ವಿಶ್ವಮಟ್ಟದಲ್ಲಿ ಭಾರತೀಯ ಸಂಸ್ಕೃತಿಯ ಪುನರುತ್ಥಾನ: ನಮೋ ನೇತೃತ್ವದಲ್ಲಿ ಜಾಗತಿಕ ಪಾರಂಪರಿಕ ತಾಣಗಳ ಜೀರ್ಣೋದ್ಧಾರ! PM Modi

ಜಕಾರ್ತ: ಪ್ರಧಾನಿ ನರೇಂದ್ರ ಮೋದಿ ( PM Modi ) ಅವರು ಇಂದು ಇಂಡೋನೇಷ್ಯಾದ ಪ್ರಸಿದ್ಧ ಪ್ರಂಬನಾನ್ ಶಿವ ದೇವಾಲಯಕ್ಕೆ ಭೇಟಿ ನೀಡಿದ ಬೆನ್ನಲ್ಲೇ, ಜಾಗತಿಕ ಮಟ್ಟದಲ್ಲಿ ಭಾರತದ ಪ್ರಾಚೀನ ನಾಗರಿಕತೆ ಮತ್ತು ಸಾಂಸ್ಕೃತಿಕ ಪರಂಪರೆಯನ್ನು ಮರುಸ್ಥಾಪಿಸುವಲ್ಲಿ ಭಾರತ ಸರ್ಕಾರ ಕೈಗೊಂಡಿರುವ ಐತಿಹಾಸಿಕ ಕಾರ್ಯಗಳು ಜಗತ್ತಿನ ಗಮನ ಸೆಳೆಯುತ್ತಿವೆ.

ಕಳೆದ ಕೆಲವು ವರ್ಷಗಳಲ್ಲಿ ಪ್ರಧಾನಿ ಮೋದಿ ಅವರ ನೇತೃತ್ವದಲ್ಲಿ, ಭಾರತದ ನೆರೆಹೊರೆಯ ದೇಶಗಳು ಸೇರಿದಂತೆ ಆಗ್ನೇಯ ಏಷ್ಯಾ ಮತ್ತು ಗಲ್ಫ್ ರಾಷ್ಟ್ರಗಳಲ್ಲಿ ಶಿಥಿಲಾವಸ್ಥೆಯಲ್ಲಿದ್ದ ಹಾಗೂ ನೈಸರ್ಗಿಕ ವಿಕೋಪಕ್ಕೆ ತುತ್ತಾಗಿದ್ದ ಹತ್ತಾರು ಸನಾತನ ಧರ್ಮದ ಐತಿಹಾಸಿಕ ದೇವಾಲಯಗಳು ಮತ್ತು ಪಾರಂಪರಿಕ ತಾಣಗಳನ್ನು ಭಾರತದ ನೆರವಿನೊಂದಿಗೆ ಭವ್ಯವಾಗಿ ಜೀರ್ಣೋದ್ಧಾರ ಮಾಡಲಾಗಿದೆ.

ಭಾರತದ ಆಪ್ತ ನೆರೆರಾಷ್ಟ್ರವಾದ ಬಾಂಗ್ಲಾದೇಶದಲ್ಲಿ ಸಾಂಸ್ಕೃತಿಕ ಸಂಬಂಧಗಳನ್ನು ಗಟ್ಟಿಗೊಳಿಸುವ ನಿಟ್ಟಿನಲ್ಲಿ ಭಾರತ ಸರ್ಕಾರ ಮಹತ್ವದ ಹೆಜ್ಜೆ ಇಟ್ಟಿದೆ. 1971ರಲ್ಲಿ ಪಾಕಿಸ್ತಾನದ 'ಆಪರೇಷನ್ ಸರ್ಚ್‌ಲೈಟ್' ವೇಳೆ ಧ್ವಂಸಗೊಂಡಿದ್ದ ಐತಿಹಾಸಿಕ ರಮಣ ಕಾಳಿ ದೇವಾಲಯವನ್ನು ಭಾರತದ ಸಂಪೂರ್ಣ ನೆರವಿನೊಂದಿಗೆ ಪುನರ್ ನಿರ್ಮಿಸಿ 2021ರಲ್ಲಿ ಲೋಕಾರ್ಪಣೆಗೊಳಿಸಲಾಯಿತು. ಇದರೊಂದಿಗೆ, ನಟೋರ್‌ನಲ್ಲಿರುವ ಸುಮಾರು 300 ವರ್ಷಗಳಷ್ಟು ಹಳೆಯದಾದ ಜಾಯ್ ಕಾಳಿ ಮಾತಾ ದೇವಾಲಯ, ಆನಂದಮಯಿ ಕಾಳಿ ಮಾತಾ ಮಂದಿರ ಮತ್ತು ರಾಮಕೃಷ್ಣ ದೇವಾಲಯಗಳ ಜೀರ್ಣೋದ್ಧಾರಕ್ಕೂ ಭಾರತ ಧನಸಹಾಯ ನೀಡುವ ಮೂಲಕ ಅಲ್ಲಿನ ಹಿಂದೂ ಧರ್ಮದ ಪ್ರಮುಖ ಕೇಂದ್ರಗಳನ್ನು ಸಂರಕ್ಷಿಸಿದೆ.

