ನ್ಯಾಯ ಸಿಗುವ ನಂಬಿಕೆ ಚೂರಾಗಿದೆ! ಜಸ್ಟೀಸ್​ ಸ್ವರ್ಣಕಾಂತ ಮುಂದೆ ಹಾಜರಾಗಲು ಒಪ್ಪದ ಕೇಜ್ರಿವಾಲ್​ರಿಂದ ಪತ್ರ

ನವದೆಹಲಿ: ದೆಹಲಿ ಮದ್ಯ ಹಗರಣ ಪ್ರಕರಣದಲ್ಲಿ ಇದೀಗ ಹೊಸ ವಿವಾದವೊಂದು ಭುಗಿಲೆದ್ದಿದೆ. ಇಂದು (ಫೆ.27) ನ್ಯಾಯಮೂರ್ತಿ ಸ್ವರ್ಣಕಾಂತ ಶರ್ಮಾ ಅವರ ಪೀಠದ ಮುಂದೆ ದೆಹಲಿಯ ಮಾಜಿ ಸಿಎಂ ಅರವಿಂದ್ ಕೇಜ್ರಿವಾಲ್​ ಹಾಜರಾಗಬೇಕಿತ್ತು. ಆದರೀಗ, ತನ್ನ ಪರ ನಮ್ಮ ವಕೀಲರಾಗಲಿ ಅಥವಾ ನಾನಾಗಲಿ ಜಸ್ಟೀಸ್​ ಸ್ವರ್ಣಕಾಂತ ಎದುರು ಬರೋದಿಲ್ಲ ಎಂದು ಕೇಜ್ರಿವಾಲ್​ ಪತ್ರದ ಮೂಲಕ ತಿಳಿಸಿದ್ದಾರೆ.

ಸ್ವರ್ಣಕಾಂತ ಶರ್ಮಾ ಅವರಿಗೆ ಪತ್ರ ಬರೆದಿರುವ ಕೇಜ್ರಿವಾಲ್​, ವೈಯಕ್ತಿಕವಾಗಿ ಅಥವಾ ವಕೀಲರ ಮೂಲಕ ನಾನು ಕೋರ್ಟ್​ಗೆ ಹಾಜರಾಗುವುದಿಲ್ಲ. ನ್ಯಾಯಮೂರ್ತಿ ಸ್ವರ್ಣಕಾಂತ ಅವರಿಂದ ನನಗೆ ನ್ಯಾಯ ಸಿಗುವ ಭರವಸೆ, ನಂಬಿಕೆಗಳು ಹುಸಿಯಾಗಿವೆ. ಹೀಗಾಗಿ, ನಾನು ಗಾಂಧೀಜಿಯವರ ಸತ್ಯಾಗ್ರಹವನ್ನು ಅನುಸರಿಸಲು ನಿರ್ಧರಿಸಿದ್ದೇನೆ. ನನ್ನ ಆತ್ಮಸಾಕ್ಷಿಯ ಆಧಾರದ ಮೇಲೆ ಈ ನಿರ್ಧಾರವನ್ನು ಕೈಗೊಂಡಿದ್ದೇನೆ. ನ್ಯಾಯಮೂರ್ತಿ ಸ್ವರ್ಣಕಾಂತ ಶರ್ಮಾ ನೀಡುವ ತೀರ್ಪನ್ನು ನಾನು ಸುಪ್ರೀಂಕೋರ್ಟ್‌ನಲ್ಲಿ ಮೇಲ್ಮನವಿ ಸಲ್ಲಿಸುತ್ತೇನೆ. ಆ ಹಕ್ಕು ನನಗಿದೆ" ಎಂದು ತಿಳಿಸಿದ್ದಾರೆ.

ಸ್ವರ್ಣಕಾಂತ ಶರ್ಮಾ ಅವರನ್ನು ಈ ಪ್ರಕರಣದಿಂದ ಕೈಬಿಡಲು ಕೇಜ್ರಿವಾಲ್ ಅರ್ಜಿ ಸಲ್ಲಿಸಿದ್ದರು. ನ್ಯಾಯಮೂರ್ತಿ ಅವರು ಆರ್‌ಎಸ್‌ಎಸ್ ಹಿನ್ನೆಲೆಯನ್ನು ಹೊಂದಿದ್ದಾರೆ ಮತ್ತು ಬಿಜೆಪಿ ಸಂಯೋಜಿತ ಸಭೆಗಳಲ್ಲಿ ಭಾಗವಹಿಸಿದ್ದಾರೆ ಎಂದು ಆರೋಪಿಸಿ, ಅವರಿಂದ ನನಗೆ ನ್ಯಾಯ ಸಿಗುವುದಿಲ್ಲ ಎಂದು ಹೇಳಿದ್ದರು. ಈ ಅರ್ಜಿಯ ವಿಚಾರಣೆ ನಡೆಸಿದ ನ್ಯಾಯಾಲಯವು, ಕಡೆಗೂ ಅರ್ಜಿಯನ್ನು ವಜಾಗೊಳಿಸಿತು.

2024ರಲ್ಲಿ ನಡೆದ ದೆಹಲಿ ಮದ್ಯ ಹಗರಣವು ರಾಷ್ಟ್ರ ರಾಜಕೀಯದಲ್ಲಿ ಭಾರೀ ಸಂಚಲನ ಸೃಷ್ಟಿಸಿತು. 2025ರಲ್ಲಿ ನಡೆದ ದೆಹಲಿ ವಿಧಾನಸಭಾ ಚುನಾವಣೆಯಲ್ಲಿ ಎಎಪಿ ಹೀನಾಯ ಸೋಲುಂಡಿತು. ಅನಿರೀಕ್ಷಿತವಾಗಿ, ಈ ವರ್ಷದ ಫೆ.27ರಂದು ವಿಚಾರಣಾ ನ್ಯಾಯಾಲಯವು ಪ್ರಕರಣವನ್ನು ವಜಾಗೊಳಿಸಿತು. ಪ್ರಕರಣದಲ್ಲಿದ್ದ ಕೇಜ್ರಿವಾಲ್ ಸೇರಿ ಎಲ್ಲರೂ ಖುಲಾಸೆಗೊಂಡರು. ಆದಾಗ್ಯೂ, ಸಿಬಿಐ ತೀರ್ಪಿನ ವಿರುದ್ಧ ದೆಹಲಿ ಹೈಕೋರ್ಟ್ ಮೆಟ್ಟಿಲೇರಿತು. ನ್ಯಾಯಮೂರ್ತಿ ಸ್ವರ್ಣಕಾಂತ ಶರ್ಮಾ ಪ್ರಕರಣದ ವಿಚಾರಣೆ ನಡೆಸಿದರು. ಇಲ್ಲಿಂದ ಶುರುವಾಗಿದ್ದೇ ಈ ಹೊಸ ವಿವಾದ.