ವಿಪರೀತ ಸೆಕೆ ಅಂತ ಎಸಿ ಆನ್​ ಮಾಡುತ್ತಿದ್ದಂತೆ ಹೊರಬಂದ 3 ವಿಷಕಾರಿ ಹಾವುಗಳು! ಭಯಾನಕ ವಿಡಿಯೋ ವೈರಲ್​... Snakes

Snakes : ನೆತ್ತಿಯ ಮೇಲೆ ಸುಡುತ್ತಿರುವ ಬೇಸಿಗೆಯ ಬೇಗೆಯಿಂದ ಪಾರಾಗಲು ಎಸಿ ಆನ್ ಮಾಡಿದ ಗುಜರಾತ್‌ನ ವಲ್ಸಾದ್ ಜಿಲ್ಲೆಯ ಪಾರ್ದಿ ಪ್ರದೇಶದ ಕುಟುಂಬವೊಂದು ಅಕ್ಷರಶಃ ಬೆಚ್ಚಿಬಿದ್ದಿದೆ. ಎಸಿ ಆನ್ ಮಾಡಿದ ಕೂಡಲೇ ಅದರಿಂದ ತಣ್ಣನೆಯ ಗಾಳಿಯ ಬದಲಿಗೆ ಒಂದಲ್ಲ, ಎರಡಲ್ಲ, ಬರೋಬ್ಬರಿ ಮೂರು ವಿಷಪೂರಿತ ಹಾವುಗಳು ಹೊರಬಂದಿವೆ. ಎಸಿಯ ಒಳಗಿನಿಂದ ಹಾವುಗಳು ಇಣುಕಿ ನೋಡುವುದನ್ನು ಕಂಡು ಮನೆಯವರು ಭಯಭೀತರಾಗಿ ಕಿರುಚಾಡಿದ್ದಾರೆ. ಇದಕ್ಕೆ ಸಂಬಂಧಿಸಿದ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್​ ಆಗುತ್ತಿದೆ. 

ವಲ್ಸಾದ್‌ನ ರೈಲ್ವೇ ಏರಿಯಾ ನಿವಾಸಿಗಳಾದ ಮಧ್ಯಮ ವರ್ಗದ ಕುಟುಂಬವೊಂದು ಮಧ್ಯಾಹ್ನದ ವೇಳೆ ಎಸಿ ಆನ್ ಮಾಡಿದಾಗ, ಅದರಲ್ಲಿ ಏನೋ ಚಲಿಸುತ್ತಿರುವುದು ಗಮನಕ್ಕೆ ಬಂದಿದೆ. ಹತ್ತಿರ ಹೋಗಿ ನೋಡಿದಾಗ ಎಸಿ ಯುನಿಟ್‌ನೊಳಗೆ ಒಂದರ ಹಿಂದೆ ಒಂದರಂತೆ ಮೂರು ಹಾವುಗಳು ಹರಿದಾಡುತ್ತಿರುವುದು ಕಂಡುಬಂದಿದೆ. ಮನೆಯಲ್ಲಿ ಮಹಿಳೆಯರು ಮತ್ತು ಮಕ್ಕಳಿದ್ದ ಕಾರಣ ಭೀತಿಯ ವಾತಾವರಣ ನಿರ್ಮಾಣವಾಗಿತ್ತಾದರೂ, ಕುಟುಂಬದವರು ತಕ್ಷಣವೇ ಎಚ್ಚೆತ್ತುಕೊಂಡು ಎಸಿ ಆಫ್ ಮಾಡಿ ಕೋಣೆಯಿಂದ ಹೊರಗೆ ಓಡಿ ಬರುವ ಮೂಲಕ ಅನಾಹುತದಿಂದ ಪಾರಾಗಿದ್ದಾರೆ.

ಘಟನೆಯ ಬಗ್ಗೆ ಮಾಹಿತಿ ಸಿಗುತ್ತಿದ್ದಂತೆ ಸ್ಥಳೀಯ ಸರ್ಕಾರೇತರ ಸಂಸ್ಥೆ ಸರ್ಪ್ ಮಿತ್ರ ಸದಸ್ಯರು ಸ್ಥಳಕ್ಕೆ ಆಗಮಿಸಿದರು. ಎಸಿ ಘಟಕವನ್ನು ತೆರೆದಾಗ, ರಕ್ಷಣಾ ತಂಡವು ಕೂಡ ಆಘಾತಕ್ಕೊಳಗಾಯಿತು. ಒಂದೇ ಎಸಿಯಲ್ಲಿ ಮೂರು ವಿಷಪೂರಿತ ಹಾವುಗಳು ಹೇಗೆ ಸುರಕ್ಷಿತವಾಗಿ ಕುಳಿತಿವೆ ಎಂಬುದನ್ನು ನೋಡಿ ತಜ್ಞರು ಸಹ ಹುಬ್ಬೇರಿಸಿದರು. ದೀರ್ಘ ರಕ್ಷಣಾ ಕಾರ್ಯಾಚರಣೆಯ ನಂತರ, ಮೂರು ಹಾವುಗಳನ್ನು ಸುರಕ್ಷಿತವಾಗಿ ಹೊರತೆಗೆದು ಕಾಡಿಗೆ ಬಿಡಲಾಯಿತು.