ಆಗ್ನೇಯ ಏಷ್ಯಾದ ರಾಷ್ಟ್ರಗಳಾದ ವಿಯೆಟ್ನಾಂ ಮತ್ತು ಮ್ಯಾನ್ಮಾರ್‌ಗಳಲ್ಲೂ ಭಾರತೀಯ ಪುರಾತತ್ವ ಇಲಾಖೆ (ASI) ಐತಿಹಾಸಿಕ ಮೈಲಿಗಲ್ಲು ಸ್ಥಾಪಿಸಿದೆ. ಪುರಾತನ ಚಂಪಾ ಸಾಮ್ರಾಜ್ಯದ ಶೈವ ಧರ್ಮದ ಪ್ರಮುಖ ಕೇಂದ್ರವಾಗಿದ್ದ ಹಾಗೂ ಯುನೆಸ್ಕೋ ಪಟ್ಟಿಗೆ ಸೇರಿದ ವಿಯೆಟ್ನಾಂನ 'ಮೈ ಸನ್ ಸ್ಯಾಂಕ್ಚುರಿ' ತಾಣವನ್ನು ಭಾರತ ಯಶಸ್ವಿಯಾಗಿ ಸಂರಕ್ಷಿಸಿದೆ. ಇನ್ನು ತೀವ್ರ ಭೂಕಂಪದಿಂದ ಹಾನಿಗೊಳಗಾಗಿದ್ದ ಮ್ಯಾನ್ಮಾರ್‌ನ ಬಗಾನ್ ಪಾರಂಪರಿಕ ವಲಯದಲ್ಲಿದ್ದ 12 ಐತಿಹಾಸಿಕ ಪಗೋಡಾಗಳು ಮತ್ತು ಪ್ರಸಿದ್ಧ ಆನಂದ್ ದೇವಾಲಯವನ್ನು ಭಾರತವು ಒಪ್ಪಂದದ ಪ್ರಕಾರ ಅತ್ಯಾಧುನಿಕ ತಂತ್ರಜ್ಞಾನ ಬಳಸಿ ಪುನರ್ ನಿರ್ಮಿಸಿದೆ.

ನೇಪಾಳ ಮತ್ತು ಶ್ರೀಲಂಕಾದಂತಹ ನೆರೆ ರಾಷ್ಟ್ರಗಳ ಆಧ್ಯಾತ್ಮಿಕ ತಾಣಗಳಿಗೆ ಭಾರತದ ಕೊಡುಗೆ ಅಪಾರವಾಗಿದೆ. ನೇಪಾಳದಲ್ಲಿ ಸಂಭವಿಸಿದ ಭೀಕರ ಭೂಕಂಪದ ನಂತರ, ಸಾಂಸ್ಕೃತಿಕ ಪುನಶ್ಚೇತನಕ್ಕಾಗಿ ಭಾರತವು 50 ಮಿಲಿಯನ್ ಯುಎಸ್ ಡಾಲರ್ ಆರ್ಥಿಕ ನೆರವು ಘೋಷಿಸಿತ್ತು. ಇದರ ಅಡಿಯಲ್ಲಿ ಐತಿಹಾಸಿಕ ಸೆಟೊ ಮಚ್ಚೀಂದ್ರನಾಥ ದೇವಾಲಯ, ಬುಢಾನಿಲಕಂಠ ದೇವಾಲಯ ಧರ್ಮಶಾಲಾ ಸೇರಿದಂತೆ ಒಟ್ಟು 28 ಪಾರಂಪರಿಕ ತಾಣಗಳ ಸಂರಕ್ಷಣಾ ಕಾರ್ಯವನ್ನು ಕೈಗೆತ್ತಿಕೊಳ್ಳಲಾಗಿದೆ. ಅತ್ತ ಶ್ರೀಲಂಕಾದಲ್ಲಿರುವ ಭಗವಾನ್ ಶಿವನ ಐದು ಪುರಾತನ ಪಂಚ ಈಶ್ವರಂಗಳಲ್ಲಿ ಒಂದಾದ ಪ್ರಸಿದ್ಧ 'ತಿರುಕೇತೀಶ್ವರಂ' ದೇವಾಲಯದ ಜೀರ್ಣೋದ್ಧಾರಕ್ಕಾಗಿ ಭಾರತ 326 ಮಿಲಿಯನ್ ಲಂಕಾ ರೂಪಾಯಿಗಳ ಅನುದಾನ ನೀಡಿ ಐತಿಹಾಸಿಕ ಸಂಬಂಧವನ್ನು ಮರುಸ್ಥಾಪಿಸಿದೆ.

