯಂತ ಮಹತ್ವದ ವಾಣಿಜ್ಯ ಕಾರ್ಯಕ್ರಮಕ್ಕೆ ವೇದಿಕೆಯಾಗಲಿದೆ. ಬ್ರಿಕ್ಸ್ ರಾಷ್ಟ್ರಗಳ ಉನ್ನತ ಉದ್ಯಮಿಗಳು, ಹೂಡಿಕೆದಾರರು ಮತ್ತು ಕಾರ್ಪೊರೇಟ್ ಪ್ರತಿನಿಧಿಗಳು ಇಲ್ಲಿ ಒಂದಾಗಲಿದ್ದಾರೆ.

ಹಾಲ್ ನಂಬರ್ 5 (ಅಂತರರಾಷ್ಟ್ರೀಯ ಮಾಧ್ಯಮ ಕೇಂದ್ರ): ಜಗತ್ತಿನ ಮೂಲೆ ಮೂಲೆಯಿಂದ ಆಗಮಿಸಿರುವ ಸುಮಾರು 1,200 ರಿಂದ 1,400 ಪತ್ರಕರ್ತರಿಗಾಗಿ ಇಲ್ಲಿ ಅತ್ಯಾಧುನಿಕ ಅಂತರರಾಷ್ಟ್ರೀಯ ಮಾಧ್ಯಮ ಕೇಂದ್ರವನ್ನು ತೆರೆಯಲಾಗಿದೆ. ಬ್ರಿಕ್ಸ್ ಶೃಂಗಸಭೆಯ ಪ್ರಮುಖ ಘೋಷಣೆಗಳು, ವಿಶೇ‍ಷ ಕ್ಷಣಗಳು ಮತ್ತು ದೃಶ್ಯಗಳನ್ನು ವಿಶ್ವಕ್ಕೆ ತಲುಪಿಸುವ ಕಾರ್ಯ ಇಲ್ಲಿಂದ ನಡೆದಿವೆ(ಏಜೆನ್ಸೀಸ್​).