ಅಷ್ಟಕ್ಕೂ ಆ ಹಾವುಗಳು ಎಸಿ ಒಳಗೆ ಹೇಗೆ ಪ್ರವೇಶಿಸಿತು ಎಂಬ ನಿಗೂಢತೆ ಇನ್ನೂ ಹಾಗೇ ಉಳಿದಿದೆ. ಆದಾಗ್ಯೂ, ತಜ್ಞರ ಪ್ರಕಾರ, ಹಾವು ಎಸಿಯ ಡ್ರೈನ್ ಪೈಪ್ ಅಥವಾ ಗೋಡೆಯ ಬಿರುಕು ಮೂಲಕ ಪ್ರವೇಶಿಸಿರುವ ಸಾಧ್ಯತೆ ಹೆಚ್ಚು ಎಂದು ಅಂದಾಜಿಸಿದ್ದಾರೆ. ಸದ್ಯ ಈ ಘಟನೆಯ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗುತ್ತಿದ್ದು, ಹಾವುಗಳನ್ನು ನೋಡಿದ ನೆಟ್ಟಿಗರು ಹುಬ್ಬೇರಿಸಿದ್ದಾರೆ. 

ಅಂದಹಾಗೆ, ಬೇಸಿಗೆಯ ತಾಪ ಹೆಚ್ಚಾದಾಗ ಹಾವುಗಳು ತಂಪು ಮತ್ತು ತೇವಾಂಶವಿರುವ ಜಾಗಗಳನ್ನು ಹುಡುಕುತ್ತಾ ಎಸಿ (AC) ಘಟಕಗಳ ಒಳಗೆ ಸೇರಿಕೊಳ್ಳುವ ಸಾಧ್ಯತೆ ಇರುತ್ತದೆ. ಆದ್ದರಿಂದ, ಈ ಬಗ್ಗೆ ಎಚ್ಚರ ವಹಿಸುವುದು ಬಹಳ ಮುಖ್ಯ. ಇದನ್ನು ತಡೆಗಟ್ಟಲು ಎಸಿಯ ಡ್ರೈನ್ ಪೈಪ್‌ನ ಮುಖಕ್ಕೆ ಸಣ್ಣ ಜಾಲರಿಯನ್ನು ಅಳವಡಿಸಬೇಕು ಮತ್ತು ಕಾಲಕಾಲಕ್ಕೆ ಎಸಿ ಸರ್ವಿಸಿಂಗ್ ಮಾಡಿಸುವ ಮೂಲಕ ಅದರೊಳಗೆ ಯಾವುದೇ ಪ್ರಾಣಿಗಳು ಸೇರಿಕೊಂಡಿಲ್ಲ ಎಂಬುದನ್ನು ಖಚಿತಪಡಿಸಿಕೊಳ್ಳಬೇಕು ಎಂದು ತಜ್ಞರು ಸಲಹೆ ನೀಡಿದ್ದಾರೆ.

ಇನ್ನೂ ಮನೆಯ ಸುತ್ತಮುತ್ತ ಪೊದೆಗಳು ಅಥವಾ ಕಸದ ರಾಶಿಗಳು ಬೆಳೆಯದಂತೆ ನೋಡಿಕೊಳ್ಳುವುದು ಅಗತ್ಯ, ಏಕೆಂದರೆ ಇವು ಹಾವುಗಳಿಗೆ ಆಶ್ರಯ ತಾಣವಾಗಬಲ್ಲವು. ವಿಶೇಷವಾಗಿ ದೀರ್ಘಕಾಲದವರೆಗೆ ಬಳಸದ ಎಸಿಯನ್ನು ಆನ್ ಮಾಡುವ ಮೊದಲು ಘಟಕವನ್ನು ಕೂಲಂಕಷವಾಗಿ ಪರೀಕ್ಷಿಸುವುದು ಸುರಕ್ಷತೆಯ ದೃಷ್ಟಿಯಿಂದ ಅತ್ಯಗತ್ಯ ಎಂಬುದು ತಜ್ಞರ ಸೂಚನೆಯಾಗಿದೆ, (ಏಜೆನ್ಸೀಸ್​).