ವಿಶ್ವದ ಅತಿ ದೊಡ್ಡ ಹಿಂದೂ ನಾಗರಿಕತೆಯ ಕೇಂದ್ರಗಳಾಗಿದ್ದ ಕಾಂಬೋಡಿಯಾ ಮತ್ತು ಲಾವೋಸ್ ದೇಶಗಳ ಭವ್ಯ ಇತಿಹಾಸಕ್ಕೆ ಮೋದಿ ಸರ್ಕಾರ ಹೊಸ ಕಳೆ ನೀಡಿದೆ. ಜಗತ್ಪ್ರಸಿದ್ಧ ಆಂಗ್ಕೋರ್ ವಾಟ್, ತಾ ಪ್ರೊಮ್ ಮತ್ತು ಪ್ರೀ ವಿಹಾರ್ ಸೇರಿದಂತೆ ಕಾಂಬೋಡಿಯಾದ ಪ್ರಮುಖ ಹೆರಿಟೇಜ್ ಸಂಕೀರ್ಣಗಳನ್ನು ಭಾರತವು 2022ರಿಂದ ಯಶಸ್ವಿಯಾಗಿ ಸಂರಕ್ಷಿಸುತ್ತಾ ಬಂದಿದೆ. ಇದರೊಂದಿಗೆ, ಲಾವೋಸ್ ದೇಶದಲ್ಲಿರುವ ಸುಮಾರು 1,000 ವರ್ಷಗಳಷ್ಟು ಹಳೆಯದಾದ, ಸನಾತನ ಸಂಸ್ಕೃತಿಯ ಹೆಮ್ಮೆಯ ಸಂಕೇತವಾಗಿರುವ ಯುನೆಸ್ಕೋ ಮಾನ್ಯತೆ ಪಡೆದ 'ವಾಟ್ ಫೌ' ಶಿವ ದೇವಾಲಯದ ಪ್ರಮುಖ ರಚನೆಗಳನ್ನು ಭಾರತದ ತಜ್ಞರು ಯಶಸ್ವಿಯಾಗಿ ಪುನರ್ ನಿರ್ಮಿಸಿದ್ದಾರೆ.

ಇಸ್ಲಾಮಿಕ್ ರಾಷ್ಟ್ರಗಳ ಒಕ್ಕೂಟದಲ್ಲಿ ಒಂದಾದ ಗಲ್ಫ್ ವಲಯದಲ್ಲೂ ಭಾರತದ ಸಾಂಸ್ಕೃತಿಕ ಹೆಜ್ಜೆಗುರುತುಗಳು ಮೂಡಿವೆ. 2019ರಲ್ಲಿ ಬಹ್ರೇನ್‌ಗೆ ಭೇಟಿ ನೀಡಿದ್ದ ಪ್ರಧಾನಿ ನರೇಂದ್ರ ಮೋದಿ ಅವರು ಮನಾಮದಲ್ಲಿರುವ 200 ವರ್ಷಗಳಷ್ಟು ಹಳೆಯದಾದ ಶ್ರೀಕೃಷ್ಣನ (ಶ್ರೀನಾಥ್ ಜಿ) ದೇವಾಲಯದ 4.2 ಮಿಲಿಯನ್ ಯುಎಸ್ ಡಾಲರ್ ವೆಚ್ಚದ ಪುನರಾಭಿವೃದ್ಧಿ ಯೋಜನೆಗೆ ಚಾಲನೆ ನೀಡಿದ್ದರು. ಈ ಮೂಲಕ ಕೇವಲ ಭಾರತದ ಒಳಗಷ್ಟೇ ಅಲ್ಲದೆ, ಜಗತ್ತಿನಾದ್ಯಂತ ಹರಡಿಕೊಂಡಿರುವ ಸನಾತನ ಸಂಸ್ಕೃತಿಯ ತಾಣಗಳನ್ನು ರಕ್ಷಿಸಿ, ಭಾರತೀಯ ನಾಗರಿಕತೆಯ ಭವ್ಯತೆಯನ್ನು ಜಾಗತಿಕ ಮಟ್ಟದಲ್ಲಿ ಪಸರಿಸುವ ರಾಜತಾಂತ್ರಿಕ ಪ್ರಯತ್ನಕ್ಕೆ ಮೋದಿ ಸರ್ಕಾರ ಯಶಸ್ವಿ ವೇದಿಕೆ ಕಲ್ಪಿಸಿದೆ, (ಏಜೆನ್ಸೀಸ್​).